Pasiuna sa Manwal sa Magtutudlo sa Mga Pundasyon sa Pagpahiuli (Religion 225)

Unsa ang gilauman gikan sa usa ka magtutudlo sa relihiyon?

Samtang mangandam ka sa pagtudlo, importante nga masabtan ang Tumong sa Seminaries and Institutes of Religion:

“Ang atong katuyoan mao ang pagtabang sa mga batan-on ug mga young adult nga makasabut ug makasalig sa mga pagtulun-an ug Pag-ula ni Jesukristo, mahimong takus alang sa mga panalangin sa templo, ug makaandam sa ilang kaugalingon, sa ilang mga pamilya, ug sa uban alang sa kinabuhing dayon uban sa ilang Amahan sa Langit” (Gospel Teaching and Learning: A Handbook for Teachers and Leaders in Seminaries and Institutes of Religion [2012], x).

Makab-ot nimo kini nga katuyoan pinaagi sa makugihong pagsunod sa ebanghelyo, sa epektibong pagtudlo sa ebanghelyo ngadto sa imong mga estudyante, ug sa tukma nga pagpahigayon sa imong klase o programa. Sa imong pagpangandam ug pagtudlo sa ebanghelyo niini nga mga paagi, mahimo ka nga takus sa impluwensya sa Espiritu Santo (tan-awa sa D&P 42:14).

Kini mao ang imong oportunidad sa pagtabang sa mga estudyante nga makakat-on pinaagi sa Espiritu aron sila makapalig-on sa ilang pagtuo ug mapalawuman ang ilang pagkakabig. Matabangan nimo ang mga estudyante nga makab-ot kini samtang mogiya ka kanila sa pag-ila, pagsabut, pagbati sa kamatuoran ug kaimportante, ug paggamit sa mahinungdanong mga doktrina ug mga baruganan sa ebanghelyo ni Jesukristo.

Ang Gospel Teaching and Learning nga handbook maoy usa ka mahinungdanon nga kapanguhaan alang sa pagsabut sa proseso sa pagtudlo ug sa pagkat-on unsaon nga magmalampuson sa klasehanan. Pag-refer kanunay niini nga handbook.

Unsa ang mga katuyoan niini nga kurso?

Kini nga kurso, ang Mga Pundasyon sa Pagpahiuli (Religion 225), naghatag sa mga estudyante og oportunidad nga magtuon sa sukaranan nga mga pinadayag, doktrina, makasaysayanon nga mga panghitabo, ug mga tawo nga may kalabutan sa paglambo sa Pagpahiuli sa Simbahan ni Jesukristo ingon nga makita diha sa sumbanan nga mga basahon, mga pagtulun-an sa mga propeta sa ulahing mga adlaw, ug sa kasaysayan sa Simbahan. Ang kurso mohatag sa mga estudyante og doktrinal nga pundasyon ug konteksto sa kasaysayan nga gikinahanglan alang sa tukma nga pagsabut sa doktrina ug kasaysayan sa Simbahan. Ang mga estudyante makapalambo sa ilang mga abilidad sa pagpangita sa kamatuoran, pagtimbang-timbang sa katinuod ug kamasaligan sa tinubdan nga materyal, ug pag-ila sa kamatuoran gikan sa sayop. Ang mga estudyante magtuon sa mga kasulatan, doktrina sa Simbahan, ug kasaysayan sa Simbahan sa mga paagi nga may kalabutan sa ilang kinabuhi ug mga kahimtang. Si Presidente Gordon B. Hinckley (1910–2008) mipamatuod sa katinuod sa Pagpahiuli:

“Kini mao ang gipahiuli nga Simbahan ni Jesukristo. Kita isip usa ka katawhan mga Santos sa Ulahing mga Adlaw. Kita nagpamatuod nga ang kalangitan naabli, nga ang mga kurtina natunga, nga ang Dios namulong, ug nga si Jesukristo nagpakita sa Iyang kaugalingon mismo. …

“Pasalamatan nato ang Dios alang sa Iyang katingalahang pagtugyan sa pagpamatuod, katungod, ug doktrina nga nag-uban niini, ang gipahiuli nga Simbahan ni Jesukristo.

“Kinahanglang mao kini ang atong dako ug talagsaon nga mensahe ngadto sa kalibutan. Wala kini nato gitanyag uban sa pagpanghambug. Kita nagpamatuod diha sa pagkamapainubsanon apan uban sa kaligdong ug tinuod nga kamatinud-anon” (“Ang Kahibulongang Tukuranan sa Atong Pagtuo, ” Liahona, Nob. 2002, 81).

Samtang ang mga estudyante makapalambo og mas hugot nga pagtuo kang Jesukristo ug mas lig-on nga mga pagpamatuod sa gipahiuli nga ebanghelyo, ilang mapadak-an ang ilang pasalig sa paghimo ug pagtuman sa sagradong mga pakigsaad ug mahimong mas andam nga mopaambit sa mensahe sa Pagpahiuli.

Unsa ang gilauman gikan sa mga estudyante?

Aron makadawat og kredito padulong sa paggradwar sa institute, ang mga estudyante kinahanglan nga mobasa sa mga tudling sa kasulatan, mga pakigpulong sa kinatibuk-ang komperensya, ug ubang mga materyal nga gilista diha sa seksyon nga Mga Basahunon sa Estudyante sa matag leksyon. Kinahanglan nga makab-ot usab sa mga estudyante ang attendance requirement ug mopakita og pagsabut sa materyal sa kurso.

Giunsa man sa paghan-ay ang mga leksyon niini nga manwal?

Kini nga kurso gidesinyo nga molungtad og usa ka semester nga adunay 28 ka mga leksyon nga gisulat alang sa 50 ka minuto nga mga panahon sa klase [class period]. Kon ang inyong klase mag-abut kaduha matag semana, pagtudlo og usa ka leksyon matag panahon sa klase. Kon ang inyong klase mag-abut kausa lamang matag semana sulod sa 90 ngadto sa 100 ka minuto, ihiusa ug itudlo ang duha ka leksyon sa matag panahon sa klase. Ang matag outline sa leksyon naglangkob og upat ka seksyon:

• Pasiuna

• Background nga Basahunon

• Mga Sugyot alang sa Pagtudlo

• Mga Basahunon sa Estudyante

Pasiuna

Kini nga seksyon naghatag og mubo nga pasiuna ngadto sa mga hilisgutan ug mga tumong sa leksyon.

Background nga Basahunon

Kini nga seksyon nagrekomendar og mga kapanguhaan, sama sa mga mensahe gikan sa mga propeta sa ulahing mga adlaw, nga makatabang kanimo nga mas makasabut sa mga doktrina, mga baruganan, ug mga kamatuoran sa ebanghelyo nga gihisgutan diha sa outline sa leksyon.

Mga Sugyot alang sa Pagtudlo

Ang seksyon nga Mga Sugyot alang sa Pagtudlo naglakip sa materyal nga makatabang kanimo nga masayud unsa ang itudlo ug unsaon sa pagtudlo niini (tan-awa usab sa mga seksyon 4.3.3 ug 4.3.4 diha sa Gospel Teaching and Learning nga handbook). Ang gisugyot nga mga kalihokan sa pagkat-on gidesinyo aron sa pagtabang sa mga estudyante sa pag-ila, pagsabut, ug paggamit sa sagradong mga kamatuoran. Mahimo ka nga mopili sa paggamit og pipila o tanan sa mga sugyot samtang imo kining ipahiangay aron mohaum sa imong kaugalingong estilo sa pagtudlo ug matubag ang mga panginahanglan ug mga sirkumstansya sa imong mga estudyante. Samtang imong ikonsiderar unsaon sa pagpahiangay sa mga materyal sa leksyon, sunda kini nga tambag gikan ni Elder Dallin H. Oaks sa Korum sa Napulog Duha ka mga Apostoles:

“Si Presidente Packer kanunayng nagtudlo, sa akong pandungog, nga una natong hangupon, dayon atong ipahiangay. Kon hingpit kita nga pamilyar sa gitakda nga leksyon nga atong ihatag, nan makasunod kita sa Espiritu aron sa pagpahiangay niini. Apan adunay tintasyon, kon maghisgut kita kabahin niini nga pagpailin-ilin, nga mosugod sa pagpahiangay imbis nga mohangup. Usa kini ka pagbalanse. Usa kini ka nagpadayon nga hagit. Apan ang pamaagi nga unang mohangup ug dayon mopahiangay usa ka maayo nga paagi sa luwas nga pagtudlo” (“A Panel Discussion with Elder Dallin H. Oaks” [sibya sa satellite sa Seminaries and Institutes of Religion, Ago. 7, 2012], lds.org/broadcasts).

Kini nga kurso naglakip sa mga pamahayag sa mga lider sa Simbahan nga lagmit nga maanaa sa daghang pinulongan. Samtang mangandam ka sa pagtudlo, mahimo nimong ipahiangay ang mga leksyon pinaagi sa paggamit og ubang mga pamahayag sa mga lider sa Simbahan nga may kalabutan sa hilisgutan.

Ang seksyon sa Mga Sugyot alang sa Pagtudlo naglangkob og pinakaminos usa ka pamahayag sa doktrina o baruganan, nga makita nga pinabaga [bold]. Samtang ang mga estudyante modiskubre niini nga mga doktrina ug mga baruganan ug mopaambit sa unsay ilang nakat-unan, ang ilang mga pulong mahimong lahi kay sa niadtong gipahayag diha sa manwal. Kon mahitabo kini, pag-amping nga dili nimo mapakita nga sayop ang ilang mga tubag. Hinoon, kon ang usa ka pamahayag mahimo pa nga mas husto, ayoha sa pagtabang nga mapaklaro ang pagsabut.

Kini nga kurikulum nagpakita kon unsaon sa paghiusa sa mga sukaranan sa pagtudlo ug pagkat-on ngadto sa usa ka kurso nga gibahin sa mga tema (tan-awa sa Gospel Teaching and Learning, 10, 23–31, 38–41). Sa moabut nga mga bulan, ang Seminaries and Institutes momantala og usa ka dokumento nga gitawag og “Pagtudlo ug Pagkat-on sa mga Kasulatan diha sa Institutes of Religion,” nga dugang nga mopasabut unsaon sa paghiusa sa mga sukaranan sa pagtudlo ug pagkat-on sa ebanghelyo ngadto sa usa ka kurso nga gibahin sa mga tema.

Si Elder David A. Bednar sa Korum sa Napulog Duha ka mga Apostoles mihulagway sa pipila sa mga benepisyo nga moabut gikan sa pagtuon sa ebanghelyo pinaagi sa mga tema:

“Samtang ang pagbasa og basahon sa kasulatan gikan sa sinugdanan hangtud sa katapusan makahatag og yano nga gidak-on sa kahibalo, ang pagtuon pinaagi sa hilisgutan makadugang sa giladmon sa atong kahibalo. Ang pagsiksik diha sa mga pinadayag alang sa mga koneksyon, mga sundanan, ug mga tema makapalig-on ug makadugang sa atong espirituhanong kahibalo … ; mopalapad kini sa atong panglantaw ug pagsabut sa plano sa kaluwasan.

“Sa akong paghukom, ang makugihong pagsiksik aron sa pagdiskubre og mga koneksyon, mga sundanan, ug mga tema usa ka parte sa unsay gipasabut sa ‘pagbusog’ sa mga pulong ni Kristo. Kini nga paagi mobukas sa ablihanan sa espirituhanong tinubdan, molamdag sa atong salabutan pinaagi sa Iyang Espiritu, ug makamugna og lawom nga pasalamat alang sa balaang mga kasulatan ug usa ka ang-ang sa espirituhanong pasalig nga dili madawat sa laing paagi. Ang ingon niana nga pagsiksik magtugot kanato sa pagtukod diha sa lig-on nga sukaranan sa atong Manunubos ug sa pagbuntog sa hangin sa pagkadautan niining ulahing mga adlaw” (“A Reservoir of Living Water” [fireside sa Brigham Young University, Peb. 4, 2007], 3, speeches.byu.edu).

Ang pipila sa mga materyal niini nga manwal gibase sa materyal sa Manwal sa Seminary sa Doktrina ug mga Pakigsaad ug Kasaysayan sa Simbahan.

Mga Basahunon sa Estudyante

Kini nga seksyon naglista sa mga tudling sa kasulatan, mga pakigpulong sa mga lider sa Simbahan, ug ubang mga materyal nga makapalambo sa pagsabut sa estudyante sa mga hilisgutan nga gihatagag gibug-aton diha sa mga leksyon. I-assign ug awhaga ang mga estudyante sa pagbasa niini nga mga materyal sa dili pa sila motambong sa matag klase. Samtang magtuon sila niining dinasig nga mga materyal, dili lamang sila mahimong mas andam sa pag-apil sa mga diskusyon sa klase, apan sila usab makaangkon og mas lapad ug mas lawom nga pagsabut sa mga hilisgutan sa kurso. Hatagi ang mga estudyante og lista sa tanan nga Mga Basahunon sa Estudyante sa pagsugod sa semester.

Unsaon nako sa pagpangandam sa pagtudlo?

Ang Ginoo motabang kanimo samtang mangandam ka sa pagtudlo. Sa imong pagpangandam, tingali makatabang kanimo ang pagpangutana sa imong kaugalingon sa mosunod nga mga pangutana:

• Nag-ampo ba ko aron makadawat sa giya sa Espiritu Santo?

• Gitun-an ba nako ang gi-assign nga mga scripture block ug background nga basahunon?

• Gibasa ba nako ang kurikulum ug gideterminar kon aduna bay kinahanglan nakong ipahiangay o i-adjust aron matubag ang mga panginahanglan sa akong mga estudyante?

• Unsaon nako sa pag-follow up ang mga estudyante aron sa pagsiguro nga makabenepisyo sila og maayo gikan sa gi-assign nga mga basahunon?

• Unsaon nako sa pagtabang ang matag usa sa akong mga estudyante nga hingpit nga moapil sa leksyon?

Ang mosunod nga mga sugyot mahimong makatabang usab:

• Awhaga ang mga estudyante sa pagbasa sa gi-assign nga mga tudling sa kasulatan ug mga artikulo sa wala pa ang matag klase.

• Molaum sa mga estudyante nga motuman sa ilang tahas isip mga tigkat-on.

• Paghatag og daghang oportunidad sa mga estudyante nga mopasabut sa mga doktrina ug mga baruganan sa ilang kaugalingong mga pulong, mopaambit og mga kasinatian nga may kalabutan sa leksyon, ug mopamatuod sa unsay ilang nahibaloan ug gibati.

• Lain-laina ang mga kalihokan sa pagkat-on ug ang mga paagi nga imong gamiton sa matag klase ug usab sa matag adlaw.

• Pagmugna og kahimtang sa pagkat-on nga modapit sa Espiritu ug mohatag sa mga estudyante sa pribilehiyo ug responsibilidad sa pagtudlo ug sa pagkat-on gikan sa usag usa (tan-awa sa D&P 88:78, 122).

Si Elder Richard G. Scott sa Korum sa Napulog Duha ka mga Apostoles mitudlo:

“Salig nga dunay daghang moapil tungod kay kana nga paggamit sa kabubut-on sa usa ka estudyante nagtugot sa Espiritu Santo sa pagtudlo. … Samtang ang mga estudyante mamahayag sa mga kamatuoran gamit ang ilang kaugalingong mga pulong, kini mapahimatud-an diha sa ilang mga kalag ug mopalig-on sa ilang personal nga mga pagpamatuod” (“To Understand and Live Truth” [gabii uban ni Elder Richard G. Scott, Peb. 4, 2005], 3, si.lds.org).

Unsaon nako sa pagpahiangay sa mga leksyon alang niadtong may mga kakulangan?

Samtang nangandam ka sa pagtudlo, pagmahunahunaon sa mga estudyante nga adunay piho nga mga panginahanglan. I-adjust ang mga kalihokan ug mga ekspektasyon aron matabangan sila nga molampus.

Alang sa dugang nga mga ideya ug mga kapanguhaan, konsultaha ang Disability Resources nga pahina sa disabilities.lds.org ug ang seksyon sa manwal sa mga lagda sa Seminaries and Institutes of Religion nga giulohan og “Adapted Classes and Programs for Students with Disabilities [Gipahiangay nga mga Klase og mga Programa alang sa mga Estudyante nga adunay mga Kakulangan].”

