Pangita sa Kamatuoran

Pasiuna

Ang mga anak sa Dios giawhag nga “[mangita sa pagtulun-an, … pinaagi sa pagtuon ug usab pinaagi sa hugot nga pagtuo” (D&P 88:118). Ang pagsunod niini nga sundanan motabang sa mga indibidwal nga mahimong takus alang sa tabang sa Espiritu Santo sa proseso sa pagkat-on. Karon, ang Internet ug ubang mga kapanguhaan naghatag og daghang impormasyon—ang uban tinuod, ang uban sayop, ug ang uban makalingla—kabahin sa doktrina ug kasaysayan sa Simbahan, ug sa posisyon niini sa sosyal nga mga isyu, nga naghimong importante kaayo alang kanato nga mosalig sa Espiritu Santo sa pagtabang kanato nga makaila sa kamatuoran gikan sa sayop. Ang pagkat-on sa pag-ila ug sa paggamit sa tukma nga mga tinubdan sa impormasyon usa ka bahin niini nga proseso.

Background nga Basahunon

Dieter F. Uchtdorf, “What Is Truth?” (debosyonal sa Church Educational System, Ene. 13, 2013), lds.org/broadcasts.
“Gospel Learning,” Gospel Topics, lds.org/topics.

Mga Sugyot alang sa Pagtudlo

Doktrina ug mga Pakigsaad 88:118, 121–26

Usa ka sundanan alang sa pagkat-on

Basaha og kusog ang mosunod nga paghulagway sa Tulunghaan sa mga Propeta nga gipahigayon sa Kirtland, Ohio:

“Niadtong 1833, ang Propeta ug usa ka pundok sa mga Santos sa Kirtland adunay talagsaon nga kahigayunan sa pagtuon sa ebanghelyo. Sa Enero niadtong tuiga aron pagsunod sa sugo sa Ginoo (tan-awa sa D&P 88:127–41), ang Propeta nag-organisar og Tulunghaan sa mga Propeta aron pagbansay sa mga naghupot sa priesthood alang sa ilang buluhaton sa pagpangalagad ug aron pag-andam kanila sa pagsangyaw sa ebanghelyo. Ang eskwelahan didto mahimutang sa kwarto sa ikaduhang andana sa tindahan ni Newel K. Whitney, diin nagpuyo ang Propeta. Duol sa 25 ka kaigsoonan ang mitambong, ang uban mibiyahe og gatosan ka mga kilometro alang sa kahigayunan sa pagtuon sa ebanghelyo sulod sa kwarto nga dili mosubra sa gidak-on nga 11 por 14 ka pye. Kadaghanan niining mga tawhana sa ngadto-ngadto nangahimong mga Apostoles, mga Seventy, ug ang uban mga lider sa Simbahan. Bisan ang Propeta ug ang ubang kaigsoonan usahay magtuon og pinulungan, giuna nila pagpunting nga makakat-on sa mga doktrina sa ebanghelyo, makugihong nagpadayon sa ilang mga pagtuon gikan sa sayo sa buntag hangtud sa hapon na kaayo. Kini nga pag-eskwela milungtad og upat ka bulan, ug pareho nga mga eskwelahan sa wala madugay gihimo sa Kirtland ug mao usab sa Missouri, diin gatusan ka mga tawo ang mitambong” (Mga Pagtulun-an sa mga Presidente sa Simbahan: Joseph Smith [2007], 315–316).

Ipasabut nga ang Doktrina ug mga Pakigsaad 88 naglangkob og mga instruksyon gikan sa Ginoo ngadto niadtong moapil sa Tulunghaan sa mga Propeta. Dapita ang mga estudyante nga hilum nga mobasa sa Doktrina ug mga Pakigsaad 88:118, nga mangita sa sundanan sa pagkat-on nga giestablisar sa Ginoo. Dayon hisguti ang mosunod nga mga pangutana:

Unsa kahay gipasabut sa “pangitaa ang pagtulun-an, … pinaagi sa pagtuon ug usab pinaagi sa hugot nga pagtuo”?
Sa unsang mga paagi nga ang pagsunod niini nga sundanan makadugang sa atong abilidad sa pagkat-on? (Ang mga estudyante mahimong mohatag og lain-laing mga tubag, apan siguroa nga maklaro nga kon atong ilakip ang hugot nga pagtuo diha sa proseso sa pagkat-on, kita mahimong sarang alang sa tabang sa Ginoo.)

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 88:121–26, nga nagrekord sa dugang nga panudlo gikan sa Ginoo ngadto sa Tulunghaan sa mga Propeta. Hangyoa ang klase sa pagsunod, nga mangita og mga baruganan nga makatabang kanato nga makasabut unsaon sa pagkat-on pinaagi sa hugot nga pagtuo. Mahimo nimong isugyot nga markahan sa mga estudyante ang ilang mga nakit-an. Ikonsiderar ang paglista sa pisara niini nga mga baruganan samtang mopaambit niini ang mga estudyante. Mahimo usab nimong isugyot nga isulat sa mga estudyante ang mga pulong nga “mga baruganan nga nagtudlo unsaon sa pagkat-on pinaagi sa hugot nga pagtuo” diha sa margin sa ilang mga kasulatan tapad niini nga mga bersikulo. (Pahinumdom: Ang paghimo og mga mugbong sulat diha sa mga margin sa mga kasulatan makatabang sa mga estudyante nga mas sayon nga makapangita ug makahinumdom og importanting mga baruganan.) Kon adunay panahon, mahimo ka nga mohangyo sa mga estudyante sa pagsiksik sa Alma 32:28, 41–43 ug Juan 7:17 alang sa dugang nga mga baruganan.

Sa unsang paagi ang pagsunod sa mga baruganan nga gitudlo niini nga mga bersikulo makatabang kanato nga makakat-on pinaagi sa pagtuon ug pinaagi sa hugot nga pagtuo? (Samtang motubag ang mga estudyante, mahimo nimong ipasabut og maayo nga ang pagsunod niini nga mga baruganan makatabang nato nga mahimong takus sa tabang sa Espiritu.)
Kon mahimo kitang takus sa pagbaton sa Espiritu sa Ginoo uban kanato, sa unsang paagi kini nga Espiritu makaapekto sa atong pagpangita sa kamatuoran?

Doktrina ug mga Pakigsaad 91:1–6

Pag-ila sa kamatuoran gikan sa sayop

I-display ang mosunod nga pamahayag ni Presidente Dieter F. Uchtdorf sa Unang Kapangulohan, ug dapita ang usa ka estudyante sa pagbasa niini og kusog:

“Wala pa sukad sa kasaysayan sa kalibutan nga duna kitay mas sayon nga access sa daghang impormasyon—ang uban niini tinuod, ang uban dili tinuod, ug ang kadaghanan tinuod sa ubang bahin.

“Agi og sangputanan, wala pa sukad sa kasaysayan sa kalibutan nga mas importante ang pagkat-on unsaon nga hustong makaila tali sa kamatuoran ug sayop” (“What Is Truth?” [debosyonal sa Church Educational System, Ene. 13, 2013], 3, lds.org/broadcasts).

Unsa ang posibling mga sangputanan kon dili kita makakat-on sa pag-ila tali sa kamatuoran ug sayop?

Isulat sa pisara ang mosunod nga pangutana:

Sa unsang paagi kita tukma nga makaila tali sa kamatuoran ug sayop?

Ipasabut nga ang pinadayag nga narekord diha sa Doktrina ug mga Pakigsaad 91 mitudlo ni Joseph Smith kon unsaon sa pag-ila kon ang usa ka butang nga iyang gibasa diha sa Apokripa tinuod. Hangyoa ang usa ka estudyante sa pagbasa og kusog sa ulohan sa seksyon 91 samtang magsunod ang klase. Dayon hangyoa ang mga estudyante sa pagkonsiderar sa pangutana diha sa pisara samtang magtuon sila sa Doktrina ug mga Pakigsaad 91 isip tibuok klase.

