Folasaga i le Iakopo
Aisea e Suesue ai Lenei Tusi?
O le suesueina o le tusi a Iakopo, e mafai ai ona e aoaoina lesona taua mai se tagata sa i ai se faatuatua e le maluelue ia Iesu Keriso. Sa faafia ona molimau mai Iakopo e uiga i le Faaola ma valaaulia lona nuu ma i latou o e o le a faitau i ana upu e salamo. Sa ia aoaoina ma faaali mai le taua o le faataunuuina ma le maelega o valaauga mai le Alii. Sa ia lapatai atu i lona nuu e uiga i le leaga o le faamaualuga, oa, ma le ola le mama. Sa sii mai foi ma ta’ua e Iakopo le faataoto a Senosa e uiga i laau olive, lea o loo faaalia a taumafaiga le faavaivai a le Faaola e aumai le faaolataga i fanau uma a le Atua. I lana feiloaiga ma Serema, se aneti-Keriso, sa faaalia ai e Iakopo le ala e tali atu ai tagata amiotonu ia i latou e fesiligia pe faitioina lo tatou faatuatuaga.
O Ai na Tusia Lenei Tusi?
O Iakopo, o le atalii lona lima a Sarai ma Liae, sa tusia le tusi lenei. Sa fanau o ia i le vaomatua i le taimi o le malaga a lona aiga i le nuu o le folafolaga. I lona talavou, sa “mafatia ai [Iakopo] i puapuaga ma le faanoanoa tele, ona o le le migao o [ona] uso” (2 Nifae 2:1). Ae peitai, sa folafola atu e Liae ia te ia o le a “faapaia [e le Atua] puapuaga [a Iakopo] mo [lona] manuia” ma o le a ia faaaluina ona aso “i le galuega a [lona] Atua” (2 Nifae 2:2–3). I lona talavou, sa vaai ai Iakopo i le mamalu o le Faaola (tagai 2 Nifae 2:3–4). Sa faapaia e Nifae ia Iakopo e avea ma se ositaulaga ma se aoao i tagata sa Nifae (tagai 2 Nifae 5:26) ma tuuina atu mulimuli ane ia te ia le vaaiga o papatusi laiti a Nifae (tagai Iakopo 1:1–4). I le avea ai ma se taitai perisitua ma se aoao faamaoni, sa galue ai Iakopo ma le filiga e tauanau lona nuu ia talitonu ia Keriso (tagai Iakopo 1:7). Sa ia maua faaaliga e uiga i le Faaola, maua auaunaga a agelu ma faalogo i le siufofoga o le Alii (tagai Iakopo 7:5), ma vaai i lona Togiola (tagai 2 Nifae 11:2–3). O Iakopo o le tama o Enosa, o le na ia tuuina atu i ai papatusi a o le’i maliu o ia.
O Anafea ma o Fea na Tusia ai?
E amata le tusi a Iakopo pe tusa o le 544 T.L.M., ina ua tuuina atu e Nifae ia Iakopo papatusi laiti. E faaiuina i le latalata ai i le faaiuga o le soifuaga o Iakopo, ina ua ia tuuina atu papatusi i lona atalii o Enosa. Na tusia e Iakopo lenei faamaumauga, a o nofo ai i le laueleele o Nifae.