Mga Pundasyon alang sa Pagpahiuli (Religion 225)

Mga Basahunon sa Estudyante

Pahinumdom: Wala kinahanglana nga imong basahon ang bisan unsa nga gisugyot nga mga materyal nga wala sa imong pinulongan.

Leksyon	Ulohan	Gisugyot nga mga Basahunon
1	Usa ka Kahibulongan nga Buhat ug usa ka Katingalahan	Isaias 29:13–14; Amos 8:11–12; 2 Nephi 27:1–5, 25–26; Doktrina ug mga Pakigsaad 1:12–30; Joseph Smith—Kasaysayan 1:5–10. Gordon B. Hinckley, “At the Summit of the Ages,” Ensign, Nob. 1999, 72–74. Isangyaw ang Akong Ebanghelyo: Usa ka Giya sa Misyonaryo nga Pangalagad (2004), 36–42.
2	Ang Unang Panan-awon	Joseph Smith—Kasaysayan 1:1–26. Gordon B. Hinckley, “Ang Kahibulongang Tukuranan sa Atong Pagtuo,” Liahona, Nob. 2002, 78–81. “First Vision Accounts,” Gospel Topics, lds.org/topics.
3	Ang Pagtungha sa Basahon ni Mormon	Doktrina ug mga Pakigsaad 17; Joseph Smith—Kasaysayan 1:29–54. Neal A. Maxwell, “By the Gift and Power of God,” Ensign, Ene. 1997, 36–41. “Book of Mormon Translation,” Gospel Topics, lds.org/topics. “Coming Forth of the Book of Mormon and Restoration of the Priesthood,” kapitulo 5 sa Church History in the Fulness of Times Student Manual, 2nd ed. (manwal sa Church Educational System, 2003), 52–66.
4	Ang Basahon ni Mormon—Sukaranang Bato sa Atong Relihiyon	Doktrina ug mga Pakigsaad 17:6; 19:26; 20:5–12. Ezra Taft Benson, “The Book of Mormon—Keystone of Our Religion,” Liahona, Okt. 2011, 53-58. Jeffrey R. Holland, “Kasiguroan alang sa Kalag,” Liahona, Nob. 2009, 88–90.
5	Ang Pagpahiuli sa Priesthood	Joseph Smith—Kasaysayan 1:68–72; Doktrina ug mga Pakigsaad 13:1; 84:18–22; 107:1–19. Thomas S. Monson, “Ang Priesthood—usa ka Sagrado nga Gasa,” Liahona, Mayo 2007, 57–60.
6	Ang Pag-organisar sa Simbahan	Doktrina ug mga Pakigsaad 1:30; 20:1–3, 17–37, 68–69. Henry B. Eyring, “Ang Tinuod ug Buhi nga Simbahan,” Liahona, Mayo 2008, 20–24.
7	Isangyaw ang Mahangturong Ebanghelyo	Doktrina ug mga Pakigsaad 4:1–7; 18:10–16; 29:4–7; 31:1–12; 33:2–7; 34:5–6; 39:20–23; 88:81. Neil L. Andersen, “Usa Kini ka Milagro,” Liahona, Mayo 2013, 77–80.
8	Ang Pagpundok sa Ulahing mga Adlaw nga Israel	Doktrina ug mga Pakigsaad 37:1–3; 38:31–33; 39:15; 45:62–67; 95:8; 110:9; 115:5–6. Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 79–82.
9	Sunda ang Buhing Propeta	Doktrina ug mga Pakigsaad 21:1–6; 28:2, 6–7; 43:1–7; 90:1–6, 16. Kevin R. Duncan, “Ang Ato Gayud nga Pagpakabuhi,” Liahona, Nob. 2010, 34–36. Russell M. Nelson, “Pagpaluyo sa mga Propeta,” Liahona, Nob. 2014, 74–77.
10	Pangita sa Kamatuoran	Doktrina ug mga Pakigsaad 88:118–26; 91:1–6. Dieter F. Uchtdorf, “What Is Truth?” (debosyonal sa Church Educational System, Ene. 13, 2013), lds.org/broadcasts. David A. Bednar, “Dali nga Makaobserbar,” Liahona, Dis. 2006, 15–20.
11	Ang Tingog sa Ginoo diha sa Doktrina ug mga Pakigsaad	Pasiuna sa Doktrina ug mga Pakigsaad; Doktrina ug mga Pakigsaad 1:1–39; 5:10. Ezra Taft Benson, “Ang Basahon ni Mormon ug ang Doktrina ug mga Pakigsaad,” Liahona, Ene. 2005, 24–28.
12	Dugang nga mga Kasulatan sa Atong Panahon	Doktrina ug mga Pakigsaad 1:38; 42:56; 45:60–62; 68:3–5; 76:15–19; 93:53; 94:10. Jeffrey R. Holland, “Ang Akong mga Pulong … Dili Gayud Mohunong,” Liahona, Mayo 2008, 91–94. “Translation and Historicity of the Book of Abraham,” Gospel Topics, lds.org/topics.
13	“Ang Panan-awon”	Doktrina ug mga Pakigsaad 76. L. Tom Perry, “Ang Plano sa Kaluwasan,” Liahona, Nob. 2006, 69–72.
14	Ang Templo sa Kirtland ug ang mga Yawe sa Priesthood	Doktrina ug mga Pakigsaad 109:1–28; 110:1–16. Jeffrey R. Holland, “Ang Atong Talagsaong Hiyas,” Liahona, Mayo 2005, 43–45. David A. Bednar, “Madungganon nga Paghupot og usa ka Pangalan ug Katungdanan,” Liahona, Mayo 2009, 97–100.
15	Kalig-on taliwala sa Oposisyon	Doktrina ug mga Pakigsaad 112:10–15; 121:1–10, 16–17; 122:1–9. Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 39–42.
16	Katubsanan sa mga Patay	Doktrina ug mga Pakigsaad 124:30–41; 127:1–9; 128:1–18; 137:1–10; 138:28–37. Richard G. Scott, “Ang Hingpit nga Kalipay sa Pagtubos sa mga Patay,” Liahona, Nob. 2012, 93–95. D. Todd Christofferson, “The Redemption of the Dead and the Testimony of Jesus,” Ensign, Nob. 2000, 9–12.
17	Mga Pagtulun-an sa Ebanghelyo didto sa Nauvoo	Salmo 82:6; Mateo 5:48; Juan 10:32–34; Mga Taga-Roma 8:16–17; 2 Pedro 1:3–4; 1 Juan 3:2–3; Doktrina ug mga Pakigsaad 93:11–22; 124:25–28, 37–42; 132:20–24. “Dios ang Amahan sa Kahangturan,” kapitulo 2 sa Mga Pagtulun-an sa mga Presidente sa Simbahan: Joseph Smith (2007), 43–51. “Becoming Like God,” Gospel Topics, lds.org/topics.
18	Ang Relief Society ug ang Simbahan	Doktrina ug mga Pakigsaad 25. Dallin H. Oaks, “Ang mga Yawe ug Awtoridad sa Priesthood,” Liahona, Mayo 2014, 49–52. Julie B. Beck, “Ang Panan-awon sa mga Propeta kalabut sa Relief Society: Hugot nga Pagtuo, Pamilya, Kahupayan,” Liahona, Mayo 2012, 83–85.
19	Ang Doktrina sa Mahangturong Kaminyoon ug Pamilya	Doktrina ug mga Pakigsaad 49:15–17; 131:1–4; 132:1–24. Russell M. Nelson, “Celestial nga Kaminyoon,” Liahona, Nob. 2008, 92–95. Joshua J. Perkey, “Nganong Magminyo sa Templo?” Liahona, Ago. 2013, 56-58.
20	Dinaghan nga Kaminyoon	Jacob 2:27–30; Doktrina ug mga Pakigsaad 132:1–3, 34–48, 54, 63; Opisyal nga Pahayag 1. “Plural Marriage in The Church of Jesus Christ of Latter-day Saints [Dinaghan nga Kaminyoon diha sa Simbahan ni Jesukristo sa mga Santos sa Ulahing mga Adlaw],” Gospel Topics, lds.org/topics. Ikonsiderar ang pagbasa sa mosunod: “Plural Marriage in Kirtland and Nauvoo [Dinaghan nga Kaminyoon sa Kirtland ug Nauvoo],” Gospel Topics, lds.org/topics. “Plural Marriage and Families in Early Utah [Dinaghan nga Kaminyoon ug mga Pamilya sa Sinugdan sa Utah],” Gospel Topics, lds.org/topics. “The Manifesto and the End of Plural Marriage [Ang Manifesto ug ang Pagtapos sa Dinaghan nga Kaminyoon],” Gospel Topics, lds.org/topics.
21	Ang Propetikanhong Misyon ni Joseph Smith	2 Nephi 3:1–21; Doktrina ug mga Pakigsaad 122:1–2; 135:3; Joseph Smith—Kasaysayan 1:33. Neil L. Andersen, “Joseph Smith,” Liahona, Nob 2014, 28–31. Tad R. Callister, “Joseph Smith—Propeta sa Pagpahiuli,” Liahona, Nob. 2009, 35–37.
22	Ang Pagkamartir ni Propeta Joseph Smith	Doktrina ug mga Pakigsaad 135:1–7; 136:36–39. Thomas S. Monson, “Si Propeta Joseph Smith: Magtutudlo pinaagi sa Ehemplo,” Liahona, Nob. 2005, 67–70. “The Martyrdom,” kapitulo 22 sa Church History in the Fulness of Times Student Manual, 2nd ed. (manwal sa Church Educational System, 2003), 273–85.
23	Pagpuli diha sa Kapangulohan	Doktrina ug mga Pakigsaad 107:33; 112:30–32; 124:127–28. Boyd K. Packer, “Ang Napulog Duha,” Liahona, Mayo 2008, 83–87. “The Twelve to Bear Off the Kingdom,” kapitulo 23 sa Church History in the Fulness of Times Student Manual, 2nd ed. (manwal sa Church Educational System, 2003), 286–96.
24	Pagbiya sa Nauvoo ug ang Panaw padulong sa Kasadpan	Doktrina ug mga Pakigsaad 136. Gordon B. Hinckley, “True to the Faith,” Ensign, Mayo 1997, 65–67. “Hugot nga Pagtuo sa Matag Lakang,” kapitulo 6 sa Ang Atong Panulundon: Usa ka Mubong Kasaysayan sa Ang Simbahan ni Jesukristo sa mga Santos sa Ulahing mga Adlaw (1996), 85–99.
25	Ang Gubat sa Utah ug ang Masaker Mountain Meadows	“Peace and Violence among 19th-Century Latter-day Saints [Kalinaw ug Kasamok taliwala sa mga Santos sa Ulahing mga Adlaw sa ika-19 nga Siglo],” Gospel Topics, lds.org/topics. Richard E. Turley Jr., “The Mountain Meadows Massacre,” Ensign, Sept. 2007, 17–21.
26	Ang Pagpadayag mahitungod sa Priesthood	2 Nephi 26:33; Opisyal nga Pahayag 2. “Race and the Priesthood [Ang Kaliwatan ug ang Priesthood],” Gospel Topics, lds.org/topics. Ahmad Corbitt, “A Personal Essay on Race and the Priesthood [Personal nga Essay mahitungod sa Kaliwatan ug sa Priesthood],” parts 1–4, mga serye sa Perspectives on Church History [Mga Panglantaw kabahin sa Kasaysayan sa Simbahan], history.lds.org/section/perspectives-on-church-history.
27	Pag-andam sa Kalibutan alang sa Ikaduhang Pag-anhi ni Jesukristo	Doktrina ug mga Pakigsaad 29:7–9; 34:5–7; 39:19–23; 45:15–46, 56–57; 88:81–87. Neil L. Andersen, “Pag-andam sa Kalibutan alang sa Ikaduhang Pag-anhi,” Liahona, Mayo 2011, 49–52. “Pagpangandam alang sa Ikaduhang Pag-anhi ni Kristo,” kapitulo 44 sa Mga Pagtulun-an sa mga Presidente sa Simbahan: Joseph F. Smith (1998), 471–81.
28	Pagpadali sa Buhat sa Kaluwasan	Dieter F. Uchtdorf, “Wala Ba Kamo Nalambigit sa Buhat sa Pagpahiuli?” Liahona, Mayo 2014, 58–62. “Pagpadali sa Buhat sa Kaluwasan,” Liahona Okt. 2013, 30–33.

© 2015 pinaagi sa Intellectual Reserve, Inc. Tanang mga katungod gigahin.