Mga Pagtulun-an sa Ebanghelyo didto sa Nauvoo

Ang unang mga katuigan nga gigahin sa mga Santos sa Nauvoo, Illinois, gimarkahan sa kalinaw ug kalamboan. Niining panahona si Joseph Smith nakadawat og mga pagpadayag ug dayon mitudlo ug miklaro sa pipila ka mga doktrina nga anaa ra sa Ang Simbahan ni Jesukristo sa mga Santos sa Ulahing mga Adlaw. Naglakip kini sa katuyoan sa mga templo, sa atong balaang potensyal nga mahimong sama sa Langitnong Amahan, ug sa ubang mga doktrina nga gitudlo diha sa Mga Artikulo sa Hugot nga Pagtuo. Kini nga leksyon makatabang sa mga estudyante nga makasabut sa kahalangdon ni Propeta Joseph Smith ingon man usab sa atong balaanong potensyal.

Background nga Basahunon

“Dios ang Amahan sa Kahangturan,” kapitulo 2 sa Mga Pagtulun-an sa mga Presidente sa Simbahan: Joseph Smith (2007), 43–51.
“Doctrinal Developments in Nauvoo,” kapitulo 20 sa Church History in the Fulness of Times Student Manual, 2nd ed. (manwal sa Church Educational System, 2003), 251–62.
“Becoming Like God,” Gospel Topics, lds.org/topics.

Mga Sugyot alang sa Pagtudlo

Mga Artikulo sa Hugot nga Pagtuo

Importante nga mga pamahayag sa mga doktrina sa ebanghelyo

Ipasabut nga didto sa Nauvoo, Illinois, si Joseph Smith mihimo og sulat ngadto ni John Wentworth, ang editor sa usa ka pamantalaan nga gitawag og Chicago Democrat, kinsa nangayo og impormasyon mahitungod sa mga Mormon. Diha sa sulat, ang Propeta miistorya sa kasaysayan sa mga Santos sa Ulahing mga Adlaw uban sa usa ka mubo nga lista sa doktrinal nga mga tinuohan nga sa kaulahian nailhan isip ang Mga Artikulo sa Hugot nga Pagtuo. (Ang tibuok sulat gipakita diha sa Mga Pagtulun-an sa mga Presidente sa Simbahan: Joseph Smith [2007], 530–40.)

I-display ang mosunod nga pamahayag ni Elder L. Tom Perry sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“[Ang Mga Artikulo sa Hugot nga Pagtuo] kauban sa labing importante ug sigurado nga maoy labing husto nga mga pahayag sa doktrina sa Simbahan. Kon inyong gamiton kini isip giya nga motudlo sa inyong mga pagtuon sa ebanghelyo ni Jesukristo, mahimo kamong andam sa pagpahayag sa inyong pagsaksi sa gipahiuli nga kamatuoran ngadto sa kalibutan. Makapahayag kamo sa yano, madayganon, ug kinasingkasing nga paagi sa sukaranang mga tinuhoan nga inyong gimahal isip miyembro sa Ang Simbahan ni Jesukristo sa mga Santos sa Ulahing mga Adlaw” (“Ang mga Doktrina ug mga Baruganan nga Anaa sa mga Artikulo sa Hugot nga Pagtuo,” Liahona, Nob. 2013, 48).

Unsaon ninyo pag-summarize ang gitudlo ni Elder Perry? (Samtang ang mga estudyante mopaambit sa ilang summary nga mga pamahayag, tabangi sila nga makasabut niini nga kamatuoran: Samtang makat-on kita sa mga doktrina nga gitudlo diha sa Mga Artikulo sa Hugot nga Pagtuo, mahimo kitang mas andam sa pagpahayag sa atong mga gituohan ngadto sa uban.)
Kanus-a kamo nakagamit sa Mga Artikulo sa Hugot nga Pagtuo aron sa pagtabang sa uban nga makasabut sa ebanghelyo?

Dapita ang klase sa pagpakli ngadto sa Mga Artikulo sa Hugot nga Pagtuo ug sa pagbasa niini sa hilum. Human sa igong panahon, hisguti ang mosunod nga mga pangutana:

Unsa nga artikulo sa hugot nga pagtuo ang imong labing naganahan ug ngano?
Sa unsang paagi ang mga doktrina diha sa Mga Artikulo sa Hugot nga Pagtuo makatabang sa paggiya kaninyo ug sa paglig-on sa inyong pagpamatuod nga si Joseph Smith usa ka propeta sa Dios?

Doktrina ug mga Pakigsaad 124:25–28, 37–42

Pagpahiuli sa mga ordinansa sa templo

Ipasabut nga human ang mga Santos nakaestablisar sa ilang mga kaugalingon didto sa Nauvoo, Illinois, si Propeta Joseph Smith nakadawat og sugo sa pagtukod og templo. Sama sa templo nga gitukod didto sa Kirtland, Ohio, kini nga tahas nagkinahanglan og dakong sakripisyo gikan sa mga Santos sa Ulahing mga Adlaw.

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 124:25–28, 37–42. Hangyoa ang klase sa pagsunod, nga mangita sa mga pagtulun-an sa Ginoo kon nganong nagkinahanglan og templo ang mga Santos. Sa dili pa moanalisar niini nga mga bersikulo, ipasabut nga naghisgot kini sa tabernakulo nga gitukod ni Moises ug sa iyang mga tawo. Ang mga tawo ni Moises wala magpahigayon og mga bunyag alang sa patay. Walay buhat alang sa mga patay ang gipahigayon hangtud nga ang Manluluwas mipasiugda niana nga buhat sa kalibutan sa espiritu human sa Iyang kamatayon. Dayon pangutan-a ang mga estudyante:

Sumala sa mga pagtulun-an sa Ginoo niini nga mga bersikulo, nganong nagkinahanglan man og templo ang mga Santos sa Nauvoo? (Samtang motubag ang mga estudyante, ipasabut og maayo kini nga doktrina: Ang ubang makaluwas nga mga ordinansa dawaton lamang sa Ginoo kon ipahigayon sa mga templo.)

Ipasabut sa mga estudyante nga ang Templo sa Kirtland “gitukod alang sa nag-unanga katuyoan sa pagpahiuli sa mga yawe sa awtoridad” (Joseph Fielding Smith, Doctrines of Salvation,comp. Sa Templo sa Nauvoo, kini nga mga yawe sa priesthood gigamit aron sa pagpahigayon sa makaluwas nga mga ordinansa alang sa mga buhi ug pagpuli nga mga bunyag alang sa patay. Sa katapusang duha ka tuig sa iyang kinabuhi, si Joseph Smith mipaila sa endowment sa templo ngadto sa gamay nga grupo sa matinud-anong mga miyembro. Siya usab mipaila sa ordinansa sa pag-seal sa bana ug asawa alang sa kahangturan.

Unsa nga mga ordinansa sa templo ang gihisgutan diha sa Doktrina ug mga Pakigsaad 124:39?

Hangyoa ang usa ka estudyante sa pagbasa og kusog sa mosunod nga pamahayag. Dapita ang klase sa pagpaminaw kon nganong ang mga ordinansa sa templo importante sa plano sa Langitnong Amahan:

“Agi og tubag sa sugo sa Ginoo [sa pagtukod og templo sa Nauvoo], ang Propeta ug ang mga Santos milihok dayon kutob sa mahimo sa pagpadayon sa pagtukod og balay ngadto sa Ginoo. Apan ang Propeta nakaamgo nga ang pagtukod mokabat og mga katuigan, ug siya nasayud nga ang mga Santos nagkinahanglan sa hingpit nga panalangin sa templo. Ang sangputanan, pagka-Mayo 4, 1842, bisan kon ang templo wala makompleto, si Joseph Smith nangalagad sa endowment ngadto sa gamay nga pundok sa matinud-anon nga kaigsoonan.

“Ang grupo nagtigum sa usa ka dako nga kwarto taas sa Red Brick Store sa Propeta. …

“Ang kasaysayan sa Propeta nag-rekord: “Akong gigahin ang adlaw diha sa ibabaw nga bahin sa tindahan, … sa konseho uban ni Heneral James Adams, sa Springfield, Patriarch Hyrum Smith, mga Bishop Newel K. Whitney ug George Miller, ug Presidente Brigham Young ug mga Elder Heber C. Kimball ug Willard Richards, nagtudlo kanila sa mga baruganan ug kapunongan sa Priesthood, mihimo sa mga paghugas ug mga pagdihog, mga endowment ug ang pagtugyan sa mga yawe kalabut sa Aaronic Priesthood, ug hangtud ngadto sa pinakataas nga kapunongan sa Melchizedek Priesthood, nagpresentar sa han-ay mahitungod sa Karaan nga mga Panahon, ug ang tanan niadto nga mga plano ug mga baruganan diin si bisan kinsa makahimo sa pag-angkon sa kahingpitan niadtong mga panalangin nga giandam na alang sa Simbahan sa Unang Natawo, ug moduol ug mag pabilin diha sa presensya sa Elohim diha sa mahangturong mga kalibutan’” (Mga Pagtulun-an: Joseph Smith, 499, 501).

Pangutan-a ang mga estudyante:

Nganong kinahanglan man ang pagpahiuli sa mga ordinansa sa templo?

Samtang motubag ang mga estudyante, dugangi ang ilang pagsabut pinaagi sa pagpaambit sa mosunod nga pamahayag ni Elder Robert D. Hales sa Korum sa Napulog Duha ka mga Apostoles:

“Ang nag-unang katuyoan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian. Ang mga ordinansa sa templo mogiya kanato ngadto sa atong Manluluwas ug mohatag kanato sa mga panalangin nga moabut kanato pinaagi sa Pag-ula ni Jesukristo” (“Ang mga Panalangin sa Templo,” Liahona, Okt. 2009, 26).

Sa unsang paagi nga napanalanginan ang inyong kinabuhi pinaagi sa pagpahiuli sa mga ordinansa sa templo?

Dapita ang mga estudyante sa pagpamalandong sa umaabut nga semana kon sa unsang paagi nga mahimo nilang taas nga prayoridad sa ilang kinabuhi ang pagsimba diha sa balay sa Ginoo.

Salmo 82:6; Mateo 5:48; Juan 10:32–34; Mga Taga-Roma 8:16–17; 2 Pedro 1:3–4; 1 Juan 3:2–3; Doktrina ug mga Pakigsaad 93:11–20; 132:20

Ang atong balaanong potensyal

Ipasabut nga ang Biblia nagrekord sa mga pulong sa karaang mga propeta kinsa misulat mahitungod sa atong balaanong potensyal. Isulat ang mosunod nga mga pakisayran sa kasulatan diha sa pisara, ug dapita ang mga estudyante sa pagbasa sa pipila niini ug sa pagpangita kon unsay gitudlo niini mahitungod sa atong mahangturong potensyal: Salmo 82:6; Mateo 5:48; Juan 10:32–34; Mga Taga-Roma 8:16–17; 2 Pedro 1:3–4; 1 Juan 3:2–3. Mahimo nimong awhagon ang mga estudyante sa pag-cross-reference o pagkonektar niini nga mga pakisayran samtang magtuon sila niini.

Human sa igo nga panahon, ipangutana:

Unsay atong makat-unan gikan niini nga mga kasulutan mahitungod sa atong potensyal? (Bisan kon mogamit sila og lain-laing mga pulong, ang mga estudyante kinahanglang makasabut niini nga doktrina: Isip mga anak sa atong Langitnong Amahan, kita adunay potensyal nga mahimong sama Kaniya.)
Unsa nga mga pulong niadto nga mga bersikulo ang naghulagway sa atong balaanong potensyal?

Ipasabut nga ang atong balaanong potensyal gitudlo usab sa modernong kasulatan. Dapita ang usa ka estudyante sa pagbasa og kusog sa Doktrina ug mga Pakigsaad 93:11–13, 19–20 ug Doktrina ug mga Pakigsaad 132:20. Tabangi ang mga estudyante nga makasabut niini nga doktrina: Sama sa Manluluwas, motubo kita gikan sa grasya ug dugang pa nga grasya hangtud nga makadawat kita sa kahingpitan sa Amahan.

Ipasabut nga usa sa labing mahinungdanon nga mga sermon ni Propeta Joseph Smith gihatag panahon sa kinatibuk-ang komperensya sa Simbahan niadtong Abril 1844. Panahon niini nga wali, ang Propeta mihatag og pasidungog ngadto ni Brother King Follett, kinsa bag-o lang namatay nianang panahona. Kini nga pakigpulong nailhan na isip ang King Follett nga diskurso. Paghatag og kopya sa handout nga “Mga Kinutlo gikan sa King Follett nga Diskurso” ngadto sa tanang mga estudyante. Dapita sila sa pagbasa sa mga kinutlo ug sa paglinya sa mga pulong nga nagpasabut nganong kinahanglan kitang magtinguha sa pagsabut sa kinaiya sa Dios.

Mga kinutlo gikan sa King Follett nga Diskurso

Mga Pundasyon sa Pagpahiuli—Leksyon 17

Si Propeta Joseph Smith (1805–44) mitudlo:

“Kon ang usa ka tawo walay makat-unan gawas sa pagkaon, pag-inom ug pagkatulog, ug wala makasabut sa bisan unsa nga mga plano sa Dios, ang mananap nakasabut sa samang mga butang. Kini mokaon, moinom, matulog, ug walay nahibaloan mahitungod sa Dios; pero nakahibalo kini sama kanato, gawas kon kita nakasabut pinaagi sa inspirasyon sa Labaw’ng Makagagahum nga Dios. Kon ang mga tawo dili makasabut sa kinaiya sa Dios, sila wala makasabut sa ilang mga kaugalingon. …

“Ang akong unang tumong mao ang pagsusi sa kinaiya sa bugtong maalamon ug tinuod nga Dios, ug unsang matanga Siya sa pagkatawo. …

“Ang Dios Mismo usa ka tawo kaniadto sama kanato karon, ug nahimaya nga tawo, ug naglingkod sa trono sa kalangitan! Mao kana ang mahinungdanong sekreto. Kon ang tabil pagabuksan karon, ug ang halangdong Dios kinsa nagkontrolar niini nga kalibutan pinaagi sa iyang pagtuyok, ug kinsa nagdumala sa tanang mga kalibutan ug sa tanang mga butang pinaagi sa Iyang gahum, magpakita sa Iyang kaugalingon,—ingnon ko, kon kamo makakita Kaniya karon, makakita kamo Kaniya sama sa porma sa usa ka tawo—sama sa inyong mga kaugalingon sa pagkatawo, imahe, ug sa porma gayud sa usa ka tawo; kay si Adan gilalang sama sa panagway, imahe ug hitsura sa Dios, ug nakadawat og instruksyon, ug nakalakaw ug nakigsulti uban Kaniya, sama sa usa ka tawo nga nakigsulti ug nakighimamat sa usag usa” (Mga Pagtulun-an sa mga Presidente sa Simbahan: Joseph Smith [2007], 46–48).

“Mao kini, ang kinabuhing dayon—nga makaila sa bugtong maalamon og tinuod nga Dios; ug nga kamo kinahanglan makakat-on unsaon nga makahimo sa inyong kaugalingon nga dios, ug aron mahimo nga mga hari ug mga pari ngadto sa Dios, … nga makahimo sa usa ka gamay nga pagtubo, ngadto-ngadto ug magsugod sa gamay ngadto sa pagdako; gikan sa grasya ngadto sa grasya, gikan sa kahimayaan ngadto sa kahimayaan, hangtud nga moabut ang imong pagkabanhaw gikan sa kamatayon, ug makahimo sa pagpuyo diha sa mahangturon nga mga kahayag, nga mahimayaon nga maghari, uban niadtong mga maghari nga may mahangturon nga gahum” (Mga Pagtulun-an: Joseph Smith, 264).

Tabangi ang mga estudyante sa pag-analisar niini nga mga pagtulun-an pinaagi sa pagpangutana:

Nganong importante man alang kanato nga makat-on sa kinaiya ug mga hiyas sa Dios ug sa atong relasyon Kaniya isip atong Langitnong Amahan?
Unsa ang proseso sa pagkahimong sama sa atong Langitnong Amahan?

Aron mapalambo ang pagsabut sa mga estudyante sa ilang balaanong potensyal, i-display ang mosunod nga pamahayag ni Presidente Gordon B. Hinckley (1910–2008). Dapita ang usa ka estudyante sa pagbasa niini og kusog:

“Ang tibuok plano sa ebanghelyo mao ang paggiya kanato paunahan ug pataas ngadto sa mas dagkong kalampusan, gani, sa katapusan, ngadto sa pagka-dios. Kini dakong posibilidad gipamulong ni Propeta Joseph Smith diha sa King Follett nga wali [tan-awa sa History of the Church, 6:302–17] ug gihatagag gibug-aton ni Presidente Lorenzo Snow. Kini mao ang mahinungdanon ug walay sama nga konsepto: Kon unsa ang Dios karon, ang tawo mamahimo! (Tan-awa sa The Teachings of Lorenzo Snow, ed. Clyde J. Williams 1984, 138.)

“Ang atong mga kaaway misaway kanato sa pagtuo niini. Ang atong tubag mao nga kining halangdong konsepto wala gayud mopakaubos sa Dios nga Amahan sa Kahangturan. Siya ang Labing Makagagahum. Siya ang Tiglalang ug Tigdumala sa uniberso. Siya ang labing mahinungdanon sa tanan ug kanunay nga ingon niana. Apan sama ni bisan kinsang yutan-ong amahan nga nangandoy sa tanang kalampusan sa kinabuhi alang sa iyang mga anak, mao usab nga nagtuo ko nga ang atong Amahan sa Langit gusto nga ang iyang mga anak mamahimong sama Kaniya sa kahalangdon ug mobarug tupad kaniya nga nagmasanagon sa diosnong kalig-on ug kaalam” (“Don’t Drop the Ball,” Ensign, Nob. 1994, 48).

Aron sa pag-summarize, pangutan-a ang mga estudyante sa mosunod:

Unsa ang kalainan nga mahimo niini sa atong kinabuhi nga mahibalo niining importanting mga kamatuoran mahitungod sa Langitnong Amahan ug sa atong balaanong potensyal?
Samtang maghunahuna kamo sa unsay atong nahisgutan karon (Mga Artikulo sa Hugot nga Pagtuo, mga ordinansa sa templo, ug ang atong balaanong potensyal), sa unsang paagi ang pagsabut niini nga mga kamatuoran makahatag kaninyo og pagsabut sa kaimportante ni Propeta Joseph Smith? Sa unsang paagi ang pagsabut niini nga mga kamatuoran makatabang kaninyo nga makasabut sa kinaiya sa Dios ug sa inyong relasyon Kaniya isip inyong Amahan sa Langit? (Hatagi ang mga estudyante og panahon sa pagrekord sa ilang mga impresyon pinaagi sa pagsulat.)

Dapita ang mga estudyante sa pagpamatuod o pagpaambit og pipila sa mga impresyon nga ilang gisulat, kon dili kaayo kini personal. Tapusa pinaagi sa pagpaambit sa imong pagpamatuod sa mga doktrina nga gitudlo niini nga leksyon ug ni Propeta Joseph Smith isip usa ka gamhanang tigpadayag.

Mga Basahunon sa Estudyante

Salmo 82:6; Mateo 5:48; Juan 10:32–34; Mga Taga-Roma 8:16–17; 2 Pedro 1:3–4; 1 Juan 3:2–3; Doktrina ug mga Pakigsaad 93:11–22; 124:25–28, 37–42; 132:20–24.
“Dios ang Amahan sa Kahangturan,” kapitulo 2 sa Mga Pagtulun-an sa mga Presidente sa Simbahan: Joseph Smith (2007), 43–51.
“Becoming Like God,” Gospel Topics, lds.org/topics.