Dinaghan nga Kaminyoon

Ang kaminyoon tali sa usa ka lalaki ug usa ka babaye mao ang balaod sa Ginoo gawas kon mosugo Siya og lahi (tan-awa sa Jacob 2:27–30). Si Propeta Joseph Smith gisugo sa pagpahiuli sa buhat sa dinaghan nga kaminyoon, diin gihimo diha sa Simbahan sa sobra katunga sa siglo hangtud nga si Presidente Wilford Woodruff gidasig sa Ginoo sa paghunong niini nga buhat. Ang dinaghan nga kaminyoon usa ka dakong pagsulay sa pagtuo alang ni Joseph Smith ug sa kadaghanan nga mibuhat niini. Samtang ang mga estudyante mopakita og pagtuo, mahimo silang masayud nga ang buhat sa dinaghan nga kaminyoon sa ulahing mga adlaw kabahin sa Pagpahiuli sa tanan nga mga butang.

Background nga Basahunon

“Plural Marriage in The Church of Jesus Christ of Latter-day Saints [Dinaghan nga Kaminyoon diha sa Simbahan ni Jesukristo sa mga Santos sa Ulahing mga Adlaw],” Gospel Topics, lds.org/topics.
“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics.
“Plural Marriage and Families in Early Utah [Dinaghan nga Kaminyoon ug mga Pamilya sa Sinugdan sa Utah],” Gospel Topics, lds.org/topics.
“The Manifesto and the End of Plural Marriage [Ang Manifesto ug ang Pagtapos sa Dinaghan nga Kaminyoon],” Gospel Topics, lds.org/topics.

Pahinumdom: Kini nga mga essay sa Hilisgutan sa Ebanghelyo [Gospel Topics] mohatag kanimo og mas daghan nga materyal kay sa imong matudlo sa gihatag nga oras. Palihug paghunahuna niini sa imong pagpangandam sa leksyon ug pagtudlo.

Mga Sugyot alang sa Pagtudlo

Jacob 2:27–30; Doktrina ug mga Pakigsaad 132:1–2, 34–48, 54, 63

Ang Ginoo mipadayag sa buhat sa dinaghan nga kaminyoon

Ipasabut nga niadtong 1831, samtang nagtrabaho si Joseph Smith sa dinasig nga hubad sa Daang Tugon, nailhan nga Hubad ni Joseph Smith, iyang nabasa nga ang pipila sa karaang mga propeta mihimo og dinaghan nga kaminyoon (gitawag usab og polygamy [daghan og asawa]). Kini nga mga propeta naglakip ni Abraham, Jacob, Moises, ug David. Nagtuon ug namalandong si Joseph Smith sa mga kasulatan aron masayud kon sa unsang paagi kini nga mga propeta nahatagan og kaangayan niini nga buhat (tan-awa sa D&P 132:1–2). Ang Ginoo mipadayag sa mga tubag sa iyang mga pangutana sa usa ka pagpadayag nga karon nailhan isip Doktrina ug mga Pakigsaad 132. Bisan tuod ang petsa niini nga pagpadayag mao ang Hulyo 12, 1843, malagmit nga midawat si Joseph Smith og pagpadayag mahitungod sa mga baruganan nga narekord niini nga seksyon sulod sa taas nga panahon, sugod pa sa 1831.

Dapita ang pipila ka estudyante nga magpuli-puli sa pagbasa og kusog sa Doktrina ug mga Pakigsaad 132:34–36. Hangyoa ang klase sa pagsunod, nga mangita kon nganong misugod sa pagbuhat si Abraham ug Sara sa dinaghan nga kaminyoon.

Sumala sa bersikulo 34, ngano nga gihatagan ni Sara si Abraham og laing asawa? Unsay gitudlo niini kanato mahitungod sa buhat sa dinaghan nga kaminyoon? (Samtang motubag ang mga estudyante, isulat sa pisara ang mosunod nga baruganan: Ang dinaghan nga kaminyoon madawat lamang nga buhat kon gisugo kini sa Ginoo.)

