Eteru 4–5

Folasaga

Sa poloaiina e le Alii Moronae e tusi ma faamaufaailogaina ana faamaumauga e uiga i le faaaliga a le uso o Iareto. Sa faamatala mai e Moronae o nei tusitusiga o le a faaalia mai pe a lava le faatuatua o tagata e pei o le uso o Iareto. E le gata i lea, sa valoia e Moronae o le a tautinoina mai e molimau e toatolu le moni o le Tusi a Mamona i aso e gata ai.

Eteru 4:1–7

Sa faamaumauina e Moronae ma faamaufaailogaina le tala atoa e uiga i le faaaliga a le uso o Iareto.

Mafaufau i se mea faitino e matua taua ia te oe po o lou aiga atonu e te manao e teu ia aua nei maua e le fanau laiti. O le a se mea e tatau ona aoaoina po o le faia e se tamaitiiiti ae te lei talitonuina o ia ma lena mea faitino?

E talitutusa lava, o loo i ai i le Alii ni upumoni taua e finagalo o Ia e faasoa mai ia i tatou, peitai o loo Ia faatali seiloga ua tatou saunia ina ia mauaina. A o e suesue i le Eteru 4, tagai mo le mea sa aoao atu e Moronae lea e mafai ona fesoasoani e saunia outou ina ia maua le upumoni ma le taitaiga silisili mai le Alii.

A o e faitau i le Eteru 3, sa faaali atu e le Alii i le uso o Iareto se faaaliga e uiga i tagata uma o nofoia le lalolagi—taimi ua tuanai, taimi nei, ma le lumanai—ma mea uma e faatatau i le lalolagi. Sa poloaiina le uso o Iareto ina ia tusia mea sa ia vaaia ma faamaufaailoga ana tusitusiga. Faitau le Eteru 4:4–5, ma tagai i le faamatalaga a Moronae e uiga i le mea sa faaalia i le uso o Iareto. Sa tusia e Moronae le mea sa vaai i ai le uso o Iareto ma sa faapea foi ona poloaiina e le Alii ina ia faamaufaailoga le faaaliga ina ia oo mai i le taimi e tatau ai a le Alii. O le faaaliga o loo faatatau i ai nei mau o loo faaaofiaina i le mea ua masani ona ta’ua o le vaega ua faamaufaailoga o le Tusi a Mamona.

Sa valoia e Moronae ia tulaga e tatau ona i ai ao lei faaalia mai le faaaliga na tuuina atu i le uso o Iareto. Atonu e te manao e faailoga ia tulaga nei i le Eteru 4:6–7.

Ina ia fesoasoani ia te oe ia mafaufau po o le a le uiga o le “faaaoga ai le faatuatua [i le Alii], e pei ona faia e le uso o Iareto” (Eteru 4:7), toe iloilo le Eteru 1–3 ma lisi i totonu o lau api talaaga mo le suesueina o tusitusiga paia ia auala na faaali ai e le uso o Iareto le faatuatua ma le talitonu i le Alii. Ia filifili foi ma faamatala mai se tasi o nei faataitaiga lea na sili ona faagaeetia ai oe ma faamatala mai pe aisea.

E pei ona e talitonuina se tamaitiiti ma se mea faitino taua i na o ni nai tulaga faapitoa, ua faasoa mai e le Alii ni upumoni faaopoopo i na o Ana fanau ao tatou faaali atu lo tatou saunia faaleagaga, talitonu i upumoni taua ua uma ona Ia faaalia mai, ma faatino le faatuatua ia te Ia.

Eteru 4:8–19

Ua aoao mai e Moronae le mea e tatau ona tatou faia ina ia maua ai nisi faaaliga

Tagai i soo se ufiufi faamalama i le potu o e i ai. Mafaufau pe o faapefea ona faaitiitia e ufiufi faamalama le mea e mafai ona e vaai i ai.

Sa faaaoga e Moronae le faatusa o se veli, lea e talitutusa lava i se ufiufi faamalama, e aoao atua mataupu faavae lea e pulea le auala e mafai ai e i tatou taitoatasi ona maua faaaliga. Faitau le Eteru 4:15, ma sue le fuaitau lea e aofia ai le upuveli. Ia matau sa faatusatusa e Moronae le le talitonu i se veli. O a ni auala e pei ai le le talitonu i se veli?

Atonu e fesoasoani le malamalama o le upu saeia i le Eteru 4:15 o lona uiga o le sasae. Mafaufau pe o le a faapei pe afai e mafai ona e saeia le veli i le va o oe ma le malamalama o le Alii.

Ata

masae le veli i le ogatotonu

Sa faamatalaina e Moronae na mea lea na fesoasoani e “saeia lena veli o le le talitonu” ma faataga i tatou ia maua nisi faaaliga. Sa ia amata i lona lapatai atu e uiga i se amio lea na taofia i tatou mai le mauaina o nisi faaaliga. Faitau le Eteru 4:8, ma faailoga le mea o le a mafua ai ona taofia e le Alii se faaaliga ma “faaalia…ni mea silisili atu.”

Tali le fesili lenei, i lau api talaaga mo le suesueina o tusitusiga paia:
1. O le a sou manatu o le uiga o le “finau tetee i le afioga a le Alii”? (Eteru 4:8).
2. O a nisi o auala e ono ”finau tetee ai [se tagata talavou] i le afioga a le Alii”?

Sa faaaofiaina e Moronae ia upu a le Alii lava ia e faamatala ai le auala e maua ai ia faaaliga faaopoopo mai ia te Ia. Suesue i le Eteru 4:11, 13–15, ma faailoga ia fuaitau lea e aoao atua le mea e tatau ona tatou faia e valaaulia ai le faaaliga a le Alii ma le auala o le a Ia tali atu ai pe afai tatou te faia nei mea.

O a ni mataupu faavae e faatatau i faaaliga ma e faapefea ona e valaauliaina i totonu o lou olaga na e aoao ai mai nei fuaiupu? Atonu e te manao e tusi le mataupu faavae e tasi sa e aoaoina mai nei fuaiupu i totonu o au tusitusiga paia i talaane o le Eteru 4:11.

O le mataupu faavae e tasi e mafai ona tatou aoaoina mai le fautuaga a le Alii e faapea a o tatou faatinoina le faatuatua tele i le afioga a le Alii, o le a Ia, faamanuiaina i tatou i nisi faaaliga i Lona lava taimi ma auala e tatau ai.

I lau api talaaga mo le suesueinga o tusitusiga paia, faamatala mai pe aisea e te manatu ai e tatau ona e faaalia le faatuatua i le afioga a le Atua ua uma ona e mauaina ao lei faaalia mai e le Alii nisi mea ia te oe. Ona e fuaina lea o oe lava ia i se fuafaatatau o le 1 i le 10 (10 e “matua lelei lava”) i le lelei o e lagona na e faatino ai le faatuatua i le Alii e ala i le saili mo ma mulimuli i Ana afioga i eria taitasi nei:
1. Tatalo i aso uma
2. Mulimuli i musumusuga sa e maua e ala i le Agaga Paia
3. Lagolagoina ma mulimuli i taitai i la outou paranesi, uarota, itu, po o siteki
4. Suesueina o le afioga a le Atua i le lotu po o le seminare
5. Suesuega faaletagata lava ia o tusitusiga paia
6. Mulimuli i upu a perofeta ma ola ai i poloaiga
I lau api talaaga mo le suesueina o tusitusiga paia, faamatala pe faapefea e le usiusitai i le Atua i se tasi o eria o loo ta’ua i luga ona mafai ai ona e maua nisi faaaliga mai le Atua.

Mafaufau loloto pe faapefea ona e tuufaatasia lenei mataupu faavae o le faatinoina o le faatuatua i le afioga a le Alii i au taumafaiga e valaaulia nisi faaaliga ma le taitaiga mai le Alii.

Eteru 5

Sa tau mai e Moronae o le a vaai ma tautino mai ni molimau se toatolu e uiga i papatusi

Ata

agelu o loo faaali atu papatusi auro ia Iosefa Samita, Oliva Kaotui, Tavita Uitimera

Faitau le Eteru 5:1–3. O le a se mea sa tusia e Moronae i nei fuaitau o loo taulai atu i le Perofeta o Iosefa Samita—o le tagata lea o le a i ai se aso faaliliuina ia talafaamaumau o i luga o papatusi? Mafaufau pe na faapei mo Iosefa Samita le vaai ai i nei fuaitau ao ia faaliliuina le Tusi a Mamona.

Faitau i le saunoaga lenei mai ia Peresitene Henry B. Eyring o le Au Peresitene Sili, ma tagai mo se fuaitau lea e faagaeetia ai oe e uiga i le mau a Molimau e Toatolu: “E lei teena lava e Molimau e Toatolu la latou mau e uiga i le Tusi a Mamona. Latou te lei mafaia aua sa latou iloa e moni. Sa latou faia ni osigataulaga ma feagai ma faigata e sili atu nai lo mea ua iloa e le toatele o tagata. Na tuuina atu foi e Oliva Kaotui lena lava molimau i le paia o le pogai o le Tusi a Mamona a o taoto o ia ua tali oti. … Sa latou faaauau pea ona faamautuina le mea na latou vaai ma faalogo i ai i lena aafiaga ofoofogia, i le gasologa o vaitaimi uumi o le o ese mai le Ekalesia ma Iosefa, sa faateteleina ai le malolosi o le latou molimau” (“O Se Molimau Malosi i le Misiona a le Perofeta o Iosefa,” Ensign po o le Liahona, Nov. 2003, 90).

E tusa ai ma le Eteru 5:2–3, o le a se mea o le a faamanuia ai le Perofeta o Iosefa Samita e fai i papatusi?

E pei o alii e toatolu o e na faamanuiaina e molimau i le moni o papatusi auro, e mafai foi ona e avea o se molimau i le moni o le Tusi a Mamona. I lau api talaaga mo le suesueina o tusitusiga paia, tusi ni nai auala e mafai ona avea ai foi oe o se molimau o le Tusi a Mamona. E le gata i lea, tusi le auala e mafai ai e lau molimau i le Tusi a Mamona ona aafia ai isi tagata.

Saili ma le agaga tatalo ni avanoa e faasoa atu ai lau molimau i le Tusi a Mamona ma se tasi i le vaiaso lenei.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Eteru 4–5 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: