7
Isangyaw ang Mahangturong Ebanghelyo
Pasiuna
Ang Doktrina ug mga Pakigsaad naglangkob og mga pinadayag gikan sa Ginoo ngadto sa piho nga mga miyembro sa Simbahan, pinaagi ni Propeta Joseph Smith, nga nagsugo sa mga miyembro sa pagpahayag og paghinulsol ug pagpundok sa Iyang pinili. Ang Simbahan paspas nga mitubo samtang ang mga misyonaryo gitawag ni Propeta Joseph Smith ug nahimong mga instrumento sa mga kamot sa Ginoo. Ang mga miyembro sa Simbahan karon makadawat og mga panalangin gikan sa misyonaryo nga buhat kon sila moila ug motuman sa ilang responsibilidad nga motabang sa pagpaambit sa ebanghelyo.
Background nga Basahunon
-
Neil L. Andersen, “Usa Kini ka Milagro,” Liahona, Mayo 2013, 77–80.
-
L. Tom Perry, “Pagdala og mga Kalag ngari Kanako,” Liahona, Mayo 2009, 109–12.
Mga Sugyot alang sa Pagtudlo
Doktrina ug mga Pakigsaad 29:4–7; 33:2–7
Ang Ginoo mitawag og mga sulugoon nga motabang sa pagpundok sa Iyang mga anak
I-display ang mosunod nga pamahayag ni Presidente Gordon B. Hinckley (1910–2008), ug dapita ang usa ka estudyante sa pagbasa niini og kusog:
“Ang misyonaryo nga buhat mao ang naghatag og kinabuhi sa Simbahan. Kini ang nag-unang paagi nga molambo ang Simbahan. Tungod niini nga ang Simbahan miabut sa gidak-on niini karon” (“Missionary Service,” First Worldwide Leadership Training Meeting, Ene. 11, 2003, 17).
-
Sa inyong opinyon, sa unsang paagi ang misyonaryo nga buhat makonsiderar nga “naghatag og kinabuhi sa Simbahan”?
Ipasabut nga sa sayo nga bahin sa Pagpahiuli, ang mga indibidwal kanunay nga mihangyo sa Propeta sa pagtinguha og mga pagpadayag alang kanila sa pagtabang kanila nga masayud kon sa unsang paagi sila makasalmot sa buhat sa Ginoo. Usahay kini nga mga pinadayag nadawat alang sa usa ka indibidwal ug usahay alang sa daghang mga indibidwal. Ipasabut nga ang Doktrina ug mga Pakigsaad 33 maoy usa ka ehemplo sa pinadayag nga nadawat alang sa duha ka mga indibidwal: si Ezra Thayer (o Thayre) ug si Northrop Sweet.
Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 33:2–7. Hangyoa ang klase sa pagsunod, nga mangita og mga pulong, mga hugpong sa mga pulong, o mga simbolo nga gigamit sa Ginoo nga magamit sa atong tahas diha sa misyonaryo nga buhat ug nga naghatag og gibug-aton sa kaimportante sa pagsangyaw sa ebanghelyo sa ulahing mga adlaw.
-
Unsa nga mga simbolo ang gigamit sa Ginoo? (Samtang nagtubag ang mga estudyante, mahimo nimong isulat sa pisara ang ilang mga tubag.)
-
Sa unsang paagi kini nga mga simbolo naghulagway sa atong tahas diha sa misyonaryo nga buhat ug naghatag og gibug-aton sa kaimportante sa pagsangyaw sa ebanghelyo?
Dapita ang mga estudyante nga tun-an og maayo ang bersikulo 6 ug ilhon kon unsay nakab-ot samtang atong isangyaw ang ebanghelyo ngadto sa uban. Dayon hangyoa sila sa pagpahayag sa ilang kaugalingong mga pulong kon unsay ilang nakit-an. (Ang mga estudyante mahimong mogamit og lain-laing mga pulong, apan kinahanglan silang makahibalo sa mosunod nga baruganan: Kon atong isangyaw ang ebanghelyo ni Jesukristo ngadto sa uban, nagtabang kita sa pagpundok sa mga pinili sa Ginoo. Mahimo nimong isaysay nga human niini nga pagpadayag, si Ezra Thayer “mipuno sa iyang kamalig” og mga tawo nga maminaw ni Joseph Smith ug sa uban nga mosangyaw sa ebanghelyo [Documents, Volume 1: Hulyo 1828–Hunyo 1831, vol. 1 sa Documents nga serye sa The Joseph Smith Papers (2013), 206].)
Ipaambit sa mga estudyante ang mosunod nga kahulugan kabahin sa pagpundok sa Israel gikan ni Elder Bruce R. McConkie (1915–85) sa Korum sa Napulog Duha ka mga Apostoles:
“Ang pagpundok sa Israel naglangkob sa pagtuo ug pagdawat ug pagpuyo nga nahisubay sa tanan nga gitanyag sa Ginoo kaniadto ngadto sa iyang napili nga katawhan sa karaan. … Naglangkob kini sa pagtuo sa ebanghelyo, pagpamiyembro sa Simbahan, ug pagsulod diha sa gingharian” (A New Witness for the Articles of Faith [1985], 515).
Dapita ang usa ka estudyante sa pagbasa og kusog sa mosunod nga istorya mahitungod sa pipila ka nag-unang mga misyonaryo nga gitawag human sa pagka-organisar sa Simbahan. Hangyoa ang klase sa pagpaminaw kon sa unsang paagi kining nag-unang mga misyonaryo milampus sa pagpundok sa pipila sa mga pinili sa Ginoo.
“[Sa tinglarag sa 1830], ang Ginoo mipadayag ngadto ni Joseph Smith nga si Oliver Cowdery, Peter Whitmer Jr., Parley P. Pratt, ug Ziba Peterson ang ‘moadto ngadto sa mga Lamanites ug mosangyaw sa akong ebanghelyo ngadto kanila’ (D&P 28:8; 30:5–6; 32:1–3). Kini nga mga misyonaryo mibiyahe og mga 1,500 ka mga milya [2,400 ka kilometros], nagsangyaw og kadali taliwala sa nagkalain-laing mga tribo sa mga Indian. … Bisan pa niana, ang pinakadako nga kalampusan sa mga misyonaryo miabut sa dihang mihunong sila sa dapit sa Kirtland, Ohio. Didto ilang gibunyagan ang mga 130 ka mga kinabig, ang kinadak-an gikan sa kapunongan sa Reformed Baptist ni Sidney Rigdon, nga sa ingon nag-abli sa nahimo nga pundokanan nga dapit alang sa gatusan ka mga miyembro sa Simbahan sa mosunod nga mga tuig. Ang mga misyonaryo nakakaplag usab og pipila ka mga kinabig taliwala sa mga nanglalin didto sa lungsod sa Jackson County, Missouri, diin ang siyudad sa Zion sa dili madugay pagatukuron” (Mga Pagtulun-an sa mga Presidente sa Simbahan: Joseph Smith [2007], 176; tan-awa usab sa Richard Dilworth Rust, “A Mission to the Lamanites: D&P 28, 30, 32,” Revelations in Context series, Peb. 22, 2013, history.lds.org).
Ipasabut nga kini nga mga pagkabig diha sa amihanang Ohio sobra pa nga midoble sa gidaghanon sa mga miyembro sa Simbahan nianang panahuna.
Hangyoa ang mga estudyante nga hilum nga mobasa sa Doktrina ug mga Pakigsaad 29:4–7, nga mangita sa usa ka paghulagway sa “mga pinili sa Ginoo.”
-
Giunsa paghulagway sa Manluluwas ang Iyang pinili?
Pasabta ang mga estudyante nga ang buhat sa unang mga misyonaryo nga miserbisyo gawas sa North America naglakip og usa ka talagsaong ehemplo kon sa unsang paagi gamiton sa Ginoo ang Iyang mga sulugoon aron sa pagpundok sa Iyang pinili. Dapita ang usa ka estudyante sa pagbasa og kusog sa mosunod nga summary. Hangyoa ang klase sa pagsunod ug sa pagpaminaw sa tambag ni Propeta Joseph Smith ngadto ni Elder Heber C. Kimball (1801–1868).
“Si Heber C. Kimball, usa ka miyembro sa Korum sa Napulog Duha, mihinumdum: ‘Unang mga adlaw kadto sa Hunyo 1837, si Propeta Joseph miduol kanako, samtang ako naglingkod sa … Templo, sa Kirtland, ug mihunghong siya kanako, miingon, “Brother Heber, ang Espiritu sa Ginoo mihunghong ngari kanako, ‘Himoa nga ang akong sulugoon moadto sa England ug mopahibalo sa akong ebanghelyo ug moabli sa pultahan sa kaluwasan niadto nga nasud.’”’ Si Elder Kimball nahinangop sa paghunahuna sa ingon nga buluhaton: ‘Gibati nako sa akong kaugalingon nga ako ang pinakahuyang nga sulugoon sa Dios. Gipangutana nako si Joseph unsa ang akong isulti kon moabut ako didto; miingon siya kanako nga moduol sa Ginoo ug Siya mogiya kanako, ug mosulti kanako pinaagi niadtong sama nga espiritu nga [misugo] kaniya.’
“Ang Propeta mihatag usab og balaang tawag ngadto ni Orson Hyde, ni Willard Richards, ug ni Joseph Fielding didto sa Kirtland, ug ni Isaac Russell, John Snyder, ug John Goodson didto sa Toronto, Canada. Kini nga mga kaigsoonan motipon ni Elder Kimball sa iyang misyon didto sa England. Nagpundok didto sa Siyudad sa New York, misakay sila sa barko nga Garrick paingon sa Great Britain niadtong Hulyo 1, 1837. Kining unang misyon gawas sa North America midala og mga 2,000 ka mga kinabig sa Simbahan sulod sa unang tuig sa mga misyonaryo didto sa England. Si Elder Kimball malipayong misulat ngadto sa Propeta: ‘Himaya sa Dios, Joseph, ang Ginoo anaa kanato taliwala sa mga nasud!’
“Ang ikaduhang apostolik nga misyon didto sa Britain, naglakip kadaghanan sa mga miyembro sa Napulog Duha ubos sa pagpangulo ni Brigham Young, gimandoan kadto pinaagi sa Propeta gikan sa Nauvoo. Mibiya nianang tinglarag niadtong 1839, ang Napulog Duha miabut sa England pagka 1840. Didto nagsugod pagtrabaho nga nianang pagka 1841 midala og labaw sa 6,000 ka mga kinabig sa Simbahan” (Mga Pagtulun-an: Joseph Smith, 397–398).
-
Unsa nga tambag ang nadawat ni Heber C. Kimball gikan ni Propeta Joseph Smith?
-
Paghulagway og panahon sa dihang inyong nasinati ang tabang sa Ginoo sa inyong mga paningkamot sa pagpaambit sa ebanghelyo.
Doktrina ug mga Pakigsaad 4:1–7; 18:10–16; 31:1–12; 34:5–6; 39:20–23; 88:81
Kadtong kinsa napasidan-an na kinahanglan mopasidaan sa ilang mga silingan
Ipasabut nga ang Doktrina ug mga Pakigsaad balik-balik nga nagpahinumdom sa mga miyembro sa Simbahan sa responsibilidad ug mga panalangin sa pag-apil sa misyonaryo nga buhat. Ang atong responsibilidad sa pagpaambit sa ebanghelyo ngadto sa uban usa ka pabalik-balik nga sundanan ug tema sa mga pinadayag nga narekord diha sa Doktrina ug mga Pakigsaad. Ang pagkat-on sa pag-ila sa mga sundanan ug mga tema nagtugot sa mga mambabasa nga mas magbusog sa pulong ni Kristo (tan-awa sa David A. Bednar, “A Reservoir of Living Water” [Brigham Young University fireside, Peb. 4, 2007], speeches.byu.edu).
Dapita ang mga estudyante nga hilum nga mobasa sa Doktrina ug mga Pakigsaad 88:81 ug dayon i-summarize sa ilang kaugalingong mga pulong kon sa unsang paagi kini magamit ngadto sa bag-ong mga miyembro sa Simbahan. (Usa ka tubag nga mahimong ihatag sa mga estudyante mao nga ang tanan nga midawat sa ebanghelyo ni Jesukristo adunay katungdanan sa pagpaambit niini sa uban.)
I-display ang mosunod nga tsart, o kopyaha kini diha sa pisara. Bahina ang klase ngadto sa tulo ka grupo, ug pag-assign sa matag grupo og usa sa mosunod nga mga tudling sa kasulatan. Hangyoa ang mga estudyante sa pagbasa sa mga tudling nga gi-assign kanila ug sa pagpangita sa mga responsibilidad ug mga panalangin nga gisaad sa pagpaambit sa ebanghelyo.
|
Mga Responsibilidad |
Mga Panalangin | |
|---|---|---|
Human sa igo nga panahon, dapita ang mga estudyante sa pagpaambit sa ilang mga nakit-an ngadto sa klase.
I-display ang mosunod nga pamahayag ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Hangyoa ang klase sa pagpaminaw sa paghulagway ni Elder Bednar sa atong indibidwal nga responsibilidad sa pagpaambit sa ebanghelyo.
“Ang matinud-anong disipulo ni Jesukristo sa kaniadto ug sa kanunay maisugong mga misyonaryo. Ang misyonaryo sumusunod ni Kristo kinsa nagpamatuod Kaniya isip Manunubos ug namahayag sa kamatuoran sa Iyang ebanghelyo.
“Ang Simbahan ni Jesukristo sa kaniadto ug sa umaabut sa kanunay misyonaryo nga simbahan. Kada miyembro sa Simbahan sa Manluluwas midawat sa ligdong obligasyon sa pagtabang sa pagtuman sa balaang sugo nga gihatag sa Ginoo sa Iyang mga Apostoles, nga narekord diha sa Bag-ong Tugon:
“‘Busa panglakaw kamo, ug himoa ninyong tinun-an ang tanang kanasuran, sa pagpamautismo kanila sa ngalan sa Amahan, ug sa Anak, ug sa Espiritu Santo:
“‘Nga magatudlo kanila sa pagtuman sa tanan nga akong gisugo kaninyo: ug, tan-awa, ako magauban kaninyo sa kanunay, hangtud sa katapusan sa kapanahonan. Amen’ (Mateo 28:19–20).
