Iunite 9: Aso 4

Iakopo 3–4

Folasaga

O le Iakopo 3 o loo i ai le faaiuga o le lauga a Iakopo na fai atu i lona nuu. I lenei faaiuga, sa tuuina puupuu atu ai e Iakopo upu faamafanafana ma le folafolaga i e loto mama. Sa ia aoaia foi tagata faamaualuluga ma lē faamaoni sa i ai i lona nuu, ma lapataia i latou e uiga i taunuuga pe afai latou te le salamo. Iakopo e 4 o loo i ai upu na musuia Iakopo e tusi mo tagata o e o le a faitauina ana tusitusiga i se aso. Sa ia molimau mai e uiga i le Togiola a Iesu Keriso ma apoapoai mai i ana au faitau e faalelei (toefuatai i le ogatasi) i latou lava ma le Atua le Tama e ala i le Togiola. Faatasi ai ma se leo o le lapataiga, sa ia ta’u atu ai i tagata Iutaia o e o le a teena Iesu Keriso ma le manino o Lana talalelei.

Iakopo 3

Sa faamalosiau atu Iakopo i e e loto mama, ma sa ia uunaia isi e salamo

Mafaufau pe o le a se fautuaga e te ono tuuina atu i se alii po o se tamaitai talavou i tulaga nei:

• O se tamaitai talavou o loo tauivi e ola amiotonu, ae ua mafatia ona o lona tama ua avea le ava malosi ma ana vaisu.

• O se alii talavou na te faia le mea sili ia ola i le talalelei ae e faigata ona o le teteaga a ona matua.

• O se tamaitai talavou e taumafai ma le maelega e alofa i lona aiga, ae e faigata ia te ia i le aiga ona o amioga manatu faapito ma le le magafagafa o lona uso.

Mafaufau i se taimi na e oo ai i ni tofotofoga e ui lava sa e taumafai e ola amiotonu. Na aoao mai e Iakopo ia i tatou le mea e fai i tulaga faapena. Faitau le fuaiupu muamua o le Iakopo 3:1, ma faailoa mai po o ai na tautala muamua atu i ai Iakopo i le mataupu 3.

Fai mai Iakopo ona o le faamaualuluga ma le le mama o isi (lea sa ia lapatai muamua e uiga i ai, e pei ona tusia i le Iakopo 2) na faapea ona mafatia ai i latou e loto mama. Faitau le Iakopo 3:1–2, ma faatumu le siata o loo i lalo:

O le a le mea na apoapoai atu Iakopo i e e loto mama e fai?	O le a le mea ua folafola mai e le Atua i e e loto mama?

1. Toe faamanatu au tali o loo i le koluma muamua. Ina ia fesoasoani ia te oe e mafaufau atili i le mataupu faavae lenei, tali ni fesili se lua o fesili nei i lau api talaaga mo le suesueina o tusitusiga paia:

   1. O le a lou manatu e mafai faapefea e se tagata talavou ona “vaai atu i le Atua ma le mausali o le mafaufau”?

   2. E te manatu o le a le uiga o le tatalo i le Atua “ma le faatuatua tele” i le taimi o se tofotofoga?

   3. E te manatu o le a se mea e mafai ona fai e se tagata talavou e “tali i le afioga malie a le Atua”?

2. Toe faamanatu au tali o loo i le koluma lona lua. Ua aoao mai nei fuaiupu o le a faamafanafana e le Atua e e loto mama i o latou puapuaga. Ina ia fesoasoani i lau iloiloga atili o lenei mataupu faavae, tali se fesili se tasi pe sili atu o fesili o loo i lalo i lau api talaaga mo le suesueina o tusitusiga paia:

   1. Na faapefea ona faamafanafana oe e le Atua i ou puapuaga a o e taumafai e mulimuli ia te Ia?

   2. Sa faapefea ona fesoasoani le tatalo “ma le faatuatua tele” ia te oe i se taimi o tofotofoga?

   3. O le a se taimi na fesoasoani ai le mauaina o le afioga a le Atua e te lagona ai Lona alofa?

Ina ua ia talanoa atu i e e loto mama, sa lauga atu Iakopo ia i latou o e sa le loto mama. Faitau le Iakopo 3:3–4, 10–12, ma faailoa mea na uunaia e Iakopo ia nei tagata e fai. Atonu o le a aoga le iloa o le fasifuaiupu “fafagau mai mafaufau” o lona uiga ia fafagu o tatou tomai ma lagona, ae o upu faitaaga ma le mataaitu e faatatau i agasala o feusuaiga ma le tuinanau.

I le Iakopo 3:3–4, 10–12, tatou te faitau ai foi i lapataiga a Iakopo e uiga i le mea o le a tupu pe afai e le salamo lona nuu. A uma ona suesue ia fuaiupu nei, li’o ia fasifuaitau e faamatala ai taunuuga nei: (a) O le a faatamaia i latou e sa Lamana. (e) O a latou faataitaiga o le a taitai atu ai a latou fanau i le faafanoga. (i) O le a latou oo i le oti faalua, pe o se isi faaupuga, o se vavaeeseina mai le Atua.

Mafaufau mo se taimi pe mafai faapefea ona avea lapataiga a Iakopo ma se faamanuiaga tele i lona nuu.

E pei ona tusia i le Iakopo 3:5–7, sa tuusa’o ona ta’u atu e Iakopo o sa Lamana sa “sili atu le amiotonu” nai lo o sa Nifae ona “ua alolofa a latou tane ia latou ava, ma ua alolofa a latou ava ia latou tane; ma ua alolofa a latou tane ma a latou ava ia latou fanau.” Sa manaomia ona salamo sa Nifae i a latou agasala uma, ae maise lava o agasala ia na taitai atu i le faaitiitia o le alofa ma le faatuatuaina i o latou aiga.

Mafaufau loloto i le Iakopo 3:11–12, ma otooto le savali i a oe lava upu.

Otootoina o Mau i Au Oe Lava Upu

Ina ia otooto mau i au oe lava upu, saili ia malamalama i mea o loo aoao mai e mau, ona mafaufau lea, fai atu, pe tusi le savali i se auala e te malamalama ai i lona uiga. O le faia o lenei mea e mafai ona fesoasoani e te faatatauina ai upumoni o mau i lou olaga. A uma ona otooto se fuaiupu po o ni fuaiupu, toe faitau ma ia mautinoa o lau otootoga e faamaoni i le manatu autu o le fuaiupu po o fuaiupu.

Faaalu sina taimi e mafaufau ai i faaosoosoga e feagai ma oe ma o a foi ni taunuuga leaga sa e sao mai ai a o e salamo mai i au mea sese.

Iakopo 4

Ua uunaia e Iakopo lona nuu ia maua se faamoemoe faapea e mafai ona latou toe foi atu i le afioaga o le Atua

Ina ia saunia e suesue le Iakopo 4, siia’e lau peni po o le penitala ia le itiiti ifo ma le lua futu pe tasi le mita i luga ae o lau tusilesona, ma taumafai e faapalasi ina ia tau tonu i le ogatotonu o le taulaiga—“o le faailoga.” Atonu o le a e manao e faataitai lenei mea mo ni nai taimi. Mafaufau i le itiiti o le aoga o le a i ai au taumafaiga pe afai sa e tilotilo i se isi mea ae le o le faailoga. O le a le lelei e te manatu o le a i ai tagata fanafana au pe afai latou te le autilo atu i le taulaiga, po o le faailoga, a o latou fanafana pe latou te tilotilo atu foi i le mea e i talaatu o le faailoga? Faitau le Iakopo 4:14, ma faailoa mai uiga o tagata na valoia e Iakopo o le a tilotilo “i talaatu o le faailoga.”

li’o o le faailoga

Atonu e te manao e tusi i au tusitusiga paia i talane o le Iakopo 4:14 e faapea “o le faailoga o Keriso” (Neal A. Maxwell, “Jesus of Nazareth, Savior and King,” Ensign, Me 1976, 26). Na faapena foi ona aoao mai o Paulo, “Ou te tausisi atu i le faailoga, ia maua ai le taui na valaauina ai a’u mai luga e le Atua ia Keriso Iesu” ( Filipi 3:14).

Sa faatatau ai le perofeta o Iakopo i tagata Iutaia o e sa le malamalama i le tulafono a Mose ma lona faamoemoega ia taitai atu i latou i le Faaola. O le toatele o tagata Iutaia sa vaavaai mo se ituaiga laveaiga e ese mai nai lo le ituaiga, sa ofoina mai e Iesu, le Mesia ia i latou—sa latou suea se laveaiga mai tulafono ma sauaga e ese mai.

3. Tali fesili nei i lau api talaaga mo le suesueina o tusitusiga paia:

   1. O le a sou manatu i le uiga o le vaavaai i tala atu o le faailoga (Iesu Keriso)?

   2. O a uiga ma amioga o loo lisiina i le Iakopo 4:14 na faatauasoina ai sa Iuta ma taofia ai i latou mai le taliaina o Iesu Keriso?

   3. O a ni isi o faataitaiga o le vaai i talaatu o le faailoga, po o le le mafai ona taulai atu i le Faaola i aso nei?

Sa manao Iakopo ia i latou o e o le a faitau i ana tusitusiga ia i ai se uiga e matuai ese lava mai uiga o sa Iuta o e na misia le faailoga. Faitau le Iakopo 4:4, ma faailoa le mea na manao Iakopo ia iloa e i latou uma o le a faitau i ana faamaumauga. Faitau foi le Iakopo 4:12, ma faailoga le fasifuaitau “aisea tou te le tautatala ai e uiga i le togiola a Keriso.” E pei ona tusia i le Iakopo 4:4–12, sa tuu atu e Iakopo nisi o mafuaaga na ia talitonu ai ia Iesu Keriso ma le mafuaaga na ia manatu ai sa taua le faailoa atu i isi o le Togiola.

4. Tusi ia mau nei e faatatau atu i ai i lau api talaaga mo le suesueina o tusitusiga paia, ona tusi lea o ni otootoga pupuu o mea na aoao mai e Iakopo e uiga ia Iesu Keriso po o le Togiola i mau taitasi:

   1. Iakopo 4:4–6

   2. Iakopo 4:7–8

   3. Iakopo 4:9–10

   4. Iakopo 4:11

O a upu po o fasifuaitau i le Iakopo 4:4–6 e faailoa ai na malamalama le nuu o Iakopo i le natura o le aiga Atua?

Atonu o le a aoga le iloa o le “tuu atu i le Atua o ni faapolopolo a Keriso” (Iakopo 4:11) e faatatau i le tutulai i luma o le Atua ma agavaa e ulufale atu i le malo o selesitila. Ma le isi, e taua foi le malamalama afai e tatau ona i ai so tatou “faamoemoe i le mamalu [o le Faaola]” (Iakopo 4:4), e ao ona tatou talitonu o Iesu Keriso ua saunia le ala mo i tatou ina ia faaolaina ai mai a tatou agasala ma toetutu ai ina ia mafai ona tatou toe foi atu i le afioaga o le Tama Faalelagi.

O le tasi upumoni e mafai ona tatou iloa i le Iakopo 4 o lenei: E ala mai i le Togiola a Iesu Keriso, e mafai ona faatumulia i tatou i le faamoemoe ma faalelei i tatou lava ma le Atua.

5. Tusi ni tali pupuu i fesili nei, i lau api o talaaga mo le suesueina o tusitusiga paia:

   1. Toe faamanatu upumoni e uiga ia Iesu Keriso a o e suesue i le Iakopo 4:4–12, ma filifili le tasi e faapitoa ona faaosofia ai oe ia manao e tautala atu e uiga i le Togiola. Tusi lena upumoni ma faamatala pe aisea na e filifilia ai.

   2. O a isi mafuaaga patino e faaosofia ai oe e manao e tautala atu e uiga ia Iesu Keriso ma le Togiola?

A o e faaiuina le lesona lenei, mafaufau pe o le a se mafuaaga e te faafetai ai mo le Faaola. Mafaufau e faasoa atu ou mafuaaga i se tagata o le aiga po o se uo lelei.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Iakopo 3–4 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: