FOLASAGA i le 2 Nifae
Aisea e Suesue ai Lenei Tusi?
O le tusi o le 2 Nifae o le a fesoasoani e te malamalama ai i aoaoga faavae autu o le talalelei, e pei o le Pau o Atamu ma Eva, le Togiola a Iesu Keriso, ma le faitalia. Ma le isi, ua tumu le tusi lenei i valoaga mai ia Nifae, Iakopo, ma Isaia, o e sa avea ma ni molimau faapitoa o le Faaola. Sa latou vavalo e uiga i le Toefuataiga o le talalelei i aso e gata ai, le faapotopotoina o tagata o le feagaiga a le Atua, le Afio Faalua mai o Iesu Keriso, ma le Meleniuma. O le tusi foi o le 2 Nifae o loo i ai le faamalamalamaga a Nifae o le aoaoga faavae o Keriso ma faaiuina i le molimau a Nifae e uiga i le Faaola.
O Ai na Tusia Lenei Tusi?
O Nifae, le atalii o Liae, na tusia le 2 Nifae. O Nifae o se perofeta ma o le uluai taitai maoae o tagata sa Nifae. O ana tusitusiga ua faaali ai sa ia maua le mana togiola o le Alii (tagai 2 Nifae 4:15–35; 33:6) ma manao ai ma lona loto atoa ia aumai le faaolataga i ona tagata (tagai 2 Nifae 33:3–4). Ina ia ausia lenei faamoemoega, sa ia faatuina se malumalu ma aoao ona tagata ia talitonu ia Iesu Keriso.
O Anafea ma o Fea na Tusia ai?
Sa amata ona tusi e Nifae le tala lea na avea ma 2 Nifae i le pe a o le 570 T.L.M.—i le mavae ai o le 30 tausaga talu ona tuua e lo latou aiga Ierusalema (tagai 2 Nifae 5:28–31). Sa ia tusia a o i ai o ia i le laueleele o Nifae (tagai 2 Nifae 5:8, 28–34).