Pagpadali sa Buhat sa Kaluwasan

Sa bag-o lang nga mga katuigan, ang mga lider sa Simbahan mihatag og gibug-aton sa panagna sa Ginoo nga Siya “modali sa [Iyang] buluhaton” (D&P 88:73). Ang buhat sa kaluwasan naglakip sa misyonaryong buhat sa mga miyembro, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug pagtudlo sa ebanghelyo. Kini nga leksyon motabang sa mga estudyante nga mas makasabut sa ilang responsibilidad isip mga miyembro sa Ang Simbahan ni Jesukristo sa mga Santos sa Ulahing mga Adlaw sa pag-apil niini nga buhat.

Background nga Basahunon

Dieter F. Uchtdorf, “Wala Ba Kamo Nalambigit sa Buhat sa Pagpahiuli?” Liahona, Mayo 2014, 58–62.
“Pagpadali sa Buhat sa Kaluwasan,” Ensign, Okt. 2013, 30–33.

Mga Sugyot alang sa Pagtudlo

Doktrina ug mga Pakigsaad 138:53–56

Gipadali sa Ginoo ang Iyang buhat

Sultihi ang mga estudyante nga sa wala pa siya mamatay, si Presidente Joseph F. Smith adunay usa ka panan-awon sa kalibutan sa espiritu, nga karon narekord isip ang Doktrina ug mga Pakigsaad 138. Iyang nakat-unan nga ang mga lider sa katapusang dispensasyon ug “daghan pang uban” giandam didto sa premortal nga kalibutan alang sa ilang yutan-ong mga responsibilidad. Dapita ang usa ka estudyante sa pagbasa og kusog sa Doktrina ug mga Pakigsaad 138:53–56 samtang magsunod ang klase nga mangita sa mga responsibilidad nga gihatag ngadto niini nga mga lider didto sa premortal nga kalibutan.

Unsa nga mga responsibilidad ang gihatag ngadto niini nga mga lider didto sa premortal nga kalibutan? Unsa nga pagpangandam ang ilang nadawat didto?
Unsa nga mga responsibilidad kaha ang gihatag kaninyo didto sa premortal nga kalibutan? Unsa nga pagpangandam kaha ang inyong nadawat? (Samtang ang mga estudyante mopaambit sa ilang mga ideya, tabangi sila nga mahibalo niini nga baruganan: Giandam kita didto sa premortal nga kinabuhi nga moanhi sa kalibutan sa kahingpitan sa panahon aron sa pagtrabaho alang sa kaluwasan sa mga kalag sa tawo.)

I-display ang mosunod nga pamahayag ni Presidente Thomas S. Monson ug hangyoa ang usa ka estudyante sa pagbasa niini og kusog:

“Nakaamgo ba mo nga ang gipahiuli nga Simbahan 98 na ka tuig usa pa nakaangkon og 100 ka stake? Apan wala pa kaabut og 30 ka tuig human niini, ang Simbahan nakaorganisar sa ikaduhang 100 ka stake. Ug walo lang ka tuig human niana ang Simbahan aduna nay sobra sa 300 ka stake. Karon [2014] kita aduna nay sobra sa 3,000 ka lig-ong mga stake.

Nganong paspas man kaayo kining pagdaghan? Tungod ba kay mas nailhan na kita karon? Tungod ba kay nindot ang atong mga chapel?

“Kining mga butanga importante, apan ang rason nga ang Simbahan nagtubo karon kay gisulti sa Ginoo nga kini motubo. Sa Doktrina ug mga Pakigsaad, Siya miingon, ‘Tan-awa, Ako modali sa akong buluhaton diha sa iyang angay nga panahon’ [D&P 88:73].

“Kita, isip espiritu nga mga anak sa atong Langitnong Amahan, kita gipadala sa yuta niining panahona aron kita makaapil sa pagpadali niining dakong buhat” (“Pagpadali sa Buluhaton,” Liahona, Hunyo 2014, 4).

Sumala ni Presidente Monson, nganong gipadala man kita sa kalibutan niining panahona? (Samtang ang mga estudyante mopaambit sa ilang mga tubag, tabangi sila nga makasabut niini nga baruganan: Aduna kitay responsibilidad sa pag-apil sa pagpadali sa buhat sa Langitnong Amahan.)
Unsa ang pipila ka mga paagi nga nakasaksi kamo og “pagpadali” sa buhat sa Dios? (Adunay daghang tubag niini nga pangutana, lakip na ang kausaban sa edad sa misyonaryo nga pagserbisyo, sa nagkadaghang mga misyonaryo, sa nagkadaghang mga templo, ug sa nagkadaghan nga mga himan aron mapasayon ang buhat sa family history.)

Ipasabut nga kini nga mga tubag naghatag og ebidensya nga ang Ginoo nagpadali sa Iyang buhat sa matag kilid sa tabil. Ipasabut nga ang mga lider sa Simbahan karon mihatag og gibug-aton sa lima ka aspeto diha sa buhat sa kaluwasan ug mihangyo nga ang matag usa kanato moapil niini nga mga aspeto aron sa pagpadali sa buhat sa Dios niining ulahing mga adlaw. I-display ang mosunod nga pamahayag ni Elder L. Whitney Clayton sa Kapangulohan sa Seventy, ug hangyoa ang usa ka estudyante sa pagbasa niini og kusog. Ipaila sa klase ang lima ka mga aspeto nga parte sa buhat sa kaluwasan:

“Ang buhing mga propeta ug mga apostoles nagtudlo kanato nga ‘ang mga miyembro sa Simbahan ni Jesukristo gipadala “sa paghago diha sa iyang ubasan alang sa kaluwasan sa mga kalag sa mga tawo” (D&P 138:56). “Kini nga buhat sa kaluwasan naglakip sa miyembro nga misyonaryo nga buhat, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug sa pagtudlo sa ebanghelyo’ [Handbook 2: Administering the Church (2010), 5.0]” (“Ang Buhat sa Kaluwasan: Kaniadto ug Karon,” Liahona, Sept. 2014, 22).

Samtang ilhon sa mga estudyante ang lima ka mga aspeto, isulat sa pisara ang mosunod:

Misyonaryo nga buhat sa miyembro

Retensyon sa kinabig

Pagpaaktibo sa dili kaayo aktibo nga mga miyembro

Buhat sa templo ug family history

Pagtudlo sa ebanghelyo

Doktrina ug mga Pakigsaad 88:73

Ang matag usa kanato makatampo sa pagpadali sa buhat sa Ginoo

Hangyoa ang usa ka estudyante sa pagbasa sa Doktrina ug mga Pakigsaad 88:73 samtang magsunod ang ubang mga estudyante. Dayon ipasabut sa mga estudyante nga ang matag usa kanato kinahanglang maningkamot sa pagpadako sa atong kontribusyon sa pagpadali sa buhat sa Ginoo. Iapud-apod ang handout sa katapusan sa leksyon ngadto sa mga estudyante, ug ipasabut nga kini nga handout motabang kanila sa paghunahuna kon unsaon nila sa pagpadako sa ilang kontribusyon. Dapita ang mga estudyante sa pagpili ug sa pagbasa og hilum sa usa o daghan pa nga mga pamahayag diha sa handout ug sa pag-andam sa pagtubag sa mga pangutana nga anaa sa handout.

handout, Pagpadali sa Buhat sa Kaluwasan

Human ang mga estudyante nakaangkon og igong panahon sa pagbasa ug pagpangandam, ikonsiderar ang pagdapit og usa ka estudyante sa pagbasa og kusog sa unang kinutlo. Dayon hangyoa ang pipila ka mga estudyante sa paghatag sa ilang mga tubag sa tulo ka mga pangutana diha sa handout, nga magtutok sa misyonaryo nga buhat. Balika kini nga proseso alang sa matag usa sa lima ka mga kinutlo.

Tabangi ang mga estudyante nga mobati sa kamatuoran ug kaimportante sa pag-apil sa buhat sa kaluwasan pinaagi sa pagpangutana sa mosunod:

Unsa nga mga panalangin ang inyong nadawat samtang miapil kamo sa usa o daghan pa nga niini nga mga aspeto sa buhat sa kaluwasan? Unsa nga mga kasinatian ang inyong nasinati samtang nag-apil sa usa niini nga mga aspeto nga makahuluganon kaayo alang kaninyo?

