2
Ang Unang Panan-awon
Pasiuna
Ang istorya sa Unang Panan-awon ni Joseph Smith nga makita diha sa Perlas nga Labing Bililhon gisulat aron sa pagkorihir sa sayop nga mga report mahitungod sa Simbahan. Sa tibuok niyang kinabuhi, si Propeta Joseph Smith mihatag og pipila ka mga istorya sa Unang Panan-awon. Kini nga mga istorya makapalambo sa atong pagsabut niana nga kasinatian ug makalig-on sa atong pagtuo sa Pagpahiuli. Kini nga leksyon gituyo aron sa pagtabang sa mga estudyante nga makasabut sa kaimportante sa pagbaton og pagpamatuod kabahin niining talagsaon nga importanting panghitabo.
Background nga Basahunon
-
Gordon B. Hinckley, “Ang Kahibulongang Tukuranan sa Atong Pagtuo,” Liahona, Nob. 2002, 78–81.
-
“First Vision Accounts,” Gospel Topics, lds.org/topics.
Mga Sugyot alang sa Pagtudlo
Joseph Smith—Kasaysayan 1:1–2
Ang Propeta misulat kabahin sa Unang Panan-awon aron sa pagkorihir sa sayop nga mga report
Ipasabut nga niadtong 1838 si Joseph Smith misugod sa pagtrabaho sa iyang opisyal nga kasaysayan. Ang seksyon sa Perlas nga Labing Bililhon nga nailhan isip Joseph Smith—Kasaysayan gikuha gikan nianang mas taas nga kasaysayan.
Dapita ang usa ka estudyante sa pagbasa og kusog sa Joseph Smith—Kasaysayan 1:1–2. Hangyoa ang klase sa pagsunod ug sa pagpangita sa mga rason nga gihatag ni Joseph Smith alang sa pag-andam sa iyang kasaysayan.
-
Sumala sa bersikulo 1, unsa ang mikaylap tali sa katawhan sa unang mga adlaw sa Simbahan?
-
Unsa ang katuyoan niadtong mipasiugda og mga report nga nagsupak sa Simbahan?
-
Unsa nga pagkaparehas ngadto niini nga sitwasyon ang anaa sa atong panahon?
Ipasabut nga nagpadayon karon nga adunay mga indibidwal ug mga grupo nga mipakatap og sayop o makalingla nga mga impormasyon kabahin sa Simbahan uban sa katuyoan sa pagdaut sa pagtuo.
-
Unsa nga mga rason ang gihatag ni Joseph sa pagsulat sa iyang kasaysayan? (Aron sa “paghupay sa hunahuna sa katilingban, ug pagbutang sa tanan nga nagpakisayud mahitungod sa kamatuoran nga makahibalo sa tinuod nga mga hitabo, sumala sa ilang pagkahitabo” [Joseph Smith—Kasaysayan 1:1].)
-
Nganong importante man nga ang “nagpakisayud mahitungod sa kamatuoran” kabahin sa Pagpahiuli mosalig sa personal nga istorya ni Joseph Smith? (Ang mga estudyante mahimong mogamit og lain-laing mga pulong, apan siguroa nga maklaro nga ang pagsalig sa istorya sa Propeta makatabang sa mga indibidwal sa paglikay nga malingla sa sayop o makailad nga impormasyon.)
I-display ang mosunod nga tambag ni Elder Neil L. Andersen sa Korum sa Napulog Duha ka mga Apostoles, ug dapita ang mga estudyante sa pagbasa niini sa hilum:
“Kanunay adunay pipila kinsa gustong modaut sa Simbahan ug moguba sa hugot nga pagtuo. Karon mogamit sila sa Internet.
“Pipila sa mga impormasyon kabahin sa Simbahan, bisan unsa pa ka mahaylohon, dili gayud tinuod” (“Pagsulay sa Inyong Hugot nga Pagtuo,” Liahona, Nob. 2012, 41).
-
Unsa nga mga tinubdan ang angay natong pangitaon ug saligan sa atong personal nga pagsiksik sa kamatuoran kabahin sa Unang Panan-awon, sa Pagpahiuli sa ebanghelyo, ug sa ubang mga panghitabo sa kasaysayan sa Simbahan? Ngano man? (Tabangi ang mga estudyante nga makasabut sa mosunod nga baruganan: Aron makalikay nga malingla sa sayop o makailad nga impormasyon, kadtong nagtinguha sa kamatuoran kinahanglang mangita og kasaligan nga mga tinubdan sa impormasyon kabahin sa Simbahan ug sa kasaysayan niini kay sa modawat lang dayon sa bisan unsang impormasyon nga ilang madungog o mabasa, lakip ang impormasyon nga naggikan sa pag-search sa Internet.)
Ipasabut nga ang mga kritiko sa Simbahan makiglalis batok sa katinuod sa Unang Panan-awon pinaagi sa pagsulti nga si Joseph Smith wala morekord sa iyang kasinatian sa panan-awon hangtud nga milabay na ang daghang katuigan human kini nahitabo. Ipasabut nga ang 14 anyos nga si Joseph Smith nagduha-duha sa pagsulti mahitungod sa iyang panan-awon tungod sa reaksyon sa mga tawo nga una niyang gisultihan (tan-awa sa Joseph Smith—Kasaysayan 1:21–26). Girekord niya ang kasinatian sa dihang gibati niya nga sakto na ang panahon aron buhaton kini. Ang Manluluwas mimando kang Pedro, Santiago, ug Juan nga dili mosulti sa ilang kasinatian didto sa Bukid sa Transpigurasyon hangtud human sa Iyang Pagkabanhaw (tan-awa sa Mateo 17:9), nagklaro nga ang ubang sagrado nga mga kasinatian kinahanglang ipaambit lamang kon giaghat sa Espiritu.
Mga istorya sa Unang Panan-awon
Pahinumdom: Samtang itudlo nimo kiini nga bahin sa leksyon, pagbilin og igong panahon nga matudlo ang katapusang seksyon sa leksyon, nga naglangkob sa Joseph Smith—Kasaysayan 1:8–20.
Pasabta ang mga estudyante nga si Joseph Smith misulat, sa personal o uban sa tabang sa mga tigsulat, sa dili mominos upat ka lain-laing mga istorya sa Unang Panan-awon. Dugang pa, pipila ka mga istorya niini nga panan-awon girekord sa mga kadungan ni Joseph Smith. Matag istorya naghatag og gibug-aton sa lain-laing mga aspeto sa kasinatian ni Joseph, apan kining tanan nagpaambit og mahinungdanong mga elemento sa unsay nakita ug nadungog ni Joseph. Aron makatabang sa pagpasabut kon nganong adunay mga kalainan niini nga mga istorya, hangyoa ang mga estudyante sa pagkonsiderar sa mosunod:
-
Paghunahuna og importante o makahuluganon nga kasinatian sa imong kinabuhi. Sa unsang paagi ang inyong istorya niana nga kasinatian molahi depende kon kinsa ang inyong mga tigpaminaw? Sa unsang paagi kini mausab depende kon kanus-a o nganong naghisgot ka mahitungod sa kasinatian?
Dapita ang usa ka estudyante sa pagbasa og kusog sa mosunod nga pamahayag, ug hangyoa ang mga estudyante sa pagpaminaw kon unsa ang gilauman sa mga magsasaysay [historian] kon ang usa ka kasinatian isaysay sa makadaghang higayon:
“Ang nagkalain-laing mga saysay sa Unang Panan-awon nagsulti og makanunayon nga istorya, bisan kon managlahi kini sa gihatagan og gibug-aton ug detalye. Ang mga magsasaysay naglaum nga kon ang indibidwal mosulti og usa ka kasinatian sa daghang mga sitwasyon sa lain-laing tigpaminaw sa daghang katuigan, ang matag istorya mohatag og gibug-aton sa lain-laing mga aspeto sa kasinatian ug maglakip og lahi nga mga detalye. Sa pagkatinuod, ang mga kalainan nga susama sa mga istorya sa Unang Panan-awon anaa sa nagkalain-laing mga saysay sa kasulatan kabahin sa panan-awon ni Pablo diha sa dalan sa Damasco ug sa kasinatian sa mga Apostoles didto sa Bukid sa Transpigurasyon [Mga Buhat 9:3–9; 22:6–21; 26:12–18; Mateo 17:1–13; Marcos 9:2–13; Lucas 9:28–36]. Apan bisan pa sa kalainan, adunay importanting pagkamakanunayon sa tanang mga istorya sa Unang Panan-awon. Sayop nga nakiglalis ang uban nga ang bisan unsang pagkausab diha sa pagsaysay og balik sa istorya usa ka ebidensya nga kini bakak. Hinoon, ang kadaghan sa rekord sa kasaysayan nagtugot kanato nga makat-on pa mahitungod niining talagsaong hitabo kay sa atong mahimo kon wala kaayo kini marekord” (“First Vision Accounts,” Gospel Topics, lds.org/topics).
Isip ehemplo sa mga kalainan diha sa mga istorya, mahimo nimong sultihan ang mga estudyante nga “samtang ang 1832 nga istorya naghatag og gibug-aton sa mas personal nga istorya ni Joseph Smith isip usa ka batan-on nga nagtinguha og kapasayloan, ang 1838 nga istorya nakatutok sa panan-awon isip ang sinugdanan sa ‘pag-uswag ug paglambo sa Simbahan’” (“First Vision Accounts,” Gospel Topics, lds.org/topics). Pahinumdumi ang mga estudyante nga ang gi-assign kanila nga basahunon naglakip sa artikulo sa Gospel Topics nga “First Vision Accounts,” nga naghatag og mas detalyado nga pag-analisar sa matag usa sa lain-laing istorya sa Unang Panan-awon. Dapita ang mga estudyante sa pagtuon sa artikulo gawas sa klase aron mas makasabut kon sa unsang paagi ang matag istorya nakatampo sa atong kahibalo mahitungod sa Unang Panan-awon. (Pahinumdom: Pahinumdumi ang mga estudyante sa kaimportante sa pagbasa sa mga assignment ubos sa “Mga Basahunon sa Estudyante” sa dili pa magklase. Ang pagbuhat niini makatabang nila nga makatampo sa mga diskusyon sa klase.)
-
Sa unsang paagi ang daghang mga istorya sa Unang Panan-awon nagsuporta sa katinuod ug makapalambo sa atong pagsabut niining sagrado nga panghitabo? (Tabangi ang mga estudyante nga makasabut nga ang daghang mga istorya sa Unang Panan-awon ni Joseph Smith nagtugot kanato nga mas makat-on pa mahitungod niining sagrado nga kasinatian kay sa atong mahimo kon wala kaayo kini masulat.)
I-display ang mosunod nga pamahayag ni Presidente Gordon B. Hinckley (1910–2008), ug dapita ang usa ka estudyante sa pagbasa niini og kusog:
“Wala ko mabalaka nga si Propeta Joseph Smith mihatag og pipila ka mga bersyon sa Unang Panan-awon sama nga wala ko mabalaka nga adunay upat ka lain-laing mga tigsulat sa ebanghelyo diha sa Bag-ong Tugon, nga ang matag usa adunay kaugalingon niyang panglantaw, ang matag usa nagsulti sa mga kalihokan alang sa iyang kaugalingong katuyoan sa pagsulat nianang panahona” (“God Hath Not Given Us the Spirit of Fear,” Ensign, Okt. 1984, 5).
Pagpamatuod sa katinuod sa Unang Panan-awon ug sa Pagpahiuli sa ebanghelyo pinaagi ni Propeta Joseph Smith.
Joseph Smith—Kasaysayan 1:8–20
Ang katinuod sa Simbahan nag-agad sa katinuod sa Unang Panan-awon
Dapita ang pipila ka estudyante nga magpuli-puli sa pagbasa og kusog sa Joseph Smith—Kasaysayan 1:8–15.
-
Unsa ang pipila ka mga butang nga gibuhat ni Joseph Smith sa pagpangita og mga tubag sa iyang mga pangutana?
-
Ngano kaha nga si Satanas misulay sa pagpahunong ni Joseph Smith sa pag-ampo?
Dapita ang pipila ka estudyante nga magpuli-puli sa pagbasa og kusog sa Joseph Smith—Kasaysayan 1:16–19.
-
Unsa ang pipila ka importanting mga kamatuoran ang atong nakat-unan gikan sa mga bersikulo 16–17? (Samtang motubag ang mga estudyante, ipasabut og maayo nga ang mahangturong mga kamatuoran gipahiuli sa yuta sa dihang ang Langitnong Amahan ug si Jesukristo mipakita ngadto ni Joseph Smith.)
I-display ug basaha og kusog ang mosunod nga pamahayag ni Elder Tad R. Callister, kinsa miserbisyo sa Kapangulohan sa Seventy. Samtang imong basahon kini nga pamahayag, mahimo nimong isugyot nga markahan sa mga estudyante diha sa ilang mga kasulatan ang mga kamatuoran nga gipasabut og maayo ni Brother Callister. Mahimo usab nimong isugyot nga isulat nila ang mga kamatuoran nga nakat-unan ni Joseph diha sa margin tupad sa Joseph Smith—Kasaysayan 1:16–19. (Pahinumdom: Ang pagkat-on sa pagmarka ug pagsulat diha sa mga kasulatan usa ka importanting kahanas sa pagtuon sa kasulatan nga makatabang ka nga mapalambo sa mga estudyante [tan-awa sa Gospel Teaching and Learning: A Handbook for Teachers and Leaders in Seminaries and Institutes of Religion (2012), 21].)
“Si Joseph Smith mao ang dinihogan sa Ginoo aron sa pagpahiuli sa Simbahan ni Kristo sa yuta. Sa dihang migula siya gikan sa kakahoyan, siya sa katapusan nakakat-on og upat ka mahinungdanong mga kamatuoran nga wala itudlo nianang panahona sa kadaghanan sa kontemporaryo nga Kristohanong kalibutan.
“Una, siya nakakat-on nga ang Dios nga Amahan ug ang Iyang Anak, nga si Jesukristo, duha ka bulag, managlahi nga mga nilalang. …
“Ang ikaduhang mahinungdanong kamatuoran nga nadiskobrehan ni Joseph Smith mao nga ang Amahan ug ang Anak adunay nahimayang mga lawas sa unod ug mga bukog. …
“Ang ikatulong kamatuoran nga nakat-unan ni Joseph Smith mao nga ang Dios makigsulti pa gihapon sa tawo karon—nga ang kalangitan dili sirado. …
“Ang ikaupat nga kamatuoran nga nakat-unan ni Joseph Smith mao nga ang hingpit ug kompleto nga Simbahan ni Jesukristo wala gayud sa ibabaw sa yuta” (“Joseph Smith—Propeta sa Pagpahiuli,” Ensign o Liahona, Nob. 2009, 35–36).
-
Ngano kaha nga kini nga mga kamatuoran mahitungod sa Langitnong Amahan ug ni Jesukristo importante nga mahibaloan ug masabtan?
-
Sa unsang paagi ang panginahanglan alang niadto nga mga kamatuoran makatabang sa pagpasabut nganong si Satanas misulay sa pagpugong sa batan-ong si Joseph Smith sa pag-ampo?
Aron mahatagan og gibug-aton ang kaimportante sa Unang Panan-awon ni Joseph Smith, i-display ang mosunod nga pamahayag ni Presidente Gordon B. Hinckley ug dapita ang usa ka estudyante sa pagbasa niini og kusog:
“Ang atong tibuok kusog anaa diha sa katinuod [sa Unang Panan-awon]. Anaa ra kon nahitabo ba kadto o wala. Kon wala, nan kini nga buhat panglingla. Kon tinuod, nan kini mao ang pinakamahinungdanon ug maanindot nga buhat dinhi sa yuta. …
“… Pagka-1820 miabot kanang mahimayaong pagpakita agig tubag sa pag-ampo sa usa ka bata kinsa nakabasa sa mga pulong ni Santiago sa Biblia sa pamilya: ‘Kon aduna man kaninyoy nakulangan og kaalam, papangayoa siya sa Dios, nga nagapanghatag ngadto sa tanang mga tawo sa madagayaon gayud ug sa walay pagpamoyboy, ug kini igahatag kaniya’ (Santiago 1:5).
“Nganha nianang talagsaon ug maanindot nga kasinatian nagbarug ang katinuod niining Simbahan” (“Ang Kahibulongang Tukuranan sa Atong Pagtuo,” Liahona, Nob. 2002, 80).
-
Sa unsang paagi ang katinuod sa Simbahan konektado sa Unang Panan-awon ni Joseph Smith?
-
Nganong importante man nga makaangkon og pagpamatuod nga si Joseph Smith nakakita sa Dios nga Amahan ug sa Iyang Anak, si Jesukristo? (Ang mga estudyante mahimong mohatag og lain-laing mga tubag, apan siguroa nga klaro ang mosunod nga baruganan: Kon makaangkon kita og pagpamatuod nga si Joseph Smith nakakita sa Dios nga Amahan ug sa Iyang Anak, nga si Jesukristo, masayud usab kita sa katinuod sa Pagpahiuli sa ebanghelyo.)
Sa imong pagtapos sa leksyon, hatagig gibug-aton ang kaimportante sa pagbaton og personal nga saksi sa katinuod sa Unang Panan-awon. Kining personal nga pagpamatuod, natukod diha sa bato sa pagpadayag, makatabang nato nga magpabiling lig-on sa atong pagtuo kon mag-atubang kita og sayop nga impormasyon mahitungod ni Propeta Joseph Smith ug sa Simbahan. Ipamatuod nga ang paagi ni Joseph Smith sa pagkat-on sa kamatuoran mosalir usab kanato. Mahimo kitang magtinguha sa kamatuoran, mobasa sa mga kasulatan, mamalandong, ug sa katapusan mangutana sa Dios, ug Siya motubag (tan-awa sa Santiago 1:5). Dapita ang mga estudyante sa pagpamalandong kon giunsa nila pagkaangkon og pagpamatuod nga ang Amahan ug Anak mipakita kang Joseph Smith. Gahini og panahon alang sa usa o duha ka mga estudyante sa pagpaambit kon giunsa nila pagkaangkon og pagpamatuod sa Unang Panan-awon.
Mga Basahunon sa Estudyante
-
Gordon B. Hinckley, “Ang Kahibulongang Tukuranan sa Atong Pagtuo,” Liahona, Nob. 2002, 78–81.
-
“First Vision Accounts,” Gospel Topics, lds.org/topics.