Ang Propetikanhong Misyon ni Joseph Smith

Human sa kamatayon ni Joseph Smith, si Elder John Taylor, kinsa kauban ni Joseph Smith sa dihang gipatay siya, mipasidungog sa Propeta (tingali uban sa pakigkumbuya sa usa o daghan pa nga mga Santos) pinaagi sa pagrekord: “Si Joseph Smith, ang Propeta ug Manalagna sa Ginoo, nakahimo og daghan pa, gawas lamang kang Jesus, alang sa kaluwasan sa mga tawo niini nga kalibutan, kay ni bisan kinsa nga tawo nga nakapuyo dinhi” (D&P 135:3). Kini nga leksyon motabang sa mga estudyante nga makakita kon sa unsang paagi ang pagpangalagad sa Propeta mituman sa karaan nga mga panagna. Kini nga leksyon mosusi usab sa mga kontribusyon nga nabuhat ni Joseph Smith ngadto sa kaluwasan sa tanang anak sa Dios.

Background nga Basahunon

Neil L. Andersen, “Joseph Smith,” Liahona, Nob 2014, 28–31.
Tad R. Callister, “Joseph Smith—Propeta sa Pagpahiuli,” Ensign o Liahona, Nob. 2009, 35–37.
“D&P 135:3. Joseph Smith Has Done More for the Salvation of Men Than Anyone Other Than Jesus,” Doctrine and Covenants Student Manual (manwal sa Church Educational System, 2001), 349–50.

Mga Sugyot alang sa Pagtudlo

2 Nephi 3:1–21

Ang gi-orden nang daan nga misyon ni Joseph Smith

Hangyoa ang mga estudyante sa pagpaambit kon unsay unang moabut sa ilang hunahuna kon maghunahuna sila ni Joseph Smith. Dapita ang pipila ka mga estudyante sa daklit nga pagpaambit og usa ka higayon sa dihang nagmapasalamaton sila ni Propeta Joseph Smith.

Sultihi ang mga estudyante nga si propeta Nephi mirekord og pipila ka tambag nga gihatag ni Lehi ngadto sa iyang anak nga si Joseph. Kini nga tambag girekord diha sa 2 Nephi 3 ug naglakip og usa ka panagna nga gihatag ni Jose sa Ehipto mahitungod sa pamilya ni Lehi ug sa ulahing mga adlaw. Si Lehi malagmit nakakat-on niini nga mga panagna sa pagbasa sa mga palid nga tumbaga. Sa 2 Nephi 3, atong nakat-unan nga gipanagna ni Jose sa Ehipto ang misyon ni Joseph Smith sa ulahing mga adlaw. Hangyoa ang usa ka estudyante sa pagbasa og kusog sa 2 Nephi 3:6–9. Hangyoa ang klase sa pagsunod ug sa pagpangita kon giunsa ni Jose sa Ehipto paghulagway si Joseph Smith.

Unsa ang pipila ka mga pulong nga gigamit ni Jose sa Ehipto sa paghulagway ni Joseph Smith? (Ang mga tubag kinahanglang maglakip sa “pinili nga manalagna,” “pagatahuron pag-ayo,” “halangdon sa akong mga mata,” ug “bantugan sama ngadto kang Moises.” Mahimo nimong isugyot nga markahan sa mga estudyante kini nga mga termino diha sa ilang mga kasulatan; diha sa margin tupad sa mga bersikulo 6–9, mahimo usab silang mosulat og Joseph Smith.)
Sa unsang mga paagi nga si Joseph Smith sama ni Moises ug ni Jose sa Ehipto? (Tan-awa usab sa Hubad ni Joseph Smith, Genesis 50:24–35 [sa Giya ngadto sa mga Kasulatan].)
Sumala sa mga bersikulo 7–8, unsay napanan-awan ni Jose sa Ehipto kabahin sa pagpangalagad ni Joseph Smith? (Siguroa nga ang mga estudyante makasabut niini nga kamatuoran: Si Joseph Smith gituboy sa Ginoo sa pagdala sa katawhan ngadto sa kasayuran sa Iyang mga pakigsaad ug sa pagbuhat sa Iyang buluhaton.)

Dapita ang mga estudyante nga magpares sa pagtrabaho ug magtuon sa 2 Nephi 3:7, 11–15, 18–21. Hangyoa ang matag pares sa paghimo og lista sa unsay gisulti sa mga kasulatan nga buhaton ni Joseph Smith aron sa pagtabang nga matuman ang buhat sa Ginoo. Mahimo nimong isugyot nga himoon sa mga estudyante kini nga lista pinaagi sa pagmarka sa importanting mga pulong nga ilang makit-an niini nga mga bersikulo. Human sa igong panahon, dapita ang pipila ka pares sa pagpaambit sa unsay ilang nakit-an. (Ang mga tubag kinahanglang maglakip sa mosunod: modala sa katawhan ngadto sa kasayuran sa mga pakigsaad [bersikulo 7]; mopatungha sa Basahon ni Mormon [mga bersikulo 13, 18–21]; modani sa katawhan sa kamatuoran sa Biblia [bersikulo 11]; pagalig-unon [bersikulo 13 ]; ug modala sa katawhan ngadto sa kaluwasan [bersikulo 15].)

I-display ang mosunod nga pamahayag ni Presidente Brigham Young (1801–77), ug dapita ang usa ka estudyante sa pagbasa niini og kusog:

“Gitakda kini sa konseho sa kahangturan, dugay na sa wala pa ipahimutang ang mga pundasyon sa yuta, nga siya, si Joseph Smith, mao ang tawo, sa katapusang dispensasyon niini nga kalibutan, nga modala sa pulong sa Dios ngadto sa mga katawhan. … Ang Ginoo nag-obserbar kaniya, ug sa iyang amahan, ug sa amahan sa iyang amahan, ug sa ilang mga katigulangan balik … ngadto ni Adan. Siya nagbantay niana nga pamilya ug kana nga dugo nga nagdagan gikan sa tuburan niini ngadto sa pagkatawo niana nga tawo. Siya gi-orden nang daan sa kahangturan sa pagdumala niining katapusan nga dispensasyon” (Mga Pagtulun-an sa mga Presidente sa Simbahan: Brigham Young [1997], 394–395).

Aron matabangan ang mga estudyante nga mobati sa kamatuoran ug kaimportante sa gi-orden nang daan nga misyon ni Joseph Smith, hisguti ang mosunod:

Nganong importante man alang kaninyo nga masayud nga si Joseph Smith gi-orden nang daan ug giandam didto sa premortal nga kinabuhi nga mahimong Propeta sa Pagpahiuli?

Doktrina ug mga Pakigsaad 135:3

Si Joseph Smith “nakahimo og daghan pa, gawas lamang kang Jesus, alang sa kaluwasan sa mga tawo”

Hangyoa ang mga estudyante sa pagpaambit kon unsay ilang isulti o ipamatuod mahitungod ni Joseph Smith kon hatagan lamang sila og pipila ka mga sentence sa pagbuhat niini. Ipasabut nga human sa kamatayon ni Joseph Smith, usa ka pasidungog ngadto ni Joseph Smith gisulat ug sa wala madugay gipreserbar alang kanato diha sa Doktrina ug mga Pakigsaad. Hangyoa ang usa ka estudyante sa pagbasa og kusog sa unang sentence sa Doktrina ug mga Pakigsaad 135:3. Ipangutana:

Unsa nga kamatuoran mahitungod ni Joseph Smith ang gideklarar niini nga sentence? (Ang mga estudyante kinahanglang mahibalo sa mosunod nga kamatuoran: Mas daghan og nahimo si Joseph Smith alang sa kaluwasan sa mga tawo niining kalibutan kay ni bisan kinsang tawo gawas ni Jesus.)

Aron moribyu sa mga buhat ug mga kontribusyon ni Propeta Joseph Smith, organisaha ang mga estudyante ngadto sa ginagmayng mga grupo. I-assign sila sa pagtan-aw diha sa Doktrina ug mga Pakigsaad ug sa paghinumdom sa mga leksyon nga gihisgutan niini nga kurso hangtud niining puntoha. Hangyoa sila sa paghimo og lista sa mga panalangin ug mga doktrina nga napahiuli pinaagi ni Propeta Joseph Smith nga nakatampo sa atong kaluwasan. Human sa igong panahon, dapita ang mga estudyante sa pagpili og item diha sa ilang lista ug sa pagpaambit diha sa ilang mga grupo kon sa unsang paagi kini miimpluwensya sa ilang kinabuhi ug modala kanila ngadto sa kaluwasan.

Aron sa pag-summarize sa mga tubag sa mga estudyante, i-display ang mosunod nga pamahayag ni Elder Tad R. Callister, kinsa miserbisyo sa Kapangulohan sa Seventy. Hangyoa ang usa ka estudyante sa pagbasa niini og kusog samtang magsunod ang ubang mga estudyante:

“Pinaagi ni Joseph Smith napahiuli ang tanang mga gahum, mga yawe, mga pagtulun-an, ug mga ordinansa nga gikinahanglan alang sa kaluwasan ug kahimayaan. Dili kamo makaadto bisan asa dinhi sa kalibutan ug maangkon kana. Dili kini makit-an sa bisan unsang simbahana. Dili kini makit-an sa bisan unsang pilosopiya sa tawo o siyentipikanhong panghunahuna o indibidwal nga pagbiyahe sa balaang yuta, bisan unsa pa kini ka daw intelektuwal. Ang kaluwasan makaplagan lamang sa usa ka dapit, ingon sa gipili sa Ginoo Mismo sa dihang Siya miingon nga kini ‘mao lamang ang tinuod ug buhi nga simbahan diha sa ibabaw sa tibuok yuta’ (D&P 1:30)” (“Joseph Smith—Propeta sa Pagpahiuli,” Liahona, Nob. 2009, 37).

Hatagi ang mga estudyante og panahon sa pagpamalandong kon sa unsang paagi ang pagpangalagad ni Joseph Smith nakatampo sa ilang kaugalingong kaluwasan, ug dayon pangutan-a:

Sa unsang piho nga mga paagi nga mahimong lahi ang inyong kinabuhi kon wala ang pangalagad ni Joseph Smith?

Doktrina ug mga Pakigsaad 122:1–2; Joseph Smith—Kasaysayan 1:33

Ang ngalan ni Joseph “pagagamiton alang sa maayo ug sa dautan diha sa tanan nga mga kanasuran”

Sultihi ang mga estudyante nga bisan pa sa tanang kaayohan nga nahimo ni Joseph Smith, aduna siyay daghan nga mga kaaway, ilabi na sa hinapos nga bahin sa iyang kinabuhi. Kini nga aspeto sa iyang kinabuhi nakita na usab daan sa karaang mga propeta (tan-awa, pananglit, sa 3 Nephi 21:10). Dapita ang usa ka estudyante sa pagbasa og kusog sa unsay gisulti ni Moroni ngadto kang Joseph Smith mahitungod niadtong mobatok kaniya, sumala sa narekord sa Joseph Smith—Kasaysayan 1:33. Dapita ang laing estudyante sa pagbasa og kusog sa Doktrina ug mga Pakigsaad 122:1–2. Tabangi ang mga estudyante nga makapahayag og kamatuoran nga makita niini nga mga tudling pinaagi sa pagpangutana:

Unsaon ninyo pag-summarize ang atong nakat-unan gikan niining duha ka mga tudling sa kasulatan kon unsay mahimong reaksyon sa mga tawo ngadto ni Joseph Smith? (Samtang ang mga estudyante mopaambit sa ilang gisugyot nga mga summary, tabangi sila nga makasabut niini nga kamatuoran: Samtang daghan sa kalibutan mobiay-biay ni Joseph Smith, ang matarung mangita sa mga panalangin nga naa na pinaagi sa iyang pagpangalagad.)
Ngano kaha nga daghan man kaayo og mga kritiko ug mga kaaway si Propeta Joseph Smith, bisan sa daghang katuigan nga milabay sukad sa iyang kamatayon? (Ang pagpamatuod sa Pagpahiuli nag-agad kon si Joseph Smith usa ba ka propeta nga mipahigayon sa buhat sa Dios o dili. Busa, si Satanas nagpadayon sa pagpaningkamot nga dili matuohan si Joseph Smith.)

Dapita ang usa ka estudyante sa pagbasa sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

“Daghan niadtong misalikway sa buhat sa Pagpahiuli wala motuo nga ang langitnong mga binuhat nakig-istorya sa katawhan dinhi sa yuta. Imposible, moingon sila, nga bulawang mga palid gihatag sa usa ka anghel ug gihubad pinaagi sa gahum sa Dios. Tungod nianang kawalay pagtuo, dali nilang gisalikway ang pagpamatuod ni Joseph, ug ang pipila nakahimo gani sa pagpawalay-bili sa kinabuhi sa Propeta ug sa pagbutang-butang sa iyang pagkatawo.

“Ilabi nang makapaguol kanato kon dunay tawo kinsa mitahud kaniadto ni Joseph nga mobakwi sa iyang lig-on nga pagtuo ug dayon mopakaulaw sa Propeta.

“‘Ang pagkat-on bahin sa Simbahan … pinaagi sa pagpaminaw sa mga mibiya sa Simbahan,’ si Elder Neal A. Maxwell kausa miingon, ‘sama ra sa pag-interbyu kang Judas aron masabtan si Jesus. Ang mga mibiya sa Simbahan kanunayng mosulti kanato bahin sa ilang kaugalingon kay sa ilang gibiyaang organisasyon’ [“All Hell Is Moved” (debosyonal sa Brigham Young University, Nob. 8, 1977), 3; speeches.byu.edu]. …

“Ang negatibong komentaryo bahin ni Propeta Joseph Smith modaghan samtang nagpadulong kita sa Ikaduhang Pag-anhi sa Manluluwas. Ang morag mga tinuod ug mga panglingla dili mokunhod. Dunay mga sakop sa pamilya ug mga higala nga magkinahanglan sa inyong tabang. Karon ang panahon sa [pag-andam] sa pagtabang sa uban nga nangita sa kamatuoran” (“Joseph Smith,” Liahona, Nob. 2014, 28–30).

