Librarya
Leksyon 16: Katubsanan sa mga Patay

16

Katubsanan sa mga Patay

Isip kabahin sa Pagpahiuli sa tanan nga mga butang sa dispensasyon sa kahingpitan sa panahon, ang Ginoo mipahiuli sa doktrina sa katubsanan sa mga patay pinaagi ni Propeta Joseph Smith. Kini nga doktrina gipahiuli “pagtulun-an human sa usa ka pagtulun-an.” Ang buhat sa pagtubos sa mga patay mahinungdanon sa kaluwasan sa mga buhi ug sa mga patay, ug si Propeta Joseph Smith mitudlo sa kaimportante sa pag-apil niini nga buhat: “Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay” (Mga Pagtulun-an sa mga Presidente sa Simbahan: Joseph Smith [2007], 575).

Background nga Basahunon

  • Richard G. Scott, “Ang Hingpit nga Kalipay sa Pagtubos sa mga Patay,” Liahona, Nob. 2012, 93–95.

  • D. Todd Christofferson, “The Redemption of the Dead and the Testimony of Jesus,” Ensign, Nob. 2000, 9–12.

  • “Mahimong mga Manluluwas sa Bukid sa Zion,” kapitulo 41 sa Mga Pagtulun-an sa mga Presidente sa Simbahan: Joseph Smith [2007], 567–78.

  • Matthew S. McBride, “Letters on Baptism for the Dead: D&C 127, 128,” Revelations in Context series, Mayo 29, 2013; history.lds.org.

Mga Sugyot alang sa Pagtudlo

Doktrina ug mga Pakigsaad 137

Ang panan-awon ni Propeta Joseph Smith sa celestial nga gingharian

Ipaambit ang mosunod nga background nga kasaysayan ngadto sa mga estudyante:

“Sa Nobyembre 1823, si Alvin Smith, ang kamagulangang anak ni Lucy Mack Smith ug Joseph Smith Sr., kalit nga nasakit og grabe ug naghigda nga himatyon. Si Alvin 25 anyos ang panuigon, usa ka kusgan ug maantigo nga batan-on kansang makugihon nga pagtrabaho nakatampo og dako sa kalig-on sa pinansyal sa pamilya. Ang iyang inahan mihulagway kaniya isip ‘usa ka batan-on nga dunay maayo kaayo nga disposisyon,’ kansang ‘kahalangdon ug kamanggihatagon’ mipanalangin niadtong naglibut kaniya sa ‘matag oras sa iyang kinabuhi.’ …

“Nasayud nga siya himatyon, gitawag ni Alvin ang iyang mga igsoong lalaki ug mga babaye sa pagduol kaniya ug nakigsulti sa matag usa kanila. Ngadto ni Joseph, kinsa hapit na mo-18 ang panuigon ug wala pa makadawat sa bulawan nga mga palid, si Alvin miingon, ‘Ako buot nga ikaw magbinuotan, ug mohimo sa tanang butang nga nag-agad sa imong gahum sa pagkuha sa talaan. Pagmatinud-anon sa pagdawat og mga panudlo ug sa paghupot sa tanang sugo nga gihatag kanimo. …’

“Dihang namatay si Alvin, ang pamilya mihangyo sa usa ka ministro nga Presbyterian sa Palmyra, New York, aron pagdumala sa iyang lubong. Tungod kay si Alvin wala man mahimong sakop sa kongregasyon sa mga ministro, ang pari nangusog sa iyang sermon nga si Alvin dili maluwas. Si William Smith, ang manghud nga lalaki ni Joseph, nahinumdom: “[Ang ministro] … mipasabot og maayo nga [si Alvin] maadto sa impyerno, tungod kay si Alvin dili man miyembro sa simbahan, apan siya usa ka buotan nga bata ug ang akong amahan wala makagusto niini’” (Mga Pagtulun-an sa mga Presidente sa Simbahan: Joseph Smith, [2007], 487, 489).

  • Tungod kay ang doktrina sa katubsanan alang sa mga patay wala pa mapahiuli sa panahon sa kamatayon ni Alvin, unsa nga mga kabalaka ang anaa sa pamilyang Smith mahitungod sa kaluwasan ni Alvin?

Sultihi ang mga estudyante nga kini nga leksyon makatabang kanila nga makasabut nga ang Ginoo mipadayag sa doktrina sa katubsanan alang sa mga patay nga inanay, pagtulun-an human sa usa ka pagtulun-an. Dapita ang mga estudyante nga hilum nga mobasa sa ulohan sa seksyon sa Doktrina ug mga Pakigsaad 137. Ipasabut nga kini nga pinadayag nahitabo pipila ka bulan sa wala pa ang pagpahinungod sa Templo sa Kirtland. (Mahimo nimong ipasabut nga sa 2013 nga edisyon sa Doktrina ug mga Pakigsaad, pipila ka kausaban ang gihimo sa ulohan sa seksyon 137.)

Dapita ang usa ka estudyante sa pagbasa og kusog sa Doktrina ug mga Pakigsaad 137:1–6 samtang magsunod ang klase. Hisguti ang mosunod:

  • Kinsa ang nakita ni Joseph Smith didto sa celestial nga gingharian? (Ang mga estudyante mahimong interesado nga mahibalo nga ang amahan ug inahan ni Joseph Smith buhi sa panahon nga kining panan-awon nadawat; gani, ang amahan ni Joseph uban kaniya sa kwarto samtang nahitabo ang pagpadayag.)

  • Sumala sa bersikulo 6, nganong natingala man si Joseph nga ang iyang igsoon nga si Alvin anaa sa celestial nga gingharian? (Mahimo nimong pahinumduman ang mga estudyante nga kini nga panan-awon nadawat pipila ka tuig sa wala pa makat-on si Joseph Smith sa doktrina sa katubsanan alang sa mga patay.)

Dapita ang usa ka estudyante sa pagbasa og kusog sa Doktrina ug mga Pakigsaad 137:7–9. Hangyoa ang klase sa pagsunod ug sa pagpangita og usa ka doktrina nga nakatabang sa mga Santos sa Ulahing mga Adlaw nga mas makasabut sa plano sa Dios sa pagluwas sa Iyang mga anak.

  • Unsa man ang giandam sa Dios diha sa Iyang plano alang niadtong mga tawo nga sama ni Alvin Smith kinsa namatay nga walay oportunidad sa pagdawat sa ebanghelyo ni Jesukristo o sa ordinansa sa bunyag? (Samtang ang mga estudyante mopaambit sa ilang mga ideya, tabangi sila nga mahibalo sa mosunod nga doktrina: Ang tanang mga tawo nga nangamatay nga wala makahibalo sa ebanghelyo, nga modawat unta niini nga kahibalo kon nakadungog pa sila niini, makapanunod sa celestial nga gingharian.)

  • Unsa ang gitudlo niini nga doktrina kaninyo mahitungod sa kinaiya sa Langitnong Amahan ug sa Iyang gugma alang sa Iyang mga anak?

  • Kanus-a kamo nahupay niini nga doktrina? Kanus-a kamo nakakita sa uban, tingali kadtong inyong gitudloan isip misyonaryo, nga nakadawat og kahupayan gikan sa ilang pagsabut niini nga doktrina?

Doktrina ug mga Pakigsaad 124:30–34; 127:5–8; 128:1–18; 138:28–37

Pagpuli nga mga ordinansa alang sa mga patay

Si Propeta Joseph Smith unang namulong mahitungod sa doktrina sa bunyag alang sa mga patay diha sa haya ni Seymour Brunson niadtong Agosto 15, 1840, wala madugay human ang mga Santos miestablisar og mga puy-anan didto sa Nauvoo, Illinois. Ang mga miyembro sa Simbahan nasurprisa ug naghinam-hinam sa dihang nasayud sila niining gipadayag nga doktrina. Sulod sa pipila ka bulan human sa pahibalo, ang mga Santos mipahigayon og mga bunyag sa duol nga suba sa Mississippi alang sa ilang namatay nga mga minahal (tan-awa sa Mga Pagtulun-an: Joseph Smith, 489; Church History in the Fulness of Times Student Manual, 2nd ed. [manwal sa Church Educational System, 2003], 251).

  • Sa unsang paagi kini nga wali nakadugang ngadto sa nagtubo nga pagsabut sa plano sa Langitnong Amahan sa pagluwas sa Iyang mga anak? (Samtang motubag ang mga estudyante, isulat sa pisara ang mosunod nga kamatuoran: Ang makaluwas nga ordinansa sa bunyag mapahigayon alang niadtong wala modawat sa ebanghelyo samtang dinhi sa mortalidad.)

  • Unsa kaha ang inyong reaksyon kon nakadungog kamo ni Propeta Joseph Smith nga namulong mahitungod sa doktrina sa bunyag alang sa mga patay sa unang higayon niini nga dispensasyon?

Ipasabut nga panahon sa kinatibuk-ang komperensya sa Oktubre 1841 sa Simbahan sa Nauvoo, Illinois, si Propeta Joseph Smith mideklarar nga gusto sa Ginoo nga ang mga Santos mohunong sa pagpahigayon og mga bunyag alang sa mga patay hangtud nga ang mga bunyag mahimong ikapahigayon sa Iyang balay (tan-awa sa D&P 124:29–34). Niadtong Nobyembre 8, 1841, si Brigham Young, niadtong higayuna mao ang Presidente sa Korum sa Napulog Duha ka mga Apostoles, mipahinungod sa bunyaganan sa basement sa wala pa mahuman nga Templo sa Nauvoo, ug ang mga miyembro sa Simbahan misugod sa paghimo og pagpuli nga mga bunyag alang sa mga patay.

Hangyoa ang mga estudyante sa pagbasa sa ulohan sa seksyon sa Doktrina ug mga Pakigsaad 127, nga nagpasabut nga ang seksyon 127 usa ka sulat gikan ni Propeta Joseph Smith ngadto sa mga Santos, nagsugo kanila sa pagtipig og mga rekord sa mga bunyag nga ilang gihimo alang sa mga patay. Ipasabut nga paglabay sa usa ka semana, si Joseph mihimo og laing sulat kalabut sa hilisgutan sa bunyag alang sa mga patay, nga makita diha sa Doktrina ug mga Pakigsaad 128.

Isulat ang mosunod nga mga pakisayran sa kasulatan diha sa pisara. (Ayaw og ilakip ang materyal sulod sa parentheses; gihatag kini alang kanimo, ang magtutudlo.)

Doktrina ug mga Pakigsaad 127:5–7; 128:8 (Kon ang usa ka ordinansa gipahigayon pinaagi sa awtoridad sa priesthood ug tukma nga girekord, ang ordinansa balido dinhi sa yuta ug didto sa langit.)

Doktrina ug mga Pakigsaad 128:6–7 (Ang rekord sa mga pagpuli nga mga ordinansa ilakip sa mga basahon nga ablihan aron sa paghukom sa mga patay.)

Doktrina ug mga Pakigsaad 128:15, 17–18 (Ang kaluwasan sa atong mga katigulangan nga patay na importante sa atong kaluwasan.)

I-assign ang mga estudyante sa pagbasa sa matag usa sa mga tudling nga gisulat diha sa pisara. Hangyoa sila sa pagpangita sa mga doktrina nga nakadugang sa atong pagsabut sa plano sa Dios alang sa katubsanan sa mga patay. Dapita ang mga estudyante sa pag-summarize sa doktrina mahitungod sa katubsanan alang sa mga patay nga gitudlo sa matag tudling sa kasulatan. Hangyoa ang pipila ka mga estudyante sa paglista sa mga doktrina diha sa pisara tupad sa mga tudling. Ipasabut nga ang mga pinadayag nga narekord diha sa Doktrina ug mga Pakigsaad 127 ug 128 naghulagway sa usa ka komon nga sundanan nga makita diha sa Pagpahiuli sa ebanghelyo—ang Ginoo mopadayag sa mga kamatuoran pagtulun-an human sa usa ka pagtulun-an, imbis nga kausahon.

Pasabta ang mga estudyante nga daghang katuigan human madawat kini nga pinadayag, ang Ginoo mihatag og dugang nga panabut sa Iyang plano sa pagtubos sa mga patay. Niadtong 1918, si Presidente Joseph F. Smith nakadawat og panan-awon mahitungod sa katubsanan sa mga patay. Ang panan-awon miabut sa dihang nagbangutan siya sa pagkawala sa iyang anak nga si Hyrum M. Smith, kinsa namatay sayo nianang tuiga samtang nagserbisyo isip sakop sa Korum sa Napulog Duha ka mga Apostoles.

Dapita ang mga estudyante sa pagbasa sa Doktrina ug mga Pakigsaad 138:28–37, nga mangita sa mga kamatuoran nga gipadayag ngadto ni Presidente Joseph F. Smith mahitungod sa katubsanan sa mga patay.

  • Unsa nga mga kamatuoran mahitungod sa katubsanan sa mga patay ang gitudlo niini nga mga bersikulo? (Samtang ang mga estudyante mopaambit sa mga kamatuoran nga ilang nakit-an, siguroa nga nakasabut sila niini nga kamatuoran: Ubos sa direksyon ni Jesukristo, ang matarung nga mga mensahero mitudlo sa ebanghelyo niadtong anaa sa bilanggoan sa espiritu.)

