Librarya
Leksyon 5: Ang Pagpahiuli sa Priesthood

5

Ang Pagpahiuli sa Priesthood

Pasiuna

Niadtong Mayo 15, 1829, si Juan Bautista mipakita ngadto ni Joseph Smith ug Oliver Cowdery ug mipahiuli sa Aaronic Priesthood. Wala madugay human niana, ang karaang mga Apostoles nga sila si Pedro, Santiago, ug Juan mipakita kang Joseph Smith ug Oliver Cowdery ug mipahiuli sa Melchizedek Priesthood. Ang Melchizedek Priesthood naghupot sa awtoridad ibabaw sa tanang mga buhatan sa Simbahan ug mangalagad sa tanang espirituhanon nga mga butang. Kini nga leksyon motabang sa mga estudyante nga makasabut kon sa unsang paagi ang Simbahan naglihok ubos sa pagdumala sa Melchizedek Priesthood.

Background nga Basahunon

  • Thomas S. Monson, “Ang Priesthood—usa ka Sagrado nga Gasa,” Liahona, Mayo 2007, 57–60.

  • Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–52.

  • Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 30–47.

Mga Sugyot alang sa Pagtudlo

Joseph Smith—Kasaysayan 1:68–71; Doktrina ug mga Pakigsaad 13:1

Si Juan Bautista mipahiuli sa Aaronic Priesthood

bunyag
pagpanalangin sa sakrament

Pagpakita og hulagway sa usa ka bunyag (tan-awa ang Batan-ong Lalaki Nga Gibunyagan [Libro sa mga Hulagway sa Ebanghelyo (2009), nu. 103; tan-awa usab sa LDS.org]) ug usa ka hulagway nga nagpakita sa pagpahigayon sa sakrament (tan-awa ang Pagpanalangin sa Sakrament [Libro sa mga Hulagway sa Ebanghelyo, nu. 107; tan-awa usab sa LDS.org]). Hangyoa ang mga estudyante sa paghulagway kon sa unsang paagi ang ilang mga kinabuhi mahimong lahi kon dili sila makadawat niining sagrado nga mga ordinansa. Pahinumdumi ang mga estudyante nga kini nga mga ordinansa nagrepresentar og pipila ka mga panalangin nga atong madawat tungod sa pagpahiuli sa Aaronic Priesthood.

Dapita ang usa ka estudyante sa pagbasa og kusog sa Joseph Smith—Kasaysayan 1:68. Hangyoa ang klase sa pagsunod ug sa pagtino kon unsay gibuhat ni Joseph Smith ug Oliver Cowdery nga misangput sa ilang pagpangutana sa Ginoo mahitungod sa bunyag. Hangyoa sila sa pagreport kon unsay ilang nadiskubrihan.

Dapita ang usa ka estudyante sa pagbasa og kusog sa Joseph Smith—Kasaysayan 1:69. Ipasabut nga ang mga pulong sa mensahero, kinsa mao si Juan Bautista, narekord usab sa Doktrina ug mga Pakigsaad 13. Pangutan-a ang klase:

  • Nganong kinahanglan man alang ni Joseph Smith ug Oliver Cowdery nga madawat ang priesthood gikan sa langitnong mensahero? (Walay tawo sa yuta nianang panahona nga naghupot sa mga yawe sa priesthood [tan-awa sa Mga Artikulo sa Hugot nga Pagtuo 1:5].)

Dapita ang mga estudyante sa pagbasa sa Joseph Smith—Kasaysayan 1:70–71. Ipasabut nga kini nga mga bersikulo nagklaro nga si Propeta Joseph mao ang una nga migamit sa priesthood niini nga dispensasyon. Ang ubang tawo naglibug nganong si Juan Bautista wala mobunyag ni Joseph Smith ug Oliver Cowdery ug nganong ang duha ka mga tawo gisugo sa pagtugyan pag-usab sa priesthood sa usag usa. Mahimo nimong ipasabut nga samtang gikinahanglan nga ang usa ka langitnong mensahero nga naghupot sa tukma nga awtoridad mopahiuli sa awtoridad sa priesthood dinhi sa yuta alang sa bag-o nga dispensasyon, sa higayon nga kana nga awtoridad napahiuli, ang tanang yutan-on nga mga ordinansa sama sa bunyag ug ordinasyon kinahanglang ipahigayon pinaagi sa mortal nga mga binuhat. Agig dugang, ang instruksyon ni Juan Bautista nga si Joseph ug Oliver motugyan og usab sa priesthood sa usag usa mibutang “sa ordinasyon ug bunyag diha sa tukma nga relasyon [o sa tukma nga han-ay]” (Joseph Fielding Smith, Doctrines of Salvation,comp. Bruce R. McConkie, 3 vols. [1954–56], 3:91).

