Ang Pag-organisar sa Simbahan

Pasiuna

Sa usa ka pagpadayag ngadto ni Propeta Joseph Smith, ang Ginoo misugo nga ang Iyang Simbahan i-organisar sa Abril 6, 1830 (tan-awa sa D&P 20, ulohan sa seksyon; D&P 20:1). Kini nga pinadayag naghatag usab sa mga miyembro og mas dakong pagsabut sa misyon ug mga pagtulun-an sa Manluluwas. Sa usa ka pinadayag nga narekord diha sa Doktrina ug mga Pakigsaad 1:30, ang Ginoo miila sa gipahiuli nga Simbahan isip ang “mao lamang ang tinuod ug buhi nga simbahan diha sa ibabaw sa tibuok yuta,” nga nagpasabut sa importanting tahas nga buhaton sa Simbahan sa ulahing mga adlaw ug sa atong kinabuhi.

Background nga Basahunon

Henry B. Eyring, “Ang Tinuod ug Buhi nga Simbahan,” Liahona, Mayo 2008, 20–24.
“Organization of the Church of Jesus Christ,” kapitulo 6 sa Church History in the Fulness of Times Student Manual, 2nd ed. (manwal sa Church Educational System, 2003), 67–68.
Boyd K. Packer, “The Only True Church,” Ensign, Nob. 1985, 80–83.
Jeffrey G. Cannon, Build Up My Church’: D&P 18, 20, 21, 22,”Revelations in Context series, Ene. 3, 2013, history.lds.org

Mga Sugyot alang sa Pagtudlo

Doktrina ug mga Pakigsaad 20:1–3

Ang Pagpahiuli sa Simbahan ni Jesukristo

Sugdi ang leksyon pinaagi sa paghangyo sa mga estudyante sa paghulagway kon unsay ilang nahibaloan mahitungod sa Simbahan nga gitukod ni Jesukristo sa kapanahunan sa Bag-ong Tugon. Dayon ipangutana:

Unsa ang atong gituohan nga nahitabo sa Simbahan ni Jesukristo human sa kamatayon sa mga Apostoles?
Sa unsang paagi kini mipasabut sa panginahanglan sa Pagpahiuli sa Simbahan ni Jesukristo?

Hangyoa ang usa ka estudyante sa pagbasa og kusog sa mosunod nga pamahayag samtang ang klase maminaw og mga paagi diin ang pag-organisar sa Ang Simbahan ni Jesukristo sa mga Santos sa Ulahing mga Adlaw mipahiuli og importanting mga bahin sa Simbahan nga gitukod ni Jesukristo sa kapanahunan sa Bag-ong Tugon.

“Niadtong Abril 6, 1830, mga onse lamang ka mga adlaw human mamantala nga ibaligya ang Basahon ni Mormon, usa ka grupo sa mga 60 ka mga tawo nagpundok didto sa balay nga troso ni Peter Whitmer Sr. didto sa Fayette, New York. Didto pormal nga giorganisar ni Joseph Smith ang Simbahan, nga sa kaulahian ginganlan pinaagi sa pagpadayag nga Ang Simbahan ni Jesukristo sa mga Santos sa Ulahing mga Adlaw (tan-awa sa D&P 115:4). Usa kini ka malipayon nga okasyon, inubanan sa pagbu-bu sa Espiritu. Gipangalagad ang sakramento, mga tumutuo gibunyagan, ang gasa sa Espiritu Santo gitugyan, ug ang mga lalaki gi-orden ngadto sa priesthood. Sa usa ka pinadayag nga nadawat atol sa meeting, ang Ginoo mitudlo ni Joseph Smith isip lider sa Simbahan: ‘manalagna, maghuhubad, propeta, apostol ni Jesukristo, anciano sa simbahan pinaagi sa kabubut-on sa Dios nga Amahan, ug sa grasya sa inyong Ginoong Jesukristo’ (D&P 21:1). Ang Simbahan ni Jesukristo sa makausa pa natukod dinhi sa yuta” (Mga Pagtulun-an sa mga Presidente sa Simbahan: Joseph Smith [2007], 10).

Dapita ang mga estudyante sa paghulagway sa pipila ka bahin sa gipahiuli nga Simbahan ni Jesukristo nga susama niadtong anaa sa Simbahan sa Bag-ong Tugon.

Ipasabut nga kon mobasa sa Doktrina ug mga Pakigsaad, mahimong makatabang ang pagbasa sa mga ulohan sa seksyon. Kini makatabang sa pag-establisar sa konteksto sa kasaysayan sa mga pinadayag. Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 20. (Mahimo nimong ipasabut nga sa 2013 nga edisyon sa Doktrina ug mga Pakigsaad, ang pipila ka impormasyon sa kasaysayan nga wala malakip sa 2012 nga edisyon gidugang ngadto sa ulohan sa seksyon.) Hangyoa ang laing estudyante sa pagbasa og kusog sa Doktrina ug mga Pakigsaad 20:1–3 Hangyoa ang klase sa pagsunod, nga mangita og mga panabut mahitungod sa Pagpahiuli sa ebanghelyo. Ipangutana:

Unsa nga mga kamatuoran mahitungod sa Pagpahiuli sa ebanghelyo ang gitudlo niini nga mga bersikulo? (Usa sa mga kamatuoran nga kinahanglang mahibaloan sa mga estudyante mao nga si Joseph Smith gitawag sa Dios ug gisugo sa pag-organisar sa Simbahan ni Jesukristo.)

Basaha og kusog ang mosunod nga pamahayag ni Presidente Gordon B. Hinckley (1910–2008):

“Si Joseph Smith ug ang iyang mga kaubanan nagtigom sa yanong balay nga troso sa umahan ni Peter Whitmer sa hilum nga balangay sa Fayette, New York, ug miorganisar sa Simbahan ni Kristo. …

“Gikan sa orihinal nga unom ka mga miyembro mitubo ang usa ka dakong pamilya sa mga magsisimba. … Gikan nianang hilum nga balangay mitubo ang usa ka Simbahan nga karon mikaylap ngadto sa mga 160 ka kanasuran sa kalibutan. … Talagsaon kana nga kalamboan. Mas daghan ang mga miyembro sa Simbahan nga nagpuyo sa gawas niini nga nasud kay sa anaa sulod niini. Kana, usab, talagsaon nga butang. Walay laing simbahan nga naggikan sa Estados Unidos nga milambo og ingon ka paspas o mikaylap og ingon ka malukpanon. … Usa kini ka talagsaong panghitabo nga wala pa makita sukad” (“The Church Goes Forward,” Ensign, May 2002, 4).

Unsay talagsaon alang kaninyo mahitungod sa paspas nga paglambo sa Simbahan sa ulahing mga adlaw?
Sa unsang paagi kita isip mga indibidwal makatabang sa Simbahan sa Ginoo nga magpadayon sa paglambo sa atong panahon?

Doktrina ug mga Pakigsaad 20:17–37, 68–69

Ang doktrina sa Simbahan ni Jesukristo ug ang mga katungdanan sa nabunyagan nga mga miyembro

Ipasabut nga ang seksyon 20 sa Doktrina ug mga Pakigsaad nailhan sa nag-unang mga miyembro sa Simbahan isip ang Mga Artikulo ug mga Pakigsaad sa Simbahan. Kini nga seksyon naglangkob sa daghan sa mga instruksyon sa Ginoo kalabut sa doktrina sa Simbahan ni Jesukristo ug sa mga katungdanan sa mga miyembro niini. Kini nga pinadayag gibasa og kusog sa pipila ka nag-una nga mga komperensya sa Simbahan.

Dapita ang mga estudyante sa paghunahuna nga sila mga bag-ong miyembro sa Simbahan niadtong 1830 ug nagtinguha nga masayud unsay angay nilang tuohan isip miyembro sa Simbahan ni Jesukristo. Dapita ang katunga sa klase sa pagbasa og hilum sa Doktrina ug mga Pakigsaad 20:17–28 ug ang laing katunga sa pagbasa sa mga bersikulo 29–36, nga mangita sa doktrina nga importanting mahibaloan sa matag miyembro sa gipahiuli nga Simbahan sa Ginoo. Mahimo nimong isugyot nga ilang markahan ang unsay ilang nakit-an.

Human sa igong panahon, dapita ang mga estudyante sa pagpaambit og mga kamatuoran nga ilang nahibaloan ug sa pagpasabut nganong ang matag kamatuoran importante ngadto kanila. Ikonsiderar ang pagsulat sa mosunod nga kamatuoran diha sa pisara: Pinaagi sa pagpadayag, ang Ginoo miklaro sa doktrina ug mga baruganan diin gitukod ang Iyang ebanghelyo.

