Pagbiya sa Nauvoo ug ang Panaw padulong sa Kasadpan

Ubos sa dinasig nga pagpangulo ni Brigham Young, ang mga Santos nahuman sa pagtukod sa Templo sa Nauvoo, diin mihimo sila og sagradong mga pakigsaad sa wala pa mosugod sa ilang lisud nga panaw ngadto sa ilang bag-ong pinuy-anan sa Rocky mountains. Kini nga mga pakigsaad sa templo mihatag sa mga Santos og kalig-on ug inspirasyon samtang nag-atubang sila og kalisdanan sa ilang panaw. Isip manununod sa kabilin niining matinud-anong mga Santos, makakat-on kita gikan sa ilang mga ehemplo ug maandam ang agianan aron ang uban makatagamtam sa mga panalangin sa ebanghelyo.

Background nga Basahunon

Gordon B. Hinckley, “True to the Faith,” Ensign, Mayo 1997, 65–67.
M. Russell Ballard, “You Have Nothing to Fear from the Journey,” Ensign, Mayo 1997, 59–61.
Church History in the Fulness of Times Student Manual, 2nd ed. (manwal sa Church Educational System, 2003), 302–14, 329–36.

Mga Sugyot alang sa Pagtudlo

Ang Pagkahuman sa Templo sa Nauvoo

Pag-display og litrato sa orihinal nga Templo sa Nauvoo, o paggamit og litrato sa bag-ong Templo sa Nauvoo Illinois (tan-awa sa Libro sa mga Hulagway sa Ebanghelyo [2009], nu. 118). Sultihi ang mga estudyante nga human mibiya sa Nauvoo ang mga Santos sa Ulahing mga Adlaw, ang templo nga ilang gitukod naguba sa sulod tungod sa sunog niadtong 1848 ug dayon hapit magun-ob sa hingpit tungod sa usa ka buhawi niadtong 1850. Paglabay sa mga 150 ka tuig, usa ka bag-ong templo ang gitukod nga susama gayud tan-awon sa orihinal ug gipahinungod niadtong Hunyo 2002.

Ipasabut nga human sa pagkamartir ni Joseph Smith, ang mga Santos mitrabaho ubos sa direksyon sa Korum sa Napulog Duha ka mga Apostoles aron mahuman ang orihinal nga Templo sa Nauvoo sa pinakadali nga mahimo. I-display ang mosunod nga mga pamahayag ug dapita ang usa ka estudyante sa pagbasa niini og kusog. Dapita ang klase sa pagtimaan sa mga sakripisyo nga gihimo sa mga Santos sa pagtukod sa Templo sa Nauvoo:

“Sobra sa 1,000 ka mga lalaki ang motrabaho matag ikanapulo nga adlaw. Si Louisa Decker, usa ka batang babaye, nadasig nga ang iyang inahan mibaligya sa iyang china nga mga plato ug maanindot nga kutson nga higdaanan isip iyang donasyon sa templo. Ang ubang mga Santos sa Ulahing mga Adlaw mihatag og mga kabayo, mga karomata, mga baka, mga baboy, ug lugas aron itabang sa pagtukod sa templo. Ang mga babaye sa Nauvoo gihangyo sa pag-tampo sa ilang mga sinsilyo alang sa pundo sa templo” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa Mga Santos sa Ulahing mga Adlaw [1996], 72).

Si Elizabeth Terry Kirby Heward mihatag sa bugtong kabtangan nga mahimo niyang mahatag—ang relo nga gipanag-iya sa iyang bana, kinsa bag-ohay lang namatay. “Ako kadtong gihatag aron sa pagtabang sa Templo sa Nauvoo ug ang bisan unsa pa nga mahimo nakong mahatag ug ang akong katapusang pipila ka mga dolyar, nga ang tanan nagkantidad og dul-an $50” (gikutlo diha sa Carol Cornwall Madsen, In Their Own Words: Women and the Story of Nauvoo [1994], 180).

