8
Ang Pagpundok sa Ulahing mga Adlaw nga Israel
Pasiuna
Sulod sa usa ka tuig sa pag-organisar sa Simbahan, ang Ginoo misugo sa mga Santos sa pagpundok didto sa Ohio nga dapit (tan-awa sa D&P 37:3). Sukad nianang panahona, ang mga Santos sa Ulahing mga Adlaw nagkapundok sa nagkalain-laing mga dapit samtang naningkamot sila sa pagsunod sa buhing propeta ug sa pag-establisar og luwas nga mga dapit nga kapuy-an. Niini nga leksyon, ang mga estudyante makakat-on nga ang Ginoo mopundok sa Iyang katawhan aron sa paglig-on kanila ug sa pag-andam kanila sa pagdawat sa mas dagkong panalangin, lakip ang mga panalangin sa templo (tan-awa sa D&P 84:4).
Background nga Basahunon
-
Russell M. Nelson, “Ang Pagpundok sa Nagkatibulaag nga Israel,” Liahona, Nob. 2006, 79–82.
Mga Sugyot alang sa Pagtudlo
Doktrina ug mga Pakigsaad 38:31–33; 39:15; 95:8; 110:9
Ang tawag aron magpundok sa Ohio
Ipakita ang mapa nga “Ang New York, Pennsylvania, ug Ohio nga Dapit sa TBA” (Mga Mapa sa Kasaysayan sa Simbahan, nu. 3), nga nahimutang sa luyo sa Doktrina ug mga Pakigsaad, o lain nga mapa niini nga dapit.
Dapita ang mga estudyante sa pag-ila sa kinatibuk-ang lokasyon sa mosunod nga mahinungdanong mga panghitabo sa Pagpahiuli: ang Unang Panan-awon (Manchester, New York), ang pagpahiuli sa priesthood (Harmony, Pennsylvania), ug ang pag-organisar sa Simbahan (Fayette, New York).
Dayon hangyoa ang pipila ka mga estudyante nga magpuli-puli sa pagbasa og kusog gikan sa mosunod nga pamahayag:
“Si Sidney Rigdon, usa ka kanhi ministro ug bag-o nga nakabig gikan sa Kirtland nga dapit, ug usa ka dili sakop nga higala nga si Edward Partridge gahinamhinam nga makita ang Propeta ug makat-on og dugang sa mga pagtulun-an sa Simbahan. Niadtong Disyembre 1830 sila mibiyahe og labaw 250 ka mga milya [400 ka kilometros] ngadto sa Fayette, New York, aron sa pagbisita ni Joseph Smith. Sila mihangyo kaniya sa pagpangutana sa unsay buot sa Ginoo kalabut sa ilang mga kaugalingon ug sa mga Santos sa Kirland. Agi og tubag, ang Ginoo mipadayag nga ang mga Santos sa New York kinahanglan nga ‘magpundok nga maghiusa sa Ohio’ (D&P 37:3). Diha sa ikatulo ug katapusan nga komperensya sa Simbahan sa New York, nga gihimo sa umahan sa Whitmer niadtong 2 sa Enero 1831, ang Ginoo miusab pagsulti sa iyang mando [nga ang mga miyembro sa Simbahan mobalhin ngadto sa Ohio]. … Kini mao ang unang tawag niini nga dispensasyon alang sa mga Santos sa pagpundok. …
“… Mga 68 ka mga miyembro gikan sa Colesville mipaingon na ngadto sa Ohio sa tunga-tunga sa Abril 1831. Sama ka masunoron sa sugo sa Ginoo mao ang 80 ka mga Santos gikan sa Fayette Branch ug 50 gikan sa Manchester Branch, kinsa mibiya sa ilang mga panimalay sayo niadtong Mayo 1831. … Sa tunga-tunga sa Mayo ang tanang mga branch sa Simbahan sa New York nakahimo sa pagbiyahe pinaagi sa barko tabuk sa Lanaw sa Erie ngadto sa pantalan sa Fairport, Ohio, diin sila gitagbo sa kaubang mga Santos ug gidala ngadto sa mga lungsod sa Kirtland ug Thompson. Ang dakong panagpundok sa ulahing adlaw nga Israel nagsugod na” (Ang Atong Panulundon: Usa ka Mubong Kasaysayan sa Ang Simbahan ni Jesukristo sa Mga Santos sa Ulahing mga Adlaw [1996], 21–23).
Dapita ang usa ka estudyante sa pagbasa og kusog sa Doktrina ug mga Pakigsaad 38:31–33. Hangyoa ang klase sa pagsunod ug sa pag-ila sa mga paagi nga ang mga Santos mapanalanginan kon sila mosunod sa sugo nga magpundok sa Ohio. Ang mga estudyante kinahanglang mahibalo og upat ka mga panalangin: (1) sila “makalingkawas sa gahum sa kaaway”; (2) sila “pagapundukon [ngadto sa Dios nga] matarung nga mga katawhan”; (3) sila makadawat sa balaod sa Dios; ug (4) sila “pagatugahan uban sa gahum nga gikan sa kahitas-an.” Mahimo kang mosugyot nga numerohan sa mga estudyante kining upat ka mga panalangin diha sa ilang mga kasulatan. (Pahinumdom: Ang pag-ila og mga lista diha sa mga kasulatan makatabang sa mga estudyante sa pag-ila sa importanting mga punto nga gihatagan og gibug-aton sa Ginoo o sa propeta.)
Isulat ang mosunod diha sa pisara: Ang Ginoo mopundok sa Iyang katawhan sa pagpanalipod kanila ug sa paglig-on kanila sa espirituhanon nga paagi. Mahimo nimong ipasabut nga diha sa mga kasulatan, ang doktrina sa pagpundok kasagaran may kalabutan sa pagpanalipod. “Ang usa ka koneksyon maoy usa ka relasyon o sumpay tali sa mga ideya, katawhan, mga butang, o mga panghitabo, ug ang mga kasulatan puno sa mga koneksyon” (David A. Bednar, “A Reservoir of Living Water” (fireside sa Brigham Young University, Peb. 4, 2007), 4, speeches.byu.edu).
Ipasabut nga sama nga ang Ginoo midala sa karaang Israel ngadto sa Bukid sa Sinai ug mihatag kanila sa Iyang balaod, Siya usab misugo sa mga Santos sa Ulahing mga Adlaw sa pagpundok ngadto sa Ohio aron madawat nila ang Iyang balaod niini nga dispensasyon (tan-awa sa D&P 38:32). Didto sa Ohio, ang Ginoo misugod sa pagpadayag sa Iyang balaod ngadto sa Simbahan (tan-awa sa ulohan sa seksyon sa D&P 42). Dayon ipangutana:
-
Sa unsang paagi ang pakigpundok niadtong susama ninyo og tinuohan ug mga sumbanan makatabang sa pagpanalipod kaninyo gikan sa gahum ni Satanas?
-
Sa unsang paagi ang pagdawat sa balaod sa Dios makatabang sa paglig-on kanato sa espirituhanong paagi?
-
Unsa kaha ang gipasabut nga didto sa Ohio ang mga Santos “pagatugahan uban sa gahum nga gikan sa kahitas-an”?
Ipasabut nga ang gisaad nga panalangin nga “pagatugahan uban sa gahum nga gikan sa kahitas-an” nagsugod sa pagkatuman sa diha nga nahuman na ang Templo sa Kirtland lima ka tuig human ang mga Santos mipundok ngadto sa Ohio. Ang langitnong mga mensahero mibisita sa nakompleto nga templo aron sa pagpahiuli ngadto ni Joseph Smith ug Oliver Cowdery sa mga yawe ug awtoridad nga gikinahanglan sa pagpahigayon sa sagradong mga ordinansa. Ang espirituhanong mga pagpakita gibu-bu ngadto sa daghang mga Santos sa panahon sa pagpahinungod sa templo. Ug dunay gamay nga pundok sa mga Santos nga nakadawat og mga paghugas sa templo ug mga pagdihog diha sa templo. Paglabay sa pipila ka tuig didto sa Nauvoo, ang saad nga matugahan og gahum dugang nga natuman sa dihang gipasiugdahan ang mga ordinansa sa endowment sa templo ngadto sa mga Santos. I-display ang mosunod nga pamahayag nga gihatag didto sa Nauvoo ni Propeta Joseph Smith, ug hangyoa ang usa ka estudyante sa pagbasa niini og kusog:
“Unsa ang katuyoan sa pagpundok sa … katawhan sa Dios sa bisan unsa nga panahon sa kalibutan? … Ang unang katuyoan mao ang pagtukod ngadto sa Ginoo og usa ka balay diin Siya mopadayag ngadto sa iyang katawhan sa mga ordinansa sa Iyang balay ug sa himaya sa Iyang gingharian, ug sa pagtudlo sa katawhan sa paagi sa kaluwasan” (Mga Pagtulun-an sa mga Presidente sa Simbahan: Joseph Smith [2007], 504).
-
Sa unsang mga paagi nga inyong naobserbahan nga ang Dios mopanalangin sa mga Santos sa Ulahing mga Adlaw kon sila magpundok ug motukod og mga templo sumala sa Iyang gisugo?
Doktrina ug mga Pakigsaad 45:62–67
Ang Ginoo mihulagway sa Bag-ong Jerusalem, o Zion
Ipasabut nga wala madugay human ang mga Santos sa New York mipundok ngadto sa Ohio, daghang sayop nga mga artikulo sa mga pamantalaan mituis ug midaut sa Simbahan. Niining panahona, si Propeta Joseph Smith nakadawat og pinadayag mahitungod sa usa ka gitakda nga tigumanan nga dapit sa kalinaw ug kaluwasan.
Dapita ang usa ka estudyante sa pagbasa og kusog sa Doktrina ug mga Pakigsaad 45:62–67. Hangyoa ang klase sa pagsunod ug pagtino sa mga katuyoan sa Ginoo sa pagsugo sa mga Santos nga magpundok “ngadto sa kasadpan nga mga nasud” (D&P 45:64). Ikonsiderar ang pagpangutana sa mosunod:
-
Unsay gisulti sa Ginoo nga “gani diha sa inyong mga pultahan”? Unsa ang kahulugan nganha kaninyo sa mga pulong “gani diha sa inyong ma pultahan”?
-
Unsa ang gusto sa Ginoo nga buhaton sa mga Santos samtang magpundok sila ngadto sa kasadpan nga mga nasud?
-
Nganong kinahanglan man nga pundokon nila ang ilang mga katigayunan? (Ipasabut nga ang pulong nga kabilin nagpasabut sa yuta nga ilang paliton diin didto sila mahimong mopuyo ug mosimba sa Ginoo.)
-
Unsa man ang itawag sa yuta sa kabilin sa mga Santos?
Ipasabut nga diha sa mga kasulatan, ang pulong nga Zion mahimong dunay pipila ka mga kahulugan. Usahay nagpasabut kini sa katawhan sa Zion ug naghulagway kanila isip “ang putli og kasingkasing” (D&P 97:21). Bisan asa ang Zion nagpasabut ngadto sa tibuok Simbahan ug sa mga stake niini (tan-awa sa D&P 82:14). Ang pulong nga Zion mahimong nagpasabut usab sa piho nga hiyograpikanhong mga dapit. Sa Doktrina ug mga Pakigsaad 45:66–67, ang Zion nagpasabut sa usa ka pisikal nga siyudad nga i-establisar ug pundokan sa mga Santos, usahay gitawag nga Bag-ong Jerusalem (tan-awa usab sa 3 Nephi 20:22; 21:23; Ether 13:1–8; Bible Dictionary, “Zion”). Hisguti ang mosunod nga mga pangutana:
-
Giunsa paghulagway sa Ginoo ang Bag-ong Jerusalem, o Zion? (Ang mga estudyante kinahanglang mahibalo sa mosunod nga doktrina: Ang Bag-ong Jerusalem mahimong usa ka dapit sa kalinaw, dangpanan, ug kasiguroan, ug ang himaya sa Ginoo maanaa didto.)
-
Sa unsang paagi ang pagkahimong miyembro sa Simbahan nakahatag kaninyo og kasiguroan ug kalinaw nga makita diha sa Zion?
Ipasabut nga sa katapusan sa ikaupat nga komperensya sa Simbahan, nga gipahigayon niadtong Hunyo 1831, sa Kirtland, Ohio, ang Ginoo misugo ni Joseph Smith ug sa ubang mga elder nga mobiyahe nga magpares sa gibana-bana nga 900 ka mga milya [1,450 ka kilometros] ngadto sa Missouri, nga magsangyaw diha sa kadalanan (tan-awa sa D&P 52, summary sa bersikulo). Sa pag-abut, ang Propeta nakadawat og pagpadayag nga nag-ila sa Missouri isip “yuta sa saad, ug ang dapit alang sa dakbayan sa Zion” diin ang Independence, Missouri, giila isip ang “tunga-tunga nga dapit” (D&P 57:1–3). Sa misunod nga pipila ka tuig, gatusan ka mga Santos sa Ulahing mga Adlaw, naghinam-hinam sa pagtukod sa Zion, mibalhin ngadto sa Jackson County nga dapit sa Missouri. Walay swerte, ang panagbangi mitumaw tali sa mga miyembro sa Simbahan ug sa ubang mga lumulupyo sa dapit ug ang sitwasyon sa katapusan nahimong bayolente. Ang mga Santos napugos sa pagbiya sa ilang mga panimalay sa Jackson County sa Nobyembre ug Disyembre 1833.
Doktrina ug mga Pakigsaad 115:5–6
Ang katawhan sa Dios magpundok karon sa mga stake sa Zion
Aron sa paghulagway sa mga paningkamot sa mga Santos sa pagpundok ngadto sa dugang nga mga dapit sa kasiguroan ug kalinaw, ipakita ang mapa nga “Ang Paingon sa Kasadpan nga Kalihokan sa Simbahan” (Mga Mapa sa Kasaysayan sa Simbahan, nu. 6), nga nahimutang sa luyo sa Doktrina ug mga Pakigsaad.
Ipasabut nga ang mga Santos sa katapusan gipugos sa pagbiya sa Kirtland, Ohio, ingon man usab sa mga dapit sa kasadpang Missouri. Niadtong 1839, ang mga Santos nagsugod sa pagpundok sa Nauvoo, Illinois, diin mi-establisar sila og dakong siyudad. Apan sa wala madugay human sa kamatayon ni Propeta Joseph Smith, ang mga miyembro sa Simbahan gipugos na usab sa pagbiya sa ilang mga panimalay. Mibalhin sila ngadto sa Rocky Mountains ug mi-establisar og mga pinuy-anan sa tibuok kasadpan sa North America, diin ang punoang buhatan sa Simbahan gi-establisar diha sa Siyudad sa Salt Lake.
Dapita ang mga estudyante sa pagbasa sa Doktrina ug mga Pakigsaad 115:5–6. Dayon ipangutana:
-
Sumala niini nga mga bersikulo, unsa nga mga panalangin ang gisaad ngadto niadtong nagpundok sa mga stake sa Zion? (Ang mga tubag kinahanglang maglakip sa mosunod nga kamatuoran: Magpundok kita sa mga stake sa Zion alang sa usa ka panalipod ug usa ka dangpanan batok sa dautan.)
-
Sa unsang mga paagi ang mga stake sa Zion makahatag sa mga miyembro sa Simbahan og usa ka panalipod ug usa ka dangpanan diha sa ilang mga dapit nga gipuy-an?
-
Kanus-a kamo mibati og kalig-on ug proteksyon samtang nakigpundok kamo sa mga Santos diha sa inyong kaugalingong ward o branch?
Aron matabangan ang mga estudyante nga makasabut kon unsay ipasabut karon nga ang mga miyembro sa Simbahan magpundok diha sa mga stake sa Zion, i-display ang mosunod nga pamahayag ni Elder Dallin H. Oaks sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:
“Sa unang mga tuig niining katapusang dispensasyon, usa ka panagtigum ngadto sa Zion naglangkob sa nagkalain-laing mga dapit sa Estados Unidos: sa Kirtland, sa Missouri, sa Nauvoo, ug sa tumoy sa mga bukid. Sa kanunay kini mga panagtigum ngadto sa umaabut nga mga templo. Uban sa paghimo og mga stake ug sa pagtukod og mga templo sa daghang kanasuran nga adunay dako-dako nga populasyon sa mga matinud-anon, ang kasugoan karon mao nga dili magpundok sa usa ka dapit apan sa pagtigum diha sa mga stake sa atong kaugalingong mga yutang pinuy-anan. Diha ang mga matinud-anon makatagamtam sa hingpit nga mga panalangin sa kahangturan sulod sa balay sa Ginoo. … Sa niini nga paagi, ang mga stake sa Zion ‘alang sa usa ka panalipod, ug alang sa usa ka dangpanan gikan sa unos, ug gikan sa kaligutgut sa diha nga kini ibu-nga walay pagkuto diha sa tibuok yuta’ (D&P 115:6)” (“Pagpangandam alang sa Ikaduhang Pag-anhi,” Liahona, Mayo 2004, 8).
Dapita ang usa ka estudyante sa pagbasa og kusog sa mosunod nga pamahayag ni Presidente Spencer W. Kimball (1895–1985):
“Karon, ang pagpundok sa Israel naglangkob sa pag-apil sa tinuod nga simbahan ug sa ilang pagsugod sa pagkasayud mahitungod sa tinuod nga Dios. … Busa, si bisan kinsa nga tawo nga midawat sa gipahiuli nga ebanghelyo, ug karon nagtinguha sa pagsimba sa Ginoo sa iyang kaugalingon nga pinulongan ug uban sa mga Santos diha sa mga nasud diin siya nagpuyo, nakatuman sa balaod sa pagpundok sa Israel ug manununod sa tanang panalangin nga gisaad ngadto sa mga Santos niining katapusang mga adlaw” (The Teachings of Spencer W. Kimball ed. Edward L. Kimball [1982],439).
-
Unsa ang inyong nakita nga nahitabo sa gidaghanon sa mga templo nga gitukod sa Simbahan sa inyong panahon?
-
Sa unsang paagi kamo napanalanginan nga nahimong sakop sa usa ka stake o district sa Zion? Sa unsang paagi kamo napanalanginan sa balaan nga templo?
Tapusa pinaagi sa paghangyo sa mga estudyante sa pagkonsiderar kon unsay ilang mabuhat sa pagtabang sa uban nga makadawat og espirituhanong proteksyon ug kalig-on nga nagagikan sa matinud-anon nga pag-apil sa mga stake sa Zion ug sa pagsimba diha sa balaan nga templo. Dapita ang mga estudyante sa pagbuhat sa mga pag-aghat sa Espiritu nga tingali ilang nadawat.