Dapita ang usa ka estudyante sa pagbasa og kusog sa Jacob 2:27, 30. Hatagi og gibug-aton ang mosunod nga baruganan: Ang kaminyoon tali sa usa ka lalaki ug usa ka babaye mao ang sumbanan sa Dios gawas kon lahi ang Iyang isugo. Ipasabut nga kini nga mga bersikulo naglakip usab og usa ka rason nga gihatag sa Ginoo alang sa buhat sa dinaghan nga kaminyoon—aron “mopasanay og binhi [ngadto sa Ginoo]” pinaagi sa pagpadaghan sa mga bata nga matawo sa matinud-anong mga ginikanan (tan-awa usab sa D&P 132:63).

Ipasabut nga gipadayag sa Ginoo kang Joseph Smith, sumala sa narekord sa Doktrina ug mga Pakigsaad 132:37–43, nga sa dihang ang Iyang katawhan mibuhat og dinaghan nga kaminyoon tungod kay misugo Siya kanila sa pagbuhat niini, wala sila makahimo sa sala sa pagpanapaw. Hinoon, bisan kinsa nga mohimo og dinaghan nga kaminyoon nga wala sugoa sa Ginoo pinaagi sa Iyang propeta nakasala og pagpanapaw. Itudlo sa mga estudyante nga ang pulong nga pagalaglagon diha sa mga bersikulo 41 ug 54 nagpasabut nga kadtong mosupak sa ilang sagrado nga mga pakigsaad, lakip na ang ilang pakigsaad sa kaminyoon, mahimulag gikan sa Dios ug sa Iyang katawhan sa pakigsaad (tan-awa usab sa Mga Buhat 3:22–23; 1 Nephi 22:20).

Dapita ang mga estudyante nga hilum nga mobasa sa Doktrina ug mga Pakigsaad 132:40 ug motino sa laing rason nga gihatag sa Ginoo alang sa buhat sa dinaghan nga kaminyoon.

Sumala sa bersikulo 40, unsa man ang buhaton sa Ginoo sa katapusang dispensasyon? (“[Mo]pahiuli sa tanan nga mga butang.”)

Ipasabut nga ang mga pulong nga “tanan nga mga butang” nagpasabut sa mga balaod ug mga ordinansa sa ebanghelyo nga gipadayag sa nangaging mga dispensasyon. Isulat ang mosunod nga kamatuoran diha sa pisara: Ang sugo sa pagsunod sa balaod sa dinaghan nga kaminyoon sa ulahing mga adlaw kabahin sa Pagpahiuli sa tanan nga mga butang (tan-awa usab sa Mga Buhat 3:20–21).

Dapita ang usa ka estudyante sa pagbasa og kusog sa Doktrina ug mga Pakigsaad 132:45, 48. Hangyoa ang klase sa pagsunod, nga mangita kon unsay nakapahimo ni Joseph Smith nga makaapil sa pagpahinabo sa Pagpahiuli sa tanan nga mga butang. Tabangi ang mga estudyante nga makasabut sa mosunod nga baruganan: Ang dinaghan nga kaminyoon matugutan lamang pinaagi sa mga yawe sa priesthood nga gihatag ngadto sa Presidente sa Simbahan.

Pag-apud-apod og kopya sa handout nga makita sa katapusan sa leksyon ngadto sa matag estudyante. Dapita ang usa ka estudyante sa pagbasa og kusog sa unang seksyon, nga giulohan og “Dinaghan nga Kaminyoon.”

handout, Pagsabut sa Dinaghan nga Kaminyoon

Sa unsang paagi ang pagkahibalo nga ang buhat sa dinaghan nga kaminyoon gihatag pinaagi sa pagpadayag ngadto ni Propeta Joseph Smith makatabang kaninyo nga mas makasabut sa pagbuhat niini sa unang mga adlaw sa Simbahan?

