Itulau Autu, Faatomuaga, ma Mau a Molimau

Folasaga

Mafaufau faapea ua fesili se uo ia te oe pe aisea e manaomia ai e le Ekalesia a Iesu Keriso o le Au Paia o Aso e Gata Ai le Tusi a Mamona ao lea ua i ai le Tusi Paia. (Atonu ua uma ona e oo i ai!) O le a lau tala o le a fai i lau uo?

E amata le Tusi a Mamona i le itulau autu ma se faatomuaga e faamalamalama ai le faamoemoega o lenei tusi paia, e aofia ai lona aafiaga ia tatou molimau ma le va ma le Atua. O itulau amata lava o le Tusi a Mamona e maua ai foi mau a molimau na vaai i papatusi auro lea na faaliliu mai ai le tusi ma tuuina mai molimau o lona amataga paia.

A o faaiuina lenei lesona, mafaufau i le ala e mafai ai ona sili ona aoga ia te oe lou suesue i le Tusi a Mamona i lenei tausaga ma pe faapefea ona fesoasoani le Tusi a Mamona ia te oe ia maua se molimau sili atu i le Faaola o Iesu Keriso ma Lana talalelei toefuataiina.

O Le Itulau Autu

Ata

Iosefa Samita ma papatusi

Na faamatalaina e le Perofeta o Iosefa Samita na faaaofia e le perofeta anamua o Moronae le itulau autu o le Tusi a Mamona i papatusi auro: “O le itulau autu o le Tusi a Mamona o se faaliliuga sao lava, na aumaia mai le itulau mulimuli lava, i le itu tauagavale o le tuufaatasiga, po o le tusi o papatusi, ia na aofia ai le tusi faamaumau lea na faaliliuina, … ma … o le itulau autu ua taua e le o se mea na tusia i ona po nei, e le o se mea foi na ou tusia po o se isi lava tagata na ola po o loo ola i lenei augatupulaga” (Aoaoga a Peresitene o le Ekalesia:Iosefa Samita [2007], 60–61).

Ao e faitauina le parakalafa muamua o le itulau autu, vaai mo upu ma fuaitau na faaaoga e Moronae e molimau ai i le aofia ai o le Alii i le oo mai o le Tusi a Mamona.

Faamatala i lau api talaaga mo le suesueina o tusitusiga paia, pe aisea e taua ai ia te oe le iloa o le aafiaga tele o le Alii i le tusiaina ma faaliliuina o le Tusi a Mamona.

Ao e faitauina le parakalafa lona lua o le itulau autu, vaai mo faamoemoega autu e tolu na tuuina mai e Moronae mo le tusiaina o le Tusi a Mamona. (Atonu e te manao e faailoga nei mea i au tusitusiga paia.) O le “aiga o Isaraelu” e faatatau ia i latou e tupuga mai ia Iakopo faapea ma i latou o tagata o le feagaiga o le ekalesia a le Alii (tagai i le Taiala i Tusitusiga Paia, “Isaraelu”).E faapea foi, le fuaitau “Iutaia ma Nuuese” e aofia ai fanau uma a le Tama Faalelagi. I le parakalafa lona lua, faapatino le savali o le itulau autu e ala i le suitulaga o lou igoa mo le “se toe vaega o le Aiga o Isaraelu” ma “Iutaia ma Nuuese.”

Faamalamalama i lau api talaaga mo le suesueina o tusitusiga paia, pe faapefea ona fesoasoani le iloaina o nei faamoemoega o le Tusi a Mamona ia te oe e malamalama ai i lona taua.

Na saunoa Peresitene Ezra Taft Benson e uiga i le “misiona autu” po o le faamoemoega o le Tusi a Mamona:

“O le misiona autu a le Tusi a Mamona, e pei ona tusia i ona itulau autu,‘o le faatalitonuina lea o tagata Iutaia ma tagata o Nuu Ese o Iesu o le Keriso lea, le Atua e Faavavau, ua faaali mai o ia i atunuu uma.’

“E mafai e soo se tasi faamaoni e saili i le upumoni, ona ia maua le molimau o Iesu o le Keriso, pe a ia manatunatu ma le agaga tatalo i upu musuia o le Tusi a Mamona.

“E sili atu ma le afa o fuaiupu uma o le Tusi a Mamona e faatatau i lo tatou Alii. E sili atu le tele o suafa ua ta’ua ai Keriso i fuaiupu o le Tusi a Mamona nai lo le Feagaiga Fou” (“O Mai ia Keriso,” Liahona, Ian. 1988, 81).

