Librarya
Leksyon 1: Usa ka Kahibulongan nga Buhat ug usa ka Katingalahan

1

Usa ka Kahibulongan nga Buhat ug usa ka Katingalahan

Pasiuna

Sa tibuok kasaysayan, ang Langitnong Amahan mitapos sa mga panahon sa apostasiya pinaagi sa pagtawag og mga propeta kinsa nakadawat og balaan nga awtoridad sa pagpahiuli sa kahingpitan sa ebanghelyo ug pag-establisar sa Simbahan ni Jesukristo. Si Joseph Smith mao kini nga propeta sa atong dispensasyon. Ang pagsabut kon sa unsang paagi ang Dios naggiya sa Iyang mga tawo ug nag-establisar sa Iyang Simbahan pinaagi sa mga propeta makatabang sa mga estudyante nga makapalambo og mas lawom nga kahibalo sa panginahanglan alang sa usa ka Pagpahiuli ug mas dako nga abilidad sa pagtudlo sa uban kabahin sa Pagpahiuli.

Background nga Basahunon

  • M. Russell Ballard, “Ang Milagro sa Balaang Biblia,” Liahona, Mayo 2007, 80–82.

  • Gordon B. Hinckley, “At the Summit of the Ages,” Ensign, Nob. 1999, 72–74.

  • Neal A. Maxwell, “From the Beginning,” Ensign, Nob. 1993, 18–20.

  • Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 36–42.

Mga Sugyot alang sa Pagtudlo

Amos 8:11–12; Joseph Smith—Kasaysayan 1:5–10

Ang Dakong Apostasiya ug ang panginahanglan alang sa Pagpahiuli

Sugdi ang leksyon pinaagi sa pagsulat sa mosunod diha sa pisara:

Kagutmanan =

Dapita ang usa ka estudyante sa pagbasa og kusog sa Amos 8:11–12. Hangyoa ang klase sa pagsunod ug sa pagtino kon sa unsang paagi ang pulong nga kagutmanan gigamit isip simbolo.

  • Unsa nga matang sa kagutmanan ang gipanagna ni Amos nga mahitabo? (Isulat ang mga tubag sa mga estudyante diha sa pisara tapad sa “Kagutmanan =”.)

  • Unsa ang gipanagna ni Amos nga buhaton sa mga tawo tungod niini nga kagutmanan?

  • Unsa nga ebidensya ang inyong nakita sa kalibutan nga adunay usa ka kagutmanan sa “pagpatalinghug sa mga pulong sa Ginoo”? (Amos 8:11).

Ipasabut nga bisan tuod ang mga panagna nga makita sa Amos 8:11–12 malagmit natuman na sa makadaghang higayon sa tibuok kasaysayan, usa ka importante nga katumanan nailhan isip ang Dakong Apostasiya. Mahimo nimong isugyot nga isulat sa mga estudyante ang Apostasiya, lakip ang Dakong Apostasiya sa margin sa ilang mga kasulatan tupad sa Amos 8:11–12.

I-display ang mosunod nga pamahayag, ug dapita ang usa ka estudyante sa pagbasa niini og kusog. Hangyoa ang mga estudyante sa pagpangita og pipila ka mga hinungdan nga nakaingon sa Dakong Apostasiya.

“Human sa kamatayon ni Jesukristo, ang dautang mga tawo migukod sa mga Apostoles ug sa mga miyembro sa Simbahan ug mipatay sa kadaghanan kanila. Uban sa pagkamatay sa mga Apostoles, ang mga yawe sa priesthood ug ang katungod sa pagpangulo sa priesthood gikuha gikan sa yuta. Ang mga Apostoles mibantay sa mga doktrina sa ebanghelyo nga magpabiling lunsay ug mipatunhay og kahusay ug naghimog sumbanan sa katakus alang sa mga miyembro sa Simbahan. Nga wala ang mga Apostoles, sa ngadto-ngadto ang mga doktrina nangatuis, ug walay pagtugot nga mga pag-usab gihimo diha sa organisasyon sa Simbahan ug sa mga ordinansa sa priesthood, sama sa bunyag ug pagtugyan sa gasa sa Espiritu Santo.

“Nga walay pagpadayag ug katungod sa priesthood, ang mga tawo nagsalig na lang sa tawhanong kaalam sa paghubad sa mga kasulatan ug sa mga baruganan ug mga ordinansa sa ebanghelyo ni Jesukristo. Sayop nga mga hunahuna gitudlo ingon nga tinuod. Kadaghanan sa kasayuran sa tinuod nga pagkatawo ug kinaiya sa Dios Amahan, sa Iyang Anak nga si Jesukristo, ug sa Espiritu Santo nangawala. Ang mga doktrina sa hugot nga pagtuo kang Jesukristo, paghinulsol, bunyag, ug sa gasa sa Espiritu Santo nanga-usab o gipangkalimtan. Ang katungod sa priesthood nga gihatag ngadto sa mga Apostoles ni Kristo nawala na sa yuta” (Isangyaw ang Akong Ebanghelyo: Usa ka Giya sa Misyonaryo nga Pangalagad [2004], 40–41).

  • Sumala niini nga pamahayag, unsa ang pipila ka hinungdan nga nakaingon sa Dakong Apostasiya?

  • Nganong importante man nga masabtan nga ang Dakong Apostasiya tinuod nga nahitabo? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga baruganan: Ang pagkasayud nga adunay usa ka Dakong Apostasiya makatabang kanato nga makasabut sa panginahanglan alang sa Pagpahiuli sa ebanghelyo.)

Ipasabut nga atol niining panahon sa apostasiya, ang Langitnong Amahan mipadayon sa paggamit sa Iyang impluwensya sa kalibutan pinaagi sa Kahayag ni Kristo, nga “gihatag ngadto sa matag tawo” (Moroni 7:16), ug pinaagi sa gahum sa Espiritu Santo, nga nagsaksi nga ang ebanghelyo tinuod (tan-awa sa Giya ngadto sa mga Kasulatan, “Espiritu Santo,” scriptures.lds.org. Gidasig Niya ang mga lalaki ug babaye sa daghang mga kultura nga nagtinguha sa Iyang panabang atol nianang panahona. Ang Kristiyanong mga repormista sama ni Martin Luther ug William Tyndale naningkamot sa pagtabang sa mga Kristiyano nga magpuyo nga mas duol sa tinuod nga mga baruganan nga ilang nakit-an sa Biblia. Ang mga paningkamot sa mga repormista, mga philosopher, ug bisan sa tinahud nga politikanhong mga lider sa Europe ug North America miresulta sa paghatag og dugang nga gibug-aton sa tawhanong dignidad ug kagawasan sa relihiyon sa daghang bahin sa kalibutan. Bisan pa niining importante nga mga kalamboan, ang Dios wala pa hingpit nga mopahiuli sa Iyang Simbahan. (Tan-awa sa Isangyaw ang Akong Ebanghelyo, 53–54.)

I-display ang mosunod nga pamahayag ni Presidente Gordon B. Hinckley (1910–2008), ug dapita ang usa ka estudyante sa pagbasa niini og kusog:

President Gordon B. Hinckley

“Sulod sa daghang mga siglo ang kalangitan nagpabiling sirado. Maayong mga lalaki ug babaye, daghan sila—tinuoray nga halangdon ug buotan nga mga tawo—misulay sa paghusto, pagpalig-on, ug pagpausbaw sa ilang mga sistema sa pagsimba ug sa ilang hinugpong nga mga doktrina. Ngadto kanila ako naghatag sa akong pasidungog ug pagrespeto. Pagkaanindot sa kalibutan tungod sa ilang maisug nga binuhatan. Samtang ako nagtuo nga ang ilang mga buhat dinasig, wala kadto gikahimut-i uban sa pag-abli sa kalangitan, uban sa pagpakita sa Dios” (“Ang Kahibulongang Tukuranan sa Atong Pagtuo,” Liahona, Nob. 2002, 80).

Pahinumdumi ang mga estudyante nga niadtong 1820 ang batan-ong si Joseph Smith nangita sa tinuod nga Simbahan apan wala makakita niini. Dapita ang mga estudyante nga hilum nga mobasa sa Joseph Smith—Kasaysayan 1:5–10, nga mangita sa mga pulong nga naghulagway sa mga hagit nga resulta sa Dakong Apostasiya.

  • Unsa ang pipila ka hugpong sa mga pulong nga gigamit ni Joseph Smith nga nagpasabut ngadto sa espirituhanon nga mga hagit sa iyang panahon?

  • Giunsa paghulagway ni Joseph ang iyang mga pagbati nga miabut isip resulta sa relihiyusong kasamok nga naglibut kaniya?

Pahinumdumi ang mga estudyante nga ang pagpangita ni Joseph Smith sa kamatuoran miresulta sa Unang Panan-awon ug sa iyang tawag isip usa ka propeta. (Pagahisgutan kini sa sunod nga leksyon.) Ipasabut nga ang pagtawag kang Propeta Joseph Smith ug ang Pagpahiuli sa ebanghelyo misunod og sundanan nga giestablisar sa Dios nga gibalik-balik sa tibuok kasaysayan. Sama pananglit, ang pagtawag kang Enoch (tan-awa sa Moises 6:26–32) ug kang Noe (tan-awa sa Moises 8:17–20) misunod niini nga sundanan. I-display ang mosunod nga pagpasabut niini nga sundanan, ug pagdapit og usa ka estudyante sa pagbasa niini og kusog:

“Ang biblikanhong kasaysayan mirekord sa daghang mga higayon nga ang Dios nakigsulti ngadto sa mga propeta, ug naghisgot usab kini sa daghang mga higayon sa apostasiya. Sa pagtapos sa matag yugto sa panahon sa kinatibuk-ang apostasiya, ang Dios mipakita sa Iyang gugma sa Iyang mga anak pinaagi sa pagtawag sa laing propeta ug paghatag kaniya og katungod sa priesthood sa pagpahiuli ug sa pagtudlo sa ebanghelyo ni Jesukristo pag-usab. Sa lintunganay, ang propeta magbarug isip tinugyanan aron modumala sa panimalay sa Dios dinhi sa yuta. Ang ingon nga mga yugto sa panahon nga gipangulohan sa mga propeta maoy gitawag og mga dispensasyon” (Isangyaw ang Akong Ebanghelyo, 38; tan-awa usab sa Giya ngadto sa mga Kasulatan, “Kapaigoan”).

  • Sa unsang paagi ang Pagpahiuli sa ebanghelyo pinaagi ni Joseph Smith nagsunod og sundanan nga makita sa nag-unang mga dispensasyon? (Ang mga estudyante mahimong mogamit og lain-laing mga pulong, apan siguroa nga mahibalo sila sa mosunod nga doktrina: Human sa mga panahon sa kinatibuk-ang apostasiya, ang Dios mitawag og mga propeta ug mihatag kanila og awtoridad sa pagpahiuli ug sa pagtudlo pag-usab sa ebanghelyo. Ang mga estudyante kinahanglang makasabut usab niini nga doktrina: Si Joseph Smith gitawag sa Dios aron sa pagpahiuli sa ebanghelyo alang sa atong dispensasyon.)

  • Sa unsang paagi ang pagsabut niini nga sundanan makatabang ninyo sa pagpasabut sa Pagpahiuli sa ebanghelyo ngadto sa usa ka tawo sa laing tinuohan?

Ipasabut og maayo nga sa Unang Panan-awon, nakat-unan ni Joseph Smith nga walay tinuod nga Simbahan nga anaa sa yuta ug nga ang kahingpitan sa ebanghelyo ni Kristo kinahanglan nga ipahiuli. Bisan og ang Biblia naglangkob og mga panagna kalabut sa Dakong Apostasiya, ang labing importante nga ebidensya nga kini nga apostasiya nahitabo mao ang kamatuoran nga si Joseph Smith gitawag nga mahimong usa ka propeta ug ang kahingpitan sa ebanghelyo gipahiuli.

2 Nephi 27:25–26; Doktrina ug mga Pakigsaad 1:12–30

Ang Pagpahiuli sa ebanghelyo “usa ka kahibulongan nga buhat ug usa ka katingalahan”

Ipasabut nga ang mga kasulatan nagsaysay sa pipila ka rason sa Ginoo sa pagpahiuli sa Iyang ebanghelyo sa yuta sa ulahing mga adlaw.

Dapita ang mga estudyante nga hilum nga mobasa sa panagna ni Isaias kabahin sa Pagpahiuli nga makita sa 2 Nephi 27:25–26, nga mangita sa paghulagway sa Ginoo sa espirituhanong kondisyon sa kalibutan sa panahon sa Pagpahiuli. Mahimo nimong isugyot nga markahan sa mga estudyante ang mga pulong nga naghulagway niining espirituhanong mga kondisyon. (Pahinumdom: Usa sa labing makatabang nga mga paagi aron ang mga estudyante makasabut ug mapabilin ang ilang nakat-unan gikan sa mga kasulatan mao ang pagmarka sa importante nga mga pulong.) Human sa igong panahon, hangyoa ang mga estudyante sa pagpaambit sa unsay ilang nakit-an.

  • Ngano kaha nga ang Pagpahiuli sa ebanghelyo gitawag isip “usa ka kahibulongan nga buhat ug usa ka katingalahan”?

  • Unsa ang inyong nakita nga “kahibulongan” ug “katingalahan” mahitungod sa Pagpahiuli? (Samtang motubag ang mga estudyante, ipasabut nga ang Pagpahiuli sa ebanghelyo isip usa ka “kahibulongan nga buhat ug usa ka katingalahan” maoy usa ka ehemplo sa usa ka pabalik-balik nga tema diha sa Doktrina ug mga Pakigsaad. “Ang mga tema mao ang malukpanon, pabalik-balik, ug makapahiusa nga mga kalidad o ideya” [David A. Bednar, “A Reservoir of Living Water” (Brigham Young University fireside, Peb. 4, 2007), 6, speeches.byu.edu].)

Dapita ang katunga sa klase sa pagtuon sa Doktrina ug mga Pakigsaad 1:12–17, nga mangita sa mga rason nga gihatag sa Ginoo sa pagpahinabo sa Pagpahiuli sa ebanghelyo. Dapita ang laing katunga sa klase sa pagtuon sa Doktrina ug mga Pakigsaad 1:18–30, nga mangita og mga paagi nga ang Pagpahiuli sa ebanghelyo mopanalangin sa mga anak sa Dios. (Pahinumdom: Ang Doktrina ug mga Pakigsaad 1:30 pagatun-an nga mas detalyado sa leksyon 6.)

Human sa igo nga panahon, dapita ang mga estudyante sa pagpaambit sa unsay ilang nakit-an. Siguroa nga nasabtan sa mga estudyante ang mosunod nga kamatuoran: Ang Pagpahiuli sa ebanghelyo makatabang niadtong nanagtuo kang Kristo nga mouswag diha sa pagtuo ug sa pagbuntog sa mga kalamidad sa katapusang mga adlaw.

Basaha og kusog ang mosunod nga pamahayag ni Propeta Joseph Smith (1805–1844):

Prophet Joseph Smith

“[Ang mga propeta naglaum] uban sa malipayon nga pagpaabut sa adlaw diin kita magpuyo; ug gidasig uban sa langitnon ug mahimayaon nga mga pagpaabut nga ilang giawit ug gisulat ug gipanagna kining atong panahon” (Mga Pagtulun-an sa mga Presidente sa Simbahan: Joseph Smith [2007], 221).

  • Nganong ang nangaging mga propeta naglaum sa atong panahon? (Usa ka ideya nga malagmit mailhan sa mga estudyante mao nga ang Pagpahiuli mokatap sa tibuok kalibutan ug moandam sa kalibutan alang sa Ikaduhang Pag-anhi ni Jesukristo.)

Ipakita ang mosunod nga pamahayag ni Presidente Gordon B. Hinckley, ug hangyoa ang pipila ka mga estudyante nga magpuli-puli sa pagbasa niini og kusog:

President Gordon B. Hinckley

“Akong mga kaigsoonan, nakaamgo ba kamo kon unsay ania kanato? Nakaamgo ba kamo sa atong dapit niining talagsaong drama sa kasaysayan sa tawo? Kini nga panahon ang resulta sa tanan nga mga panghitabo kaniadto. …

“… Ang buluhaton sa Makagagahum sa ulahing mga adlaw, nga gipamulong sa karaang mga propeta, nga gipanagna sa mga propeta ug mga apostoles, miabut. Anaa na kini. Tungod sa pipila ka rason nga wala nato masayri, apan sumala sa kaalam sa Dios, gihatagan kita sa pribilehiyo nga moanhi sa yuta niining mahimayaon nga panahon. …

“Tungod sa unsay anaa kanato ug sa unsay atong nahibaloan, kinahanglang mas maayo kita nga mga tawo kay sa unsa kita karon. Kinahanglang mahimo kitang mas Kristohanon, mas mapasayloon, mas matinabangon ug mahunahunaon sa tanang naglibut kanato.

“Anaa kita sa kinatumyan sa kasaysayan sa kalibutan, naapektuhan sa mahinungdanon ug ligdong nga pagsabut sa kasaysayan. Kini ang katapusang dispensasyon diin ang tanan sa nangaging panahon nakatutok. Mopamatuod ug mosaksi ko sa reyalidad ug kamatuoran niining mga butanga” (“At the Summit of the Ages,” Ensign, Nob. 1999, 74).

  • Unsa nga mga hunahuna ug pagbati ang mapukaw diha kaninyo sa pamahayag nga “anaa kita sa kinatumyan sa kasaysayan sa kalibutan”?

  • Kon dili kaayo personal, pagpaambit og kasinatian gikan sa imong kinabuhi nga milig-on sa imong pagpamatuod sa gipahiuli nga ebanghelyo ni Jesukristo.

  • Unsa ang atong mahimo aron mapakita ang atong pasalamat alang sa Pagpahiuli sa ebanghelyo?

Mga Basahunon sa Estudyante