Iunite 2: Aso 1

1 Nifae 1

Folasaga

E amata le Tusi a Mamona i le tala a Nifae i lona tama, o Liae, na faataunuuina ma le faatuatua ana matafaioi o se perofeta ma le avea ai o se taitai perisitua i lona aiga. O le malamalama i le galuega talai a Liae e fesoasoani e te malamalama atili ai i le matafaioi a perofeta i o tatou aso. O ia o se tasi o “perofeta e toatele, na vavalo atu i [tagata Iutaia] e ao ina latou salamo” (1 Nifae 1:4). Ona sa usitai Liae i le Atua ma valoia le faatafunaga o Ierusalema, na ulagia o ia e tagata ma saili e fasioti o ia. Ae ui i lea, na olioli Liae i le alofa mutimutivale ma le mana laveai o le Alii. Ao e suesueina le 1 Nifae 1, mafaufau i le ala ua faaalia ai le alofa mutimutivale ma le aofia patino ai o le Atua i lou lava olaga.

1 Nifae 1:1–3

Ua amata e Nifae lana talafaamaumau

Faitau 1 Nifae 1:1, ma faailoa upu autu ma fuaitau o loo faaalia ai pe na faapei le olaga o Nifae.

1. Mai mea na e faitau i ai i le fuaiupu 1, tusi i lau api talaaga mo le suesueina o tusitusiga paia ia le itiiti ma le tasi le auala e te lagona e tutusa ai lou olaga ma le olaga o Nifae.

2. Tali le fesili lenei, i lau api talaaga mo le suesueina o tusitusiga paia: O le a sou manatu pe na faapefea e Nifae ona “vaai i puapuaga e tele” ae “sa alofagia tele e le Alii i [ona] aso uma”?

Faamanuiaga o le Suesue i Tusitusiga Paia

O se tasi o ou avanoa i lenei tausaga i le avea ai ma se tamaitiiti aoga o le seminare o le faitau lea o le Tusi a Mamona. O le faitauina o tusitusiga paia e faamalosia ai lo lua va ma le Alii. Na aoao mai Peresitene Spencer W.Kimball: “Ua ou iloaina a ou manatu faatalale i le ma fesootaiga ma le e paia, ma a oo ina foliga mai e le o faafofoga mai le Atua ma leai se siufofoga paia o fetalai mai, o lona uiga ua ou matua mamao, mamao ese lava. Afai ou te faatofuina au lava i tusitusiga paia, ona vaapiapi ai lea o le va ma toe foi mai le faaleagaga” (Aoaoga a Peresitene o le Ekalesia:Spencer W.Kimball [2006], 67).

1 Nifae 1:4–20

Na maua e Liae se faaaliga ma lapataia tagata i le faatafunaga o Ierusalema

Mafaufau i se taimi na lapataia ai oe e ou matua po o taitai o le Ekalesia e uiga i se mea matautia. O le a le faamoemoega o lo la lapataia o oe?

E alofa le Tama Faalelagi ia i tatou ma e finagalo ia tatou saogalemu mai le agasala, lea e faatamaia i tatou. O se tasi auala e lapatai ai e le Atua Lana fanau e ala mai lea i perofeta. E lapataia e perofeta mai le agasala ma aoao mai le faaolataga e ala mai ia Iesu Keriso.Ao e suesueina le 1 Nifae 1, vaavaai mo faamaoniga o lenei mataupu faavae. Na amata e Nifae lana talafaamaumau i le tauina mai ia i tatou na talai ma lapataia e perofeta tagata i le mea o le a tupu pe a latou le salamo (tagai 1 Nifae 1:4). Faitau 1 Nifae 1:5–7, ma faailoga i au tusitusiga paia pe na faapefea ona tatalo Liae ma po o le a foi le mea na tatalo ai. O le tatalo a Liae i le Alii ua faaalia ai na ia talitonu i mea na fai mai ai perofeta.

Faitau 1 Nifae 1:8–10, ma lio mea uma na vaai i ai Liae i le faaaliga.

• Atua

• Iesu Keriso

• Agelu

• Le isi toasefululua

Liae

Faitau le 1 Nifae 1:11–12, ma vaai po o le a le mea na tupu ia Liae ao ia faitau i le tusi na tuuina atu ia te ia. E ala mai i lenei faaaliga na saunia atili ai e le Alii Liae e talai i tagata o Ierusalema. Faitau 1 Nifae 1:13, ma tusi po o le a le mea na aoaoina ai Liae e uiga ia Ierusalema. Ao e faitau, tuu oe lava ia i le tulaga o Liae ma vaai faalemafaufau pe o le a lou lagona pe a tau atu e le Alii ia te oe o nei mea o le a tutupu i lou aiga ma lou aai.

O le lapataiina e uiga i le faatafunaina o lona nuu ma le aai e mautinoa lava le faigata tele mo Liae. Ae, faitau le 1 Nifae 1:14–15, ma vaai pe aisea na olioli ai Liae e ui lava na ia vaai o le a faaumatia Ierusalema.

3. Tusi ou mafaufauga i le fesili lea i lau api talaaga mo le suesueina o tusitusiga paia: Mata na faapefea e le aafiaga o Liae i le 1 Nifae 1:5–15 ona uunaia lona manao e aoao tagata ma valaaulia i latou e salamo?

Ina ua uma ona lapataia Liae i le faatafunaina o Ierusalema, na ia faasoa atu i tagata o Ierusalema mea na ia aoaoina. Na ia lapataia i latou o le a faaumatia i latou pe afai latou te le salamo. Faitau 1 Nifae 1:18–20, ma faailoa po o a uiga faaalia o tagata o Ierusalema. Faapea o oe o se faatonu o se nusipepa ma e tatau ona e tusia se ulutala autu mo le 1 Nifae 1:18–20. O le a lau ulutala autu?

O Liae o loo Vavalo Atu i le Nuu o Ierusalema

Mafaufau loloto i le fuaitau lenei:

“O perofeta o aso nei ua faapei lava o perofeta anamua e molimau ia Iesu Keriso ma aoao mai Lana talalelei. Latou te faailoa mai le finagalo ma uiga moni o le Atua. Latou te saunoa mai ma le le fefe ma le manino, e tautino mai le leaga o le agasala ma lapatai mai i ona taunuuga. E i ai foi taimi e musuia ai i latou e vavalo mai i mea o le a tutupu i le lumanai mo lo tatou manuia” (Faamaoni i le Faatuatua: O Se Tusitaiala o le Talalelei [2004], 129).

4. I au lava upu, tusi se fuaiupu i lau api talaaga mo le suesueina o tusitusiga paia e faamatala ai le tiutetauave o se perofeta e ui lava i faigata e feagai ma ia.

Ao tusia e Nifae mea na oo i ai lona tama i Ierusalema, na ia faaopoopo se savali i le taga faitau, i le 1 Nifae 1:20, e amata i le fuaitau “Ae faauta, o au, o Nifae, o le a ou faaali atu ia te outou …” o lenei fuaiupu o loo folasia mai ai se autu na faamamafaina e Nifae i lana tusiga atoa. Vase le autu lenei i le 1 Nifae 1:20, ona faitau lea o le Moronae 10:3 ma vaavaai mo se isi autu faapena. (O Moronae o le perofeta mulimuli o le Tusi a Mamona. O le taimi i le va o Nifae ma Moronae e tusa ma le 1,000 tausaga.)

Ia matau na folafola atu e Nifae i le mataupu muamua o le Tusi a Mamona o le a ia faaalia ia i tatou “le alofa mutimutivale agamalu o le Alii” i ana tusitusiga (1 Nifae 1:20). I le mataupu mulimuli o le Tusi a Mamona, na tau mai e Moronae ia i tatou ia manatua “le alofa mutimutivale tele o le Alii” (Moronae 10:3).

Na manao Nifae ia tatou malamalama mai lava i le amataga o lana talafaamaumau o le alofa mutimutivale agamalu e tuuina atu ia i latou e faaalia le faatuatua ia te Ia. Na faamatalaina mai e Elder David A.Bednar o le Korama a Aposetolo e Toasefululua le alofa mutimutivale agamalu o le Alii i o tatou olaga. Lio upu ma fuaitau na faaaoga e Elder Bednar e faamatala ai le “alofa mutimutivale agamalu o le Alii” ao e faitauina lana faamalamalamaga:

“O le alofa mutimutivale o le Alii o ni faamanuiaga patino taitasi, o le malosi, puipuiga, mautinoa, taitaiga, alofa ma le agalelei, faamafanafanaga, lagolagosua, ma meaalofa faaleagaga tatou te maua mai i le Alii o Iesu Keriso. …

“… E le tupu faafuasei le alofa mutimutivale o le Alii pe na o se mea foi e tei lava ua tupu. O le faatuatua, usiusitai, ma le lotomaulalo e aumaia ai le alofa mutimutivale i o tatou olaga, ma o le tele lava o le taimi a le Alii e mafai ai ona tatou iloa ma faapelepele i nei faamanuiaga taua” (“O Le Alofa Mutimutivale o le Alii,” Ensign po o le Liahona, Me 2005, 99–100).

5. Tali le fesili lenei, i lau api talaaga mo le suesueina o tusitusiga paia: O a ni faataitaiga ua e vaaia o le faaalia o le alofa mutimutivale agamalu o le Alii i lou olaga po o le olaga o se tasi e te iloa?

Amata pe faaauau ona vaavaai mo le faaalia o le alofa mutimutivale agamalu o le Alii mo oe ma faamaumau i lau api talaaga mo le suesueina o tusitusiga paia. Ao e faia, o le a sili atu ona e saunia e vaaia faamanuiaga a le Atua ua tuuina atu ia te oe.

6. Tusi le mea lea i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Nifae 1 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: