Ang Pagtungha sa Basahon ni Mormon

Pasiuna

Ang Ginoo mipadala sa anghel nga si Moroni sa pag-andam ni Joseph Smith sa pagdawat ug paghubad sa Basahon ni Mormon. Gamay ra ang nahibaloan mahitungod sa aktwal nga proseso sa paghubad. Si Joseph Smith miingon nga ang Basahon ni Mormon gihubad “pinaagi sa gasa ug gahum sa Dios” (pasiuna sa Basahon ni Mormon, 1830 nga edisyon). Sumala sa balaod mahitungod sa mga saksi (tan-awa sa 2 Mga Taga-Corinto 13:1), ang Ginoo mitugot sa uban pa nga mahimong mga saksi niining karaan nga rekord. Ang ilang mga pagpamatuod milig-on sa kredibilidad sa Basahon ni Mormon alang sa tibuok kalibutan.

Background nga Basahunon

Neal A. Maxwell, “By the Gift and Power of God,” Ensign, Ene. 1997, 36–41.
“Book of Mormon Translation,” Gospel Topics, lds.org/topics.
“Coming Forth of the Book of Mormon and Restoration of the Priesthood,” kapitulo 5 sa Church History in the Fulness of Times Student Manual, 2nd ed. (manwal sa Church Educational System, 2003), 52–66.

Mga Sugyot alang sa Pagtudlo

Joseph Smith—Kasaysayan 1:30–35, 42–54

Gihubad pinaagi sa gasa ug gahum sa Dios

Pagdapit og usa o duha ka mga boluntaryo nga i-summarize alang sa klase kon unsay ilang nahinumduman mahitungod sa pagbisita ni anghel Moroni sa batan-ong si Joseph Smith sa gabii sa Septyembre 21, 1823. Kon gikinahanglan, ipaambit ang mosunod nga impormasyon:

“Sa gabii sa Septyembre 21, 1823, si Joseph natulog didto sa iyang lawting nga kwarto sa kahoy nga balay sa iyang pamilya didto sa Palmyra, New York, apan siya nagmata pa samtang ang uban sa kwarto nakatulog na, matinguhaong nag-ampo nga masayud mahitungod sa mga katuyoan sa Dios alang kaniya. …

“Agig tubag sa iyang pag-ampo, nakakita si Joseph og kahayag nga midan-ag sa iyang kwarto nga nagkahayag ug nagkahayag hangtud ang kwarto ‘mas hayag pa sa udtong tutok.’ Usa ka langitnong mensahero ang nagpakita sa kilid sa iyang higdaanan, nagbarug sa hangin, nagsul-ob og kupo nga ‘hilabihan ka puti.’ (Joseph Smith—Kasaysayan 1:30–31.) Kini nga mensahero mao si Moroni, ang katapusang Nephite nga propeta, kinsa gatusan ka tuig na ang milabay milubong sa mga palid diin gisulat ang Basahon ni Mormon ug kinsa karon naghupot sa mga yawe kalabut niining sagrado nga rekord (tan-awa sa D&P 27:5). Siya gipadala sa pagsulti ni Joseph nga ang iyang mga sala gipasaylo na sa Dios ug adunay mahinungdanon nga buluhaton nga iyang pagabuhaton. Isip kabahin niini nga buhat, si Joseph kinahanglan nga moadto sa duol nga bungtod, diin ang sagrado nga rekord, gisulat diha sa bulawan nga mga palid, nga gilubong. … Si Joseph kinahanglang mohubad sa rekord ug mopagula niini ngadto sa kalibutan.

“Pagkasunod adlaw, si Joseph miadto sa bungtod diin gilubong ang mga palid sa Basahon ni Mormon. Didto iyang gikatagbo si Moroni ug nakakita sa mga palid, pero giingnan nga dili pa niya madawat kini sulod sa upat ka mga tuig. …

“… Niadtong Septyembre 22, 1827, miuban [ang asawa ni Joseph, si Emma] ngadto sa bungtod ug mihulat sa duol samtang si Moroni mitugyan sa mga palid ngadto sa mga kamot sa Propeta” (Mga Pagtulun-an sa mga Presidente sa Simbahan: Joseph Smith [2007], 69).

Dapita ang mga estudyante sa pagpakli ngadto sa ulohang pahina sa Basahon ni Mormon ug basahon ang unang paragraph, nga mangita sa impormasyon mahitungod kon sa unsang paagi kining karaan nga rekord motungha ug mahubad. Human og basa sa mga estudyante, hangyoa sila sa pagpaambit sa ilang nakit-an. (Ang mga estudyante kinahanglang mahibalo sa mosunod nga kamatuoran: Ang Basahon ni Mormon nahubad pinaagi sa gasa ug gahum sa Dios.)

Dapita ang usa ka estudyante sa pagbasa og kusog sa Joseph Smith—Kasaysayan 1:34–35. Hangyoa ang klase sa pagsunod ug mangita og usa ka paagi nga ang Ginoo mitabang kang Joseph Smith sa paghubad sa Basahon ni Mormon.

Sumala niini nga mga bersikulo, unsa ang usa ka paagi nga ang Ginoo mitabang ni Joseph Smith sa paghubad sa karaang rekord? (Ang Ginoo mihatag sa Urim ug Thummim alang sa paghubad.)

Ipasabut nga ang laing instrumento nga gigamit ni Joseph Smith samtang naghubad sa Basahon ni Mormon mao ang usa ka gamay nga bato nga porma og itlog, usahay gitawag nga “bato sa manalagna,” nga iyang nadiskubrihan pipila ka tuig sa wala pa niya makuha ang bulawang mga palid (tan-awa sa “Book of Mormon Translation” Gospel Topics, lds.org/topics). Ang makasaysayan nga istorya nagpasabut nga ang Propeta usahay migamit sa Urim ug Thummim ug usahay migamit sa bato sa manalagna sa paghubad.

Basaha og kusog ang mosunod nga pamahayag sa pagtabang sa mga estudyante nga makasabut nga ang Ginoo mipadayag sa Iningles nga hubad sa Basahon ni Mormon ngadto sa Propeta pinaagi sa Urim ug Thummim ug sa bato sa manalagna:

“Sa dihang gipangutana sa mga detalye sa proseso sa paghubad, si Joseph mibalik-balik og sulti sa pipila ka mga higayon nga kini gihimo ‘pinaagi sa gasa ug gahum sa Dios’ ug kausa midugang, ‘Dili tuyo nga isulti sa kalibutan ang tanang detalye sa pagtungha sa basahon ni Mormon.’

“Bisan pa niana, ang mga tigsulat ug uban pa nga nakasaksi sa paghubad mihimo og daghan nga mga istorya nga naghatag og panabut ngadto sa proseso. Ang pipila sa mga istorya nagpakita nga gitun-an ni Joseph ang mga titik diha sa mga palid. Kadaghanan sa mga istorya naghisgot sa paggamit ni Joseph sa Urim ug Thummim (ang mga ighuhubad o ang bato sa manalagna), ug daghan nga mga istorya naghisgot sa iyang paggamit og usa ka bato. Sumala niini nga mga istorya, gibutang ni Joseph ang mga ighuhubad o bato sa manalagna sulod sa usa ka kalo, giduso ang iyang nawong ngadto sa kalo aron maalihan ang sobra nga kahayag, ug mibasa og kusog sa Iningles nga mga pulong nga nakita diha sa instrumento. Ang proseso sama sa gihulagway nagpahinumdom sa usa ka tudling gikan sa Basahon ni Mormon nga naghisgot sa Dios nga miandam og ‘usa ka bato, diin mohayag diha sa kangitngit ngadto sa kahayag’ [Alma 37:23–24]” (“Book of Mormon Translation [Hubad sa Basahon ni Mormon],” Gospel Topics, lds.org/topics).

Ipasabut nga ang tabang sa Ginoo makita usab diha sa kamubo sa panahon nga gihubad ni Joseph Smith ang Basahon ni Mormon. I-display ang mosunod nga pamahayag ni Elder Russell M. Nelson sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Hunahunaa ang kamubo sa panahon nga gihubad ni Joseph ang Basahon ni Mormon. Nagtrabaho gikan sa Abril hangtud sa Hunyo 1828, gihubad ni Joseph ang 116 ka pahina nga sa wala madugay nawala ni Martin Harris. Misugod si Joseph sa paghubad pag-usab sa Martes, Abril 7, 1829, nga si Oliver Cowdery ang tigsulat. Ang manuskrito nahuman paglabay sa otsentay singko ka adlaw, sa pagka-Hunyo 30 nianang tuiga. Siyempre, dili tanan niana nga panahon ang gigahin sa trabaho sa paghubad. … Sa konserbatibong pagbana-bana, aduna na lay sayes sinta y singko o minos pa nga mga adlaw tingtrabaho diin ang propeta ug ang iyang mga tigsulat mihubad niini nga basahon, nga naglangkob og 531 ka mga pahina sa kasamtangang edisyon niini. (Tan-awa sa John W. Welch, Ensign, Ene. 1988, pp. 46–47.) Makalkulo kana nga mo-average og walo ka pahina kada adlaw. Ikonsiderar kini kon mohubad kamo og libro, o samtang moiskedyul kamo sa inyong kaugalingong pagbasa sa Basahon ni Mormon” (“A Treasured Testament,” Ensign, Hulyo 1993, 61–62).

Unsa ang pipila ka mga paagi nga ang pagtungha sa Basahon ni Mormon nahitabo “pinaagi sa gasa ug gahum sa Dios”?
Kon wala kita makahibalo sa tanang detalye kalabut sa pagtungha sa Basahon ni Mormon, unsaon nato pagkahibalo nga kini nga basahon tinuod? (Makadawat kita og espirituhanong saksi sa Basahon ni Mormon bisan og wala makahibalo sa tanang detalye kalabut sa paghubad niini.)
Unsay nakatabang ninyo nga makaangkon og pagpamatuod sa Basahon ni Mormon?

Dapita ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley:

“Unang miabut si Moroni uban sa mga palid diin gihubad ang Basahon ni Mormon. Unsa ka pagkakatingalahan ug pagkatalagsaon niini nga butang. Ang istorya ni Joseph mahitungod sa bulawan nga mga palid talagsaon. Kini lisud tuohan ug sayon hagiton. Makasulat ba kaha siya niini sa iyang kaugalingong kapasidad? Ania kini, mga kaigsoonan, nga makita, mahikap, mabasa sa tanan. Ang tanang pagsulay sa pagpasabut sa gigikanan niini, gawas nianang iyang gihatag, napakyas. Siya wala kaayoy kinaadman; sa mubo nga higayon, iyang nahimo ang paghubad diin namantala ang labaw sa 500 ka mga pahina. …

“Niining milabayng mga katuigan ang mga tigpanaway naningkamot sa pagpasabut niini. Namulong sila batok niini. Mibiay-biay sila niini. Apan kini milupig kanilang tanan, ug ang impluwensya niini karon mas midako pa kay sa bisan unsa nga panahon sa kasaysayan niini” (“Ang Bato nga Gipikas Gikan sa Bukid,” Liahona, Nob. 2007, 85).

Unsay inyong masulti aron matabangan ang usa ka tawo kinsa naglisud sa pagtuo nga ang Basahon ni Mormon tinuod?

Ipamatuod nga ang Basahon ni Mormon mitungha pinaagi sa gasa ug gahum sa Dios.

Doktrina ug mga Pakigsaad 17

Ang mga Pagpamatuod sa Tulo ka mga Saksi ug sa Walo ka mga Saksi

Ipasabut nga samtang naghubad si Joseph Smith sa Basahon ni Mormon, iyang nakat-unan nga ang Ginoo motudlo og uban aron mahimong mga saksi sa karaan nga rekord (tan-awa sa 2 Nephi 27:12–13; Ether 5:2–5). Nianang higayuna, si Oliver Cowdery, David Whitmer, ug Martin Harris mipahayag og tinguha nga mahimo kini nga espesyal nga mga saksi. Ang Doktrina ug mga Pakigsaad 17 naglangkob og mga instruksyon sa Ginoo ngadto niining mga tawhana.

Dapita ang pipila ka mga estudyante nga magpuli-puli sa pagbasa og kusog gikan sa Doktrina ug mga Pakigsaad 17:1–6. Hangyoa ang klase sa pagsunod nga mangita sa unsay gisugo sa Manluluwas nga buhaton sa mga saksi human nila makita ang mga palid. Human mapaambit sa mga estudyante ang ilang nakit-an, ipangutana:

Ngano kaha nga kining mga tawhana kinahanglang mopakita og hugot nga pagtuo sama sa mga propeta sa karaang panahon sa dili pa sila tugutan sa Ginoo nga makakita sa mga palid?
Sumala sa mga bersikulo 3–5, unsa ang responsibilidad niini nga mga saksi human makakita sa mga palid?
Unsa ang responsibilidad nga maanaa kanato kon ang Ginoo mopakita kanato sa kamatuoran sa Basahon ni Mormon? (Ang mga estudyante kinahanglang moila og baruganan susama sa mosunod: Human kita makaangkon og saksi sa kamatuoran, aduna kitay responsibilidad sa pagpamatuod niini. [Tan-awa usab sa D&P 88:81.]) Mahimo nimong ipasabut nga kini nga baruganan usa usab ka ehemplo sa usa ka sundanan nga atong makaplagan diha sa mga kasulatan. “Ang sundanan mao ang usa ka plano, model, o sumbanan nga magamit isip giya alang sa pabalik-balik nga pagbuhat o paghimo og usa ka butang” [David A. Bednar, “A Reservoir of Living Water” (fireside sa Brigham Young University, Peb. 4, 2007), 5, speeches.byu.edu].)
Sa unsang paagi ang pagpamatuod sa kamatuoran usa ka pagpakita sa atong hugot nga pagtuo?

Dapita ang usa ka estudyante sa pagbasa og kusog sa istorya ni Joseph Smith sa iyang kasinatian uban sa Tulo ka mga Saksi:

“Si Martin Harris, David Whitmer, Oliver Cowdery ug ako, nagkauyon nga moadto sa kakahoyan, ug mosulay nga maangkon, pinaagi sa kinasingkasing ug mapainubsanong pag-ampo, ang katumanan sa mga saad. … [Human] sa ikaduha namong kapakyasan, misugyot si Martin Harris nga mopalayo siya kanamo, nagtuo, sumala sa iyang kaugalingong pagpahayag, nga ang iyang presensya maoy hinungdan nga wala namo maangkon ang among gipangandoy. Tungod niini mipalayo siya kanamo, ug miluhod kami pag-usab, ug dili pa lang dugay sa pagsugod namo og ampo, sa diha nga … usa ka anghel [si Moroni] mibarug sa among atubangan. Ang iyang mga kamot naghupot sa mga palid. … Gipakli niya ang mga pahina og tagsa-tagsa, aron makakita kami niini, ug klarong makita ang mga kinulit diha niini. … Nakadungog kami og tingog gikan sa kahayag ibabaw kanamo, nga nag-ingon, ‘Kini nga mga palid gipadayag pinaagi sa gahum sa Dios, ug kini gihubad pinaagi sa gahum sa Dios. Ang hubad niini diin inyo nang nakita sakto, ug mosugo ako kaninyo sa pagpamatuod sa unsay inyong nakita ug nadungog karon.’

“Gibiyaan nako karon si David ug Oliver, ug miapas kang Martin Harris, kinsa akong nakit-an didto sa layo, matinguhaon kaayo nga nag-ampo. Wala madugay iya kong gisultihan, hinoon, nga wala pa siya dungga sa Ginoo, ug matinud-anong mihangyo kanako nga moapil niya sa pag-ampo, nga siya usab unta makadawat sa samang mga panalangin nga bag-o lang namong nadawat. Tungod niini naghiusa kami sa pag-ampo, ug sa katapusan nakuha ang among mga tinguha, kay sa wala pa kami nahuman, ang samang panan-awon gipakita kanamo, nianang paagiha giusab kinig pakita kanako, ug sa makausa pa nakita ug nadungog nako ang samang mga butang; samtang sa samang higayon, si Martin Harris nakatuaw, sa naghingapin nga kalipay, ‘Igo na; igo na; nakakita ang akong mga mata; nakakita ang akong mga mata’” (sa History of the Church, 1:54–55).

Mibalik si Joseph ngadto sa panimalay sa mga Whitmer ug miingon ngadto sa iyang mga ginikanan, “Gihimo sa Ginoo nga mapakita ang mga palid ngadto sa tulo pa ka tawo gawas kanako kinsa nakakita usab og anghel ug kinahanglang mopamatuod sa kamatuoran sa unsay akong gisulti, kay sila nasayud sa ilang kaugalingon nga wala ako mangilad sa mga tawo, ug akong gibati nga daw natangtangan ako og makalilisang nga palas-anon nga morag sobra ra kaayo aron akong malahutay, … ug nalipay ang akong kalag niini nga wala na ako sa hingpit mag-inusara sa kalibutan” (sa Lucy Mack Smith, History, 1844–1845, basahon 8, pahina 11, josephsmithpapers.org/paperSummarylucy-mack-smith-history-1844-1845).

Ngano kaha nga nalipay si Joseph Smith human niini nga kasinatian? (Wala na siya mag-inusara isip saksi sa mga palid ug sa langitnong mensahero.)

Ipasabut nga walo ka dugang nga mga saksi nakadawat usab sa oportunidad nga makakita sa mga palid.

Dapita ang katunga sa klase sa pagbasa sa “Ang Pagpamatuod sa Tulo ka mga Saksi” ug ang laing katunga sa pagbasa sa “Ang Pagpamatuod sa Walo ka mga Saksi”, nga makita sa pasiuna nga mga pahina sa Basahon ni Mormon. Hangyoa ang mga estudyante sa pagpangita og mahinungdanong mga elemento sa mga kasinatian sa mga saksi. Human sa igo nga panahon, dapita ang mga estudyante sa pagpaambit sa ilang nadiskubrihan.

Sa unsang paagi ang kasinatian sa Tulo ka mga Saksi lahi kay sa Walo ka mga Saksi? (Ang Tulo ka mga Saksi nakadungog sa tingog sa Dios ug nakakita og anghel apan wala makagunit sa mga palid. Ang Walo ka mga Saksi gipakita ni Joseph Smith sa mga palid ug nakahimo sa paggunit niini. Ang Walo ka mga Saksi adunay mas pisikal nga saksi sa katinuod sa mga palid, samtang ang Tulo ka mga Saksi adunay mas espirituhanon nga kasinatian.)
Ngano kaha nga importante kaayo sa pagtungha sa Basahon ni Mormon nga adunay daghang mga saksi?

Ang ubang mga estudyante tingali wala mahibalo nga ang matag usa sa Tulo ka mga Saksi ug ang pipila sa Walo ka mga Saksi sa kadugayan mibiya sa Simbahan. Dapita ang usa ka estudyante sa pagbasa og kusog sa mosunod nga pamahayag ni Elder Dallin H. Oaks sa Korum sa Napulog Duha ka mga Apostoles:

“Gitandi ngadto sa tanang … posible nga mga pagsupak, ang pagpamatuod sa Tulo ka mga Saksi sa Basahon ni Mormon nagpabilin nga lig-on kaayo. … Sama sa nahibaloan pag-ayo, tungod sa mga panagsumpaki o kasina nga naglakip sa ubang mga lider sa Simbahan, ang matag usa niining tulo ka mga saksi gipahimulag gikan sa Ang Simbahan ni Jesukristo sa mga Santos sa Ulahing mga Adlaw mga walo ka tuig human sa pagmantala sa ilang pagpamatuod. … Apan hangtud sa katapusan sa ilang mga kinabuhi … walay usa niini nga mga saksi ang mitipas gikan sa iyang namantala nga pagpamatuod o misulti og bisan unsa nga nakamugna og bisan unsang pagduha-duha kabahin sa katinuod niini.

“Dugang pa, ang ilang pagpamatuod wala gayud supaka ni bisan kinsa nga mga saksi. Mahimong mosalikway ang tawo niini, apan unsaon sa pagpasabut ang tulo ka mga tawo nga dunay maayong mga kinaiya nga naghiusa ug mipadayon niining gimantala nga pagpamatuod hangtud sa katapusan sa ilang kinabuhi bisan pa sa hilabihan nga pagbiay-biay ug ubang personal nga kadaut? Sama sa Basahon ni Mormon mismo, walay mas maayo nga pagpasabut kay sa gihatag diha sa pagpamatuod mismo, ang ligdong nga pamahayag sa buotan ug matinuorong mga lalaki nga misulti sa unsay ilang nakita” (“The Witness: Martin Harris,” Ensign, Mayo 1999, 36).

Sa unsang paagi kaha nga ang pagpamatuod sa Tulo ka mga Saksi nalig-on sa kamatuoran nga wala gayud nila gilimud ang ilang pagsaksi, bisan human sila gipahimulag sa Simbahan? (Ipasabut nga si Oliver Cowdery ug Martin Harris sa wala madugay gibunyagan pag-usab.)

I-refer og balik ang mga estudyante sa Doktrina ug mga Pakigsaad 17:6, ug ipasabut nga kini nga bersikulo naglakip sa posibleng labing mahinungdanong pagsaksi sa katinuod sa Basahon ni Mormon. Kini nga bersikulo naglakip sa pagpamatuod sa Dios Mismo, gipanumpaan, nga ang Basahon ni Mormon tinuod.

Hangyoa ang mga estudyante sa paghunahuna nga ang ilang personal nga pagpamatuod sa Basahon ni Mormon mahimong idugang ngadto sa matag kopya sa Basahon ni Mormon. Dapita ang mga estudyante sa pagpaambit kon unsay ilang ilakip diha sa ilang pagsaksi o pagpamatuod.

Dapita ang mga estudyante sa pagpaambit sa ilang pagpamatuod sa Basahon ni Mormon ngadto sa usa ka tawo sa wala pa ang sunod nga klase.

Mga Basahunon sa Estudyante

Doktrina ug mga Pakigsaad 17; Joseph Smith—Kasaysayan 1:29–54.
Neal A. Maxwell, “By the Gift and Power of God,” Ensign, Ene. 1997, 36–41.
“Book of Mormon Translation,” Gospel Topics, lds.org/topics.
“Coming Forth of the Book of Mormon and Restoration of the Priesthood,” kapitulo 5 sa Church History in the Fulness of Times Student Manual, 2nd ed. (manwal sa Church Educational System, 2003), 52–66.