Ipasabut nga tungod sa nagkadako nga pagpanglutos sa mga Santos ug sa mga hulga gikan sa mga kaaway sa Simbahan, ang mga lider sa Simbahan mipahibalo niadtong Septyembre 24, 1845, nga ang mga Santos mobiya sa Nauvoo sa mosunod nga tingpamulak. Pangutan-a ang mga estudyante:

Sa unsang paagi kaha nga ang desisyon nga mobiya sa Nauvoo tingali nakaapekto sa mga paningkamot sa mga Santos sa paghuman sa templo?

Ipasabut sa mga estudyante nga bisan tuod ang mga Santos nasayud nga kinahanglan silang mobiya sa Illinois, gidugangan nila ang ilang mga paningkamot sa paghuman sa templo sa dili pa sila mobiya. Ang mga kwarto sa templo gipahinungod sa pagkahuman dayon niini aron ang mga ordinansa mapahigayon sa labing sayo nga mahimo. Sa wala pa siya mamatay, si Propeta Joseph Smith mipahigayon sa seremonya sa endowment sa templo ngadto sa usa ka gamay nga pundok sa mga lalaki ug babaye. Niadtong Disyembre 10, 1845, kini nga mga lalaki ug babaye misugod sa pagpahigayon sa mga ordinansa sa templo ngadto sa ubang mga miyembro diha sa gipahinungod nga mga kwarto sa templo. Dapita ang usa ka estudyante sa pagbasa og kusog sa mosunod nga duha ka mga paragraph, nga naghulagway sa mga paningkamot sa mga Santos ug sa ilang mga lider aron sa pagsiguro nga ang pinakadaghang tawo kutob sa mahimo makadawat sa mga ordinansa sa templo sa dili pa mobiya sa Nauvoo:

Gikan sa 1844 hangtud sa 1846, si Presidente Young ug ang Napulog Duha mihimo sa paghuman sa Templo sa Nauvoo nga usa ka dinaliang prayoridad. Ang mga endowment ug mga sealing gipahigayon didto sa wala pa mahuman ang pagtukod. Si Brigham Young (1801–77) mirekord: “Kini mao ang tinguha nga gipakita sa mga Santos nga makadawat sa mga ordinansa [sa Templo], ug mao ang among tinguha sa pagpangalagad ngadto kanila, nga akong gigahin ang akong kaugalingon sa hingpit ngadto sa buhat sa Ginoo diha sa Templo gabii ug adlaw, nga dili gani matulog sobra sa upat ka oras, sa kasagaran, matag adlaw, ug mopauli makausa sa usa ka semana” (sa History of the Church, 7:567).

Agig dugang sa mga tawo nga mitrabaho sa templo, “traynta y sais ka mga babaye nahimong mga ordinance worker sa Templo sa Nauvoo, nagtrabaho sa tanang oras panahon sa tingtugnaw sa 1845–46 aron sa pagpahigayon sa mga ordinansa ngadto sa labing daghan nga mahimo sa dili pa molalin. ‘Mitrabaho ko sa Templo kada adlaw nga walay hunong hangtud nga sirad-an kini,’ nahinumdom si Elizabeth Ann Whitney, usa sa traynta y sais. ‘Akong gitugyan ang akong kaugalingon, akong panahon ug atensyon niana nga misyon.’ Dinosena nga laing mga babaye nanglaba ug miandam sa mga pagkaon nga mipatunhay sa pisikal nga paagi nianang talagsaong kalihokan” (Carol Cornwall Madsen, “Faith and Community: Women of Nauvoo,” sa Joseph Smith: The Prophet, The Man, ed. Susan Easton Black and Charles D. Tate Jr. [1993], 233–34).

Ipasabut nga tali sa Disyembre 10, 1845 ug sa Pebrero 7, 1846—ang petsa diin ang mga Santos misugod sa pagbiya alang sa ilang panaw ngadto sa kasadpan—gibana-bana nga mga 5,615 ka mga Santos ang nakadawat sa ordinansa sa endowment diha sa Templo sa Nauvoo ug daghang mga pamilya ang na-seal didto.

Unsay atong makat-unan gikan sa mga sakripisyo sa mga Santos aron mahuman ang templo, bisan kon nasayud sila nga sa dili madugay mobiya sila sa Nauvoo? (Ang mga estudyante mahimong mahibalo og lain-laing mga baruganan, sama sa mosunod: Ang pagdawat sa mga ordinansa sa templo angay lang sa tanan natong matarung nga paningkamot ug sakripisyo. Ikonsiderar ang pagsulat niini diha sa pisara aron sa paghatag og gibug-aton.)
Sa unsang mga paagi kaha nga ang pagdawat og mga ordinansa sa templo tingali miandam niadtong mibiya sa Nauvoo alang sa ilang panaw sa sobra sa 1600 ka kilometro aron mangita og kadangpan diha sa kasadpang Estados Unidos?

Aron motabang sa pagtubag niini nga pangutana, i-display ang mosunod nga mga pamahayag gikan ni Sister Sarah Rich ug Elder Robert D. Hales sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini og kusog:

“Kay kon dili pa tungod sa hugot nga pagtuo ug kahibalo nga gitugyan ngari kanamo didto sa templo pinaagi sa impluwensya ug tabang sa Espiritu sa Ginoo, ang among biyahe susama ra unta sa pag-ambak ngadto sa kangitngit” (Sarah Rich, gikutlo diha sa Anak nga mga Babaye sa Akong Gingharian: Ang Kasaysayan ug Buhat sa Relief Society [2011], 36).

“Ang atong mga katigulangan nga pioneer na-seal isip mga pamilya didto sa Nauvoo. Ang ilang mga pakigsaad sa Ginoo didto sa Nauvoo Temple mao ang ilang proteksyon panahon sa ilang panaw sa kasadpan, ingon man alang sa matag usa nato karon ug sa tibuok natong kinabuhi. …

“Alang niining unang mga Santos, ang ilang pag-apil sa mga ordinansa sa templo importante sa ilang mga pagpamatuod samtang sila nag-atubang sa kalisdanan, sa masuk-anong mga tawo, nga gipapahawa sa komportable nga mga panimalay sa Nauvoo, ug sa taas ug lisud nga biyahe sa unahan. Sila natugahan og gahum diha sa balaan nga templo. Ang bana ug asawa na-seal sa usag usa. Ang mga anak na-seal ngadto sa ilang mga ginikanan. Daghan kanila ang namatyan og mga miyembro sa pamilya sa ilang pagpadulong, apan sila nasayud nga dili kadto ang katapusan para kanila. Sila na-seal na sa templo hangtud sa kahangturan” (Robert D. Hales, “Mga Panalangin sa Templo,” Liahona, Peb. 2014, 4).

Pangutan-a ang mga estudyante:

Unsa ang epekto sa pagkadawat sa mga ordinansa sa templo diha sa unang mga Santos sa Ulahing mga Adlaw kinsa napugos sa paghimo sa taas nga panaw paingon sa kasadpan? (Samtang ang mga estudyante mopaambit sa ilang mga tubag, tabangi sila nga makasabut sa mosunod nga baruganan: Ang mga ordinansa sa templo makahatag kanato og proteksyon ug kalig-on kon mag-atubang kita og mga panahon sa kalisdanan.)
Sa unsang paagi ang pagsimba sa templo mipanalipud ug milig-on kaninyo o niadtong inyong kaila sa mga panahon sa pagsulay?

Awhaga ang mga estudyante sa pagpamalandong kon unsay ilang buhaton aron makakita og mas dakong espiritwal nga proteksyon ug kalig-on pinaagi sa pagsimba diha sa balay sa Ginoo.

Doktrina ug mga Pakigsaad 136

Ang mga instruksyon sa Ginoo niadtong mipanaw ngadto sa kasadpan

map, Paingon sa Kasadpan nga Kalihokan sa Simbahan

Dapita ang mga estudyante sa pagpakli ngadto sa Mga Mapa sa Kasaysayan sa Simbahan, nu. 6, “Ang Paingon sa Kasadpan nga Kalihokan sa Simbahan,” ug hangyoa sila sa pagpangita sa Nauvoo ug sa Winter Quarters. Ipasabut nga tungod sa sobrang ulan ug sa dili igo nga mga supply, ang mga Santos nga mibiya sa Nauvoo sa Pebrero 1846 migahin og upat ka bulan sa pagbiyahe sa 482 ka kilometro tabok sa Iowa. Niining higayona, sobra sa 500 ka mga Santos sa Ulahing mga Adlaw nga kalalakin-an—kinsa ang nailhan isip ang Mormon Battalion—misanong sa panawagan ni Presidente Brigham Young nga magpalista sa Kasundalohan sa Estados Unidos aron moserbisyo panahon sa gubat sa Estados Unidos batok sa Mexico. Ang uban nga mga lalaki giubanan sa ilang mga asawa ug mga anak. Ang ilang pagserbisyo mokita og kwarta nga makatabang sa kabus nga mga miyembro sa Simbahan sa pagpanaw paingon sa kasadpan, apan daghang mga pamilya ang walay mga bana ug mga amahan sa usa ka bahin sa ilang panaw padulong sa kasadpan. Tungod niini nga mga rason, ang mga lider sa Simbahan mideterminar nga dili mopadayon sa kasadpan ngadto sa Rocky Mountains hangtud sa tingpamulak sa 1847. Ang mga Santos mipuyo sa dapit nga gitawag nila og Winter Quarters. Didto nadawat ni Brigham Young ang pinadayag nga narekord diha sa Doktrina ug mga Pakigsaad 136.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 136:1–5. Hangyoa ang klase sa pagsunod, nga mangita kon unsay gisugo sa Ginoo nga buhaton sa mga Santos aron mangandam sa pagpadayon sa ilang panaw padulong sa kasadpan.

Sa unsang paagi i-organisar ang mga pundok? Sa unsang paagi kaha kini nga organisasyon makatabang sa mga Santos sa ilang panaw?
Sa unsang paagi kini nga organisasyon susama sa paagi nga ang Simbahan gi-organisar karon? (Human makatubag ang mga estudyante, mahimo nimong isulat ang mosunod nga kamatuoran diha sa pisara: Ang Ginoo mi-organisar sa Iyang mga Santos ngadto sa mga grupo aron ang matag tawo magiyahan ug maatiman.)
Unsa ang gisugyot sa bersikulo 4 kon sa unsang paagi ang mga Santos makadawat og kalig-on sa ilang mga paningkamot sa pagtuman sa kabubut-on sa Ginoo?

I-assign ang mga estudyante nga hilum nga magtuon sa Doktrina ug mga Pakigsaad 136:6–11, nga mangita sa mga paagi nga ang mga Santos kinahanglan nga maorganisar aron sa pag-atiman sa mga panginahanglan sa usag usa ug sa pagtabang sa kabus ug timawa panahon sa panaw padulong sa kasadpan. Human sa igong panahon, ikonsiderar ang pagpangutana sa mosunod aron sa paggiya sa diskusyon:

Unsa nga mga pulong diha sa mga bersikulo 6–11 ang nagpakita kon sa unsang paagi ang mga Santos kinahanglang moamuma sa usag usa ug alang niadtong nanginahanglan? (Mahimo nimong hatagan og gibug-aton ang pulong nga “pag-andam” sa mga bersikulo 6, 7, ug 9. Mohatag kini og atensyon sa kahanas sa pagtuon sa kasulatan nga magkat-on sa pag-ila sa mga pabalik-balik.)
Sumala sa bersikulo 11, unsa ang mga saad sa Ginoo niadtong nagtinguha sa pagtabang sa uban ug pag-andam sa agianan alang kanila? (Samtang motubag ang mga estudyante, isulat diha sa pisara ang mosunod nga baruganan: Ang Ginoo mopanalangin kanato kon motabang kita sa uban ug moandam sa agianan alang kanila.)
Kinsa ang miandam sa agianan alang kaninyo aron matagamtam ang mga panalangin sa ebanghelyo? Unsay ilang gibuhat sa pag-andam sa agianan alang kaninyo?

Mahimo nimong ipasabut nga ang mga pulong nga unang pumupuyo [pioneer] mahimong mahulagway isip usa ka tawo nga nag-una aron sa pag-andam o pagbukas og agianan nga sundon sa uban, nagpasabut nga kitang tanan mahimong mga pioneer sa pipila ka mga paagi. Hatagi ang mga estudyante og panahon sa pagpamalandong kon unsay ilang mahimo sa pagtabang sa uban ug sa pag-andam sa agianan aron sila makatagamtam sa mga panalangin sa ebanghelyo. Dapita ang pipila ka mga estudyante sa pagpaambit sa ilang mga hunahuna. Pagpamatuod nga ang Ginoo nagtinguha nga maningkamot kita sa tibuok natong kinabuhi nga motabang sa pag-andam sa agianan alang sa matag usa sa Iyang mga anak nga modawat sa ebanghelyo ug mobalik og puyo uban Kaniya.

Ipasabut nga ang mga Santos misunod sa mga sugo sa Ginoo pinaagi sa pagtabang sa usag usa ug sa pag-andam sa agianan alang niadtong nagsunod kanila. Ang unang grupo sa mga pioneer mibiya sa Winter Quarters niadtong Abril 5, 1847. Mibiyahe sila og sobra sa 1,600 ka kilometro ug miabut sa Walog sa Salt Lake sa ulahing bahin sa Hulyo 1847. Niadtong Hulyo 24, 1847, si Presidente Brigham Young misulod sa walog ug nakadawat og kumpirmasyon nga nakaplagan na sa mga Santos ang ilang bag-ong panimalay.

I-display ang mosunod nga pamahayag ni Elder William R. Walker, kanhi sakop sa Seventy, ug hangyoa ang usa ka estudyante sa pagbasa niini og kusog:

“Kaliwat man kamo o dili sa mga pioneer, ang panulundon sa pagtuo ug sakripisyo sa Mormon pioneer inyong panulundon. Usa kini ka halangdong panulundon sa Ang Simbahan ni Jesukristo sa mga Santos sa Ulahing mga Adlaw” (“Pagpuyo nga Matinud-anon sa Tinuohan,” Liahona, Mayo 2014, 97).

Ngano kaha nga importante alang sa matag miyembro sa Simbahan nga makasabut nga ang “panulundon sa pagtuo ug sakripisyo sa Mormon pioneer” ilang panulundon, bisan unsay ilang kagikan?
Sa unsang mga paagi ang pagkat-on mahitungod sa panaw sa mga Mormon pioneer makadasig sa mga miyembro sa Simbahan karon sa ilang mga paningkamot sa pagserbisyo sa uban ug pagtabang kanila sa ilang panaw balik sa Langitnong Amahan?

I-display ang mosunod nga pamahayag gikan ni Presidente Gordon B. Hinckley (1910–2008), ug hangyoa ang usa ka estudyante sa pagbasa niini og kusog:

“Nagbarug kita karon isip mga nakadawat sa dakong paningkamot [sa mga pioneer]. Nanghinaut ko nga kita mapasalamaton. Manghinaut ko nga magbaton kita diha sa atong mga kasingkasing og lawom nga pagbati sa pagpasalamat alang sa tanan nilang nahimo alang kanato. …

“Minahal ko nga mga kaigsoonan, pagkabulahan nato! Pagkatalagsaon sa atong kabilin! Naglakip kini og sakripisyo, pag-antus, kamatayon, panan-awon, hugot nga pagtuo, ug kahibalo ug pagpamatuod sa Dios nga Mahangturong Amahan ug sa Iyang Anak, ang nabanhaw nga Ginoong Jesukristo. …

“Labi natong napasidunggan kadtong nag-una kanato kon moserbisyo kita og maayo diha sa kawsa sa kamatuoran” (“True to the Faith,” Ensign, Mayo 1997, 66–67).

Pahinumdumi ang mga estudyante nga ang matag miyembro sa Simbahan napanalanginan sa uban kinsa miandam sa agianan alang kanila aron makatagamtam sa mga panalangin sa ebanghelyo. Awhaga ang mga estudyante sa pagkonsiderar kon unsay ilang mabuhat aron sa pag-andam sa uban, lakip sa ilang kaliwatan, nga magpuyo diha sa hugot nga pagtuo ug pagkamasulundon ngadto sa Langitnong Amahan ug ni Jesukristo.

Mga Basahunon sa Estudyante

Doktrina ug mga Pakigsaad 136.
Gordon B. Hinckley, “True to the Faith,” Ensign, Mayo 1997, 65–67.
“Hugot nga Pagtuo sa Matag Lakang,” kapitulo 6 sa Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw (1996), 85–99.