Kalig-on taliwala sa Oposisyon

Niadtong 1837 ug 1838, ang kinaiya sa pagpangita og mga sayop, panagbingkil, ug apostasiya mikaylap taliwala sa ubang mga lider ug mga miyembro sa Simbahan sa Kirtland, Ohio, ug sa amihanang Missouri. Ang mga problema misamot samtang ang ubang mga tawo mipakita og dayag nga oposisyon ngadto ni Propeta Joseph Smith. Gikan sa mga kasinatian sa unang mga Santos, atong makat-unan nga samtang mag-atubang kita og oposisyon, makadawat kita og espirituhanong kalig-on kon magpuyo kita nga matarung ug mopaluyo sa mga sulugoon sa Ginoo.

Background nga Basahunon

“Pagbantay sa Mapait nga Bunga sa Apostasiya,” kapitulo 27 sa Mga Pagtulun-an sa mga Presidente sa Simbahan: Joseph Smith (2007), 381–394.
Jeffrey R. Holland, “Lessons from Liberty Jail” (fireside sa Church Educational System, Sept. 7, 2008), lds.org/broadcasts.
Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 39–42.

Mga Sugyot alang sa Pagtudlo

Doktrina ug mga Pakigsaad 112:10–15

Apostasiya sa Kirtland, Ohio

Isulat ang mosunod nga mga pulong diha sa pisara: nasuko, nasilo, nagselos. Dapita ang mga estudyante sa paghunahuna sa mga panahon sa dihang nakasinati sila niini nga mga pagbati.

I-display ang mosunod nga istorya ug dapita ang usa ka estudyante sa pagbasa niini og kusog. Hangyoa ang mga estudyante sa pagtino sa sitwasyon nga miresulta sa pagsinati ni Thomas B. Marsh sa mga pagbati nga gisulat sa pisara.

Sa wala madugay sa pagkatawag ni Thomas B. Marsh nga mahimong Apostol niadtong 1835, gitudlo siya nga Presidente sa Korum sa Napulog Duha ka mga Apostoles. Sa tingpamulak niadtong 1837, si Presidente Marsh nakahibalo nga usa sa Napulog Duha ka mga Apostoles, si Elder Parley P. Pratt, nagplano nga magmisyon ngadto sa England nga walay direksyon ni Presidente Marsh. Si Presidente Marsh, kinsa didto sa Missouri, misulat ngadto ni Elder Pratt ug sa ubang mga sakop sa Napulog Duha ug midapit kanila nga magmiting kaniya didto sa Kirtland, Ohio, niadtong Hulyo 24, 1837, aron sila magkahiusa sa ilang mga plano alang sa mga misyon. Bisan pa niana, usa ka bulan sa wala pa ang miting, laing duha ka sakop sa Napulog Duha, sila si Elders Heber C. Kimball ug Orson Hyde, mibiya padulong sa England human makadawat og tawag sa misyon gikan ni Propeta Joseph Smith. Si Presidente Marsh klaro nga naglagot nga ang mga sakop sa Napulog Duha misangyaw sa ebanghelyo didto sa England nga wala siya pahibaloa.

Niini nga sitwasyon, unsa unta ang gihimo ni Presidente Marsh aron malikayan ang mga pagbati nga nalista sa pisara?
Unsa ang pipila ka mga kakuyaw sa pagtugot sa maong mga pagbati sa pagdumala sa atong mga hunahuna ug mga aksyon? (Ipasabut sa mga estudyante nga ang ingon nga mga pagbati makapasilo sa Espiritu Santo ug kasagaran mosangput ngadto sa mas seryuso nga sala.)

Hangyoa ang estudyante sa pagpadayon pinaagi sa pagbasa sa mosunod:

Si Presidente Marsh misulti sa iyang reklamo ngadto ni Propeta Joseph Smith ug nangayo sa iyang tambag. Agig tubag, mihatag ang Ginoo sa pagpadayag nga narekord sa Doktrina ug mga Pakigsaad 112.

Niadtong Hulyo 1837, sa dihang ang Ginoo mihatag niini nga pagpadayag, ang Simbahan nakasinati og pagkawalay panaghiusa, panagbingkil, ug apostasiya. Garbo ug kahakog maoy nakaingon nga ang ubang mga miyembro sa Simbahan dayag nga misaway ni Propeta Joseph Smith ug mikwestyon sa iyang awtoridad. Pipila ka mga miyembro sa Simbahan, lakip sa pipila sa Korum sa Napulog Duha ka mga Apostoles, nagtinguha gani sa pagtang-tang ni Joseph Smith isip Presidente sa Simbahan.

Unsa nga mga pagbati ang nakahimo sa pipila ka mga miyembro sa Simbahan sa pagbaliwala sa ilang mga pagpamatuod sa kamatuoran ug dayag nga mosupak ni Propeta Joseph Smith?

Dapita ang mga estudyante sa pagbasa sa Doktrina ug mga Pakigsaad 112:10–12, 15, nga mangita sa tambag nga gihatag sa Ginoo ngadto ni Presidente Marsh ug sa ubang mga sakop sa Korum sa Napulog Duha nga makatabang sa mga miyembro sa Simbahan nga molikay sa pagpanaway sa ilang mga lider.

Hangyoa ang mga estudyante nga moreport sa ilang nakit-an. Dayon ipangutana:

Sa unsang paagi ang tambag niini nga mga bersikulo makatabang sa mga miyembro sa Simbahan nga molikay sa pagpanaway sa mga lider sa Simbahan? (Samtang ang mga estudyante mopaambit sa ilang mga tubag, tabangi sila nga makasabut sa mosunod nga mga baruganan: Kon mapainubsanon kita, ang Ginoo mogiya kanato ug mohatag kanato og mga tubag sa atong mga pag-ampo. Ang Ginoo nagkinahanglan nga atong paluyohan ang mga lider kinsa naghupot sa mga yawe sa pagdumala sa Simbahan. Mahimo nimong isugyot nga i-cross-reference sa mga estudyante ang bersikulo 15 ngadto sa Doktrina ug mga Pakigsaad 84:35–38. Mahimo usab nimong ipasabut nga ang tambag sa pagpahimangno sa mga sakop sa Napulog Duha gihatag ngadto sa Presidente sa Korum sa Napulog Duha ka mga Apostoles ug dili magamit ngadto sa tagsa-tagsa ka mga miyembro sa Simbahan.)

Hatagi ang matag estudyante og kopya sa handout nga makita sa katapusan niining leksyon. Ikonsiderar ang pagbahin sa klase ngadto sa gagmay nga mga grupo ug sa pagdapit sa matag grupo nga dungan nga magbasa sa seksyon nga giulohan og “Apostasiya sa Kirtland: Ang Panginahanglan nga Matinud-anong Mosunod sa mga Lider sa Simbahan.” Hangyoa ang mga estudyante sa paghisgot sa mga pangutana sa katapusan sa seksyon diha sa ilang mga grupo.

Mahimo nimong tapuson kini nga bahin sa leksyon pinaagi sa pagpakita ug paghisgot sa mosunod nga pamahayag ni Presidente Heber C. Kimball (1801–68) sa Unang Kapangulohan:

“Ako mohatag kaninyo og usa ka yawe nga maoy gihatag usab ni Brother Joseph Smith didto sa Nauvoo. Miingon siya nga ang mismong lakang sa apostasiya nagsugod uban sa pagkawala sa kompiyansa sa mga lider niini nga simbahan ug gingharian, ug kon kamo makamatikod niana nga espiritu hibaloi nga kana modala sa mismong tawo sa dalan ngadto sa apostasiya” (Mga Pagtulun-an sa mga Presidente sa Simbahan: Joseph Smith [2007], 384).

Aron hatagan og gibug-aton ang kaimportante sa matinud-anong pagsunod sa propeta ug sa ubang mga lider sa Simbahan, basaha ang mosunod nga kasinatian gikan sa kinabuhi ni Brigham Young (1801–77), kinsa sakop sa Korum sa Napulog Duha ka mga Apostoles nianang higayuna:

“Samtang didto sa Kirtland, si Presidente Brigham Young nakahimamat og usa ka pundok sa mga mibiya sa kamatuoran kinsa nagplano batok kang Propeta Joseph Smith sa sulod mismo sa templo. Siya namahayag, ‘Mibarug ako, ug sa yano ug dayag nga paagi miingon ngadto kanila nga si Joseph usa ka Propeta, ug ako nasayud niini, ug sila mahimong motamay ug mopakaulaw kaniya kutob sa ilang gusto, dili sila makaguba sa pagkatudlo sa Propeta sa Dios, ila lamang maguba ang ilang kaugalingong katungod, moputol sa higot nga nagbugkos kanila ngadto sa Propeta ug ngadto sa Dios ug mopaunlod sa ilang mga kaugalingon ngadto sa impyerno’” (Mga Pagtulun-an sa mga Presidente sa Simbahan: Brigham Young [1997], 93).

Doktrina ug mga Pakigsaad 121:1–10, 16–17; 122:1–9

Oposisyon sa Amihanang Missouri

Ikonsiderar ang pagpabilin sa mga estudyante diha sa gagmayng grupo ug pagdapit sa matag grupo sa pagbasa sa ikaduhang seksyon sa handout nga giulohan og “Panagbangi didto sa Amihanang Missouri: Pagkat-on nga Malahutay og Maayo ang Oposisyon.” Ipasabut nga kini nga seksyon naghulagway sa pipila ka binuhatan nga misangput sa pagkaabug sa mga Santos gikan sa amihanang Missouri ug sa pagkatanggong sa Propeta sa Liberty Jail. Hangyoa ang mga estudyante sa paghisgot sa mga pangutana sa katapusan niini nga seksyon diha sa ilang mga grupo.

Human makompleto sa mga estudyante ang handout, ipasabut nga ang Doktrina ug mga Pakigsaad 121–23 naglangkob og mga pinili gikan sa usa ka sulat nga gisulat ni Propeta Joseph Smith ngadto sa mga Santos sa hapit na matapos ang iyang pagkabilanggo sa Liberty Jail.

Hangyoa ang mga estudyante nga magpuli-puli sa pagbasa og kusog gikan sa Doktrina ug mga Pakigsaad 121:1–6. Hangyoa ang mga estudyante sa pagpangita sa mga pangutana nga gipadayag sa Propeta ngadto sa Ginoo.

Unsa nga mga pangutana ang inyong nakit-an?

Dapita ang usa ka estudyante sa pagbasa og kusog sa Doktrina ug mga Pakigsaad 121:7–10, 16–17; 122:7–9. Hangyoa ang klase sa pagsunod ug sa paghunahuna kon sa unsang paagi ang mga tubag sa Ginoo sa mga pangamuyo ni Joseph Smith tingali nakalig-on ni Joseph sa pag-atubang sa padayon nga oposisyon gikan sa iyang mga kaaway.

Hangyoa ang mga estudyante sa pagpahayag og mga doktrina ug mga baruganan nga ilang nakat-unan gikan sa mga bersikulo nga ilang gibasa. (Ang mga tubag mahimong maglakip sa mosunod: Kon maayo natong pagkalahutay ang oposisyon dinhi sa mortalidad, ang Dios mopanalangin kanato karon ug sa kahangturan. Kadtong miakusar sa mga sulugoon sa Ginoo mao ang mga sulugoon sa sala. Mahimo kitang malig-on diha sa atong mga pagsulay samtang mosalig kita sa Pag-ula sa Manluluwas ug mohinumdom sa Iyang ehemplo sa matinud-anon nga paglahutay.)

I-display ang mosunod nga pamahayag ni Elder Neil L. Andersen sa Korum sa Napulog Duha ka mga Apostoles, ug dapita ang usa ka estudyante sa pagbasa niini og kusog:

“Sa pagkatinuod, ang mga pagsulay malisud. Mahimong anaay kasubo, kalibug, mga gabiing walay tulog, ug mga paghilak. Apan ang atong mga pagsulay dili kinahanglang moresulta sa espiritwal nga kalaglagan. Dili kinahanglang mopalayo kini kanato sa atong mga pakigsaad o sa panimalay sa Dios. …

“Sama sa nagdilaab nga kalayo nga mousab sa puthaw ngadto sa asero, kon magpabilin kita nga matinud-anon atol sa lisud nga pagsulay sa atong hugot nga pagtuo, kita mahapsay ug malig-on sa espirituhanong paagi” (“Pagsulay sa Inyong Hugot nga Pagtuo,” Liahona, Nob. 2012, 41–42).

Dapita ang mga estudyante sa paghunahuna kon unsay ilang nabuhat o buhaton aron mahinumdom nga ang Dios makalig-on kanila kon makasinati sila og mga pagsulay o oposisyon sa ilang hugot nga pagtuo. Hatagi og panahon ang mga estudyante sa pagpaambit sa ilang mga kasinatian o mga hunahuna mahitungod sa pagsalig sa Dios sa lisud nga mga panahon.

Mga Basahunon sa Estudyante

Doktrina ug mga Pakigsaad 112:10–15; 121:1–10, 16–17; 122:1–9.
Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 39–42.

Pagpabiling Lig-on Panahon sa Oposisyon

Mga Pundasyon sa Pagpahiuli—Leksyon 15

Apostasiya sa Kirtland: Ang Panginahanglan sa Matinud-anong Pagsunod sa mga Lider sa Simbahan

Niadtong 1837, ang mga Santos sa Kirtland, Ohio, nakasinati og pinansyal nga mga problema. Aron sa pagtabang sa mga Santos nga mas mas adunay ikasarang sa ilang panalapi, si Joseph Smith ug ang ubang mga lider sa Simbahan mitukod og kompaniya nga susama sa usa ka bangko ug gitawag kini og Kirtland Safety Society. Tungod sa malukpanon nga ekonomikanhong kalisud niining panahona, daghang mga bangko ang nabangkaruta sa tibuok Estados Unidos. Ang Kirtland Safety Society nabangkaruta usab sa tinglarag sa 1837. Duha ka gatus ka mga namuhunan [investor] sa bangko nawad-an sa hapit tanan sa ilang kwarta, lakip ni Joseph Smith nga nakaangkon sa labing dako nga pagkaalkanse. Bisan og ang Kirtland Safety Society wala gibutangan og puhunan sa Simbahan, ang ubang mga Santos mikonsiderar niini nga bangko sa Simbahan o bangko sa Propeta ug ilang gibasol si Joseph Smith sa ilang pinansyal nga mga problema. Ang uban misugod pa gani sa pagtawag kaniya nga napukan nga propeta. Apan bisan pa sa pagkabangkaruta sa bangko, daghan pang uban nga nawad-an og kwarta mipadayon sa pagkamatinud-anon sa Simbahan ug nagmatinuoron sa Propeta.

Ang kinaiya sa pag-apostasiya ug sa pagpangita og sayop misugod sa pagkaylap taliwala sa daghang mga Santos. Sa Hunyo 1838, mga 200 o 300 ka mga miapostasiya mibiya sa Simbahan, lakip ang upat ka mga Apostoles, ang Tulo ka mga Saksi sa Basahon ni Mormon, ug usa ka sakop sa Unang Kapangulohan. Hinoon, kadaghanan sa mga Santos mitubag niini nga panahon sa pagsulay gamit ang pagtuo, sama gayud sa gibuhat ni Brigham Young. Gilig-on sila sa Ginoo, ug nagpabilin silang matinud-anon sa ilang mga pagpamatuod. Ang pipila niadtong mibiya sa Simbahan niini nga panahon sa apostasiya sa wala madugay mibalik ug mihangyo nga mahiusa sila pag-usab sa Simbahan sa Ginoo. Lakip kanila mao si Oliver Cowdery, Martin Harris, Luke Johnson, ug si Frederick G. Williams.

Taliwala niining mga panlimbasug sa Kirtland, ang pipila ka mga miapostasiya mitinguha sa pagpatay ni Joseph Smith. Gipasidan-an sa Espiritu, siya ug si Sidney Rigdon mibiya pagkagabii niadtong Enero 12, 1838. Gigukod sila sa ilang mga kaaway sulod sa pipila ka adlaw, apan ang Ginoo mipanalipod kanila. Miabut sila uban sa ilang mga pamilya didto sa Far West, Missouri, pagka-Marso 14, 1838.

Hisguti ang mosunod nga mga pangutana isip grupo:

Unsa nga mga baruganan ang atong makat-unan gikan niini nga mga panghitabo kon unsaon sa pagtubag ang mga oposisyon sa atong kinabuhi? Unsa ang atong makat-unan gikan niini nga mga panghitabo kon unsaon pagtubag ang mga oposisyon batok sa Simbahan?
Unsa ang atong mahimo aron magpabiling matinud-anon sa mga lider sa Simbahan bisan og tingali makadungog kita og ubang mga tawo nga mosaway kanila?
Sa unsang mga paagi nga napanalanginan kamo tungod kay nagsunod kamo sa propeta?

Panagbangi didto sa Amihanang Missouri: Pagkat-on nga Malahutay og Maayo ang Oposisyon

Sa 1837 ug 1838, ang pipila sa mga naglagot ug na-excommunicate nga mga miyembro sa Simbahan nga nagpuyo uban sa mga Santos didto sa Far West misugod sa pagkiha sa Simbahan ug sa mga lider ug sa pagsamok sa Simbahan. Sa Hunyo 1838, si Sidney Rigdon kusganong namulong sa unsay nailhan na isip “Salt Sermon [Wali mahitungod sa Asin].” Iyang gigamit ang Mateo 5:13 ug miingon nga kon ang asin mawad-an sa lami, kini wala nay pulos ug angay nga ilabay, nagpasabut nga kadtong mibiya sa Simbahan kinahanglan isalikway gikan sa mga Santos. Paglabay sa duha ka semana, pagka-Hulyo 4, si Sidney Rigdon namulong diin iyang gisaad nga ang mga Santos manalipod sa ilang kaugalingon bisan kon moresulta kini sa usa ka “gubat nga hinutdanay.” Bisan kon kining duha ka mga pakigpulong daw mosukwahi sa panudlo sa Ginoo nga “pangamuyo alang sa kalinaw” (D&P 105:38), kining duha ka pakigpulong gimantala ug nakahimo og dakong kahadlok sa mga dili Santos sa Ulahing mga Adlaw.

Niining panahona, usa ka kinabig nga ginganlan og Sampson Avard mipahigayon og tinago nga mga panumpa niadtong mokuyog kaniya sa pagmugna og grupo sa mga tulisan nga gitawag og Danites. Si Avard misugo kanila nga manulis ug mangawat sa mga taga-Missouri, nag-ingon nga makatabang kini sa pagtukod sa gingharian sa Dios. Si Avard mikombinser sa iyang mga sumusunod nga ang iyang mga sugo naggikan sa Unang Kapangulohan. Ang kamatuoran nadiskubrihan sa wala madugay, ug si Avard gi-excommunicate. Ang mga binuhatan ni Avard nakahimo og dakong kadaut sa imahe sa Simbahan ug nakadugang sa hinungdan sa pagkabilanggo sa Propeta sa Liberty Jail.

Niadtong Oktubre 1838, usa ka gubat tali sa pipila ka mga miyembro sa Simbahan ug sa mga sakop sa Missouri militia miresulta sa kamatayon sa pipila ka mga tawo sa matag habig. Ang gipasobrahan nga mga report sa gubat miabut ni Gobernador Lilburn W. Boggs, ang gobernador sa estado sa Missouri, kinsa mihatag dayon sa unsay nailhan isip mando sa paghurot og patay: “Ang Mormons kinahanglang isipon nga mga kaaway ug kinahanglan hutdon og patay o abugon gikan sa estado, kon gikinahanglan alang sa kaayohan sa publiko” (gikutlo diha sa History of the Church, 3:175). Wala madugay, ang dakbayan sa Far West gilibutan sa militia nga may gidaghanon nga lima ka pilo sa gidaghanon sa pwersa sa mga Santos. Si Joseph Smith ug ang ubang mga lider sa Simbahan gibilanggo sa Liberty Jail, diin nagpabilin sila didto sa tibuok tingtugnaw. Ang nahibilin sa mga Santos napugos sa pagbiya sa estado.

Hisguti ang mosunod nga mga pangutana isip grupo:

Unsa nga mga baruganan ang atong makat-unan gikan niining mga panghitabo aron sa pagtabang kanato nga mas maayong makalahutay sa oposisyon?
Nganong importante man alang sa matag usa kanato nga mosunod sa ehemplo sa Manluluwas sa mga panahon sa kalisud o oposisyon? Unsa ang nahitabo didto sa amihanang Missouri tungod kay ang ubang mga Santos wala mobuhat niini?
Kanus-a kamo nakakita nga ang mga pulong o mga binuhatan sa usa ka tawo miimpluwensya sa laing tawo nga makabaton og positibo nga panglantaw sa Simbahan?