Ang Tingog sa Ginoo diha sa Doktrina ug mga Pakigsaad

Pasiuna

Ang Doktrina ug mga Pakigsaad usa ka ebidensya nga ang Dios namulong ngadto sa mga propeta sa ulahing mga adlaw ug nga Siya nag-andam sa kalibutan alang sa Ikaduhang Pag-anhi ni Jesukristo. Kon atong basahon ang mga pinadayag nga makita diha sa Doktrina ug mga Pakigsaad, makadungog kita sa tingog ni Jesukristo. Kon atong masabtan ang kaimportante sa Doktrina ug mga Pakigsaad, atong ipakabililhon ang mga pagtulun-an niini labaw sa tanang mga katigayunan sa yuta.

Background nga Basahunon

Ezra Taft Benson, “Ang Basahon ni Mormon ug ang Doktrina ug mga Pakigsaad,” Liahona, Ene. 2005, 8–12.

Mga Sugyot alang sa Pagtudlo

Pasiuna sa Doktrina ug mga Pakigsaad

Ang tingog sa Ginoo diha sa Doktrina ug mga Pakigsaad

I-display ang mosunod nga pamahayag ni Presidente Ezra Taft Benson (1899–1994). Hangyoa ang usa ka estudyante sa pagbasa niini og kusog samtang magsunod ang klase.

“Ang Basahon ni Mormon makadala sa mga tawo ngadto ni Kristo. Ang Doktrina ug mga Pakigsaad makadala sa mga tawo ngadto sa gingharian ni Kristo, bisan Ang Simbahan ni Jesukristo sa mga Santos sa Ulahing mga Adlaw, ‘nga mao lamang ang tinuod ug buhi nga Simbahan diha sa ibabaw sa yuta’ [D&P 1:30]. Nasayud ako niana.

“Ang Basahon ni Mormon mao ang ‘tukurang bato’ sa atong relihiyon, ug ang Doktrina ug mga Pakigsaad mao ang capstone [ulohang bato], uban sa nagpadayong pagpadayag sa ulahing adlaw. Ang Ginoo mihatag sa Iyang pagtugot sa tukurang bato ug sa capstone” (“Ang Basahon ni Mormon ug ang Doktrina ug mga Pakigsaad,” Liahona, Ene. 2005, 10).

Unsay inyong nakaplagan diha sa Doktrina ug mga Pakigsaad nga nagpakita sa kaimportante sa basahon ngadto sa Simbahan ug sa tagsa-tagsa ka mga miyembro?

Hangyoa ang klase sa pag-abli sa ilang mga kasulatan ngadto sa pasiuna sa Doktrina ug mga Pakigsaad, nga makita sa sinugdanan sa Doktrina ug mga Pakigsaad. Dapita ang duha ka estudyante nga magpuli-puli sa pagbasa og kusog sa mga paragraph uno ug tres samtang magsunod ang klase. Hangyoa ang klase nga mangita sa mga paagi diin ang Doktrina ug mga Pakigsaad lahi kay sa ubang mga basahon sa kasulatan ug motimaan nga ang pasiuna naghatag og gibug-aton sa pagpaminaw sa tingog sa Ginoo. Dayon ipangutana:

Sa unsang paagi ang Doktrina ug mga Pakigsaad lahi sa ubang sumbanan nga mga basahon?
Unsay gisulti sa pasiuna mahitungod sa “tingog ni Ginoong Jesukristo”? (Tabangi ang mga estudyante nga makasabut nga samtang magtuon kita sa Doktrina ug mga Pakigsaad, makakat-on kita sa pag-ila sa tingog ni Ginoong Jesukristo. Ipasabut nga ang mga pulong nga “tingog sa Ginoo,” o usa ka kalahian niini, makita sobra sa 40 ka higayon diha sa Doktrina ug mga Pakigsaad [pananglitan, tan-awa sa D&P 1:2; 18:35–36; 76:30]; ang mga pulong nga “sa ingon miingon ang Ginoo” makita sobra sa 60 ka higayon diha sa Doktrina ug mga Pakigsaad [pananglitan, tan-awa sa D&P 36:1; 56:14].) Ang pagpaminaw sa tingog sa Ginoo maoy usa ka importante nga tema diha sa Doktrina ug mga Pakigsaad.

I-display ang mosunod nga pamahayag ni Elder Neal A. Maxwell (1926–2004) sa Korum sa Napulog Duha ka mga Apostoles. Hangyoa ang usa ka estudyante sa pagbasa niini og kusog samtang magsunod ang klase.

“Kon pangutan-on asa nga basahon sa kasulatan ang naghatag og labing daghang kahigayunan sa ‘pagpaminaw’ sa Ginoo nga namulong, kadaghanan sa mga indibidwal unang maghunahuna sa Bag-ong Tugon. Ang Bag-ong Tugon usa ka talagsaong koleksyon sa mga binuhatan ug daghan sa mga doktrina sa Mesiyas. Apan diha sa Doktrina ug mga Pakigsaad atong madawat ang tingog ingon man ang pulong sa Ginoo. Daw hapit na nato siyang ‘madungog’ nga namulong” (“The Doctrine and Covenants: The Voice of the Lord,” Ensign, Dis. 1978, 4).

Sa unsang paagi ang pagkat-on sa pagpaminaw ug pag-ila sa tingog sa Ginoo pinaagi sa pagtuon sa Doktrina ug mga Pakigsaad makahimo og kalainan sa inyong kinabuhi?

Hatagi ang mga estudyante og pipila ka minutos sa pagtuon sa paragraph otso sa pasiuna sa Doktrina ug mga Pakigsaad. Hangyoa sila sa pag-ila sa mga doktrina nga narekord diha sa Doktrina ug mga Pakigsaad. Human sa igo nga panahon, ipangutana:

Unsay nakahimo sa Doktrina ug mga Pakigsaad nga “labaw pa nga bililhon kay sa katigayunan sa tibuok kalibutan”?

Ikonsiderar ang pagpaambit sa gisulti ni Elder Steven E. Snow sa Seventy mahitungod sa mga pinadayag nga anaa sa Doktrina ug mga Pakigsaad:

“Pinaagi niining makapadasig ug makapabayaw nga mga pagpadayag, ang Doktrina ug mga Pakigsaad nagtudlo ug nagpasabut og usab og importante nga doktrina. … Misulat si Elder John A. Widtsoe (1872–1952), ‘Ang matag doktrina nga gitudlo sa Ang Simbahan ni Jesukirsto sa mga Santos sa Ulahing mga Adlaw makita, gilatid man o gipanagna, diha sa Basahon sa Doktrina ug mga Pakigsaad. Kutob sa akong nasayran, walay doktrina nga gitudlo sa Simbahan nga dili makita sa pipila ka paagi o matang dinhi niini nga basahon.’ Midugang siya nga ang Doktrina ug mga Pakigsaad mahinungdanon tungod kay ‘walay lain sa atong sagrado nga mga basahon ang makaangkon nga misusi sa tanang doktrina sa Simbahan’ [The Message of the Doctrine and Covenants (1969), 117]” (“Treasuring the Doctrine and Covenants,” Ensign, Ene. 2009, 52).

Dapita ang mga estudyante sa pagpaambit kon sa unsang paagi ang Doktrina ug mga Pakigsaad mipanalangin sa ilang kinabuhi.

Doktrina ug mga Pakigsaad 1:1–17; 5:10

Background sa Doktrina ug mga Pakigsaad

Pasabta ang mga estudyante nga ang pinadayag nga narekord diha sa Doktrina ug mga Pakigsaad 1 sa sinugdanan gihatag sa Ginoo isip usa ka pasiuna sa Basahon sa mga Sugo, nga mao ang unang pagtigum sa mga pinadayag ni Joseph Smith. Kini nga koleksyon sa mga pinadayag, uban sa daghan pa nga mga pinadayag sa Propeta ug ang Lectures on Faith [Mga Leksyon sa Pagtuo], sa kaulahian gimantala isip Doktrina ug mga Pakigsaad. Ang seksyon 1 naghisgot sa panginahanglan alang niini nga basahon sa kasulatan sa atong panahon. Dapita ang usa ka estudyante sa pagbasa og kusog sa ulohan sa seksyon sa Doktrina ug mga Pakigsaad 1. Tabangi ang mga estudyante sa pag-analisar sa ulohan sa seksyon pinaagi sa pagpangutana sa mosunod:

Unsa nga desisyon ang gikauyunan diha sa talagsaon nga komperensya sa mga anciano [elders]? (Ang mga pinadayag nga nadawat ni Joseph Smith hangtud niini nga panahon imantala nga usa ka basahon. Pahinumdumi ang mga estudyante nga bisan tuod kini nga basahon gitawag sa sinugdanan nga Basahon sa mga Sugo, wala madugay gitawag kini nga Doktrina ug mga Pakigsaad.)

Dapita ang pipila ka mga estudyante nga magpuli-puli sa pagbasa og kusog sa Doktrina ug mga Pakigsaad 1:1–5. Dayon pangutan-a ang klase:

Ngadto kang kinsa namulong si Jesukristo niini nga mga bersikulo?
Unsaon ninyo sa pag-summarize ang importante nga mensahe nga narekord dinhi niini nga mga bersikulo?
Sa unsang paagi ang Ginoo miingon nga ihatud ang Iyang mga pasidaan ngadto sa tanang katawhan? (Ang mga estudyante kinahanglang mahibalo sa mosunod nga doktrina: Ang Ginoo mosulti sa Iyang mga pasidaan ngadto sa tanang katawhan pinaagi sa Iyang pinili nga mga disipulo.)

Dapita ang usa ka estudyante sa pagbasa og kusog sa Doktrina ug mga Pakigsaad 1:12. Dayon ipangutana:

Sumala sa bersikulo 12, unsa nga panghitabo ang gusto sa Ginoo nga mapangandaman sa kalibutan? (Mahimo nimong ipasabut nga ang mga pulong nga “ang Ginoo hapit na moabut” nagpasabut sa Ikaduhang Pag-anhi ni Jesukristo.)

Hangyoa ang mga estudyante nga hilum nga mobasa sa Doktrina ug mga Pakigsaad 1:14–16, nga mangita sa paghulagway sa Ginoo sa kalibutan nga atong gipuy-an. Human mopaambit ang mga estudyante sa unsay ilang nakit-an, hangyoa sila sa pagbasa sa bersikulo 17 ug sa pagpasabut kon unsa ang gibuhat sa Ginoo aron matubag ang problema nga gihulagway diha sa mga bersikulo 14–16.

Hangyoa ang usa ka estudyante sa pagbasa og kusog sa Doktrina ug mga Pakigsaad 5:10 samtang magsunod ang klase. Dayon hisguti ang mosunod:

Unsay inyong nakat-unan gikan niini nga tudling mahitungod sa talagsaon nga calling ni Joseph Smith? (Ang mga estudyante kinahanglang mahibalo sa mosunod nga kamatuoran: Ang Ginoo mitawag ni Joseph Smith aron sa paghatud sa Iyang pulong ngadto sa kalibutan.)

Dapita ang usa ka estudyante sa pagbasa sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:

“Sa tanan nga iyang natuman … gibilin ni Joseph [Smith] labaw sa tanan ang tinuod nga kabilin sa balaan nga pagpadayag—[dili usa, nag-inusarang] pagpadayag nga walay ebidensya o sangputanan, ug dili ‘gamay nga matang sa inspirasyon nga misulod sa mga hunahuna sa tanang maayo nga mga tawo’ bisan asa, pero piho, gidokumentohan, nagpadayon nga direksyon gikan sa Dios. Sama sa buotang amigo ug matinud-anong eskolar nga LDS nga misulti sa daklit, ‘Sa usa ka panahon sa dihang ang sinugdanan sa Kristiyanismo ubos sa pag-ataki sa rasyonal nga Enlightenment, si Joseph Smith [dili kaduhaduhaan ug nag-inusara] mipabalik sa modernong Kristiyanismo ngadto sa iyang sinugdanan sa pagpadayag’ [Richard L. Bushman, “A Joseph Smith for the Twenty-First Century,” sa Believing History (2004), 274]” (“Mga Propeta, mga Manalagna, ug mga Tigpadayag,” Liahona, Nob. 2004, 8).

Sa unsang paagi kini nga leksyon mipalawom sa inyong pagsabut sa katuyoan ug kamahinungdanon sa Doktrina ug mga Pakigsaad?
Sa unsang paagi ang Doktrina ug mga Pakigsaad mipalig-on sa inyong pagpamatuod sa balaan nga tawag ni Joseph Smith isip propeta sa Dios?

Tapusa pinaagi sa pagpangutana kon aduna bay mga estudyante nga gustong mopaambit sa ilang mga pagpamatuod sa mga doktrina, mga baruganan, ug mga kamatuoran nga narekord diha sa Doktrina ug mga Pakigsaad.

Mga Basahunon sa Estudyante

Pasiuna sa Doktrina ug mga Pakigsaad; Doktrina ug mga Pakigsaad 1:1–39; 5:10.
Ezra Taft Benson, “Ang Basahon ni Mormon ug ang Doktrina ug mga Pakigsaad,” Liahona, Ene. 2005, 8–12.