Librarya
Leksyon 27: Pag-andam sa Kalibutan alang sa Ikaduhang Pag-anhi ni Jesukristo

27

Pag-andam sa Kalibutan alang sa Ikaduhang Pag-anhi ni Jesukristo

Ang Manluluwas sa usa ka adlaw mobalik dinhi sa yuta diha sa gahum ug dako nga himaya. Agig pagpangandam alang nianang mahinungdanon nga adlaw, ang mga Santos gitudloan sa pagtuon sa mga timailhan sa Iyang Pag-anhi ug sa pagpangandam alang niini pinaagi sa pagbarug sa balaan nga mga dapit ug sa pagdawat sa “Balaan nga Espiritu alang sa ilang paggiya” (D&P 45:57). Ang Ginoo mideklarar nga ang Simbahan ug ang mga miyembro niini adunay responsibilidad sa pag-andam sa kalibutan alang sa Ikaduhang Pag-anhi sa Manluluwas.

Background nga Basahunon

  • Neil L. Andersen, “Pag-andam sa Kalibutan alang sa Ikaduhang Pag-anhi,” Liahona, Mayo 2011, 49–52.

  • Dallin H. Oaks, “Pagpangandam alang sa Ikaduhang Pag-anhi,” Liahona, Mayo 2004, 7–10.

  • “Pagpangandam alang sa Ikaduhang Pag-anhi ni Kristo,” kapitulo 44 sa Mga Pagtulun-an sa mga Presidente sa Simbahan: Joseph F. Smith (1998), 471–81.

Mga Sugyot alang sa Pagtudlo

Doktrina ug mga Pakigsaad 45:15–46, 56–57

Mga timailhan nga mag-una sa Ikaduhang Pag-anhi

Pangutan-a ang mga estudyante sa mosunod:

  • Unsaon ninyo pagkahibalo kon hapit na mag-ulan?

Ipasabut nga ingon nga dunay mga timaan nga makatabang kanato aron mahibalo kon kanus-a mobundak ang ulan, dunay mga timaan usab, o mga timailhan, nga makatabang kanato aron mahibalo kon kanus-a mahitabo ang Ikaduhang Pag-anhi ni Jesukristo. Sultihi ang mga estudyante nga sigun sa narekord sa Mateo 24, ang Manluluwas nakigkita sa Iyang mga disipulo didto sa Bukid sa Oliba sa wala pa Siya mamatay ug mihulagway sa mga timailhan sa Iyang Ikaduhang Pag-anhi. Iyang gisubli ang pipila niini nga mga pagtulun-an ngadto ni Joseph Smith sa atong panahon, sumala sa narekord sa Doktrina ug mga Pakigsaad 45. Ipasabut og maayo sa mga estudyante nga ang pagpangandam alang sa Ikaduhang Pag-anhi ni Jesukristo usa ka importanting tema sa tibuok Doktrina ug mga Pakigsaad. Dapita ang mga estudyante nga mogahin og panahon samtang magtuon sila sa Doktrina ug mga Pakigsaad sa pagtimaan sa mga pagtulun-an mahitungod sa Ikaduhang Pag-anhi ug sa pagpamalandong kon sa unsang paagi sila makaandam alang niini.

Dapita ang mga estudyante sa pagbasa sa Doktrina ug mga Pakigsaad 45:15–17, nga mangita sa unsay gipangutana sa mga disipulo sa Manluluwas ngadto Kaniya ug giunsa Niya sa pagtubag.

  • Unsa ang gipangutana sa mga disipulo ngadto ni Jesus?

  • Unsa man ang Iyang tubag?

Aron matabangan ang mga estudyante nga mahibalo sa mga timailhan nga mag-una sa Ikaduhang Pag-anhi, isulat ang mosunod nga mga pakisayran diha sa pisara:

D&P 45:25–27

D&P 45:28–31, 33

D&P 45:40–43

Ipares-pares ang mga estudyante, ug i-assign ang matag parisan sa usa sa mga tudling nga nasulat diha sa pisara. Hangyoa sila sa pagbasa og dungan sa mga bersikulo, nga mangita sa mga timailhan nga gihisgutan niadto nga mga bersikulo. Ipasabut nga ang pipila sa mga timailhan natuman na o anaa sa proseso nga matuman. Mahimo nimong ipaambit ang mosunod nga impormasyon kalabut sa bersikulo 30: “Ang panahon diin ang mga Hentil maoy mag-una sa pagdawat sa ebanghelyo maoy gitawag nga panahon sa mga Hentil. Diha niini ang mga dili Judeo … adunay oportunidad sa pagdawat sa ebanghelyo ug pag-angkon og kaluwasan sa dili pa ihatag kana nga katungod, sa bisan unsang matang, sa labing minos, diha sa mga Judeo” (Bruce R. McConkie, Mormon Doctrine, 2nd ed. [1966], 721–22).

Human sa igong panahon, dapita ang mga parisan sa pag-report sa ilang mga nakit-an ngadto sa klase. Mahimo nimong isugyot nga markahan sa mga estudyante ang mga timailhan diha sa ilang mga kasulatan.

Dapita ang usa ka estudyante sa pagbasa og kusog sa Doktrina ug mga Pakigsaad 45:34 samtang magsunod ang klase. Dayon ipangutana:

  • Kon mobasa o makadungog kamo mahitungod sa mga panghitabo o mga timailhan nga mag-una sa Ikaduhang Pag-anhi, mabalaka ba mo? Ngano o nganong dili man?

  • Sa unsang mga paagi ang pagkasayud mahitungod sa mga timailhan sa Ikaduhang Pag-anhi sa Manluluwas makatabang kanato sa pagbuntog sa kahadlok ug kabalaka sa atong kinabuhi?

Dapita ang mga estudyante sa pagbasa og hilum sa Doktrina ug mga Pakigsaad 45:35–38 aron makat-on nganong gipadayag sa Ginoo ang mga timailhan nga mag-una sa Iyang Ikaduhang Pag-anhi.

  • Nganong importante man nga mahibalo nga natuman na ang mga timailhan sa pag-anhi sa Manluluwas?

Hangyoa ang klase sa pagpangita og mga paagi nga mangandam alang sa Ikaduhang Pag-anhi ni Kristo samtang basahon nila ang Doktrina ug mga Pakigsaad 45:32, 39, 56–57. Dayon hisguti ang mosunod:

  • Unsa ang inyong nakat-unan gikan niini nga mga bersikulo kon unsaon sa pagpangandam alang sa Ikaduhang Pag-anhi? (Samtang ang mga estudyante mopaambit sa ilang mga ideya, hatagig gibug-aton ang mosunod nga baruganan: Ang pagbarug diha sa balaan nga mga dapit ug ang pagbaton sa Espiritu Santo isip atong giya mahinungdanon samtang mangandam kita alang sa Ikaduhang Pag-anhi ni Jesukristo.)

  • Unsa ang kinahanglan natong buhaton aron makabaton sa Espiritu Santo isip atong giya?

  • Sa unsang paagi kaha nga ang usa ka sumusunod ni Jesukristo “magbarug sa balaan nga mga dapit”? (Ang balaan nga mga dapit naglakip sa mga templo, mga chapel, ug mga panimalay. Ang usa ka panimalay mahimong balaan pinaagi sa makanunayon nga personal ug pamilya nga pag-ampo, pagtuon sa kasulatan, pagserbisyo, ug family home evening. Ang pagbarug diha sa balaan nga mga dapit may kalabutan usab kon giunsa nato sa pagpakabuhi. Kon nagpakabuhi kita nga takus sa pagpakig-uban sa Espiritu Santo, nan nagbarug kita sa balaan nga dapit. Ikonsiderar ang pagsugyot nga isulat sa mga estudyante ang pipila niini nga mga ideya diha sa margin sa ilang mga kasulatan tupad sa Doktrina ug mga Pakigsaad 45:32.)

  • Sa unsang paagi kamo nakahimo sa pagbarug diha sa balaang mga dapit bisan pa nga nagpuyo sa dautan nga kalibutan?

  • Unsa ang pipila sa mga rason nga naghinam-hinam kamo sa Ikaduhang Pag-anhi sa Manluluwas? Nganong mapasalamaton man kamo nga moanhi pag-usab ang Manluluwas?

Doktrina ug mga Pakigsaad 29:7–9; 34:5–7; 39:19–23

Pag-andam sa kalibutan alang sa Ikaduhang Pag-anhi

Pahinumdumi ang mga estudyante nga ang ulohan niini nga kurso mao ang Mga Pundasyon sa Pagpahiuli. Pangutan-a ang mga estudyante:

  • Unsa ang koneksyon o relasyon ang inyong nakita tali sa Pagpahiuli sa ebanghelyo ug sa Ikaduhang Pag-anhi ni Jesukristo?

Isulat ang mosunod nga mga pakisayran diha sa pisara. Hangyoa ang mga estudyante nga tun-an kini nga mangita og usa ka komon nga tema:

Doktrina ug mga Pakigsaad 29:7–9

Doktrina ug mga Pakigsaad 34:5–7

Doktrina ug mga Pakigsaad 39:19–23

Human sa igong panahon, hangyoa ang mga estudyante sa pag-atubang ngadto sa tawo nga naglingkod tupad kanila ug sa paghisgot unsay komon niini nga mga tudling sa kasulatan. Pangutan-a ang pipila ka estudyante kon unsaon nila sa pag-summarize ang mensahe niini nga mga kasulatan. (Samtang ang mga estudyante mopaambit sa ilang mga ideya, tabangi sila nga mahibalo ug makasabut niini nga baruganan: Samtang mosangyaw kita sa ebanghelyo ngadto sa uban, nagtabang kita sa pag-andam sa kalibutan alang sa Ikaduhang Pag-anhi ni Jesukristo.)