Ipasabut nga ang Apokripa usa ka koleksyon sa sagradong mga libro sa katawhan nga Judeo. Kini nga mga libro wala orihinal nga malakip sa Hebreohanon nga Biblia (Daang Tugon) apan nalakip diha sa Gresyanhon nga hubad sa Biblia sa wala pa ang panahon ni Kristo. Diha nga ang nag-unang mga Kristiyano mihugpong sa mga libro sa Biblia paglabay sa mga siglo, gilakip nila ang mga libro sa Apokripa isip usa ka appendix. Ang ubang Kristiyano nga mga relihiyon mikonsiderar sa mga basahon sa Apokripa isip kasulatan, apan ang ubang mga relihiyon dili motuo nga kini dinasig nga mga sinulat. Ang kopya sa Biblia nga gigamit ni Joseph Smith sa paghimo sa iyang dinasig nga hubad naglakip sa Apokripa. Nangutana si Joseph sa Ginoo kon ang iyang hubad sa Biblia kinahanglan ba nga maglakip niini nga mga libro.

Dapita ang usa ka estudyante sa pagbasa og kusog sa Doktrina ug mga Pakigsaad 91:1–3.

Unsa man ang nakat-unan ni Joseph Smith mahitungod sa Apokripa? (Tingali kinahanglan nimong ipasabut nga ang interpolation [pagdugang] mao ang materyal nga gipasukip diha sa usa ka manuskrito, nga usahay moresulta sa pagkadaut sa orihinal nga teksto.)

Dapita ang laing estudyante sa pagbasa og kusog sa Doktrina ug mga Pakigsaad 91:4–6.

Sa unsang paagi ang tambag sa mga bersikulo 4–6 makatabang kanato sa pag-ila sa kamatuoran gikan sa sayop ug sa pagtimbang-timbang sa pagkamasaligan sa unsay atong gibasa? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga kamatuoran: Ang Espiritu Santo makatabang nato nga masayud kon ang mga butang nga atong gibasa tinuod ba.)

Ipasabut nga ang kadaghan sa impormasyon nga anaa sa Internet nakamugna og nagkadako nga panginahanglan sa matag usa kanato nga makabaton sa espiritwal nga gasa sa pag-ila (tan-awa sa D&P 46:23) aron masayud kita kon unsaon nga tukmang makaila sa kamatuoran gikan sa sayop. (Alang sa dugang nga impormasyon kon nganong ang gasa sa pag-ila importante kaayo sa atong kinabuhi, tan-awa sa artikulo ni Elder David A. Bednar nga “Dali nga Makaobserbar,” Liahona, Dis. 2006, 15–20.)

Hatagi ang matag estudyante og kopya sa mosunod nga pamahayag ni Elder Steven E. Snow sa Seventy. Dapita ang mga estudyante sa pagsiksik sa unang duha ka mga paragraph alang sa tambag nga gihatag ni Elder Snow kabahin sa pagtimbang-timbang sa impormasyon nga tingali atong mabasahan mahitungod sa kasaysayan ug mga pagtulun-an sa Simbahan.

Tungod kay kinahanglan natong timbang-timbangon pag-ayo kon masaligan ba ang mga tinubdan sa impormasyon kabahin sa kasaysayan ug mga pagtulun-an sa Simbahan, unsaon ninyo sa paggamit ang mga pagtulun-an ni Elder Snow aron sa pagtabang kaninyo nga matimbang-timbang ang pagkamasaligan sa usa ka butang nga inyong gibasa mahitungod sa Simbahan?

Dapita ang mga estudyante nga basahon sa hilum ang ikatulong paragraph sa pamahayag ni Elder Snow. Dayon hisguti ang mosunod nga pangutana:

Sa unsang paagi makatabang ang tambag ni Elder Snow kon makasugat kamo og impormasyon nga mosumpaki sa inyong mga gituohan?

Pagpabiling matinud-anon kon motumaw ang mga pangutana

Ipasabut nga ang mga miyembro sa Simbahan usahay adunay mga pangutana o gani pagduha-duha mahitungod sa doktrina, kasaysayan, o posisyon sa Simbahan kabahin sa sosyal nga mga isyu. Ipaambit ang mosunod nga pamahayag ni Presidente Dieter F. Uchtdorf sa imong mga estudyante:

“Natural lang nga dunay mga pangutana—ang gamayng liso sa matinuorong pangutana sagad mogitib ug mohingkod sa pagkadakong kahoy sa panabut. Dunay pipila ka miyembro sa Simbahan kinsa, sa usa ka higayon, wala makasulay og seryuso o sensitibong mga pangutana. Usa sa mga katuyoan sa Simbahan mao ang pag-alima ug pag-ugmad sa liso sa pagtuo—bisan sa balason nga yuta sa pagduha-duha ug kawalay kasiguroan” (“Dali, Pakig-uban Kanamo,” Liahona, Nob. 2013, 23).

Hatagi ang matag estudyante og kopya sa handout nga “Pag-ila sa Kamatuoran gikan sa Sayop,” nga naglakip sa tambag gikan sa mga lider sa Simbahan alang niadtong adunay mga pangutana o mga pagduha-duha. Dapita ang mga estudyante nga hilum nga mobasa sa mga pamahayag diha sa handout ug sa pag-ila sa mga baruganan nga makatabang sa usa ka tawo sa pag-atubang sa mga pangutana o pagduha-duha sa matinud-anon nga paagi. Human sa igong panahon, dapita ang mga estudyante sa pagpasabut kon sa unsang paagi ang usa ka butang nga ilang nabasa diha sa handout makatabang og tawo nga adunay pangutana o pagduha-duha mahitungod sa doktrina, kasaysayan, o posisyon sa Simbahan sa sosyal nga mga isyu.

Sa imong pagtapos sa leksyon, ipasabut og maayo nga bisan og adunay mga pangutana nga dili kita makakita og mga tubag sa panahon sa atong pagpakabuhi, makakita kita og mga tubag sa atong labing importanting mga pangutana kon mosunod kita sa mga sugo, magtuon sa tukma nga mga kapanguhaan og impormasyon—ilabi na sa mga pulong sa buhi nga mga propeta—magtinguha og giya pinaagi sa pag-ampo, ug mopakita og pailub ug hugot nga pagtuo.

Dapita ang mga estudyante sa pagpaambit og mga kasinatian nga aduna sila sa dihang gibati nila ang tabang sa Ginoo nga naggiya kanila sa pagpangita sa kamatuoran ug mga tubag sa ilang mga pangutana.

Awhaga ang mga estudyante sa pagribyu sa mga pamahayag diha sa handout, ug dapita sila sa pagsunod sa tambag gikan sa leksyon nga magtinguha sa pagkat-on pinaagi sa pagtuon ug pinaagi sa hugot nga pagtuo.

Mga Basahunon sa Estudyante

Doktrina ug mga Pakigsaad 88:118–26; 91:1–6.
Dieter F. Uchtdorf, “What Is Truth?” (debosyonal sa Church Educational System, Ene. 13, 2013), lds.org/broadcasts.
David A. Bednar, “Dali nga Makaobserbar,” Liahona, Dis. 2006, 15–20.

Pag-ila sa Kamatuoran gikan sa Sayop

Mga Pundasyon sa Pagpahiuli—Leksyon 10

Sa tanang mga dispensasyon sa ebanghelyo, ang mga pwersa sa dautan misupak sa Dios ug sa Iyang buhat. Apan ang buluhaton sa Dios dili makawang. Niining ulahing mga adlaw, ang bato gipikas na gikan sa bukid, ug kini “mokaylap, hangtud kini mopuno sa tibuok yuta” (D&P 65: 2). Hinoon, tungod kay ang indibidwal nga mga miyembro sa Simbahan mahimong mailad, ang matag usa kanato kinahanglan nga “magbantay ug mag-ampo kanunay” (3 Nephi 18:18).

“Dili na kinahanglan para kaninyo o kanako, niining panahon nga ang kahingpitan sa ebanghelyo napahiuli, nga molawig pa sa wala mahibaloi nga mga kadagatan o mobiyahe sa wala pa maagii nga mga dalan sa pagpangita sa kamatuoran. Usa ka mahigugmaong Langitnong Amahan ang mibuhat sa atong agianan ug mihatag og dili mapakyas nga giya—nga mao ang pagkamasulundon. Ang kahibalo sa kamatuoran ug ang mga tubag sa atong importanting mga pangutana moabut kanato kon kita magmasulundon sa mga sugo sa Dios. (Thomas S. Monson, “Ang Pagkamasulundon Makahatag og Panalangin,” Ensign o Liahona, Mayo 2013, 89).

“Akong mga higala—palihug, duhaduhai una ang inyong pagduhaduha sa dili pa mo magduhaduha sa inyong pagtuo. Dili gayud nato tugutan nga himoon kitang binilanggo sa atong pagduhaduha ug ilayo kita sa diosnong gugma, kalinaw, ug gasa nga moabut pinaagi sa pagtuo kang Ginoong Jesukristo” (Dieter F. Uchtdorf, “Dali, Pakig-uban Kanamo,” Liahona, Nob. 2013, 23).

“Si Satanas mao ang dakong tiglingla, ‘ang magsusumbong batok sa [mga] kaigsoonan’ [Pinadayag 12:10], ang amahan sa tanan nga mga bakak [tan-awa sa Juan 8:44], kinsa kanunay nga nagtinguha sa paglimbong aron siya makabuntog kanato [tan-awa sa D&P 50:3]. …

“Alang niadtong midawat na sa kamatuoran, ang iyang nag-unang estratehiya mao ang pagkaylap sa mga liso sa pagduha-duha. Sama pananglit, daghan siya og napapandol nga mga miyembro sa Simbahan kon makahibalo sila og impormasyon kabahin sa Simbahan nga daw mosukwahi sa ilang nahibaloan kaniadto.

“Kon makasinati kamo og sama nga higayon, hinumdumi nga niining panahon sa impormasyon adunay daghan nga nagmugna og pagduha-duha bahin sa bisan unsa ug sa tanang butang, sa bisan unsang panahon ug sa tanang dapit. …

“… Ug maayo gayud nga hinumduman nga tungod lamang kay ang usa ka butang giimprinta diha sa papel, makita sa Internet, kanunayng gibalik-balik, o adunay gamhanan nga pundok sa mga sumusunod wala maghimo niini nga tinuod.

“Usahay ang dili tinuod nga mga pangangkon o impormasyon gipresentar sa paagi nga makita kini nga katoohan. …

“… Ang unsay daw nagkasumpaki karon mahimong hingpit nga masabtan samtang magsiksik kita ug makadawat og mas kasaligan nga impormasyon” (Dieter F. Uchtdorf, “What Is Truth?” [debosyonal sa Church Educational System, Ene. 13, 2013], lds.org/broadcasts).

“Kon magsugod kita pinaagi sa pagsukod sa modernong mga buhat ug mga sugyot batok sa unsay atong nahibaloan sa plano sa Dios ug mga butang nga gihatag diha sa pulong sa Dios ug sa mga pagtulun-an sa Iyang buhi nga mga propeta, … nasayud kita nga kini nagbutang nato sa luwas nga lugar sa kahangturan” (Dallin H. Oaks, “As He Thinketh in His Heart” [gabii uban ni Elder Dallin H. Oaks, Peb. 8, 2013], lds.org/broadcasts).

“Sa mga higayon sa kahadlok o pagduha-duha o sa malisud nga mga panahon, gamita ang hugot nga pagtuo nga napalambo na ninyo, bisan og limitado kini. … Kon kini nga mga higayon moabut ug mogawas ang mga problema, ang kasulbaran dili dayon moabut, panggunit og hugot sa unsay inyo nang nahibaloan ug barug nga malig-on hangtud moabut ang dugang nga kahibalo” (Jeffrey R. Holland, “Nagatuo Ako,” Liahona, Mayo 2013, 94).

“Mahimong atong pahinumduman ang sinserong nangutana nga ang impormasyon sa Internet walay salaan [filter] sa “kamatuoran”. Ang ubang impormasyon, bisan unsa pa ka makakumbinsir, dili gayud tinuod” (Neil L. Andersen, “Joseph Smith,” Ensign o Liahona, Nob. 2014, 29).

“Ang mga tubag sa espiritwal nga mga pangutana ihatag ngadto sa mga indibidwal kinsa wala magpatig-a sa ilang mga kasingkasing; kinsa nangutana uban sa pagtuo, nagtuo nga sila makadawat; ug kinsa matinud-anong nagsunod sa mga sugo” (Paul V. Johnson, “A Pattern for Learning Spiritual Things” [Church Educational System nga pakigpulong ngadto sa mga religious educator, Ago. 7, 2012], si.lds.org).

“Ang pagtuon sa Simbahan … pinaagi sa pagpaminaw sa mga tawo nga mibiya niini susama ra sa pag-interbyu kang Judas aron masabtan si Jesus” (Neal A. Maxwell, “All Hell Is Moved” [debosyonal sa Brigham Young University, Nob. 8, 1977], 3, speeches.byu.edu).