Ang Doktrina sa Mahangturong Kaminyoon ug Pamilya

Ang ebanghelyo ni Jesukristo naghatag og gibug-aton sa doktrina nga ang kaminyoon ug pamilya gi-orden sa Dios. Si Propeta Joseph Smith mitudlo nga ang mga magtiayon makapadayon isip bana ug asawa human sa Pagkabanhaw. Ang pinadayag gikan sa Ginoo nagpasabut nga ang “bag-o ug walay katapusan nga pakigsaad sa kaminyoon” (D&P 131:2) gikinahanglan aron makadawat sa kahimayaan. Kini nga leksyon mopaklaro ngadto sa mga estudyante nga aron ang usa ka kaminyoon molungtad sa kahangturan, ang magtiayon kinahanglan gayud nga ma-seal pinaagi sa tawo nga naghupot og mga yawe sa priesthood ug dayon magpuyo nga matarung.

Background nga Basahunon

Russell M. Nelson, “Celestial nga Kaminyoon,” Liahona, Nob. 2008, 92–95.
David A. Bednar, “Ang Kaminyoon Mahinungdanon sa Iyang Mahangturong Plano,” Liahona, Hunyo 2006, 50–55.
Joshua J. Perkey, “Nganong Magminyo sa Templo?” Liahona, Ago. 2013, 56-58.

Mga Sugyot alang sa Pagtudlo

Doktrina ug mga Pakigsaad 49:15–17; 131:1–4

“Ang bag-o ug walay katapusan nga pakigsaad sa kaminyoon”

Pahinumdom: Samtang itudlo nimo kini nga leksyon, pagmatngon nga basin duna kay mga estudyante nga adunay lisud nga kinabuhi sa panimalay o nakasinati og kasubo o kasakit kalabut sa kaminyoon ug pagpanganak. Ikonsiderar ang mga panginahanglan niini nga mga estudyante samtang mangandam ug magtudlo ka sa imong leksyon.

Sultihi ang mga estudyante nga niadtong 1831 sa Kirtland, Ohio, si Leman Copley mipasakop sa Simbahan. Miyembro siya kanhi sa United Society of Believers in Christ’s Second Appearing, kasagaran nga gitawag og mga Shaker tungod sa ilang pamaagi sa pagsimba, nga naglakip sa pagpakurog sa ilang mga lawas samtang sila manganta, manayaw, ug mamakpak sa ilang mga kamot ngadto sa musika. Samtang si Leman Copley mituo sa ebanghelyo, mituo gihapon siya sa pipila sa mga pagtulun-an sa mga Shaker. Mibisita siya ni Joseph Smith, ug isip resulta sa pagbisita, ang Ginoo mihatag kang Joseph sa pinadayag nga karon nailhan isip Doktrina ug mga Pakigsaad 49 niadtong Mayo 7, 1831. (Ang mga ulohan sa seksyon sa unang mga edisyon sa Doktrina ug mga Pakigsaad mihatag sa Marso 1831 isip petsa niini. Ang mga historian bag-o lang nga mideterminar nga ang mas tukma nga petsa mao ang Mayo 7, 1831.)

Ang mga Shaker misalikway sa kaminyoon ug nagtuo sa pagpuyo og kinabuhi nga hingpit nga maglikay sa sekswal nga mga relasyon [celibacy]. Ang Ginoo mikorihir niining sayop nga doktrina diha sa pinadayag ug misugo usab ni Leman Copley ug sa uban sa pagsangyaw sa ebanghelyo ngadto sa mga Shaker.

Dapita ang mga estudyante sa pagbasa sa Doktrina ug mga Pakigsaad 49:15–17, nga mangita sa gisulti sa Ginoo mahitungod sa kaimportante sa kaminyoon ug pamilya. Ipangutana:

Sumala niini nga mga bersikulo, unsa ang gitudlo sa Ginoo mahitungod sa kaminyoon? (Ang mga estudyante kinahanglang mahibalo sa mosunod nga doktrina: Ang kaminyoon tali sa lalaki ug sa babaye gi-orden sa Dios.)
Unsa kaha ang gipasabut nga ang kaminyoon gi-orden sa Dios “nga ang yuta makatuman sa katuyoan sa iyang pagkalalang”? (Ang mga tubag sa estudyante mahimong maglakip sa mosunod nga mga kamatuoran: Ang mga bana ug mga asawa gisugo nga magbaton og anak. Ang kalibutan gilalang aron sa paghatag og usa ka dapit diin ang mga anak sa Dios makapuyo isip mga pamilya.)
Sa unsang paagi ang pagsabut sa mga kamatuoran nga gitudlo niini nga mga bersikulo makatabang nato sa pagpasabut sa mga pagtulun-an sa Simbahan mahitungod sa kaminyoon?

Ipasabut nga paglabay sa katuigan, ang pagsabut sa mga Santos sa kaimportante sa doktrina sa mahangturong kaminyoon ug pamilya milambo pag-ayo. Niadtong Mayo 16, 1843, si Joseph Smith mibiyahe ngadto sa Ramus, Illinois. Samtang nagpuyo sa panimalay ni Benjamin ug Melissa Johnson, ang Propeta mitudlo kanila kabahin sa mahangturon nga kaminyoon. Ang pipila sa mga instruksyon sa Propeta nga gihatag sa Ramus narekord diha sa Doktrina ug mga Pakigsaad 131. Dapita ang usa ka estudyante sa pagbasa og kusog sa Doktrina ug mga Pakigsaad 131:1–4, ug dayon pangutana:

Unsa man ang kinahanglan natong buhaton aron maangkon ang labing taas nga ang-ang sa celestial nga gingharian? (Ang mga estudyante kinahanglang mahibalo sa mosunod nga doktrina: Aron makaangkon sa labing taas nga ang-ang sa celestial nga gingharian, kinahanglang mosulod kita sa bag-o ug walay katapusan nga pakigsaad sa kaminyoon. Ipasabut nga ang pulong nga bag-o niini nga konteksto nagpasabut nga kini nga pakigsaad bag-o lang gipahiuli sa atong dispensasyon. Ang termino nga walay katapusan nagpasabut nga kini nga pakigsaad kanunay na nga anaa ug molahutay hangtud sa kahangturan. Mahimo nimong isugyot nga isulat sa mga estudyante kini nga mga kahulugan diha sa margin sa ilang mga kasulatan.)
Sa atong panahon, sa unsang paagi ang lalaki ug babaye mosulod niini nga “bag-o ug walay katapusan nga pakigsaad sa kaminyoon”?

Ipasabut nga ang mga lalaki ug mga babaye makasulod niini nga bag-o ug walay katapusan nga pakigsaad sa kaminyoon sa sulod lamang sa balaang mga templo. Ang mga indibidwal nga naminyo sa gawas sa templo mahimong molakip sa mga termino nga sama sa “nagminyo alang sa karon ug sa kahangturan” diha sa ilang mga panumpa sa kaminyoon, apan ang Dios dili motuman niini nga mga kaminyoon didto sa kahangturan.

I-display ang mosunod nga mensahe ni Presidente Russell M. Nelson sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Awhaga ang mga estudyante sa pagpangita kon unsay gitudlo ni Presidente Nelson nganong ang mahangturon nga kaminyoon importante kaayo:

“Ang hilisgutan sa kaminyoon gidibatehan sa tibuok kalibutan, diin ang nagkalain-laing mga kasabutan anaa alang sa panagtipon sa kaminyoon. Ang akong katuyoan sa pagsulti kabahin niini nga hilisgutan mao ang pagpamahayag, isip usa ka Apostol sa Ginoo, nga ang kaminyoon tali sa lalaki ug babaye sagrado—gi-orden kini sa Dios. Ako usab nga gipamatud-an ang hiyas sa kaminyoon sa templo. Mao kini ang labing taas ug labing malungtaron nga matang sa kaminyoon nga ikahatag sa atong Tiglalang ngadto sa Iyang mga anak.

“Samtang ang kaluwasan maoy usa ka indibidwal nga butang, ang kahimayaan mao ang usa ka butang sa pamilya. …

“… Aron mahimong takus alang sa kinabuhing dayon, kinahanglan gayud nga kita mohimo og usa ka mahangturon ug walay katapusan nga pakigsaad uban sa atong Langitnong Amahan [tan-awa sa D&P 132:19]. Kini nagpasabut nga ang kaminyoon sa templo dili lamang tali sa bana ug asawa; naglakip kini og pakigkumbuya uban sa Dios [tan-awa sa Mateo 19:6]” (“Celestial nga Kaminyoon,” Liahona, Nob. 2008, 92–93).

Unsa kaha ang gipasabut niini nga sentence: “Samtang ang kaluwasan maoy usa ka indibidwal nga butang, ang kahimayaan mao ang usa ka butang sa pamilya”?
Unsay buot ipasabut sa paglakip og “pakigkumbuya uban sa Dios” diha sa mahangturon nga kaminyoon? Ngano kaha nga importante ang pagbaton og pakigkumbuya uban sa Dios diha sa kaminyoon? (Diha lamang sa kaminyoon nga ang usa ka tawo naghimo og pakigsaad uban sa laing tawo ug uban sa Dios. Ang tanang pakigsaad sa ebanghelyo gawas niini gihimo tali sa usa ka indibidwal ug sa Dios.)
Sa unsang paagi ang gipahiuli nga doktrina sa mahangturong kaminyoon ug pamilya makapalambo sa tinguha sa usa ka tawo sa pagtukod og usa ka mahigugmaon ug mahangturong kaminyoon?

Si Elder Parley P. Pratt (1807–57) sa Korum sa Napulog Duha ka mga Apostoles mipasabut sa epekto niini nga kahibalo sa gipahiuli nga doktrina diha kaniya. Dapita ang usa ka estudyante sa pagbasa sa mosunod:

“Gikan ni [Joseph Smith] nga akong nakat-unan nga ang akong asawa mahimo nga mahiusa kanako alang sa karon ug sa kahangturan. … Gikan kaniya nga ako nakakat-on nga kita mahimo nga makaugmad niini nga mga pagbati, ug motubo ug molambo sa gihapon hangtud sa kahangturan; samtang ang resulta sa atong walay katapusan nga panaghiusa mao ang mga anak nga sama sa gidaghanon sa mga bitoon sa langit, o sa mga balas sa baybayon sa dagat. … Nahigugma ako kaniadto, apan wala ko masayud kon ngano. Apan karon ako nahigugma—uban sa kaputli—usa ka kusog nga nabayaw, nahimaya nga pagbati” (Autobiography of Parley P. Pratt, ed. Parley P. Pratt Jr. [1938], 297–98).

Sa dili pa mopadayon sa leksyon, mas maayo nga hisgutan sa daklit ang mosunod:

“Pipila ka mga miyembro sa Simbahan ang nagpabiling wala maminyo bisan tuod nga dili nila sala, bisan kon ganahan sila nga magminyo. Kon ikaw anaa niini nga sitwasyon, magmasaligon nga “ang matag usa ka butang ang Dios nagabuhat og maayo uban kanila nga nahigugma kaniya” (Mga Taga-Roma 8:28). Samtang magpabilin ikaw nga takus, ikaw sa umaabut, niining kinabuhia o sa sunod, pagahatagan sa tanang mga panalangin sa usa ka mahangturong relasyon sa pamilya” (Matinud-anon sa Tinuhoan: Usa ka Pakisayran sa Ebanghelyo [2004], 99).

Doktrina ug mga Pakigsaad 132:1–21

Ang celestial nga kaminyoon gikinahanglan alang sa kahimayaan

Ipasabut nga mga duha ka bulan human mihatag si Joseph Smith sa instruksyon nga narekord sa Doktrina ug mga Pakigsaad 131, iyang gidiktar ang pinadayag nga karon nailhan isip Doktrina ug mga Pakigsaad 132. Hangyoa ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 132. Ipasabut nga ang binuhatan sa dinaghan nga kaminyoon hisgutan sa sunod nga leksyon. Dapita ang usa ka estudyante sa pagbasa og kusog sa Doktrina ug mga Pakigsaad 132:3–6. Hangyoa ang klase sa pagsunod ug pag-ila sa mga pulong nga nagsugyot sa kaimportante sa pagsulod diha sa bag-o ug walay katapusan nga pakigsaad sa kaminyoon. Hisguti ang mosunod nga mga pangutana:

Unsa nga mga pulong niini nga mga bersikulo ang nagklaro sa kaimportante sa mahangturon nga kaminyoon?
Unsa ang mga sangputanan sa pagsalikway niini nga doktrina? (Mahimo nimong ipasabut nga ang pulong nga pagasilutan nagpasabut nga ang tawo pugngan sa iyang mahangturong pag-uswag.)