Isulat sa pisara ang mosunod nga pangutana:

Sa unsang paagi ang Aaronic Priesthood makatabang kanato nga makadawat sa mga panalangin sa Pag-ula ni Jesukristo?

Awhaga ang mga estudyante sa pagkonsiderar niini nga pangutana samtang imong basahon og kusog ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Unsay gipasabut nga ang Aaronic Priesthood naghupot sa ‘yawe sa pagpangalagad sa mga anghel’ ug sa ‘ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala’? Ang kahulugan makita diha sa ordinansa sa bunyag ug sa sakrament. Ang bunyag alang sa kapasayloan sa mga sala, ug ang sakrament usa ka pagbag-o sa mga pakigsaad ug mga panalangin sa bunyag. Ang duha kinahanglan nga unhan sa paghinulsol. …

“Walay usa [kanato] nga nabuhi nga walay sala sukad sa [atong] bunyag. Kon walay pipila ka probisyon alang sa dugang nga paglimpyo human sa atong bunyag, ang matag usa nato nawad-an sa mga butang nga espirituhanon. …

“Kita gimandoan sa paghinulsol sa atong mga sala ug sa pagduol ngadto sa Ginoo uban sa mapainubsanong kasingkasing ug mahinulsulong espiritu ug sa pag-ambit sa sakrament agi og pagsunod sa mga pakigsaad niini. Kon atong bag-uhon ang atong mga pakigsaad sa bunyag niini nga paagi, ang Ginoo mobag-o sa makalimpyo nga epekto sa atong bunyag. …

“Dili nato mapalabihan og sulti ang kamahinungdanon sa Aaronic Priesthood niini nga sitwasyon. Ang tanan niining importante nga mga lakang kalabut sa kapasayloan sa mga sala gipahigayon pinaagi sa makaluwas nga ordinansa sa bunyag ug sa makabag-ong ordinansa sa sakrament” (“The Aaronic Priesthood and the Sacrament,” Ensign, Nob. 1998, 37–38).

Dapita ang mga estudyante sa pagpaambit sa ilang mga tubag sa pangutana diha sa pisara. Ipamatuod nga ang mga ordinansa sa Aaronic Priesthood mihimo nga maanaa ang daghang mga panalangin sa Pag-ula ni Jesukristo, lakip ang bunyag alang sa kapasayloan sa mga sala.

Joseph Smith—Kasaysayan 1:72; Doktrina ug mga Pakigsaad 84:19–22; 107:8, 18–19

Si Pedro, Santiago, ug Juan Mipahiuli sa Melchizedek Priesthood

Dapita ang klase sa pagsunod samtang ang usa ka estudyante mobasa og kusog sa Joseph Smith—Kasaysayan 1:72. Aron matabangan ang mga estudyante nga mapalapdan ang ilang pagsabut sa konteksto niini nga tudling, ipasabut nga sa wala madugay human sa pagbisita ni Juan Bautista, si Joseph Smith ug Oliver Cowdery nakadawat sa Melchizedek Priesthood gikan ni Pedro, Santiago, ug Juan. Kini nahitabo niadtong Mayo 1829, sa usa ka dapit duol sa Suba sa Susquehanna (tan-awa sa Larry C. Porter, “The Restoration of the Aaronic and Melchizedek Priesthoods,” Ensign, Dis. 1996, 30–47). Human maorganisar ang Simbahan, ang Propeta nakadawat og ubang mga pinadayag mahitungod sa doktrina ug katuyoan sa priesthood. Ang priesthood maoy usa ka komon nga tema sa tibuok Doktrina ug mga Pakigsaad.

Dapita ang mga estudyante nga hilum nga magtuon sa Doktrina ug mga Pakigsaad 84:19 ug 107:8, 18–19, nga mangita kon sa unsang paagi gihulagway niini nga mga bersikulo ang awtoridad sa Melchizedek Priesthood. Mahimo nimong isugyot sa mga estudyante nga ilang i-cross-reference kini nga mga tudling. (Pahinumdom: Ang pag-cross-reference maoy usa ka himan sa pagtuon sa kasulatan nga makahatag og dugang nga impormasyon ug panabut sa kasulatan nga gitun-an.) Human sa igo nga panahon, dapita ang mga estudyante sa pagpaambit kon unsay ilang nakat-unan mahitungod sa Melchizedek Priesthood. Samtang motubag sila, isulat ang mosunod nga mga pulong diha sa pisara:

Mopangalagad sa ebanghelyo

Naghupot sa mga yawe sa mga misteryo sa gingharian

Naghupot sa yawe sa kahibalo sa Dios

Naghupot sa mga yawe sa espirituhanong mga panalangin sa Simbahan

Naghupot sa mga yawe sa pagdawat og pagpadayag

Naghupot sa mga yawe sa pagpakigsulti sa langitnong mga panon ug pagpuyo uban sa Amahan ug sa Anak

Mahimo nimong i-summarize ang mga tubag sa pisara pinaagi sa paghatag og gibug-aton sa mosunod nga kamatuoran: Ang Melchizedek Priesthood naghupot sa mga yawe sa tanang ordinansa ug espirituhanong mga panalangin sa Simbahan. Aron matabangan ang mga estudyante nga mas masabtan ang mga pulong diha sa pisara, hisguti ang pipila o ang tanan sa mosunod nga mga pangutana:

  • Unsa ang pipila ka mga paagi diin ang Melchizedek Priesthood “nangalagad sa ebanghelyo”? (D&P 84:19). (Ang mga tubag mahimong maglakip sa pagpahigayon sa piho nga mga ordinansa ug sa pagdumala ug paggiya sa Simbahan.)