Hisguti ang mosunod nga mga pangutana:

Nganong makatabang man nga masayud nga bisan tuod daghan na nga katuigan ang milabay sukad sa pagkamatay ni Joseph Smith, ang mga kaaway sa Simbahan nagpadayon sa pag-ataki sa iyang reputasyon?
Unsay atong mabuhat sa pagtabang niadtong nangita sa kamatuoran aron mahibalo nga si Joseph Smith propeta sa Dios?

I-display ang mosunod nga pamahayag ni Elder Neil L. Andersen, ug dapita ang usa ka estudyante sa pagbasa niini og kusog:

“Ang sinsero nga nangutana kinahanglang makakita sa pagkaylap sa gipahiuli nga ebanghelyo isip bunga sa buhat sa Ginoo pinaagi sa Propeta. …

“Si Jesus miingon:

“Ang maayong kahoy dili makabungag mga bungang walay pulos, ug usab ang kahoyng walay pulos dili makabungag mga maayong bunga. …

“‘… Maila ninyo sila pinaagi sa ilang mga bunga’ [Mateo 7:18, 20].

“Kining mga pagpasabut makapadani, apan ang sinserong nangutana dili gayud magsalig lamang niini aron masulbad ang pagpangita niya sa kamatuoran.

“Ang matag tumutuo nagkinahanglan og espirituhanong pagmatuod sa balaanong misyon ug kinaiya ni Propeta Joseph Smith. Kini tinuod sa tanang henerasyon. Ang espirituhanong mga pangutana nagkinahanglan og espirituhanong mga tubag gikan sa Dios” (“Joseph Smith,” Liahona, Nob. 2014, 29–30).

Hatagi ang mga estudyante og oportunidad sa pagpamatuod kabahin ni Joseph Smith pinaagi sa pagpangutana sa mosunod:

Unsa nga mga aspeto sa Ang Simbahan ni Jesukristo sa mga Santos sa Ulahing mga Adlaw ang inyong nakita nga ebidensya sa propetikanhong misyon ni Joseph Smith?
Unsa ang inyong mga kasinatian nga nakatampo sa inyong pagpamatuod mahitungod ni Propeta Joseph Smith?

Tapusa pinaagi sa pag-display sa mosunod nga pamahayag ni Bathsheba W. Smith (1822–1910), kinsa miserbisyo isip ikaupat nga kinatibuk-ang presidente sa Relief Society, ug ni Presidente Brigham Young (1801–77). Si Sister Smith ug si Presidente Young nakaila ni Joseph Smith sa mortalidad. Dapita ang usa ka estudyante sa pagbasa og kusog niini nga mga pamahayag:

“Dihang akong nadungog ang Ebanghelyo nahibalo ako nga kini tinuod; sa una nakong pagbasa sa Basahon ni Mormon, nahibalo ako nga dinasig kini sa Dios; sa una nakong pagkakita kang Joseph Smith nahibalo ako nga nakig-atubang ako og usa ka propeta sa buhing Dios, ug walay pagduhaduha sa akong hunahuna mahitungod sa iyang awtoridad” (Bathsheba W. Smith, gikutlo diha sa Anak nga mga Babaye sa Akong Gingharian: Ang Kasaysayan ug Buhat sa Relief Society [2011], 40).

“Ingon og gusto nako nga mosinggit, og aleluya, sa tanang higayon, samtang akong mahunahuna nga nailhan gayud nako si Joseph Smith, ang Propeta kinsa gituboy sa Ginoo ug gi-ordinahan, ug kinsa Iyang gihatagan sa mga yawe ug gahum aron sa pagtukod sa gingharian sa Dios dinhi sa yuta” (gikutlo diha sa Mga Pagtulun-an sa mga Presidente sa Simbahan: Joseph Smith [2007], 599).

Dapita ang mga estudyante sa pagkonsiderar sa ilang pagpamatuod ni Propeta Joseph Smith ug sa unsay ilang mabuhat aron sa pagpaambit niini ngadto sa uban, sa personal man o pinaagi sa paggamit sa social media. Awhaga sila sa pag-ila og tawo nga gusto nilang mapaambitan niini nga pagpamatuod ug dayon buhaton ang ilang tinguha.

Mga Basahunon sa Estudyante

2 Nephi 3:1–21; Doktrina ug mga Pakigsaad 122:1–2; 135:3; Joseph Smith—Kasaysayan 1:33.
Neil L. Andersen, “Joseph Smith,” Liahona, Nob 2014, 28–31.
Tad R. Callister, “Joseph Smith—Propeta sa Pagpahiuli,” Ensign o Liahona, Nob. 2009, 35–37.