Pahinumdom: Paggahin og pipila ka minuto sa pagtudlo sa mga estudyante sa importanting kahanas sa pagtuon sa kasulatan sa pagtimaan sa importanting mga pulong, ang kahanas nga bag-o lang nilang gigamit sa Doktrina ug mga Pakigsaad 132:3–6. Importante ang pagtimaan ug pagsabut sa mga pulong samtang magtuon sa mga kasulatan. Diha sa mga bersikulo 3–6, ang mosunod nga mga pulong importante nga masabtan: “pagdawat ug pagsunod,” “kinahanglan nga mosunod,” “kon ikaw dili mosunod niana nga pakigsaad, niana ikaw silotan,” “walay usa nga makasalikway,” “kinahanglan.” Ang pipila niini nga mga pulong mga ehemplo usab sa mga koneksyon tali sa mga ideya diha sa mga kasulatan. Ang mga koneksyon nagpakita sa relasyon o sumpay tali sa mga ideya. Sama pananglit, ang bersikulo 3 nagpakita sa mga koneksyon tali sa mga ideya sa pagpangandam, pagdawat, ug pagsunod.

Dapita ang mga estudyante sa pagbasa og hilum sa Doktrina ug mga Pakigsaad 132:7–8, nga mangita sa mga kinahanglanon sa balaod sa Ginoo aron mahimong posible alang sa bana ug asawa ang pagpuyo isip magtiayon human niining kinabuhia.

Sumala niini nga mga bersikulo, unsa nga mga kinahanglanon ang gikinahanglan aron ang usa ka kaminyoon molahutay sa kahangturan? (Samtang motubag ang mga estudyante, isulat sa pisara ang mosunod nga kamatuoran: Kon ang usa ka pakigsaad gihimo pinaagi sa tukmang awtoridad sa priesthood ug nabugkos pinaagi sa Espiritu Santo sa Saad [Balaang Espiritu sa Saad], kini molungtad sa kahangturan.)

Ipaambit ang mosunod nga kahulugan sa Balaang Espiritu sa Saad: “Ang Espiritu Santo mao ang Balaan nga Espiritu sa Saad (Buhat 2:33). Siya nagmatuod nga madawat sa Dios ang matarung nga mga buhat, mga ordinansa, ug mga pakigsaad sa mga tawo. Ang Balaan nga Espiritu sa Saad mosaksi ngadto sa Amahan nga ang mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan” (Giya ngadto sa mga Kasulatan, “Balaan nga Espiritu sa Saad,” scriptures.lds.org).

Aron matabangan ang mga estudyante nga mas masabtan kini nga baruganan, i-display ang mosunod nga pamahayag ni Elder Bruce R. McConkie (1915–85) sa Korum sa Napulog Duha ka mga Apostoles:

“Ang pag-seal mao ang pagmatuod, paghatag og kaangayan, o pag-aprubar. Busa ang usa ka buhat nga gi-seal pinaagi sa Balaan nga Espiritu sa Saad mao ang usa ka buhat nga gimatud-an sa Espiritu Santo; kini mao ang usa ka buhat nga gi-aprubahan sa Ginoo; ug ang tawo nga midawat sa obligasyon diha sa iyang kaugalingon gihatagan og kaangayan sa Espiritu diha sa mga butang nga iyang nabuhat. Ang nagmatuod nga silyo sa pag-aprubar ibutang lamang diha sa usa ka buhat lang kon kadtong misulod sa kontrata takus nga makadawat sa balaan nga pag-aprubar isip resulta sa personal nga pagkamatarung” (Mormon Doctrine, 2nd ed. [1966], 361–62).

Ang Ginoo mipadayon sa paglatid sa mga kinahanglanon ug mga panalangin sa mahangturong kaminyoon, ingon nga narekord sa Doktrina ug mga Pakigsaad 132:19–21. I-assign ang mga estudyante nga magpares sa pagtuon niini nga tudling. Hangyoa ang mga pares sa paghimo og duha ka lista: (1) mga kinahanglanon aron ang usa ka kaminyoon mahimong mahangturon, ug (2) mga panalangin nga madawat kon matuman kini nga mga kinahanglanon. Kon makompleto, ang mga lista mahimong maglakip sa mosunod:

Ang mga kinahanglanon aron ang kaminyoon mahimong mahangturon

Ang kaminyoon kinahanglang ipahigayon sumala sa balaod sa Ginoo ug sa “bag-o ug walay katapusan nga pakigsaad.”
Ang kaminyoon kinahanglang i-seal sa Balaan nga Espiritu sa Saad.
Ang kaminyoon kinahanglan gayud nga ipahigayon pinaagi sa tawo nga naghupot sa mga yawe sa priesthood.
Ang magtiayon kinahanglan gayud mosunod sa pakigsaad sa Dios.

Mga panalangin nga madawat

Ang magtiayon mobangon sa Unang Pagkabanhaw.
Ang magtiayon makapanunod og mga trono, mga gingharian, mga kayutaan, mga kagamhanan, mga kamandoan, tanan nga mga kahitas-an ug mga kahiladman.
Ang kaminyoon hingpit gihapon nga epektibo human sa pisikal nga kamatayon.
Ang magtiayon molabay sa mga anghel.
Ang magtiayon mahimaya ug makaangkon og himaya sa tanang butang.
Ang magtiayon makaangkon og “pagpadayon sa mga binhi hangtud sa hangtud” (ang ilang pamilya ug kaliwatan magpadayon hangtud sa kahangturan; sila dunay mahangturong pag-uswag).
Ang magtiayon mahimong mga dios ug walay katapusan.
Ang magtiayon mahimong labaw sa tanang butang ug aduna sa tanang gahum, ug tanan nga mga butang alagad ngadto kanila.

Hisguti ang mosunod nga mga pangutana aron matabangan ang mga estudyante nga makasabut sa mga kinahanglanon ug sa gisaad nga mga panalangin sa mahangturon nga kaminyoon:

Unsa kaha ang gipasabut sa “mosunod” diha sa pakigsaad sa kaminyoon? (Mahimo nimong ipasabut nga usa sa kahulugan sa pulong nga gihubad nga mosunod mao ang magpabilin o magpadayon. Nagpasabut usab kini nga magpuyo sumala sa pakigsaad.)
Nganong ang pagka-seal diha sa templo nga kana lang dili igo aron makab-ot ang mahangturon nga kaminyoon?
Unsa ang inyong mga hunahuna ug mga pagbati samtang inyong gikonsiderar ang gisaad sa Langitnong Amahan kaninyo?

I-display ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles:

“Ang celestial nga kaminyoon mao ang mahinungdanon nga bahin sa pagpangandam alang sa kinabuhing dayon. Nagkinahanglan kini sa usa ka tawo nga maminyo sa tukma nga tawo, sa tukmang dapit, pinaagi sa tukmang awtoridad, ug sa pagsunod niana nga sagradong pakigsaad sa matinud-anong paagi. Dayon ang usa ka tawo mahimo nga gisiguro sa kahimayaan didto sa celestial nga gingharian sa Dios” (“Celestial nga Kaminyoon,” Liahona, Nob. 2008, 94).

Unsaon ninyo sa pagpasabut sa tawo nga dili miyembro sa Simbahan sa kaimportante sa pagminyo “sa tukmang dapit, pinaagi sa tukmang awtoridad”?
Tungod sa kaimportante sa doktrina sa mahangturong kaminyoon ug pamilya, unsay inyong mabuhat karon aron maandam alang sa mahangturon nga kaminyoon ug mohimo og lig-on nga mga relasyon?

Dapita ang mga estudyante sa pagkonsiderar kon unsay kinahanglan nilang usbon sa ilang kinabuhi aron mas maandam alang sa sealing sa templo o mosunod sa mga pakigsaad nga may kalabutan niana nga sealing. Ipaambit ang imong pagpamatuod nga ang pagtinguha og mahangturong kaminyoon angay lang sa atong mga sakripisyo ug paningkamot.

Mga Basahunon sa Estudyante

Doktrina ug mga Pakigsaad 49:15–17; 131:1–4; 132:1–24.
Russell M. Nelson, “Celestial nga Kaminyoon,” Liahona, Nob. 2008, 92–95.
Joshua J. Perkey, “Nganong Magminyo sa Templo?” Liahona, Ago. 2013, 56-58.