Pagpuli diha sa Kapangulohan

Sa hinapos nga bahin sa iyang kinabuhi, si Joseph Smith mitugyan sa mga yawe sa priesthood niini nga dispensasyon ngadto sa mga sakop sa Korum sa Napulog Duha ka mga Apostoles. Human sa pagkamartir sa Propeta, sa usa ka miting nga gipahigayon niadtong Agosto 8, 1844, daghan nga mga Santos ang nakadawat og espirituhanong pagpakita nga nagmatuod kanila nga si Brigham Young, kinsa mao ang Presidente sa Korum sa Napulog Duha ka mga Apostoles, mao ang mangulo sa Simbahan. Samtang ang mga estudyante makasabut sa mga baruganan nga may kalabutan sa pagpuli diha sa Kapangulohan sa Simbahan, sila makabaton og pagsalig nga ang Ginoo mipili ug miandam sa matag indibidwal nga nahimong Presidente sa Ang Simbahan ni Jesukristo sa mga Santos sa Ulahing mga Adlaw.

Background nga Basahunon

“Succession in the Presidency,” kapitulo 3 sa Teachings of the Living Prophets Student Manual (manwal sa Church Educational System, 2010), 28–41.
“The Twelve to Bear Off the Kingdom,” kapitulo 23 sa Church History in the Fulness of Times Student Manual, 2nd ed. (manwal sa Church Educational System, 2003), 286–96.
Brent L. Top ug Lawrence R. Flake, “‘The Kingdom of God Will Roll On’: Succession in the Presidency,” Ensign, Ago. 1996, 22–35.

Mga Sugyot alang sa Pagtudlo

Doktrina ug mga Pakigsaad 107:33; 112:30–32

Ang mga Apostoles naghupot sa mga yawe niini nga dispensasyon

Ipangutana ang mosunod:

Sa unsang paagi ang proseso sa pagpili og bag-ong Presidente sa Ang Simbahan ni Jesukristo sa mga Santos sa Ulahing mga Adlaw lahi sa paagi sa pagpili sa mga lider sa ubang mga organisasyon?

Pahibaloa ang mga estudyante nga kini nga leksyon mosusi sa pagbalhin sa pagpangulo sa Simbahan human sa kamatayon ni Propeta Joseph Smith. Ipasabut nga pipila ka tuig sa wala pa siya mamatay, ang Propeta nakadawat og mga pagpadayag mahitungod sa Unang Kapangulohan ug sa Korum sa Napulog Duha ka mga Apostoles. Hangyoa ang mga estudyante sa pagtuon sa Doktrina ug mga Pakigsaad 107:33 ug 112:30–32 nga mangita sa paghulagway sa Ginoo sa awtoridad sa priesthood nga gihuptan sa mga sakop sa Unang Kapangulohan ug sa Korum sa Napulog Duha.

Giunsa paghulagway sa Ginoo ang awtoridad sa Unang Kapangulohan ug sa Korum sa Napulog Duha ka mga Apostoles? (Siguroa nga nasabtan sa mga estudyante ang mosunod nga baruganan: Ang mga sakop sa Unang Kapangulohan ug Korum sa Napulog Duha ka mga Apostoles naghupot sa mga yawe sa priesthood niini nga dispensasyon, ug ang Napulog Duha naglihok ubos sa direksyon sa Unang Kapangulohan.)

Pag-apud-apod og kopya sa handout nga makita sa katapusan sa leksyon ngadto sa matag estudyante. Ipasabut nga gigahin ni Joseph Smith ang katapusang mga bulan sa iyang kinabuhi sa kanunay nga pakigmiting sa mga sakop sa Korum sa Napulog Duha ka mga Apostoles sa pag-andam kanila nga mangulo sa Simbahan. Ipabasa og kusog sa usa ka estudyante ang seksyon sa handout nga giulohan og “Miting uban sa Napulog Duha ka mga Apostoles, Marso 1844.” Sultihi ang mga estudyante nga usa kini ka mubo nga istorya sa usa ka miting nga gipahigayon ni Propeta Joseph Smith uban sa mga Apostoles ug ubang mga lider sa Simbahan, sumala sa pagsaysay ni Presidente Wilford Woodruff, kinsa usa ka Apostol nianang panahona. Human sa pagbasa, pangutana:

Sa unsang paagi kini nga pagtugyan sa mga yawe diha sa mga sakop sa Korum sa Napulog Duha ka mga Apostoles nakatabang sa pag-andam kanila alang sa panahon nga si Propeta Joseph Smith dili na uban kanila? (Ilang nadawat ang samang mga yawe sa priesthood nga gihuptan ni Propeta Joseph.)
Nganong importante man nga itugyan ni Joseph Smith kini nga mga yawe sa priesthood diha sa mga Apostoles sa dili pa siya mamatay? (Nianang higayuna, si Joseph Smith lamang ang naghupot sa tanang mga yawe sa priesthood niini nga dispensasyon. Kon wala niya matugyan kini nga mga yawe ngadto sa uban, niana ang mga anghel kinahanglang moanhi na usab sa yuta aron sa pagpahiuli niini.)

Doktrina ug mga Pakigsaad 124:127–28

Si Brigham Young mipuli ni Joseph Smith isip Presidente sa Simbahan

Ipasabut nga sa dihang ang Korum sa Napulog Duha ka mga Apostoles unang giorganisar niadtong 1835, ang han-ay sa seniority i-determinar pinaagi sa edad. Si Thomas B. Marsh, kinsa gituohan nianang panahona nga mao ang kinatigulangan nga Apostol, gikonsiderar nga senior nga Apostol (nasayran human niana nga si David W. Patten sa pagkatinuod mao ang kinatigulangan nga Apostol).

Hangyoa ang usa ka estudyante sa pagbasa og kusog sa Doktrina ug mga Pakigsaad 124:127–28. Ipasabut nga niadtong Oktubre 1838, si Presidente Marsh mi-apostasiya ug mibiya sa Simbahan ug si David W. Patten namatay. Si Brigham Young niana nahimong senior nga Apostol, sama sa gipasabut niini nga mga bersikulo. Human sa inisyal nga pagpili sa mga Apostoles ug nagpadayon hangtud karon, ang seniority diha sa Korum sa Napulog Duha ka mga Apostoles gideterminar pinaagi sa petsa sa pag-orden.

Ipasabut nga dihang si Joseph ug Hyrum Smith gimartir niadtong Hunyo 27, 1844, ang Napulog Duha, gawas ni John Taylor ug Willard Richards, didto sa silangan nga bahin sa Estados Unidos nagserbisyo og misyon. Sulod sa tulo ka semana, hinoon, ang tanang mga Apostoles nahibalo sa makaguol nga balita ug nagdali nga mibalik sa Nauvoo. Sa pag-abut sa mga Apostoles, nakita nila ang kalibug tali sa mga miyembro sa Simbahan kon si kinsa ang mangulo sa Simbahan. Ang uban nga mga miyembro sa Simbahan nagtuo nga ang pagpangulo angay nga maanaa sa Korum sa Napulog Duha ka mga Apostoles. Sa misunod nga mga bulan, pipila ka mga tawo nangangkon nga aduna silay katungod sa pagpangulo sa Simbahan. Hangyoa ang duha ka mga estudyante sa pagbasa og kusog sa mga seksyon sa handout nga giulohan og “Ang Pangangkon ni Sidney Rigdon” ug “Ang Pangangkon ni James Strang.” Samtang maminaw ang klase, dapita sila sa paghunahuna mahitungod sa mga kabalaka nga tingali ilang bation bahin niini nga mga pagpangangkon kon didto pa sila sa Nauvoo nianang panahona.

I-follow up pinaagi sa pagpangutana sa mga estudyante:

Nganong ang mga pangangkon nga gihimo niining mga tawhana dili lehitimo? (Mahimo nimong ipasabut nga bisan tuod si Sidney Rigdon sakop sa Unang Kapangulohan, wala itugyan ni Joseph ang mga yawe sa priesthood nganha kaniya.)

Dapita ang usa ka estudyante sa pagbasa og kusog sa seksyon sa handout nga giulohan og “Agosto 7, 1844.” Hisguti ang mosunod nga pangutana ngadto sa klase:

Nganong ang pagpamatuod ni Brigham Young kabahin sa mga yawe sa pagka-apostol importante? (Human makatubag ang mga estudyante, isulat sa pisara ang mosunod nga doktrina: Ang mga Apostoles naghupot sa tanang mga yawe sa priesthood nga gikinahanglan sa pagdumala sa Simbahan.)

Dapita ang usa ka estudyante sa pagbasa og kusog sa seksyon sa hangout nga giulohan og “Agosto 8, 1844, 10:00 A.

Sa unsang paagi ang Ginoo mipanalangin sa mga Santos aron mahibalo kinsay Iyang gitudlo nga mangulo sa Simbahan?
Unsaon nato sa pagkahibalo nga ang mga lider sa Simbahan karon gitawag sa Dios? (Human makatubag ang mga estudyante, isulat ang mosunod nga baruganan diha sa pisara: Pinaagi sa Espiritu Santo, makadawat kita og usa ka pagsaksi nga kadtong mangulo sa Simbahan gitawag sa Dios.)
Kanus-a kamo mibati sa Espiritu nga misaksi kaninyo nga ang Presidente sa Simbahan karon gitawag sa Dios?

Ipasabut nga atol sa miting nga gipahigayon sa alas 2:00 sa hapon sa Agosto 8, si Brigham Young ug ang ubang mga Apostoles namulong. Ipabasa og kusog sa usa ka estudyante ang seksyon sa handout nga giulohan og “Agosto 8, 1844, 2:00 P.

Ipasabut nga sa dihang namatay si Joseph Smith, si Brigham Young, isip senior nga Apostol, diha dayon nakahimo sa paggamit sa tanang mga yawe sa priesthood. Sulod sa sobra tulo ka tuig human sa pagkamartir sa Propeta, ang Korum sa Napulog Duha ka mga Apostoles mao ang nagdumala sa Simbahan, ubos sa direksyon ni Brigham Young. Dayon niadtong Disyembre 5, 1847, si Brigham Young gipaluyohan isip Presidente sa Simbahan ug ang Unang Kapangulohan giorganisar pag-usab.

Si Sidney Rigdon mibalhin sa Pittsburgh, Pennsylvania, ug miorganisar sa Simbahan ni Jesukristo nga adunay mga apostoles, mga propeta, mga pari, ug mga hari. Kini nga simbahan nahunong pagka-1847. Ug bisan tuod ang mga pangangkon ni James Strang sa kapangulohan sayop, tulo sa kanhi Napulog Duha ka mga Apostoles—si William E. McLellin, John E. Page, ug William Smith—misuporta kaniya. Si Strang gipatay niadtong 1856 sa naglagot nga mga sumusunod.

Aron matabangan ang mga estudyante nga makasabut sa proseso sa pagpuli diha sa Kapangulohan sa Simbahan karon, i-display ang mosunod nga pamahayag ni Presidente Boyd K. Packer sa Korum sa Napulog Duha ka mga Apostoles mahitungod sa nahitabo human sa kamatayon ni Presidente Gordon B. Hinckley. Hangyoa ang usa ka estudyante sa pagbasa og kusog sa pamahayag:

“Walay pangutana kon unsay buhaton, walay pagduhaduha. Nasayud kita nga ang senior nga Apostol mao ang Presidente sa Simbahan. Ug niana nga sagrado nga miting, si Thomas Spencer Monson gipaluyohan sa Korum sa Napulog Duha Ka mga Apostoles isip Presidente sa Simbahan. … Karon, sumala sa gisulti sa mga kasulatan, siya lamang ang bugtong tawo sa yuta kinsa adunay katungod sa paggamit sa tanang mga yawe. Apan kaming tanan naghupot niini isip mga Apostoles. Adunay usa ka tawo kanamo nga gitawag ug giordinahan, ug siya nahimong Presidente sa Ang Simbahan ni Jesukristo sa mga Santos sa Ulahing mga Adlaw” (“Ang Napulog Duha,” Liahona, Mayo 2008, 83).

Human mamatay ang Presidente sa Simbahan, kinsa man kanunay ang mahimong sunod nga Presidente sa Simbahan? (Ang senior nga Apostol, nga mao ang Presidente sa Korum sa Napulog Duha ka mga Apostoles.)

Ang ubang mga estudyante tingali maghunahuna kon kanus-a nadawat sa Presidente sa Simbahan ang mga yawe nga gikinahanglan sa pagdumala sa Simbahan. Ipasabut nga ang matag Apostol gihatagan sa tanang mga yawe dihang una siyang giordinahan isip Apostol. Hangyoa ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley (1910–2008):

“Apan ang awtoridad sa paggamit niana nga mga yawe anaa ra sa Presidente sa Simbahan. Sa iyang pagkamatay, kana nga awtoridad magamit na sa senior nga Apostol, kinsa dayon pangalanan, i-set apart, ug i-orden nga propeta ug Presidente pinaagi sa iyang mga kaubanan sa Konseho sa Napulog Duha” (Come and Partake,” Ensign, Mayo 1986, 47).

Unsay inyong mga pagbati samtang inyong maamguhan nga ang gingharian sa Ginoo dinhi sa yuta mopadayon nga wala kaayoy pagkabalda human sa kamatayon sa Presidente sa Simbahan?

Mahimo nimong tapuson kini nga leksyon pinaagi sa pagpamatuod nga ang sama nga mga yawe ug gahum sa priesthood nga gitugyan ni Joseph Smith diha ni Brigham Young ug sa mga sakop sa Korum sa Napulog Duha ka mga Apostoles gihuptan karon sa Presidente sa Simbahan, sa iyang mga Magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles. Mahimo usab nimong ipaambit kon giunsa nimo pagkaangkon sa imong pagpamatuod nga ang mga lider sa Simbahan gitawag sa Dios. Dapita ang mga estudyante nga mainampoong magtinguha sa pag-angkon o paglig-on sa ilang mga pagpamatuod sa mga kamatuoran nga ilang nahisgutan karon.

Mga Basahunon sa Estudyante

Doktrina ug mga Pakigsaad 107:33; 112:30–32; 124:127–28.
Boyd K. Packer, “Ang Napulog Duha,” Liahona, Mayo 2008, 83–87.
“The Twelve to Bear Off the Kingdom,” kapitulo 23 sa Church History in the Fulness of Times Student Manual, 2nd ed. (manwal sa Church Educational System, 2003), 286–96.

Pagpuli diha sa Kapangulohan sa Simbahan

Mga Pundasyon sa Pagpahiuli—Leksyon 23

Miting uban sa Napulog Duha ka mga Apostoles, Marso 1844

Si Presidente Wilford Woodruff (1807–98) mihinumdom:

Nakahinumdom ako sa katapusan nga pagpamulong nga sukad gihatag [ni Joseph Smith] diri kanamo sa wala pa siya mamatay. … Nagbarug siya sulod sa mga tulo ka oras. Ang kwarto napuno og ingon sa nagaut-ut nga kalayo, ang iyang nawong tin-aw nga masanag, ug siya gisul-uban sa gahum sa Dios. Siya mipasabut kanamo sa among mga katungdanan. Siya mipasabut kanamo sa kahingpitan niining mahinungdanon nga buluhaton sa Dios; ug sa iyang pagpamulong kanamo siya miingon: ‘Akong gisilyo dinhi sa akong ulo ang matag yawe, matag gahum, matag baruganan sa kinabuhi ug kaluwasan nga sukad gihatag sa Dios ngadto sa tawo kinsa nakapuyo sa ibabaw niini nga yuta. Ug kini nga mga baruganan ug kini nga Priesthood ug gahum nahilakip niining mahinungdanon ug katapusan nga dispensasyon diin ang Dios sa Kalangitan miandam sa Iyang mga kamot sa pag-establisar dinhi sa kalibutan. Karon,’ miingon siya ngadto sa Napulog Duha, ‘Akong gisilyo diha sa inyong mga ulo ang matag yawe, matag gahum, ug ang matag baruganan diin ang Ginoo misilyo diri sa akong ulo.’ …

“Human namulong ngari kanamo sa ingon niini nga paagi miingon siya: ‘Sultihan ko kamo, ang palas-anon sa gingharian anaa na karon sa inyong mga abaga; ilibut kini ninyo sa tibuok kalibutan’” (gikutlo diha sa Mga Pagtulun-an sa mga Presidente sa Simbahan: Joseph Smith [2007], 645–646).

Ang Pangangkon ni Sidney Rigdon

Si Sidney Rigdon, Unang Magtatambag sa Unang Kapangulohan, miabut sa Nauvoo gikan sa Pittsburgh, Pennsylvania, niadtong Agosto 3, 1844. Mipatawag siya og usa ka espesyal nga miting nga ipahigayon sa Martes, Agosto 6, aron ang mga miyembro sa Simbahan makapili og usa ka tigbantay sa Simbahan. Daw masabut nga naningkamot si Sidney Rigdon sa pagpahigayon niini nga miting aron ang mga miyembro sa Simbahan mokumpirma sa iyang posisyon isip tigbantay sa Simbahan sa dili pa makabalik ang tanang Napulog Duha ka mga Apostoles gikan sa ilang mga misyon sa silangan nga bahin sa Estados Unidos. Maayo gani, tungod sa mga paningkamot ni Elder Willard Richards ug Elder Parley P. Pratt, gibalhin ang miting ngadto sa Huwebes, Agosto 8, 1844, diin niini nga panahon kadaghanan sa mga Apostoles nakabalik na sa Nauvoo.

Si Sidney Rigdon nangangkon nga tungod kay siya kaniadto gitawag ug gi-orden isip tigpama-ba ni Joseph Smith (tan-awa sa D&P 100:9), iyang responsibilidad ang “pagsiguro nga ang simbahan gidumala sa tukma nga paagi” (sa History of the Church, 7:229).

Pangangkon ni James Strang

Human sa pagkamatay ni Joseph Smith, si James Strang, kinsa nabunyagan niadtong Pebrero 1844, nangangkon nga nakadawat og sulat gikan ni Joseph Smith nga nag-ingon nga si Joseph mitudlo ni Strang isip iyang puli. Ang sulat usa ka minao-mao, apan daw naglakip kini sa pirma ni Joseph Smith, ug nakalingla kini sa pipila ka mga miyembro sa Simbahan dihang gipakita kini ni Strang kanila. Si Strang miingon usab nga giduaw siya sa usa ka anghel, kinsa mihatag kaniya og mga yawe.

Agosto 7, 1844

Ang mga Elder nga si John Taylor, Willard Richards, Parley P. Pratt, ug George A. Smith anaa na sa Nauvoo sa dihang miabut si Sidney Rigdon. Ang kadaghanan sa ubang mga apostoles, lakip ni Brigham Young, nakauli sa Nauvoo sa gabii sa Agosto 6, 1844. Pagkasunod adlaw, Agosto 7, ang mga Apostoles nagtagbo isip konseho sa balay ni John Taylor. Sa wala madugay nianang hapona, ang Napulog Duha ka mga Apostoles, ang high council, ug ang mga high priest nag-abut. Si Presidente Young mihangyo ni Sidney Rigdon sa pagsulti sa iyang mensahe ngadto sa mga Santos. Si Sidney Rigdon maisugong mipahayag nga nakakita siya og panan-awon ug nga walay tawo nga makapuli ni Joseph Smith isip Presidente sa Simbahan. Misugyot dayon siya nga itudlo siya isip tigbantay sa katawhan.

Human matapos si Sidney Rigdon sa iyang pakigpulong, si Brigham Young (1801–77) miingon:

“Wala koy panginlabot kon si kinsa ang mangulo sa simbahan, … apan usa ka butang nga kinahanglan nakong mahibaloan, ug mao kana kon unsay gisulti sa Dios mahitungod niini. Aduna ako sa mga yawe ug sa mga paagi sa pag-angkon sa hunahuna sa Dios kalabut niini. …

“Si Joseph mitugyan dinhi sa among mga ulo sa tanang mga yawe ug mga gahum nga nahilakip sa pagka Apostoles diin iya usab mismo nga gihuptan sa wala pa siya kuhaa, ug walay tawo o pundok sa katawhan nga makapanghilabot ni Joseph ug sa Napulog Duha niini nga kalibutan o sa kalibutan nga moabut.

“Unsa ka makanunayon si Joseph nga moingon ngadto sa Napulog Duha, ‘ako na nga gitukod ang pundasyon ug kamo motukod gikan niini, kay diha sa inyong mga abaga nag-agad ang gingharian’” (sa History of the Church, 7:230).

Agosto 8, 1844, 10:00 A.M.

Niadtong Agosto 8, 1844, ang mga Santos sa Nauvoo nagpundok pagka-alas 10:00 sa buntag aron maminaw ni Sidney Rigdon nga mohimo sa iyang pangangkon isip tigbantay sa Simbahan. Namulong siya ngadto sa liboan nga nagpundok nga mga Santos sulod sa usa ka oras ug tunga, mipasabut nganong kinahanglang siya ang tigbantay sa Simbahan. Pipila ka mga tawo mihulagway sa iyang pakigpulong nga dili makadasig.

Si Presidente Brigham Young namulong kadiyot ug miingon nga mas palabihon unta niya nga mobalik sa Nauvoo aron magbangutan alang sa Propeta kay sa motudlo og bag-ong lider. Gipahibalo niya nga usa ka panagtigum sa mga lider ug mga miyembro ipahigayon unya nianang adlawa sa alas 2:00 sa hapon. Pipila ka mga miyembro sa Simbahan sa kaulahian mipamatuod nga samtang namulong si Brigham Young, ilang nakita ang iyang panagway nga nausab ug nadungog ang iyang tingog nga nausab, ug nakuha niya ang panagway ug tingog ni Propeta Joseph Smith.

Si Emily Smith Hoyt nahinumdom: “Ang paagi sa pagpangatarungan, ang ekspresyon sa nawong, ang tono sa tingog nakalipay sa tibuok nakong kalag. … Nasayud ko nga patay na si Joseph. Apan nakugang ako kanunay ug wala tuyoa nga motan-aw sa atubangan aron makita kon dili ba kadto si Joseph. Dili, si Brigham Young kadto” (gikutlo diha sa Lynne Watkins Jorgensen, “The Mantle of the Prophet Joseph Passes to Brother Brigham: A Collective Spiritual Witness,” BYU Studies, vol. 36, nu. 4 [1996–97], 142).

Si Wilford Woodruff misulat, “Kon wala pa ko makakita niya sa kaugalingon nakong mga mata, walay usa nga makakombinser nako nga dili kadto si Joseph Smith, ug makapamatuod niini si bisan kinsa nga sinati niining duha ka tawo” (sa History of the Church, 7:236).

Agosto 8, 1844, 2:00 P.M.

Sa alas 2:00 sa hapon, liboan ka mga Santos nagpundok alang sa unsay ilang nahibaloan nga importante nga miting. Si Brigham Young walay lipud-lipod nga namulong kabahin sa gisugyot nga pagkahimong tigbantay ni Sidney Rigdon ug sa dili mahigalaong kinaiya ni Sidney Rigdon kang Joseph Smith sa miaging duha ka tuig ug dayon miingon:

“Kon gusto sa mga tawo nga si Presidente Rigdon ang mangulo kanila mahimo silang mosunod kaniya; apan moingon ko kaninyo nga ang Korum sa Napulog Duha naghupot sa mga yawe sa gingharian sa Dios sa tibuok kalibutan.

“Ang Napulog Duha gitudlo pinaagi sa tudlo sa Dios. Ania si Brigham, nagpanuko ba siya sa pagbuhat sa unsay gisugo kaniya? Namakak ba siya sukad? Ania si Heber [C. Kimball] ug ang tibuok Napulog Duha, usa ka independente nga grupo kinsa nagbaton sa mga yawe sa priesthood—sa mga yawe sa gingharian sa Dios nga ihatud sa tibuok kalibutan: kini mao ang tinuod, busa tabangi ako Dios. Nagsunod sila ni Joseph, ug sama sa Unang Kapangulohan sa Simbahan” (sa History of the Church, 7:233).

Daghang mga Santos ang mikomentaryo nga si Brigham Young makita ug madungog nga sama ni Joseph Smith samtang namulong siya nianang hapona. Agi og dugang niini nga milagro, daghan usab sa mga Santos ang mibati sa Espiritu Santo nga misaksi kanila nga si Brigham Young ug ang Korum sa Napulog Duha gitawag sa Dios aron mangulo sa Simbahan. Sa pagtapos niini nga miting, ang mga Santos sa Nauvoo nagkahiusang miboto sa pagpaluyo sa Korum sa Napulog Duha ka mga Apostoles, diin si Brigham Young ang ilang pangulo, aron mogiya sa Simbahan. Hinoon, dili tanang miyembro sa Simbahan ang mipili sa pagsunod sa mga Apostoles sa katapusan. Pipila sa mga tawo mipili hinoon sa pagsunod sa mga indibidwal sama ni Sidney Rigdon ug James Strang, kinsa mihimo og ilang kaugalingon nga mga simbahan.