Ang buhat sa dinaghan nga kaminyoon usa ka pagsulay sa pagtuo

Dapita ang katunga sa klase nga hilum nga mobasa sa seksyon sa handout nga giulohan og “Usa ka Lisud nga Sugo.” Ipabasa sa laing katunga sa klase ang seksyon nga giulohan og “Usa ka Pagsulay sa Pagtuo.” Dayon hisguti ang mosunod nga mga pangutana:

Unsa ang pipila ka rason nganong si Propeta Joseph Smith ug ang uban tingali nagduhaduha sa pag-implementar sa buhat sa dinaghan nga kaminyoon?
Unsa ang nasinati ni Joseph Smith, Lucy Walker, ug sa uban nga sa katapusan nakatabang kanila nga mabuntog ang dagkong kalisdanan aron modawat sila ug mosunod sa balaod sa dinaghan nga kaminyoon?

Hangyoa ang pipila ka mga estudyante nga magpuli-puli sa pagbasa og kusog sa seksyon sa handout nga giulohan og “Si Joseph Smith ug ang Dinaghan nga Kaminyoon.”

Ipasabut sa mga estudyante nga daghan pa kita og wala masayri mahitungod sa buhat sa dinaghan nga kaminyoon sa sayong bahin sa Simbahan. Sama pananglit, ang kasamtangan natong pagsabut sa pulong nga pag-seal dili gayud susama sa pagsabut niini nga pulong niadtong mga 1840, sa diha nga ang buhat sa pag-seal bag-o pa ug ang ubang mga aspeto sa buhat wala pa masabti sa hingpit. Kon makadungog kita sa pulong nga pag-seal diha-diha dayon makahunahuna kita sa kaminyoon, apan alang kang Joseph Smith ug sa unang mga Santos, ang pag-seal wala kanunay magpasabut sa kaminyoon sa hingpit nga kahulugan niini, nagpasabut nga ipon nga magpuyo isip bana ug asawa. Daghang mga detalye sa buhat sa dinaghan nga kaminyoon gihimong kompidensyal, ug ang mga rekord sa kasaysayan wala gayud motubag sa tanan natong mga pangutana. Awhaga ang mga estudyante sa pagtuon sa mga Basahunon sa Estudyante nga gilista sa katapusan sa leksyon alang sa dugang nga impormasyon mahitungod sa buhat sa dinaghan nga kaminyoon.

Mahimo nimong pahinumduman ang mga estudyante nga samtang magtuon sila mahitungod sa dinaghan nga kaminyoon, kinahanglan nilang hinumduman ang sundanan nga gisunod ni Propeta Joseph Smith sa iyang pagkat-on sa ebanghelyo. Nagtuon, namalandong, ug nag-ampo siya aron makaangkon og kahibalo. Kinahanglan usab nilang hinumduman nga daghang dili kasaligan nga impormasyon mahitungod sa dinaghan nga kaminyoon anaa sa Internet ug sa daghang inimprinta nga mga tinubdan. Pipila sa mga tagsulat nga misulat kabahin sa Simbahan ug sa kasaysayan niini mipresentar og impormasyon nga wala sa konteksto, o naglakip og dili kompleto nga mga kamatuoran nga mahimong makalingla. Ang katuyoan sa pipila niini nga mga sinulat mao ang pagdaut sa pagtuo.

Opisyal nga Pahayag 1

Ang Ginoo mipadayag nga ang mga Santos sa Ulahing mga Adlaw kinahanglang mohunong sa pagbuhat og dinaghan nga kaminyoon

Ipasabut nga ang buhat sa dinaghan nga kaminyoon midaghan human ang mga Santos miabut sa Utah nga dapit ug dayon sa wala madugay gihunong sumala sa pagpadayag. Hangyoa ang mga estudyante nga magpuli-puli sa pagbasa og kusog sa mga seksyon sa handout nga giulohan og “Oposisyon sa Dinaghan nga Kaminyoon” ug “Ang Ikaduha nga Manipesto.”

Unsa nga mga sangputanan ang giatubang sa mga unang Santos sa Ulahing mga Adlaw tungod kay gisunod nila ang sugo sa Ginoo sa paghimo og dinaghan nga kaminyoon?

Dapita ang pipila ka mga estudyante nga magpuli-puli sa pagbasa og kusog gikan sa katapusang duha ka mga paragraph sa Opisyal nga Pahayag 1 sa Doktrina ug mga Pakigsaad ug ang una ug ikapito nga mga paragraph sa “Mga Kinutlo gikan sa Tulo ka mga Pakigpulong ni Presidente Wilford Woodruff Mahitungod sa Manipesto,” nga nagsunod sa Opisyal nga Pahayag 1. Dayon ipangutana:

Unsa ang gitudlo ni Presidente Woodruff sa mga Santos? (Ang pipila sa mga baruganan nga iyang gitudlo naglakip sa mosunod: Ang Ginoo dili gayud motugot sa Presidente sa Simbahan nga mopahisalaag sa Simbahan. Ang Ginoo naggiya sa Iyang Simbahan pinaagi sa pagpadayag ngadto sa Presidente sa Simbahan.)

Ang mosunod tingali makatabang sa dugang nga pagpasabut sa desisyon nga tapuson ang buhat sa dinaghan nga kaminyoon:

“Si Presidente George Q. Cannon, naghunahuna sa proseso sa pagpadayag nga mipahinabo sa Manipesto: ‘Ang Kapangulohan sa Simbahan kinahanglang mosinati sa kinabuhi niini nga kalibutan sama gayud kaninyo,’ miingon siya. ‘Kinahanglan nilang mohimo og mga pag-uswag sama kaninyo. Kinahanglan nilang mosalig diha sa mga pagpadayag sa Dios samtang moabut kini kanila. Dili sila makakita sa katapusan gikan sa sinugdanan, sama sa mabuhat sa Ginoo.’ ‘Ang tanan namong mahimo,’ miingon si Cannon, namulong kabahin sa Unang Kapangulohan, ‘mao ang pagtinguha sa hunahuna ug kabubut-on sa Dios, ug sa diha nga moabut kini kanamo, bisan tuod kini sukwahi sa tanan namong pagbati, kami walay laing mahimo gawas sa pagsunod sa unsay gitudlo sa Dios, ug sa pagsalig Kaniya’” (“The Manifesto and the End of Plural Marriage [Ang Manipesto ug ang Pagtapos sa Dinaghan nga Kaminyoon],” Gospel Topics, lds.org/topics).

Tapusa ang leksyon pinaagi sa pagpangutana:

Base sa unsay inyong nakat-unan, unsaon ninyo pagtubag kon dunay mangutana kaninyo kon ang Santos sa Ulahing mga Adlaw nagbuhat ba og dinaghan nga kaminyoon?

Ikonsiderar ang pagpaambit sa mosunod nga pamahayag ni Presidente Gordon B. Hinckley (1910–2008):

“Kon adunay atong mga miyembro nga mahibaloan nga naghimo og dinaghan nga kaminyoon, sila i-excommunicate, ang labing seryuso nga silot nga ikapahamtang sa Simbahan. … Labaw sa usa ka siglo ang milabay klaro nga gipadayag sa Dios ngadto sa Iyang propeta nga si Wilford Woodruff nga kinahanglang hunongon na ang pagbuhat sa dinaghan nga kaminyoon, nagpasabut nga kini supak na sa balaod sa Dios. Bisan diha sa mga nasud diin ang sibil o relihiyuso nga balaod nagtugot sa dinaghan nga kaminyoon, ang Simbahan nagtudlo nga kinahanglan ang kaminyoon ngadto ra sa usa ka bana o asawa ug dili kini modawat sa pagkamiyembro niadtong nagbuhat sa dinaghan nga kaminyoon” (“What Are People Asking about Us?” Ensign, Nob. 1998, 71–72).

Ang mosunod nga paragraph mahimong makatabang usab samtang hisgutan nimo ang bag-ong mga binuhatan sa Simbahan:

“Sumala sa mga pagtulun-an ni Joseph Smith, ang Simbahan nagtugot sa usa ka lalaki kansang asawa namatay na nga ma-seal ngadto sa laing babaye kon siya magminyo og usab. Dugang pa, ang mga miyembro gitugutan sa pagpahigayon og mga ordinansa alang sa patay nga mga lalaki ug babaye kinsa naminyo og sobra sa kausa dinhi sa yuta, i-seal sila ngadto sa tanan nga mga kapikas kang kinsa sila legal nga naminyo. Ang tukmang matang niini nga mga relasyon sa sunod nga kinabuhi wala pa mahibaloi, ug daghan nga mga relasyon sa pamilya pagahan-ayon sa kinabuhi nga moabut. Ang mga Santos sa Ulahing mga Adlaw giawhag nga mosalig sa atong maalamon nga Langitnong Amahan, kinsa nahigugma sa Iyang mga anak ug nagbuhat sa tanan alang sa ilang kalamboan ug kaluwasan” (“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics).

Sa dili pa tapuson ang leksyon, mahimong maalamon ang pagsulti sa mga estudyante nga ang ubang mga tawo nga mibiya sa Simbahan naghimo og dinaghan nga kaminyoon karon. Nag-awhag sila sa mga tawo sa pag-ampo ug pagpamalandong kon husto ba ang pagbuhat og dinaghan nga kaminyoon karon. Kinahanglang dili kita magtinguha sa pagdawat og pagpadayag nga sukwahi sa unsay gipadayag na sa Ginoo pinaagi sa Iyang mga propeta. Ang Ginoo mipadayag pinaagi sa Iyang propeta nga ang paghimo og dinaghan nga kaminyoon mihunong na sa Simbahan. Si bisan kinsa nga nag-awhag sa pagbuhat og dinaghan nga kaminyoon dili sulugoon sa Ginoo.

Ipaambit ang imong pagpamatuod mahitungod ni Propeta Joseph Smith. Mahimo kang mopamatuod nga siya nakadawat ug misunod sa pagpadayag gikan sa Dios, sama sa gibuhat sa karaang mga propeta nga si Abraham, Isaac, ug Jacob (tan-awa sa D&P 132:37).

Mga Basahunon sa Estudyante

Jacob 2:27–30; Doktrina ug mga Pakigsaad 132:1–3, 34–48, 54, 63; Opisyal nga Pahayag 1.
“Plural Marriage in The Church of Jesus Christ of Latter-day Saints [Dinaghan nga Kaminyoon diha sa Simbahan ni Jesukristo sa mga Santos sa Ulahing mga Adlaw],” Gospel Topics, lds.org/topics.

Ikonsiderar ang pagbasa sa mosunod:

“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics.
“Plural Marriage and Families in Early Utah [Dinaghan nga Kaminyoon ug mga Pamilya sa Sinugdan sa Utah],” Gospel Topics, lds.org/topics.
“The Manifesto and the End of Plural Marriage [Ang Manifesto ug ang Pagtapos sa Dinaghan nga Kaminyoon],” Gospel Topics, lds.org/topics.

Pagsabut sa Dinaghan nga Kaminyoon

Mga Pundasyon sa Pagpahiuli—Leksyon 20

Dinaghan nga Kaminyoon

“Ang mga Santos sa Ulahing mga Adlaw nagtuo nga ang kaminyoon sa usa ka lalaki ug usa ka babaye mao ang naestablisar nga balaod sa Ginoo sa kaminyoon. Sa biblikanhong kapanahunan, ang Ginoo misugo sa uban sa pagbuhat og dinaghan nga kaminyoon—ang kaminyoon sa usa ka lalaki ug sobra sa usa ka babaye. Pinaagi sa pagpadayag, ang Ginoo misugo ni Joseph Smith sa pagpasiugda sa buhat sa dinaghan nga kaminyoon tali sa mga miyembro sa Simbahan sa sayong bahin sa mga 1840. Sulod sa sobra sa katunga sa siglo, ang dinaghan nga kaminyoon gibuhat sa mga Santos sa Ulahing mga Adlaw ubos sa direksyon sa Presidente sa Simbahan” (“Plural Marriage in The Church of Jesus Christ of Latter-day Saints [Dinaghan nga Kaminyoon sa Ang Simbahan ni Jesukristo sa mga Santos sa Ulahing mga Adlaw],” Gospel Topics, lds.org/topics).

Usa ka Lisud nga Sugo

Si Eliza R. Snow (1804–87), ang ikaduha nga kinatibuk-ang presidente sa Relief Society, na-seal ngadto ni Propeta Joseph Smith. Girekord niya ang mosunod nga kasinatian diin si Propeta Joseph Smith mitudlo sa baruganan sa dinaghan nga kaminyoon ngadto sa iyang igsoon nga si Lorenzo Snow.

“Si Propeta Joseph Smith mipahungaw sa iyang gibati [ngadto ni Lorenzo Snow], ug mihulagway sa lisud nga pagsulay sa hunahuna nga iyang nasinati sa pagbuntog sa iyang ngil-ad nga mga pagbati, ang natural nga resulta sa gahum sa edukasyon ug sosyal nga pamatasan, kalabut sa pagpasiugda og dinaghan nga kaminyoon. Nasayud siya sa tingog sa Dios—nasayud siya nga ang sugo sa Labawng Makagagahum ngadto kaniya mao ang pagpadayon—sa pagpakita og ehemplo, ug pag-establisar sa Celestial nga dinaghan nga kaminyoon. Nasayud siya nga dili lamang ang iyang kaugalingong mga pagpihig ug kanhi mga pagsabut ang pakigbatukan ug buntugon, apan usab ang mga pagpihig sa tibuok Kristiyanong kalibutan; apan ang Dios, nga labaw sa tanan, mihatag sa sugo, ug Siya kinahanglan gayud nga sundon. Apan nagduha-duha ug naglangan-langan ang Propeta, hangtud nga ang usa ka anghel sa Dios mibarug duol kaniya nga naghulbot og espada, ug misulti kaniya nga, gawas kon mopadayon siya ug moestablisar sa dinaghan nga kaminyoon, ang iyang Priesthood pagakuhaon gikan kaniya ug siya pagalaglagon! Kini nga pagpamatuod wala lamang niya gisulti ngadto sa akong igsoon, apan usab ngadto sa uban—usa ka pagpamatuod nga dili malalis [masupak]” (Biography and Family Record of Lorenzo Snow [1884], 69–70).

Usa ka Pagsulay sa Pagtuo

Daghan sa nanlimbasug sa baruganan sa dinaghan nga kaminyoon napanalanginan og mapamatuorong espiritwal nga saksi sa kamatuoran sa baruganan.

“Sumala ni Helen Mar Kimball, mipahayag si Joseph Smith nga ‘ang pagbuhat niini nga baruganan mao ang pinakalisud nga pagsulay sa mga Santos sa ilang pagtuo.’ Bisan kon kini mao ang usa sa ‘pinakagrabe’ nga mga pagsulay sa iyang kinabuhi, mipamatuod siya nga kini usab mao ang ‘usa sa labing dako nga mga panalangin.’ …

“Si Lucy Walker mihinumdom sa kagubot nga iyang gibati sa kaugalingon sa dihang gidapit siya ni Joseph Smith nga mahimo niyang asawa. ‘Ang matag tipik sa akong kalag misupak niini,’ misulat siya. Bisan pa niana, human sa pipila ka gabii nga pag-ampo nga wala mahimutang, nakakaplag siya og kahupayan sa dihang ang iyang kwarto ‘napuno sa balaang impluwensya’ susama sa ‘masanag nga kahayag sa adlaw.’ Miingon siya, ‘Napuno ang akong kalag sa tam-is nga kalinaw nga wala nako masayri sukad’ ug ‘ang dakong kalipay mipuno sa akong tibuok nga pagkatawo’” (“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics).

Si Joseph Smith ug ang Dinaghan nga Kaminyoon

Daghan nga mga babaye ang gi-seal ngadto ni Joseph Smith, apan wala masayri ang tukmang gidaghanon.

“Atol sa panahon nga gibuhat ang dinaghan nga kaminyoon, ang mga Santos sa Ulahing mga Adlaw miila sa kalainan tali sa mga sealing alang sa karon ug sa kahangturan ug sa mga sealing alang lamang sa kahangturan. Ang mga sealing alang sa karon ug sa kahangturan naglakip sa mga pasalig ug mga relasyon niining kinabuhia, kasagaran lakip sa posibilidad sa sekswal nga relasyon. Ang mga sealing nga alang lamang sa kahangturan nagpasabut og mga pakigrelasyon nga alang lamang sa sunod nga kinabuhi.

“… Ang ubang mga babaye nga gi-seal ngadto ni Joseph Smith sa kadugayan mipamatuod nga ang ilang kaminyoon alang sa karon ug sa kahangturan, samtang ang uban miingon nga ang ilang pakigrelasyon alang lamang sa kahangturan.

“Kadaghanan sa gi-seal ngadto ni Joseph Smith anaa sa mga edad tali 20 ug 40 anyos sa panahon sa ilang pagka-seal ngadto kaniya. Ang kinamagulangan, si Fanny Young, 56 anyos ang panuigon. Ang kinamanghuran mao si Helen Mar Kimball, … kinsa gi-seal ngadto ni Joseph pipila ka bulan sa wala pa ang iyang ika-15 nga birthday. Ang kaminyoon sa ingon niana nga edad, dili angay sa mga sumbanan karong panahona, legal niana nga panahon, ug ang ubang mga babaye nagminyo sa mga tunga-tunga sa ilang pagkatin-edyer. Si Helen Mar Kimball naghisgot sa iyang pagka-seal ngadto ni Joseph isip ‘alang lamang sa kahangturan,’ nagsugyot nga ang relasyon wala maglakip og sekswal nga relasyon. …

“… Si Joseph Smith gi-seal ngadto sa pipila ka mga babaye nga naminyo na. Kini nga mga babaye ug si Joseph wala kaayo mopasabut mahitungod niini nga mga sealing, hinoon ang pipila sa mga babaye miingon nga alang lamang kadto sa kahangturan. Ang ubang mga babaye wala magbilin og rekord, nga dili na mahibaloan kon ang ilang mga sealing alang ba sa karon ug sa kahangturan o alang ba sa kahangturan lamang.

“Adunay pipila ka posible nga mga pagpasabut niini nga buhat. Kini nga mga sealing tingali nakahatag og paagi sa pagmugna og mahangturong relasyon o sumpay tali sa pamilya ni Joseph ug sa ubang mga pamilya diha sa Simbahan. Kini nga mga relasyon misumpay sa pabarug nga paagi, gikan sa ginikanan ngadto sa anak, ug sa pababag nga paagi, gikan sa usa ka pamilya ngadto sa lain. Karon ang ingon nga mahangturong mga bugkos maangkon pinaagi sa mga kaminyoon sa templo sa mga indibidwal nga na-seal usab ngadto sa ilang kaugalingong natawhan nga mga pamilya, sa ingon niini nagsumpay sa mga pamilya” (“Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics).

Human sa kamatayon sa Propeta, daghan nga mga babaye ang gi-seal ngadto kaniya nga walay mortal nga relasyon kaniya.

Oposisyon sa Dinaghan nga Kaminyoon

Daghan nga mga relihiyuso ug politikal nga mga lider sa Estados Unidos misupak sa sistema sa dinaghan nga kaminyoon, nga gikonsiderar nila nga imoral ug dili sibilisado. Ang mga Santos sa Ulahing mga Adlaw gitamay diha sa mga pakigpulong sa publiko, sa mga libro, mga magasin, ug mga pamantalaan. Ang Kongreso sa Estados Unidos mipasar og mga balaod nga naglimita sa kagawasan sa mga miyembro sa Simbahan ug naglisud-lisud sa Simbahan sa ekonomikanhong paagi pinaagi sa paglimita sa gidaghanon sa kabtangan nga mahimong mapanag-iya sa Simbahan. “Kini nga balaod nakapahimo sa mga opisyal sa pagdakop ug pagbilanggo sa mga lalaki kinsa adunay labaw sa usa ka asawa ug sa pagkuha kanila sa katungod sa pagbotar, sa katungod sa pagkapribado sa ilang mga panimalay ug sa pagtagamtam sa laing sibil nga mga kalingkawasan” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw [1996], 120). Pagka-1890, gatusan ka matinud-anon nga mga Santos sa Ulahing mga Adlaw nakagahin na og panahon sulod sa bilanggoan. Ang uban mitago aron makalikay sa pagkadakop ug pagkabilanggo. Niini nga mga kahimtang, daghang mga pamilya ang nag-antus sa kahasol, kagul-anan, kakabus, ug kagutom.

Bisan tuod ang kalibutan mibiay-biay kanila tungod sa pagbuhat sa dinaghan nga kaminyoon, daghan nga matinud-anong mga Santos sa Ulahing mga Adlaw mipanalipod sa binuhatan ug mipamatuod nga nasayud sila nga kini gipadayag sa Dios pinaagi ni Propeta Joseph Smith.

Kining lisud nga mga sirkumstansya nakapahimo ni Presidente Wilford Woodruff nga mainampoong magtinguha sa giya sa Ginoo mahitungod sa buhat sa mga Santos sa dinaghan nga kaminyoon. Niadtong 1889, si Presidente Woodruff misugo sa mga lider sa Simbahan sa paghunong sa pagtudlo sa baruganan sa dinaghan nga kaminyoon. Pagka-1890, diyutay ra kaayo nga dinaghan nga kaminyoon ang gipahigayon, ug kini gihimo nga supak sa tambag ni Presidente Woodruff. Hinoon, ang ubang mga tawo mimantala og mga report nga ang Simbahan nagpasiugda gihapon sa buhat sa dinaghan nga kaminyoon. Kini nga mga report midala og dugang nga oposisyon batok sa Simbahan. Sa Septyembre 1890, si Presidente Woodruff mihatag og usa ka Manipesto, nga karon nailhan isip Opisyal nga Pahayag 1 diha sa Doktrina ug mga Pakigsaad.

Ang Ikaduhang Manipesto

“Ang Manipesto [Opisyal nga Pahayag 1] mideklarar sa tuyo ni Presidente [Wilford] Woodruff nga monunot sa mga balaod sa Estados Unidos. Kini walay gisulti mahitungod sa mga balaod sa ubang mga nasud. Sukad sa pag-abli og mga kolonya sa Mexico ug sa Canada, ang mga lider sa Simbahan mipahigayon og mga dinaghan nga kaminyoon niadto nga mga nasud, ug human sa Oktubre 1890, ang dinaghan nga kaminyoon padayon nga gipahigayon sa hilum didto. … Ubos sa talagsaon nga mga kahimtang, adunay diyutay nga bag-ong dinaghan nga kaminyoon nga gipahigayon sa Estados Unidos tali 1890 ug 1904, bisan og dili klaro kon ang mga kaminyoon gitugutan ba nga ipahigayon sulod sa mga estado” (“The Manifesto and the End of Plural Marriage [Ang Manipesto ug ang Pagtapus sa Dinaghan nga Kaminyoon],” Gospel Topics, lds.org/topics).

“Sa Abril 1904 nga kinatibuk-ang komperensya, si Presidente [Joseph F.] Smith mipagawas og kusganong pamahayag, nga nailhan isip ang Ikaduhang Manipesto, nga naghimo sa bag-ong dinaghan nga mga kaminyoon nga masilutan pinaagi sa pagka-excommunicate” (“Plural Marriage in The Church of Jesus Christ of Latter-day Saints Ang Dinaghan nga Kaminyoon diha sa Ang Simbahan ni Jesukristo sa mga Santos sa Ulahing mga Adlaw],” Gospel Topics, lds.org/topics).