Folasaga i le 3 Nifae
Aisea e Suesue ai Lenei Tusi?
A o e suesueina le 3 Nifae, o le a e aoao e uiga i fetalaiga ma faatinoga a le Faaola i le aluga o Lana galuega i tagata o le Tusi a Mamona. Ua ta’ua e taitai o le ekalesia ia le 3 Nifae o se “Talalelei lona lima” a lo tatou Alii, aua e pei o le Talalelei e fa i le Feagaiga Fou, e na te taulai atu i aoaoga tuusao ma le galuega a Iesu Keriso (tagai Gordon B. Hinckley, “The Cornerstones of Our Faith,” Ensign, Nov. 1984, 52). Na aoao mai Peresitene Ezra Taft Benson: o le “3 Nifae o loo aofia ai nisi o fuaitau sili ona faamomoiloto ma mamana i tusitusiga paia uma lava. O loo molimau mai e uiga ia Iesu Keriso, o Ana perofeta, ma aoaoga faavae o le olataga” (O Le Asiasiga a le Faaola i Amerika,”Liahona, Iulai 1987, 6). I le vaaia o le auala na faaalia ai e Iesu Keriso le agalelei mo tagata “taitoatasi” (3 Nifae 11:15; 17:21), e sili atu ona mafai ona e malamalama i Lona popole mo oe o se tagata e toatasi. E mafai foi ona e aoaoina ni lesona taua e ala i le matauina o le auala na saunia ai e nisi o tagata i latou lava e feiloai ma le Faaola, a o taofia e isi i latou lava mai le mauaina o faamanuiaga matagofie.
O Ai na Tusia Lenei Tusi?
O Mamona sa tuufaatasia ma otootoina ia faamaumauga mai papatusi lapopoa a Nifae e fatu ai le tusi o le 3 Nifae. Ua faaigoaina le tusi ia Nifae le atalii o Nifae, o ana galuega e aofia ai vaitaimi ao lei oo mai le Faaola, le taimi o le Faaola, ma ina ua mavae le faaali atu o le Faaola i tagata. I le taimi atoa o le amioleaga tele lea na muamua atu i asiasiga a Iesu Keriso, na auauna atu ai Nifae “i le mana ma le pule tele” (3 Nifae 7:17). Peitai o le galuega a Nifae ua na o se tamua i le galuega a Iesu Keriso, e ona afioga ma galuega ua faavaeina ai le taulaiga o le mataupu faavae o le 3 Nifae. A o faia lona otootoga o faamaumauga a Nifae, na faaopoopo foi e Mamona ana ia lava faamatalaga ma le molimau i lenei tusi (tagai 3 Nifae 5:8–26; 26:6–12; 29–30).
O Anafea ma o Fea na Tusia ai?
O uluai faamaumauga na faaaoga o ni punavai mo le tusi o le 3 Nifae na foliga mai na tusiaina i le va o le 1 T.L.Mma le 34 T.L.M Na otootoina e Mamona na faamaumauga i le taimi i le va o le T.A. 345 ma le T.A. 385. Sa le’i tusia e Mamona le mea na i ai o ia, ina ua ia tuufaatasia lenei tusi.