  • Unsa kaha ang gipasabut nga ang Melchizedek Priesthood “naghupot sa yawe sa mga misteryo sa gingharian”? (D&P 84:19). (Mahimo nimong ipasabut nga ang “mga misteryo sa Dios mao ang mga espirituhanon nga mga kamatuoran nga mahibaloan lamang pinaagi sa pagpadayag” [Giya ngadto sa mga Kasulatan, “Misteryo sa Dios, Mga,” scriptures.lds.org]. Gawas sa uban pa nga mga misteryo, kini nga bersikulo naghisgot sa mga ordinansa sa templo nga hapit na ipadayag kang Joseph Smith ug ang kamatuoran nga kini kinahanglang ipahigayon pinaagi sa awtoridad sa Melchizedek Priesthood. Diha sa templo, ang takus nga mga miyembro sa Simbahan makakat-on sa pipila sa “mga misteryo sa Dios” samtang moapil sila sa mga ordinansa nga gipahigayon didto ug motuman sa kauban nga mga pakigsaad.)

  • Sa unsang paagi ang Melchizedek Priesthood makatabang kanato nga makaangkon “sa kahibalo sa Dios”? (D&P 84:19). (Makaangkon kita sa kahibalo sa Dios samtang moapil kita sa mga ordinansa nga ipahigayon pinaagi sa Melchizedek Priesthood.)

Aron matabangan ang mga estudyante nga makasabut sa mga pulong nga “kahibalo sa Dios”, mahimo nimong basahon ang mosunod nga pamahayag ni Presidente James E. Faust (1920–2007) sa Unang Kapangulohan:

Presidente James E. Faust

“Unsa ang yawe sa kahibalo sa Dios, ug maangkon ba kini ni bisan kinsa? Kon wala ang priesthood wala usab ang kahingpitan sa kahibalo sa Dios. Si Propeta Joseph Smith miingon nga ang ‘Melchizedek Priesthood … mao ang agianan diin ang tanang kahibalo, doktrina, ang plano sa kaluwasan, ug ang tanang importante nga butang ipadayag gikan sa langit’ [Mga Pagtulun-an sa mga Presidente sa Simbahan: Joseph Smith (2007), 127]” (“Ang Yawe sa Kahibalo sa Dios,” Liahona, Nob. 2004, 52).

Dapita ang usa ka estudyante sa pagbasa sa Doktrina ug mga Pakigsaad 84:20–22. Hangyoa ang klase sa pagsunod, nga mangita og mga paagi nga ang espirituhanong mga panalangin nga maanaa pinaagi sa Melchizedek Priesthood mahimong matagamtam sa matag miyembro sa Simbahan. Dayon ipangutana ang mosunod nga mga pangutana:

  • Unsa nga mga ordinansa ang mapahigayon lamang pinaagi sa awtoridad sa Melchizedek Priesthood? (Kumpirmasyon, pagtugyan sa Melchizedek Priesthood, mga ordinansa sa templo, pagpanalangin sa mga bata, pagpangalagad sa mga masakiton, patriyarkal nga mga panalangin, pag-set apart og tawo alang sa usa ka calling.)

  • Sa unsang paagi ang mga ordinansa sa priesthood makatabang sa tawo nga makasinati sa “gahum sa pagka-diosnon,” nga nagpasabut sa gahum nga mahimong sama sa Dios?

  • Sa unsang paagi ang mga ordinansa sa Melchizedek Priesthood nag-andam kanato nga makakita sa nawong sa Dios?

  • Sa unsang paagi ang mga ordinansa sa priesthood nakatabang kaninyo nga mahimong mas sama sa Dios?

  • Unsa pa nga mga kasinatian ang nakatampo sa inyong pagpasalamat ug pagpamatuod sa priesthood?

Ikonsiderar ang pagpaambit sa imong kaugalingong pagpamatuod sa mga panalangin sa priesthood. Awhaga ang mga estudyante sa pagkonsiderar kon unsa ang mahimo nilang buhaton aron mas mapahiangay ang ilang mga kaugalingon sa direksyon nga gikan sa ilang mga lider sa priesthood.

Mga Basahunon sa Estudyante