  • Sa unsang paagi kining dugang nga mga kamatuoran makatabang kanato nga makasabut kon sa unsang paagi ang tawo nga namatay nga wala makadawat sa mga ordinansa sa ebanghelyo, sama ni Alvin Smith, makadawat og kabilin diha sa celestial nga gingharian?

Basaha og kusog ang mosunod nga pamahayag ni Elder David A. Bednar sa Korum sa Napulog Duha ka mga Apostoles:

Elder David A. Bednar

“Isip mga miyembro sa gipahiuli nga Simbahan ni Kristo, kita adunay responsibilidad nga pakigsaad sa pagsiksik sa atong mga katigulangan ug paghatag kanila sa makaluwas nga mga ordinansa sa ebanghelyo. ‘Sila kon wala kita dili mahimong hingpit’ (Mga Hebreohanon 11:40; tan-awa usab sa Mga Pagtulun-an: Joseph Smith, 575). Ug ‘ni kita kon wala ang atong mga patay mahingpit’ (D&P 128:15)” (“Ang mga Kasingkasing sa mga Anak Mobati,” Liahona, Nob. 2011, 25).

  • Nganong ang buhat sa pagtubos sa mga patay kinahanglang usa ka prayoridad sa atong kinabuhi?

  • Sa unsang paagi ang pagpahigayon og makaluwas nga mga ordinansa alang sa atong kaliwatan nga patay na makatabang kanila ug kanato nga mahimong hingpit?

Basaha og kusog ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:

Presidente Russell M. Nelson

“Bisan kon ang buhat sa templo ug sa family history adunay gahum sa pagpanalangin niadtong anaa sa kalibutan sa espiritu, kini adunay sama nga gahum sa pagpanalangin sa mga buhi. Kini adunay makapalunsay nga impluwensya niadtong nagbuhat niini. Sila sa pagkatinuod nagtabang aron mahimaya ang ilang mga pamilya” (“Mga Kaliwatan Nasumpay sa Gugma,” Liahona, Mayo 2010, 93).

  • Sa unsang paagi ang doktrina sa katubsanan sa mga patay nagpamatuod sa walay kinutuban nga pagkab-ot sa Pag-ula ni Jesukristo?

Basaha og kusog ang mosunod nga pamahayag ni Elder Richard G. Scott sa Korum sa Napulog Duha ka mga Apostoles:

Elder Richard G. Scott

“Ang Ginoo mipadayag kang Joseph Smith sa mahinungdanon nga doktrina kabahin sa sagradong ordinansa sa bunyag. Kana nga kahayag miabut samtang ang ubang Kristiyanong simbahan mitudlo nga ang kamatayon, sa kahangturan, modeterminar sa padulngan sa kalag. Sila nagtudlo nga ang mga nabunyagan magantihan og walay katapusang kalipay samtang ang walay bunyag makasinati og walay katapusang kahasol nga walay paglaum sa katubsanan. …

“Kining mahimayaong doktrina usa ka laing saksi sa masangkarong hiyas sa Pag-ula ni Jesukristo. Gihimo Niya ang kaluwasan nga anaa alang sa matag mahinulsulong kalag. Ang Iyang Pag-ula mibuntog sa kamatayon, ug gitugotan Niya ang takus nga nangamatay nga makadawat sa tanan nga mga ordinansa sa kaluwasan pinaagi sa pagpuli” (“Ang Hingpit nga Kalipay sa Pagtubos sa mga Patay,” Liahona, Nob. 2012, 93).

  • Unsa nga mga kasinatian ang nakatudlo kaninyo sa kaimportante sa pag-apil sa buhat sa pagtubos sa mga patay?

  • Sa unsang paagi milambo ang inyong pagpamatuod tungod kay miapil kamo sa buhat sa pagtubos sa mga patay? (Dapita ang pipila ka mga estudyante sa pagpaambit sa ilang mga pagpamatuod.)

Awhaga ang mga estudyante sa pagkonsiderar kon sa unsang paagi sila makaapil sa mahinungdanon nga buhat sa pagtubos sa mga patay, pinaagi man sa pagsiksik sa family history o pinaagi sa pagserbisyo isip mga proxy sa pagpahigayon sa mga ordinansa sa templo. Ipaambit ang imong pagpamatuod nga pinaagi sa buhat nga nahimo diha sa moderno nga mga templo, ang tanang anak sa Langitnong Amahan mahimong makadawat sa tanang mga ordinansa nga gikinahanglan alang sa kaluwasan.

Mga Basahunon sa Estudyante