Ikonsiderar ang pagdapit sa katunga sa klase sa pagbasa sa Doktrina ug mga Pakigsaad 20:37, nga mangita sa mga kinahanglanon alang niadtong nagtinguha nga mabunyagan. Hangyoa ang laing katunga sa klase sa pagbasa sa Doktrina ug mga Pakigsaad 20:68–69, nga mangita sa gipaabut sa Ginoo kanato human sa atong bunyag. Ipasabut nga ang mga instruksyon nga makita niini nga mga bersikulo nagpakita og klarong sundanan nga angayng sundon sa mga miyembro sa Simbahan.

Hisguti ang mosunod nga mga pangutana ngadto sa klase:

Unsay kinahanglang ipakita sa usa ka tawo sa dili pa siya mabunyagan? (Ang mga estudyante kinahanglang mahibalo sa mosunod: Sa dili pa mabunyagan ang mga indibidwal, kinahanglan gayud nga sila mapainubsanon, mahinulsulon, andam sa pagdala diha kanila sa ngalan ni Jesukristo, ug determinado nga moserbisyo Kaniya hangtud sa katapusan.)
Unsay gipaabut sa Ginoo kanato human kita mabunyagan? (Ang mga tubag sa mga estudyante tingali magkalahi, apan kinahanglan silang mahibalo sa mosunod nga kamatuoran: Human sa bunyag, mapakita nato sa Ginoo ang atong katakus pinaagi sa atong matarung nga kinabuhi ug sinultihan.)
Unsa kaha ang gipasabut nga “mopakita … sa matarung nga kinabuhi ug sinultihan [panultihon]”? (D&P 20:69).
Nganong ang mga panalangin mahimong moabut ngadto sa mga miyembro sa Simbahan kinsa “naglakaw nga balaanon sa panan-aw sa Ginoo?” (D&P 20:69).

Kon itugot sa panahon, mahimo nimong ipasabut sa mga estudyante nga ang mga doktrina ug mga buluhaton sa Simbahan nga narekord diha sa Doktrina ug mga Pakigsaad 20 gihulagway usab diha sa Basahon ni Mormon, nga nagtabang kanato nga makasabut nga ang Simbahan ni Jesukristo mao lang gayud gihapon sa tanang mga dispensasyon. Sama pananglit, ang mga doktrina nga gihulagway diha sa Doktrina ug mga Pakigsaad 20:17–36 gihulagway usab diha sa Basahon ni Mormon. Sa samang paagi, ang mga ordinansa ug mga buluhaton nga narekord diha sa Doktrina ug mga Pakigsaad 20:73–80 narekord usab diha sa Basahon ni Mormon.

Doktrina ug mga Pakigsaad 1:30

“Mao lamang ang tinuod ug buhi nga simbahan”

Ipasabut nga daghan sa atong panahon nagtuo nga ang tanan nga mga simbahan tinuod ug managsama nga husto diha sa panan-aw sa Dios. Hinoon, mga usa ka tuig ug tunga human maorganisar ang Ang Simbahan ni Jesukristo sa mga Santos sa Ulahing mga Adlaw, ang Ginoo mihatag og importante nga paghulagway sa Simbahan. Dapita ang mga estudyante nga hilum nga mobasa sa Doktrina ug mga Pakigsaad 1:30. Dayon ipangutana:

Giunsa paghulagway sa Ginoo ang gipahiuli nga Simbahan? ( Ang mga estudyante kinahanglang mopahayag sa mosunod nga kamatuoran: Ang Simbahan ni Jesukristo sa mga Santos sa Ulahing mga Adlaw mao lamang ang tinuod ug buhi nga simbahan sa yuta.)
Unsay kahulugan niini kaninyo nga Ang Simbahan ni Jesukristo sa mga Santos sa Ulahing mga Adlaw “mao lamang ang tinuod ug buhi nga simbahan” ibabaw sa yuta? (Sa dili pa motubag ang mga estudyante, mahimo nimo silang pahinumduman nga kini nga doktrina wala magpasabut nga kinahanglang mobati kita nga mas labaw kay sa uban.)

I-display ang mosunod nga mga pamahayag ni Presidente Henry B. Eyring sa Unang Kapangulohan ug ni Elder David A. Bednar sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog. Hangyoa ang tibuok klase sa pagsunod, nga mangita kon nganong Ang Simbahan ni Jesukristo sa mga Santos sa Ulahing mga Adlaw gikonsiderar nga “mao lamang ang tinuod ug buhi nga simbahan.”

“Kini ang tinuod nga Simbahan, ang bugtong tinuod nga Simbahan, tungod kay anaa niini ang mga yawe sa priesthood. Niini lamang nga Simbahan nga gihatag sa Ginoo ang gahum sa pabugkos dinhi sa yuta ug sa pagbugkos didto sa langit sama sa Iyang gibuhat sa panahon ni Apostol Pedro. Kadtong mga yawe gipahiuli ngadto ni Joseph Smith, kinsa gitugutan sa pagtugyan niini ngadto sa mga sakop sa Korum sa Napulog Duha” (Henry B. Eyring, “Ang Tinuod ug Buhi nga Simbahan,” Liahona, Mayo 2008, 20).

“Ang Ginoo mipahayag nga ang Simbahan ni Jesukristo sa mga Santos sa Ulahing mga Adlaw ‘mao lamang ang tinuod ug buhi nga simbahan diha sa ibabaw sa tibuok yuta’ (D&P 1:30). Kini nga gipahiuli nga Simbahan tinuod tungod kay Simbahan man kini sa Manluluwas; Siya ang ‘dalan, ang kamatuoran, ug ang kinabuhi’ (Juan 14:6). Ug buhi kini nga simbahan tungod sa mga buhat ug mga gasa sa Espiritu Santo” (David A. Bednar, “Dawata ang Espiritu Santo,” Liahona, Nob. 2010, 97).

Sa unsang paagi ang mga kamatuoran nga giila ni Presidente Eyring ug Elder Bednar naghimo sa Ang Simbahan ni Jesukristo sa mga Santos sa Ulahing mga Adlaw nga lahi kay sa tanan nga mga simbahan dinhi sa yuta? (Kini ang Simbahan sa Manluluwas, anaa dinhi ang mga kahimoan ug mga gasa sa Espiritu Santo, ug ang mga yawe sa priesthood makita dinhi. Mahimo nimong isugyot nga isulat sa mga estudyante ang pipila niini nga mga ideya diha sa margin sa ilang mga kasulatan tapad sa Doktrina ug mga Pakigsaad 1:30.)

Ipasabut nga si Presidente Boyd K. Packer sa Korum sa Napulog Duha ka mga Apostoles mikutlo gikan sa Doktrina ug mga Pakigsaad 1:30 ug dayon mipasabut nganong kining balaanong hinatag nga paghulagway sa Simbahan importante kaayo. Dapita ang usa ka estudyante sa pagbasa og kusog sa mosunod nga pamahayag ni Presidente Packer:

“Ibale-wala kini nga doktrina, ug dili ninyo mapangatarungan ang Pagpahiuli. …

“Wala nato giimbento ang doktrina sa bugtong tinuod nga simbahan. Gikan kini sa Ginoo. Bisan unsa pa ang panglantaw sa uban kanato, bisan unsa pa kita ka arogante tan-awon, bisan unsa pa nga pagpanaway ang gitumong kanato, kinahanglang itudlo nato kini sa tanan nga maminaw. …

“Wala kita mangangkon nga ang uban walay kamatuoran. Ang Ginoo mihulagway kanila nga may “hulagway sa pagkadiosnon.” Ang mga kinabig sa Simbahan mahimong modala uban kanila sa tanang kamatuoran nga ilang gihuptan ug kini pagadugangan” (“The Only True Church,” Ensign, Nob. 1985, 82).

Sa unsang paagi kini nga doktrina nagklaro sa panginahanglan alang sa Pagpahiuli?

Dapita ang mga estudyante sa pagpasabut kon sa unsang paagi ang mga indibidwal mahimong masayud alang sa ilang kaugalingon nga Ang Simbahan ni Jesukristo sa mga Santos sa Ulahing mga Adlaw tinuod.

Mga Basahunon sa Estudyante

Doktrina ug mga Pakigsaad 1:30; 20:1–3, 17–37, 68–69.
Henry B. Eyring, “Ang Tinuod ug Buhi nga Simbahan,” Liahona, Mayo 2008, 20–24.