I-display ang mosunod nga pamahayag ni Presidente Dieter F. Uchtdorf sa Unang Kapangulohan, ug dapita ang usa ka estudyante sa pagbasa niini og kusog:

“Kon mahuman na ang atong panahon sa mortalidad, unsa nga mga kasinatian ang atong mapakigbahin kalabut sa atong kaugalingong kontribusyon niining importante nga panahon sa atong kinabuhi ug sa pagpalambo sa buhat sa Ginoo? Makaingon ba kita nga nagkugi kita og maayo ug mitrabaho sa tibuok natong kasingkasing, gahum, hunahuna, ug kusog? O kinahanglan ba natong angkunon nga ang atong tahas kasagaran mao lang ang tig-obserbar?” (“Wala Ba Kamo Nalambigit sa Buhat sa Pagpahiuli?” Liahona, Mayo 2014, 59).

Dapita ang mga estudyante sa pagplano sa unsay ilang buhaton aron mas hingpit nga makaapil sa buhat sa kaluwasan pinaagi sa pagpangutana:

Unsa ang pipila ka mga paagi nga nakakita kamo sa uban nga mitabang sa pagpadali sa buhat sa Ginoo?
Unsa ang pipila ka mga paagi nga nagplano kamo nga motampo sa pagpadali sa buhat sa Ginoo?
Sa unsang paagi ang atong kahibalo ug pagpamatuod sa Pagpahiuli modasig kanato nga mas hingpit nga moapil sa buhat sa kaluwasan?

Dapita ang pipila ka estudyante sa pagpaambit ug pagpamatuod sa usa ka butang nga ilang nakat-unan kabahin sa Pagpahiuli sa ebanghelyo pinaagi sa ilang pagtuon niini nga kurso. Tapusa pinaagi sa pagpamatuod sa katinuod sa Pagpahiuli sa ebanghelyo pinaagi ni Propeta Joseph Smith.

Mga Basahunon sa Estudyante

Dieter F. Uchtdorf, “Wala Ba Kamo Nalambigit sa Buhat sa Pagpahiuli?” Liahona, Mayo 2014, 58–62.
“Pagpadali sa Buhat sa Kaluwasan,” Ensign, Okt. 2013, 30–33.

Pagpadali sa Buhat sa Kaluwasan

Mga Pundasyon sa Pagpahiuli—Leksyon 28

Pamalandungi ang mosunod nga mga pangutana kalabut sa matag usa sa lima ka mga aspeto nga parte sa buhat sa kaluwasan:

Sa unsang paagi nga ang inyong mga paningkamot niini nga aspeto sa buhat sa Dios mas makapaduol sa uban sa mga panalangin sa kaluwasan?
Unsa nga mga kasinatian ang inyong nasinati ug unsa nga mga panalangin ang inyong nadawat samtang miapil kamo niini nga aspeto sa buhat sa Ginoo sa kaluwasan?
Unsa ang inyong mahimo, bisan unsa pa ang inyong kasamtangang calling sa Simbahan, aron makatampo niini nga aspeto sa buhat sa kaluwasan?

Misyonaryo nga Buhat sa Miyembro

Si Elder Neil L. Andersen sa Korum sa Napulog Duha ka mga Apostoles mitudlo:

“Mga kaigsoonan, sa kasiguroan nga ang Ginoo midasig og daghang misyonaryo sa pagserbisyo, giablihan usab Niya ang mga hunahuna ug kasingkasing sa daghang buotan ug matinuorong mga tawo aron modawat sa iyang mga misyonaryo. Inyo na silang kaila o inyo pang maila-ila. Inyo ra silang kapamilya ug mga silingan. Gilabyan ra nila kamo sa dalan, katapad ninyo sa eskwelahan, ug ka-chat sa internet. Kamo mga importante usab nga bahin niining nagkadayag nga milagro.

“Kon dili kamo full-time nga misyonaryo nga dunay name tag, karon ang panahon sa pagbutang og usa niini sa inyong kasingkasing—ibutang sama sa giingon ni Pablo, ‘dili sa tinta, apan sa Espiritu sa Dios nga buhi’ [2 Mga Taga-Corinto 3:3]. … Kitang tanan adunay ikatampo sa paghimo niini nga milagro” (“Usa kini ka Milagro,” Liahona, Mayo 2013, 78).

Retensyon sa Kinabig

Si Elder M. Russell Ballard sa Korum sa Napulog Duha ka mga Apostoles namahayag:

“Kamo ug ako kinahanglang mobuhat sa tanan natong mahimo aron sa pagsiguro nga ang matag miyembro sa Simbahan hingpit nga gipakigdaitan ug nagtagamtam sa tanang mga panalangin nga gitanyag sa ebanghelyo.

“Si Presidente Gordon B. Hinckley mipahinumdom kaninyo ug kanako sa atong responsibilidad nga mahimong katrabaho sa Ginoo sa pagpahinabo sa Iyang mga plano alang sa Simbahan. Sa usa ka satellite nga sibya si Presidente Hinckley miingon:

“‘Ang Ginoo mihatag kanato sa sugo sa pagtudlo sa ebanghelyo ngadto sa matag nilalang. Kini magkinahanglan sa labing maayong paningkamot sa matag misyonaryo—full-time ug sa stake. Magkinahanglan kini sa labing maayong paningkamot sa matag bishop, sa matag counselor sa bishop, sa matag miyembro sa ward council …’ (‘Find the Lambs, Feed the Sheep,’ Ensign, Mayo 1999, 107). Magkinahanglan kini sa labing maayong paningkamot sa matag miyembro” (“Members Are the Key,” Ensign, Sept. 2000, 10).

Pagpaaktibo sa Dili Kaayo Aktibo nga mga Miyembro

“Ang atong tahas mao ang pagpahinungod sa atong kaugalingon sa paghigugma ug pagserbisyo niadtong anaa sa atong palibut—paghupay sa usa ka kauban sa trabaho nga nanginahanglan, pagdapit sa atong mga higala sa usa ka bunyag, pagtabang sa usa ka tigulang nga silingan sa iyang buluhaton sa nataran, pagdapit og dili kaayo aktibo nga miyembro nga mangaon, o pagtabang sa usa ka silingan sa iyang family history. Natural ra kining tanan, malipayong mga paagi sa pagdapit sa dili kaayo aktibo nga mga miyembro ug kadtong dili sa atong tinuohan ngadto sa atong mga kinabuhi ug sa ingon ngadto sa kahayag sa ebanghelyo. Ang pagpakigbahin uban kanila sa makalingaw ug sagradong mga panahon sa atong kinabuhi tingali mao ang labing epektibo nga paagi ni bisan kinsa nato nga ‘maghago sa ubasan [ni Jesukristo] alang sa kaluwasan sa mga kalag sa mga lalaki [ug babaye]’ (D&P 138:56)” (“Pagpadali sa Buhat sa Kaluwasan,” Liahona, Okt. 2013, 30).

Buhat sa Templo ug Family History

Si Elder Quentin L. Cook sa Korum sa Napulog Duha ka mga Apostoles mitudlo:

“Ang kapangulohan sa Simbahan nanawagan ngadto sa nagtubo nga kaliwatan nga mag-una sa paggamit sa teknolohiya aron masinati ang Espiritu ni Elijah, sa pagsiksik sa ilang katigulangan, ug sa pagpahigayon sa mga ordinansa sa templo alang kanila. Kadaghanan sa lisud nga mga buhat sa pagpadali sa buhat sa kaluwasan alang sa mga buhi ug mga patay buhaton ninyo mga kabatan-onan” (“Mga Gamut ug mga Sanga,” Liahona, Mayo 2014, 46).

Pagtudlo sa Ebanghelyo

“Ang responsibilidad sa pagtudlo sa ebanghelyo dili lang kay alang niadtong adunay pormal nga tawag isip mga magtutudlo. Isip miyembro sa Ang Simbahan ni Jesukristo sa mga Santos sa Ulahing mga Adlaw, aduna kay responsibilidad sa pagtudlo sa ebanghelyo. Isip usa ka ginikanan, anak, bana, asawa, igsoon, lider sa Simbahan, magtutudlo sa klase, home teacher, visiting teacher, kauban nga trabahante, silingan, o higala, ikaw adunay mga kahigayunan sa pagtudlo. Usahay makatudlo ka sa bukas ug direkta nga paagi pinaagi sa mga butang nga imong isulti ug sa pagpamatuod nga imong ipadayag. Ug kanunay ka nga nagtudlo pinaagi sa ehemplo” (Pagtudlo, Walay Labaw ka Mahinungdanon nga Tawag: Usa ka Giya nga Kapanguhaan alang sa Pagtudlo sa Ebanghelyo [1999], 3–4).