3 Nifae 23

Folasaga

I le maea ai ona sii mai o upu a Isaia, na poloaiina e Iesu Keriso sa Nifae e suesue i upu a perofeta. Na faasa’oina foi e le Faaola sa Nifae mo le le filiga i a latou faamaumauga o tusi talafaamaumau.

3 Nifae 23:1–5

Ua poloaiina e Iesu Keriso tagata e suesue i upu a perofeta

Mafaufau loloto i au aafiaga i le suesueina o tusitusiga paia i le aluga o le tausaga ua tuanai. Tusi ni nai upu po o ni fasifuaitau pupuu o loo faamatala ai faamanuiaga ua oo mai i lou olaga o se taunuuga o lou suesueina o tusitusiga paia.

A o e toe autilo i lau lisi, mafaufau po o a mea e mafai ona aoaoina ai oe e nei faamanuiga e uiga i le taua o le suesueina o tusitusiga paia.

I le maea ai ona sii mai o nisi o aoaoga a Isaia (tagai 3 Nifae 22), na poloaiina e le Faaola ia tagata ia suesue ma le filiga i upu a Isaia ma perofeta. Faitau le 3 Nifae 23:1–5, ma faailoa mai le mafuaaga ua fetalai mai ai le Faaola e tatau ona tatou suesue i upu a Isaia ma perofeta. Mafaufau e faailoga upu ma fasifuaitau o le a fesoasoani ia te oe e manatua ai mea ua e aoaoina.

O se tasi o mafuaaga ua poloaiina ai i tatou e suesue i upu a Isaia ona “ua ia tautala mai e uiga i mea uma e faatatau i [tagata osi feagaiga a le Alii] o e o le aiga o Isaraelu” (3 Nifae 23:2). Ona ua e osia feagaiga ma le Alii, ua avea oe ma se vaega o le aiga o Isaraelu. O tusitusiga a Isaia e faatatau ia te oe. O se tasi o mafuaaga e tatau ai ona tatou suesue i upu a Isaia ona o le a faataunuuina uma i latou (tagai 3 Nifae 23:3).

Matau i le 3 Nifae 23:1 na poloaiina faapitoa ai e Iesu Keriso sa Nifae ia “suesue ma le filiga [i upu a Isaia].”

Tali fesili nei, i lau api talaaga mo le suesueina o tusitusiga paia:
1. O le a lou manatu i le eseesega o le va o le faitauina o upu a perofeta ma le suesue i ai ma le filiga?
2. O a metotia tau le suesueina o tusitusiga paia e mafai ona fesoasoani ia te oe e suesue ai ma le mataalia ma le anoa ia upu a Isaia ma perofeta? (Atonu e te manao e toe iloilo le lesona Iunite 1: Aso 1, “Suesueina o Tusitusiga Paia,” e manatua ai nisi o fesoasoaniga tau le suesueina o tusitusiga paia.)

O Elder Merrill J. Bateman, o se uso faamalolo o le Fitugafulu, na ta’ua nisi o faamanuiaga e oo mai i o tatou olaga a o tatou suesue i upu a perofeta: “E i ai ni faamanuiaga faapitoa e maua pe a suesue se tasi i tusitusiga paia. A o suesue se tagata i afioga a le Alii ma usiusitai i ai, o le a latalata o ia i le Faaola ma maua se faanaunauga maoae e ola i se olaga amiotonu. O le a faateleina le mana e tetee atu ai i faaosoosoga ma faatoilaloina ai vaivaiga faaleagaga. E faamaloloina ai manu’a faaleagaga” (“O Mai ia Keriso e Ala i le Suesue i Tusitusiga Paia,” Liahona, Ian. 1993, 34).

Faitau le 3 Nifae 23:5, ma vaavaai mo le folafolaga na tuuina mai e le Faaola ia i tatou pe a tatou suesue ma galulue i valaaulia ua i ai i tusitusiga paia.

Vaai faalemafaufau e faapea, o loo i ai sau uo po o se tagata o le aiga o loo tauivi ma le suesueina e le aunoa o tusitusiga paia. O le faaaogaina o mea ua e aoaoina i le 3 Nifae 23:1–5, tusi ni mea e te ono tau atu e uunaia ai lenei tagata e suesue ma le filiga i upu a perofeta ma maua se aafiaga anoa i tusitusiga paia.

3 Nifae 23:6–14

Ua aoai e Iesu Keriso Ona soo ona o le faatamala e faamaumau mea taua na tutupu

Faitau le faamatalaga lenei mai ia Peresitene Spencer W. Kimball:

“O le Alii lava Ia o Iesu Keriso na ia faamamafaina le taua tele o le tausia o faamaumauga i sa Nifae ma sa Lamana [tagai 3 Nifae 23:6–13]. …

“Ou te fiafia sa le’o au sa aoaiina, e ui lava e itiiti ma agalelei, mo le le faataunuuina o le matafaioi e tausia le faafouina o a’u faamaumauga. …

“… Ia manatua, e aoai e le Faaola i latou o e faatamala e faamaumau mea taua na tutupu” (“The Angels May Quote from It,” New Era, Feb. 2003, 32, 34–35).

O le vaega o totoe o le 3 Nifae 23 o loo i ai le tala na faamatalaina e Peresitene Kimball, ina ua aoai e le Faaola sa Nifae mo le le faaaofiaina o nisi o mea taua na tutupu i totonu o faamaumauga. Faitau le 3 Nifae 23:6–11, ma faailoa mai mea na faatamala sa Nifae e faamaumau. Aisea e te manatua ai na taua ia sa Nifae ona faamaumauina le faataunuuina o lenei valoaga na faia e Samuelu i sa Lamana? Ua faapefea ona fesoasoani ia i tatou i o tatou aso le mauaina o lena faamaumauga i totonu o le Tusi a Mamona?

Tali le fesili lenei i lau api talaaga mo le suesueina o tusitusiga paia: Aisea atonu e taua ai ona e tusia i lalo mea faaleagaga e tutupu ma musumusuga e oo mai i lou olaga?

Afai na i ai se mea faaleagaga na tupu talu ai nei i lou olaga na e faatamala e faamaumau, mafaufau e tusi loa i totonu o lau api talaaga i le taimi nei. O se api faatauvaa po o ni pepa ua lava lea mo le tausia o se api talaaga. Faitau le 3 Nifae 23:12–14, ma vaavaai mo mea na faia e le Faaola ina ua maea ona usitaia e sa Nifae le poloaiga e tusi i lalo le faataunuuina o le valoaga a Samuelu le sa Lamana.

Na “faamalamalamaina [e le Faaola] tusitusiga paia uma,” o lona uiga na Ia faamalamalamaina le uiga o tusitusiga paia.

Faitau le 3 Nifae 24:1, ma matau le mea e tutusa ai le vaega muamua o lenei fuaiupu ma mea na tupu i le 3 Nifae 23:12–14. Ia matauina ina ua maea ona faamaumauina e sa Nifae mea na aoao ai i latou e Iesu Keriso, na Ia tuu atu ia i latou ni malamalama ma faaaliga faaopoopo e ala i le faamalamalamaina o na mea.

E faavae i luga o mea ua e aoaoina mai le 3 Nifae 23:6–14, faamaea le mataupu faavae lenei: A o ou tusia i lalo musumusuga paia ma mea na tutupu, ou te valaaulia.

Mai i isi auala, atonu e mafai ona e faamaeaina le mataupu faavae o loo i luga i le auala lenei: A ou tusia i lalo musumusuga paia ma mea e tutupu, ou te valaaulia le Alii e tuuina mai nisi faaaliga ia te a’u.

Ina ia e malamalama lelei i le upumoni ua e aoaoina, faitau faamatalaga e lua nei mai ia Elder Richard G. Scott o le Korama a Aposetolo e Toasefululua:

“O le malamalama ua faamaumauina lelei, o le malamalama lea e mafai ona maua i taimi e manaomia ai. O faamatalaga taua faaleagaga e tatau ona teuina i se nofoaga paia, e mafai ona faaali atu ai i le Alii, lou faatauaina o ia mea. O lena ala, e faailoa mai ai, e mafai ona e mauaina le malamalama e sili atu” (“Ausia o le Malamalama Faaleagaga,” Liahona, Ian. 1994, 104).

“Tusi i se mea e malupuipuia, ia mea taua ua e aoaoina mai le Agaga. O le a e iloaina a o e tusia musumusuga taua, e masani ona tele isi musumusuga e oo mai. Ma le isi foi, o le malamalama na e mauaina o le a tumau pea i lou olaga atoa” (“Ina Ia Maua le Malamalama ma le Malosi ia Faaaogaina Ai ma le Poto,” Liahona, Aokuso 2002, 12).

Tali fesili nei, i lau api talaaga mo le suesueina o tusitusiga paia:
1. Aisea e te manatu ai o le tusiaina i lalo o faaaliga ua tatou mauaina mai le Alii e mafai ona fesoasoani tatou te maua ai nisi faaaliga?
2. E mafai faapefea e le faaaluina o le taimi e tusia ai uunaiga a le Alii i o tatou olaga ona fesoasoani tatou te lagona ai le agaga faafetai mo o tatou faamanuiaga ma faaali atu ai lo tatou agaga faafetai ia te Ia?

Atonu e te popole e te le i mauaina lava se aafiaga faapitoa pe paia lea o le a lava lona taua e faamaumau ai. Elder John H. Groberg, o se uso faamalolo faamamaluina o le au Fitugafulu, na saunoa e uiga i lenei popolega: “O nisi o tagata e latou te faapea mai, ‘E leai sa’u mea e faamaumau. E leai lava se mea faaleagaga ua tupu ia te a’u.’ Ou te fai atu, ‘Amata ona faamaumau, ma o le a tutupu mea faaleagaga. O loo i ai iina i taimi uma, ae e sili atu ona tatou amanaiaina pe a tatou tusitusi” (“Writing Your Personal and Family History,” Ensign, May 1980, 48).

E mafai ona e amata faaaogaina mea ua e aoaoina i le faamaumauina o aafiaga faaleagaga e ala i lou feaveaia o se fasi pepa, se api, po o se api talaaga i le vaiaso a sau. Faamaumau ai soo se musumusuga, uunaiga, po o faalogona e te mauaina i le aluga o le vaiaso. Ia faamaumau foi lou lagonaina o le uunaia e faatino na musumusuga e te mauaina. A maea ona e mulimuli i na faatinoga, ia e tusi e uiga i ou aafiaga.

Tau atu i se tagata (se tagata o le aiga, uo, po o se taitai o le Ekalesia) e uiga i lau fuafuaga e tausia se faamaumauga o ou aafiaga faaleagaga. Mafaufau e valaaulia lenei tagata e auai ma oe i lenei taumafaiga e ala i le faamaumauina o nisi o ona lava aafiaga faaleagaga. O le valaauliaina o se isi tagata e faia lenei galuega faatino ma oe, e mafai ai ona oulua faafemalosiaua’i ma lipoti atu lo oulua alualu i luma i le tasi ma le isi. Ae peitai, e tatau ona e manatua e le manaomiaina—ma e ono le talafeagai—le faasoa atu o ou aafiaga paia i le tasi ma le isi.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 3 Nifae 23 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: