Librarya
Leksyon 26: Ang Pagpadayag mahitungod sa Priesthood

26

Ang Pagpadayag mahitungod sa Priesthood

Panahon sa ika-20 nga siglo, samtang ang misyonaryo nga buhat mikatap sa tibuok yuta, ang mga lider sa Simbahan nag-ampo alang sa giya mahitungod sa mga restriksyon sa pag-orden sa priesthood ug sa mga ordinansa sa templo alang sa mga miyembro sa Simbahan nga kaliwat og taga-Africa. Usa ka klaro nga pinadayag miabut ngadto ni Presidente Spencer W. Kimball, sa iyang mga magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles didto sa Templo sa Salt Lake niadtong Hunyo 1, 1978. Samtang ang mga estudyante moapil niini nga leksyon mas makasabut sila unsaon pag-atubang ang mga pangutana sa ebanghelyo sa matinud-anong paagi ug makakat-on usab sa mga kahimtang ug mga kamatuoran kalabut niining klaro nga pinadayag.

Background nga Basahunon

  • Gordon B. Hinckley, “Priesthood Restoration,” Ensign, Okt. 1988, 69–72.

  • “Race and the Priesthood [Ang Kaliwatan ug ang Priesthood],” Gospel Topics, lds.org/topics.

  • Ahmad Corbitt, “A Personal Essay on Race and the Priesthood,” parts 1–4, Perspectives on Church History series, history.lds.org/section/perspectives-on-church-history.

Mga Sugyot alang sa Pagtudlo

Pasiuna sa Opisyal nga Pahayag 2

Pag-atubang sa mga pangutana sa ebanghelyo sa matinud-anon nga paagi

Ipresentar ang mosunod nga sitwasyon ngadto sa klase:

Human sa klase usa ka adlaw, si Scott giduol sa laing miyembro sa Simbahan kinsa bag-ohay lang nakahunahuna og pipila ka mga pangutana mahitungod sa doktrina sa Simbahan. Mibati si Scott nga nakatabang siya sa iyang higala, apan pagkahuman naghunahuna siya kon unsay lahi niyang buhaton sa sunod higayon nga usa ka miyembro sa Simbahan nga anaa sa susamang sitwasyon moduol kaniya.

Pangutan-a ang mga estudyante unsay ilang nahimo sa pagtabang sa mga miyembro sa Simbahan nga miduol kanila nga adunay sinsero nga mga pangutana kabahin sa Simbahan o sa doktrina niini.

Ipakita ug basaha ang mosunod nga pamahayag gikan ni Presidente Dieter F. Uchtdorf sa Unang Kapangulohan:

Presidente Dieter F. Uchtdorf

“Ang pagpangutana mao ang sinugdanan sa pagpamatuod. Ang uban tingali mobati og kaulaw o nga dili takus tungod kay aduna silay seryuso nga mga pangutana mahitungod sa ebanghelyo, apan dili sila kinahanglan nga mobati niana. Ang pagpangutana dili timailhan sa kahuyang; kini ang mag-una sa paglambo.

“Ang Dios nagsugo kanato nga magtinguha sa mga tubag sa atong mga pangutana ug naghangyo lamang nga magtinguha kita nga ‘kinasingkasing, uban sa tinuod nga katuyoan, nga may hugot nga pagtuo kang Kristo’ [Moroni 10:4]. Kon mobuhat kita niini, ang kamatuoran sa tanang butang mapakita ngari kanato ‘pinaagi sa gahum sa Espiritu Santo’ [Moroni 10:5].

“Ayaw kahadlok; pangutana. Mahimong kuryuso, apan ayaw pagduha-duha! Kanunay nga paghupot sa hugot nga pagtuo ug sa kahayag nga nadawat na ninyo” (“The Reflection in the Water” [Church Educational System nga fireside alang sa mga young adult, Nob. 1, 2009], 7, ldschurchnewsarchive.com).

  • Unsay gitudlo ni Presidente Uchtdorf nga makatabang og tawo nga dunay mga pangutana mahitungod sa doktrina, kasaysayan, o sosyal nga mga isyu kalabut sa Simbahan? (Tabangi ang mga estudyante nga makasabut sa mosunod nga baruganan: Kon mopakita kita og hugot nga pagtuo diha ni Jesukristo, nan ang sinsero nga mga pangutana sa kadugayan makakuha og mga tubag gikan sa atong Amahan sa Langit.)

Ipasabut nga usa sa mga isyu sa kasaysayan diin ang ubang mga miyembro sa Simbahan adunay mga pangutana nagagikan sa polisiya sa Simbahan nga gisunod gikan sa mga tunga-tunga sa 1800 hangtud sa 1978 nga nagpugong sa itom nga mga lalaki nga kaliwat og taga-Africa sa pagka-orden ngadto sa priesthood. Nagdili usab kini sa itom nga mga babaye ug mga lalaki sa pag-apil sa temple endowment o sa mga sealing nga seremonya. Dapita ang usa ka estudyante sa pagbasa og kusog sa mosunod nga pamahayag, nga usa ka bahin sa pasiuna sa Opisyal nga Pahayag 2 (makita sa Doktrina ug mga Pakigsaad). Hangyoa ang mga estudyante sa paghunahuna kon sa unsang paagi kini nga impormasyon makatabang niadtong adunay mga kabalaka mahitungod niini nga isyu sa kasaysayan.

“Ang Basahon ni Mormon nagtudlo nga ‘ang tanan managsama ngadto sa Dios,’ lakip ang ‘itum ug puti, ulipon ug gawasnon, lalaki ug babaye’ (2 Nephi 26:33). Sa tibuok kasaysayan sa Simbahan, ang mga tawo sa tanang kaliwatan o kagikan diha sa daghang mga nasud nabunyagan ug nagpuyo isip matinud-anong mga miyembro sa Simbahan. Sa panahon sa kinabuhi ni Joseph Smith, ang pipila ka itom nga mga lalaki nga miyembro sa Simbahan gi-orden ngadto sa priesthood. Sa sayong bahin sa kasaysayan niini, ang mga lider sa Simbahan mihunong sa pagtugyan sa priesthood ngadto sa itom nga mga lalaki nga kaliwat og taga-Africa. Ang mga rekord sa Simbahan wala maghatag og klarong panabut sa kagikan niini nga buhat” (pasiuna sa Opisyal nga Pahayag 2).

  • Unsa nga importanting mga kamatuoran ang ania niini nga pamahayag alang niadtong nanlimbasug tingali niini nga isyu?

Ipasabut ang linya nga nag-ingon, “ang mga rekord sa Simbahan wala maghatag og klarong panabut sa kagikan niini nga buhat.” Samtang ang ubang mga tawo mosugyot og mga rason nganong ang mga lalaki nga kaliwat og taga-Africa wala i-orden sa priesthood sulod sa usa ka panahon, kadto nga mga rason tingali dili sakto. Dapita ang usa ka estudyante sa pagbasa sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

Elder Dallin H. Oaks

“Kon mobasa kamo sa mga kasulatan nga maghunahuna niini nga pangutana, ‘Nganong gisugo man kini sa Ginoo o nganong gisugo man kana niya,’ inyong makita nga minos sa usa sa usa ka gatos ka mga sugo nga dunay rason nga gihatag. Dili kana buhat sa Ginoo nga mohatag og mga rason. Kita [nga mga mortal] makabutang og mga rason sa pagpadayag. Makabutang kita og mga rason sa mga sugo. Kon mobuhat kita niini, dili kita suportado sa doktrina. Ang ubang mga tawo mohatag og mga rason sa unsay atong gihisgutan karon [kaliwat ug ang priesthood], ug sila nasayop pag-ayo. …

“… Dili nato himoon ang mga sayop nga nahimo sa nangagi, dinhi ug sa ubang dapit, nga mosulay sa paghatag og mga rason sa pagpadayag. Ang mga rason sa dakong bahin migawas nga hinimo lang sa tawo” (Life’s Lessons Learned [2011], 68–69).

  • Nganong maalamon man ang paglikay sa pagpangagpas sa mga rason nganong ang mga tawo nga kaliwat og taga-Africa wala hatagi sa priesthood o sa pag-apil sa mga ordinansa sa templo sa wala pa ang 1978? (Ang tawo mamulong gikan sa limitado nga panglantaw, ug ang Dios wala mosulti kanato sa mga rason.)

Hatagi og gibug-aton nga karon, ang Simbahan misalikway sa mga teyoriya nga gipakatap kaniadto kabahin niini nga isyu: ang itom nga mga panit usa ka timailhan sa pagkawalay gusto o pagtunglo sa kahitas-an; ang itom nga panit nagpakita og dili matarung nga mga binuhatan sa premortal nga kinabuhi; ang kaminyoon sa duha ka tawo nga gikan sa managlahing kaliwatan [race] usa ka sala; o ang mga itom o katawhan sa ubang kaliwatan o kagikan ubos sa bisan unsang paagi kay sa uban. Ang mga lider sa Simbahan karon klarong nanghimaraut sa tanang diskriminasyon sa kaliwatan [racism], kaniadto ug karon, sa bisan unsang matang. (Tan-awa sa “Race and the Priesthood [Ang Kaliwatan ug ang Priesthood],” Gospel Topics, lds.org/topics.)

  • Sa unsang paagi ang pagtuo sa mga tawo diha ni Jesukristo makatabang kanila sa pagsulbad sa ilang mga pangutana o mga kabalaka mahitungod sa restriksyon sa priesthood nga anaa sa wala pa ang 1978?

Opisyal nga Pahayag 2

Ang mga panalangin sa priesthood ug temple gitanyag ngadto sa matag takus nga miyembro sa Simbahan

Ipasabut nga sa wala pa ang 1978, liboan ka mga tawo nga kagikan og taga-Africa diha sa lain-laing mga nasud nakahibalo sa katinuod sa gipahiuli nga ebanghelyo. Ang mga lider sa Simbahan sa Siyudad sa Salt Lake nakadawat og daghang sulat gikan sa wala pa mabunyagi nga mga kinabig sa Nigeria ug Ghana nga naghangyo nga padalhan og mga misyonaryo ang Africa. Sulod sa mga katuigan, ang mga lider sa Simbahan mainampoong mikonsiderar niini apan mibati nga wala pa moabut ang panahon nga magpadala og mga misyonaryo sa Africa. Sa Brazil, ang matinud-anon nga itom nga mga miyembro mitabang sa pagtukod sa Templo sa São Paulo, nga gipahibalo niadtong 1975, bisan kon nasayud sila nga dili sila makahimo sa pagsulod sa templo.

Pahibaloa ang mga estudyante nga ang Opisyal nga Pahayag 2naglangkob sa opisyal nga pahibalo sa usa ka pagpadayag nga nadawat ni Presidente Spencer W. Kimball, sa iyang mga Magtatambag sa Unang Kapangulohan, ug sa napulo ka mga sakop sa Korum sa Napulog Duha ka mga Apostoles. Ang pinadayag nadawat niadtong Hunyo 1, 1978. Dapita ang usa ka estudyante sa pagbasa og kusog sa unang paragraph ubos sa mga pulong nga “Minahal kong mga Kaigsoonan.” Dapita ang klase sa pagsunod, nga mangita kon unsay gisulti sa mga lider sa Simbahan nga ilang nasaksihan.

  • Unsa ang nasaksihan sa mga lider sa Simbahan sa tibuok kalibutan?

  • Unsa man ang midasig sa mga lider sa Simbahan samtang nasaksihan nila ang pagkanap sa buhat sa Ginoo?