Hangyoa ang klase sa pagtan-aw og balik sa mga seksyon 29, 34, ug 39 diha sa Doktrina ug mga Pakigsaad ug tan-awa ang mga petsa kon kanus-a gihatag ang mga pinadayag. Ipangutana:

  • Unsa ka dali human sa pag-organisar sa Simbahan nga ang Ginoo misugod sa pagtudlo sa baruganan nga bag-o lang gihisgutan?

Hangyoa ang usa ka estudyante sa pagbasa sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles:

Elder Neil L. Andersen

“Gikan sa unang mga adlaw sa Pagpahiuli, ang mga Kaigsoonan seryoso kaayo sa ilang buluhaton sa pagsangyaw sa ebanghelyo. Niadtong 1837, pito pa lamang ka tuig human sa pag-organisar sa Simbahan, atol sa panahon sa kakabus ug pagpanggukod, ang mga misyonaryo gipadala aron itudlo ang ebanghelyo didto sa England. Sa nagsunod nga pipila ka katuigan, ang mga misyonaryo nagsangyaw didto sa nagkalainlaing mga dapit sama sa Austria, French Polynesia, India, Barbados, Chile, ug sa China.

Gipanalanginan sa Ginoo kini nga buhat, ug ang Simbahan na-establisar sa tibuok kalibutan. … Bisan asa sa kalibutan adunay matarung nga mga misyonaryo nga nagpamatuod kabahin sa Manluluwas. Hunahunaa ang espirituhanong gahum sa 52,000 ka mga misyonaryo, hinatagan sa Espiritu sa Ginoo, lig-ong namahayag nga “walay lain nga ngalan nga gihatag ni lain nga mga agianan ni mga paagi diin ang kaluwasan modangat … , lamang diha ug pinaagi sa ngalan ni Kristo’ [Mosiah 3:17]. … Ang kalibutan giandam na alang sa Ikaduhang Pag-anhi sa Manluluwas tungod sa buhat sa Ginoo pinaagi sa Iyang mga misyonaryo” (“Pag-andam sa Kalibutan alang sa Ikaduhang Pag-anhi,” Liahona, Mayo 2011, 51).

Hisguti ang mosunod:

  • Sa unsang paagi ang mga mensahe nga gitudlo sa mga misyonaryo sa Simbahan nag-andam sa katawhan alang sa Ikaduhang Pag-anhi ni Jesukristo?

  • Nganong ang Pagpahiuli sa ebanghelyo gikinahanglan sa dili pa ang Manluluwas moanhi pag-usab sa kalibutan?

I-display ang mosunod nga pamahayag ni Presidente Joseph F. Smith (1838–1918), ug dapita ang usa ka estudyante sa pagbasa niini og kusog:

Presidente Joseph F. Smith

“Ang ebanghelyo nagtudlo sa mga tawo nga magmapainubsanon, matinud-anon, matinuuron ug matarung sa atubangan sa Ginoo ug sa matag usa, ug agig tugbang maingon nga ang mga baruganan niini gipatuman maingon man usab ang kalinaw ug pagkamatarung molungtad ug matukod diha sa yuta, ug ang sala, panagbangi, pagpaagas sa dugo ug pagkadautan sa tanang matang mahunong, ug ang yuta mahimong putli ug mahimong haum nga puy-an sa langitnong mga linalang; ug sa Ginoo nga atong Dios nga moanhi ug mopuyo diha, nga iyang buhaton panahon sa Kaliboan” (Mga Pagtulun-an sa mga Presidente sa Simbahan: Joseph F. Smith [1998], 479).

“Ang Simbahan ni Jesukristo sa mga Santos sa Ulahing mga Adlaw … naghunahuna niini isip kabahin sa misyon niini aron sa pag-andam og agianan alang sa tinuod ug mahimayaon nga pag-abut sa Anak sa Dios nganhi sa yuta, sa pagmando ibabaw niini ug mopuyo uban sa Iyang katawhan” (Mga Pagtulun-an: Joseph F. Smith, 479).

Ipangutana ang mosunod:

  • Atol niini nga leksyon, unsa nga mga hunahuna o espirituhanong mga impresyon ang inyong nasinati kabahin sa responsibilidad sa Simbahan ug sa mga miyembro niini sa pagtabang sa pag-andam sa kalibutan alang sa Ikaduhang Pag-anhi?

  • Sa unsang paagi kaha nga ang pagtabang sa uban nga mangandam alang sa Ikaduhang Pag-anhi makatabang usab kaninyo sa pagpangandam?

Sa pagtapos sa leksyon, dapita ang mga estudyante sa pagpaambit sa unsay ilang nahimo sa pagpaambit sa mensahe sa Pagpahiuli niadtong dili sama nato og tinuohan.

Mga Basahunon sa Estudyante