“Ang mga miyembro seryuso niining responsibilidad sa pagtudlo sa mga tawo sa tanang nasud kabahin ni Ginoong Jesukristo ug sa Iyang gipahiuli nga ebanghelyo. …
“Sa pagkatinuod, kami mobati og ligdong kapangakohan sa pagdala niining mensahe sa tanang nasud, kaliwatan, pinulongan ug katawhan.(“Dali ug Tan-awa,” Liahona, Nob. 2014, 107).
-
Nganong kinahanglan nga ang mga miyembro sa Simbahan sa Ginoo motan-aw sa misyonaryo nga buhat isip usa ka ligdong nga obligasyon?
I-display ang mosunod nga pamahayag ni Elder L. Tom Perry sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Hangyoa ang klase sa pagsunod ug sa pagpamalandong nganong angay nilang ikonsiderar nga mahimong mas makugihon sa pagpaambit sa ebanghelyo.
“Ang ebanghelyo nakasentro diha sa Pag-ula sa atong Ginoo ug Manluluwas. Ang Pag-ula naghatag og gahum sa paghugas sa mga sala, sa pag-ayo, ug sa paghatag og kinabuhing dayon. Ang tanan nga dili matukib nga mga panalangin sa Pag-ula mahatag ngadto niadtong kinsa nagsunod sa mga baruganan ug nakadawat sa mga ordinansa sa ebanghelyo—hugot nga pagtuo diha kang Jesukristo, paghinulsol, bunyag, pagdawat sa Espiritu Santo, ug paglahutay ngadto sa katapusan. Ang atong mahinungdanong pang-misyonaryo nga mensahe ngadto sa kalibutan mao nga ang tanang katawhan gidapit nga masalbar ug mosulod sa pundok sa Maayong Magbalantay sa mga Karnero, nga mao si Jesukristo.
“Ang atong pang-misyonaryo nga mensahe gilig-on pinaagi sa kahibalo mahitungod sa Pagpahiuli. Kita nasayud nga ang Dios nakigsulti ngadto sa Iyang mga propeta karon, sama sa Iyang gihimo sa karaang panahon. Nasayud usab kita nga ang Iyang ebanghelyo gidumala uban sa gahum ug katungod sa gipahiuli nga priesthood. Walay laing mensahe ang ingon ka may talagsaon ka mahangturon nga kahulugan ngadto sa tanan nga nagpuyo sa yuta karon” (“Pagdala og mga Kalag ngari Kanako,” Liahona, Mayo 2009, 110–11).
-
Ngano kaha nga ang matag usa kanato kinahanglan nga mahimong mas makugihon sa pagpaambit sa ebanghelyo? (Ang mga tubag kinahanglang maglakip sa mosunod: Kon mopaambit kita sa ebanghelyo ngadto sa uban, atong gitanyag kanila nga maka-access sa mga panalangin sa Pag-ula ni Jesukristo.)
Dapita ang mga estudyante sa pagtuon sa Doktrina ug mga Pakigsaad 34:5–6; 39:20–23, nga mangita og laing importante nga rason nganong ang Ginoo misugo kanato sa pagpaambit sa mensahe sa ebanghelyo ngadto sa uban. (Ang mga estudyante mahimong mogamit og lain-laing mga pulong, apan kinahanglan silang makahibalo sa mosunod nga baruganan: Kon atong ipaambit ang mensahe sa ebanghelyo ngadto sa uban, gitabangan nato sila nga mangandam alang sa Ikaduhang Pag-anhi ni Jesukristo.)
-
Sa unsang paagi ang pagsabut sa mahangturong kahulugan sa ebanghelyo makatabang sa pagdasig kaninyo nga mopaambit niini niadtong dili sama nato og tinuohan?
-
Paghulagway og usa ninyo ka kasinatian sa pagpaambit sa mensahe sa ebanghelyo ngadto sa uban.
Hatagi ang mga estudyante og pipila ka minuto sa pagpamalandong ug pagsulat kon unsay ilang mahimo sa pag-apil sa pagpaambit sa ebanghelyo. Sama pananglit, mahimo nilang isulat ang ngalan sa usa ka tawo nga ilang nailhan kinsa dili miyembro sa Simbahan sa pagkakaron ug mopasalig sa pagpaambit sa ebanghelyo niana nga tawo. Dapita ang pipila ka mga estudyante sa pagpaambit kon unsay plano nilang buhaton. Awhaga ang mga estudyante nga buhaton ang bisan unsa nga mga impresyon nga ilang nadawat ug sa pag-ampo matag adlaw alang sa oportunidad nga makapaambit sa ebanghelyo ngadto sa uban.