Dapita ang usa ka estudyante sa pagbasa og kusog sa sunod nga paragraph, nga nagsugod sa mga pulong nga “Nakahibalo sa mga saad.” Dapita ang klase sa pagpangita kon sa unsang paagi gilihok sa mga lider sa Simbahan ang ilang dinasig nga mga tinguha. Ipangutana:

  • Giunsa ni Presidente Spencer W. Kimball ug sa ubang mga lider sa Simbahan sa paglihok ang ilang dinasig nga mga tinguha?

  • Sumala sa unang tulo ka linya niini nga paragraph, unsay nahibaloan sa mga lider sa Simbahan mahitungod sa restriksyon sa priesthood? (Nasayud sila nga sa umaabut nga panahon, ang tanang takus nga mga lalaki makabaton sa oportunidad sa pagdawat sa priesthood.)

Ipasabut nga sulod sa daghang katuigan sa wala pa ang 1978, nasayud nga usa ka pagpadayag ang gikinahanglan aron adunay kausaban nga mahitabo, ang Unang Kapangulohan ug ang Korum sa Napulog Duha ka mga Apostoles naghisgot sa restriksyon sa priesthood ug nag-ampo mahitungod niini. Ipakita ang mosunod nga pamahayag ni Presidente Spencer W. Kimball (1895–1985) ug dapita ang usa ka estudyante sa pagbasa niini og kusog:

President Spencer W. Kimball

“Kada adlaw nag-inusara akong moadto ug uban sa dakong kabalaan ug kaligdong didto sa ibabaw nga mga kwarto sa templo, ug didto akong gihalad ang akong kalag ug gihalad ang akong mga paningkamot sa pagpadayon sa programa. Buot ako nga mobuhat unsa ang iyang buot ipabuhat. Nakigsulti ako kaniya kalabut niini ug miingon, ‘Ginoo, buot lamang ako nga mobuhat unsa ang husto. Wala kami maghimo og bisan unsa nga mga plano nga daw mapasundayagong makahaylo. Buot lamang kami sa mga butang nga pagbuot nimo, ug buot kami niini kon imong pagbuot ug dili hangtud nga ikaw magbuot’” (Mga Pagtulun-an sa mga Presidente sa Simbahan: Spencer W. Kimball [2006], 296–297).

  • Unsa ang gitudlo kanato sa mga pulong ni Presidente Kimball mahitungod sa paagi nga ang mga propeta magtinguha og pagpadayag? (Human makatubag ang mga estudyante, mahimo nimong isulat ang mosunod nga kamatuoran diha sa pisara: Ang mga propeta magtinguha sa kabubut-on sa Ginoo sa pagdumala sa Simbahan.)

Dapita ang usa ka estudyante sa pagbasa og kusog sa mosunod nga duha ka paragraph diha sa Opisyal nga Pahayag 2, nga nagsugod sa “Siya nakadungog sa atong mga pag-ampo.” Hangyoa ang klase sa pagpangita sa tubag sa Ginoo sa mga pag-ampo ni Presidente Kimball, sa iyang mga magtatambag sa Unang Kapangulohan, ug sa mga sakop sa Korum sa Napulog Duha ka mga Apostoles.

  • Unsa ang tubag sa Ginoo sa mga pag-ampo sa Iyang propeta? (Ipasabut og maayo ang mensahe sa Ginoo nga nadawat niini nga pagpadayag: Ang mga panalangin sa ebanghelyo ni Jesukristo anaa alang sa tanang anak sa Langitnong Amahan.)

Aron matabangan ang mga estudyante nga makasabut kon sa unsang paagi nadawat ang pagpadayag nga narekord diha sa Opisyal nga Pahayag 2, ipaambit ang mosunod nga pamahayag ni Presidente Gordon B. Hinckley (1910–2008), kinsa anaa sa adlaw nga nadawat ang pagpadayag diha sa templo:

President Gordon B. Hinckley

“Adunay tinahud ug nabalaan nga palibut diha sa kwarto. Alang kanako, mabati nga daw adunay agianan nga naabli tali sa langitnong trono ug sa nagluhod, nangamuyo nga propeta sa Dios kinsa giubanan sa iyang mga Kaigsoonan. Ang Espiritu sa Dios anaa didto. Ug pinaagi sa gahum sa Espiritu Santo dihay miabut niana nga propeta nga usa ka kasiguroan nga ang butang nga iyang giampo husto, nga ang panahon miabut na, ug nga karon ang talagsaon nga mga panalangin sa priesthood kinahanglang ihatag sa takus nga mga lalaki bisan asa sa walay pagsapayan sa kaliwatan. …

“Kaming tanan nasayud nga ang panahon miabut na alang sa kausaban ug nga ang desisyon miabut gikan sa langit. Ang tubag klaro. Adunay hingpit nga panaghiusa diha kanamo sa among kasinatian ug sa among pagsabut” (“Priesthood Restoration,” Ensign, Okt. 1988, 70).

Ipasabut nga human dayon sa pagdawat sa pinadayag nga nagtapos sa restriksyon sa priesthood, ang mga misyonaryo gipadala ngadto sa Africa. Ang mga templo gitukod niana nga kontinente sukad niadto, sobra sa usa ka gatus ka mga stake ang naorganisar, ug gatusan ka liboan ka mga tawo ang nakadawat sa mga ordinansa sa ebanghelyo alang sa ilang mga kaugalingon ug alang sa ilang mga katigulangan. (Tan-awa, pananglit, sa “Mormons in Africa: A Bright Land of Hope,” mormonnewsroom.org; “Emerging with Faith in Africa,” parts 1–3, lds.org/prophets-and-apostles/unto-all-the-world.)

I-display ang mosunod nga pamahayag ni Presidente Russell M. Nelson sa Korum sa Napulog Duha ka mga Apostoles, ug hangyoa ang usa ka estudyante sa pagbasa niini:

Presidente Russell M. Nelson

“Sa matag kontinente ug tabok sa tanang isla sa kadagatan, ang matinud-anon gipangpundok ngadto sa Ang Simbahan ni Jesukristo sa mga Santos sa Ulahing mga Adlaw. Ang mga panaglahi sa background sa kultura, pinulongan, sekso, ug hitsura dili na importante samtang ang mga miyembro mopahinungod sa ilang kaugalingon sa pagserbisyo sa ilang hinigugma nga Manluluwas. Ang deklarasyon ni Pablo natuman na: ‘Kay ang tanan kaninyo nga gibautismo ngadto kang Kristo gikasul-uban ni Kristo.

“‘Walay Judeo ni Gresyanhon, walay ulipon ni gawas, walay lalaki ni babaye: kay kamong tanan usa ra diha kang Kristo Jesus’ [Mga Taga-Galacia 3:27–28].

“Ang pagsabut lamang sa katinuod sa Pagkaamahan sa Dios ang makahatag og hingpit nga pagdayeg sa tinuoray nga panag-igsoonay sa tawo. Kana nga pagsabut makapadasig og tinguha sa pagtukod og mga taytayan sa kooperasyon imbis sa mga paril nga nagpahimulag” (“Teach Us Tolerance and Love,” Ensign, Mayo 1994, 70).

  • Sa unsang paagi ang ebanghelyo nag-andam kanato nga mahiusa uban sa mga katawhan gikan sa lain-laing mga kahimtang?

  • Unsa nga mga ehemplo ang inyong nakita sa mga miyembro sa Simbahan gikan sa lain-laing mga kahimtang nga dungan nga naglambo diha sa panaghiusa ug kooperasyon?

Sa pagtapos, dapita ang mga estudyante sa pagkonsiderar kon unsaon nila pagtubag kon pangutan-on sila nganong ang Simbahan wala mo-orden og mga lalaki nga kaliwat og taga-Africa sulod sa usa ka panahon. Pamatud-i nga angay lang nga ipasabut sa uban nga wala kita masayud nganong misugod ang restriksyon sa priesthood ug nga kita kinahanglang mopaambit ug mopamatuod sa mga kamatuoran nga atong nahibaloan.

Mga Basahunon sa Estudyante