E pei ona folafola mai e le itulau autu, o le Tusi a Mamona o se molimau o Iesu o le Keriso. Ao e suesueina le Tusi a Mamona i lenei tausaga, tulimatai atu i mea e te aoaoina e uiga ia Iesu Keriso ma fesili atu i le Tama Faalelagi i le tatalo e faamautuina mea o loo e aoaoina i le mana o le Agaga Paia.

Faatomuaga i le Tusi a Mamona

Pe na e tau mafaufau ea pe faapefea e se faitotoa faaofuofu o se auala maualuga po o se fale ona mafai ona taofia mai le pau e aunoa ma se lagolago i lalo ifo? Pe a fausia se faitotoa faaofuofu, e fausia itu e lua agai i luga ma ni lagolago e taofia ai. Ona fuaina lea ma le faaeteete le avanoa i le tumutumu o le faaofuofu, se maa, e taua o le “maa’au’au,” e tipiina ina ia fetaui lelei. Pe a tuuina le maa’au’au i lona tulaga, o le a tu loa le faitotoa faaofuofu e aunoa ma se faalagolago. Vaai faalemafaufau i le mea e tupu i le faitotoa faaofuofu pe afai e aveese le maa’au’au.

Ata

faitotoa faaofuofu

Sue i le faatomuaga o le Tusi a Mamona ma faitau le parakalafa lona ono, e amata “E faatatau i lenei talafaamaumau …” Ao e faitauina lenei parakalafa, vaai mo mataupu faavae autu e tolu na aoao mai e le Perofeta o Iosefa Samita e uiga i le Tusi a Mamona.

Na faamatalaina atili mai e Peresitene Ezra Taft Benson pe faapefea ona avea le Tusi a Mamona ma maa’au’au o la tatou tapuaiga. Ao e faitauina le upusii, vase fuaitau po o faamatalaga e mafai ona fesoasoani ia te oe e faamalamalama i se tasi le matafaioi autu o le Tusi a Mamona i la tatou tapuaiga.

“O loo i ai ala e tolu ua avea ai le Tusi a Mamona ma maaauau o la tatou tapuaiga.O le Tusi a Mamona o le maaauau o la tatou molimau ia Keriso.O le Tusi a Mamona o le maaauau o la tatou aoaoga faavae.O le Tusi a Mamona o le maaauau o la tatou molimau.

“O le Tusi a Mamona o le maaauau o la tatou molimau ia Iesu Keriso, o Ia lava o le maatulimanu o mea uma tatou te faia.O le Tusi a Mamona e molimau i Lona moni ma le mana ma le manino. …

“Ua fetalai mai le Alii lava Ia o loo i le Tusi a Mamona le ‘atoatoa o le talalelei a Iesu Keriso’ (MF&F 20:9). E le faapea o loo i ai aoaoga faavae ma mataupu faavae uma lava ua faaalia mai. Ae o lona uiga, o loo i le Tusi a Mamona le atoatoa o mataupu tatou te maua ai le olataga. Ma ua aoao manino ai i ni auala faigofie e oo i fanau laiti e mafai ona latou aoao ma iloa ai ala i le faaolataga ma le faaeaga. …

“Mulimuli, o le Tusi a Mamona o se maa’au’au lea o le molimau. E faapei ona solovi i lalo le faitotoa faaofuofu pe a aveese le maa’au’au, e faapea foi mea uma lava ua aoaoina ma faia e le Ekalesia pe a aveese le moni o le Tusi a Mamona. Ua malamalama lelei lava fili o le Ekalesia i lena mea. O le pogai lena ua latou tinou ai e tau sese le Tusi a Mamona, aua a mafai ona tauseseina, o le a faapea foi le Perofeta o Iosefa Samita. O le a faapena foi lo tatou talitonuga i ki o le perisitua, ma faaaliga ma le Ekalesia toefuataiina. Ae a faapea ua moni le Tusi a Mamona—ma e miliona ma miliona ua molimau mai ua latou maua le molimau mai le Agaga ua moni—e tatau i le tagata ona ia talia talitonuga o le toefuataiga faapea ma mataupu uma ua ala mai ai” (“O Le Tusi a Mamona—O Le Maa’au’au o lo Tatou Faatuatuaga,” Liahona, Ian. 1987, 5–6).

Faitau le parakalafa lona valu o le faatomuaga o le Tusi a Mamona, lena e amata “Matou te valaau atu i tagata uma i soo se mea … ,” ma faailoa mai pe faapefea ona e iloa e moni le Tusi a Mamona. A uma ona e faitauina le parakalafa, faauma le fuaiupu lea i lau api o talaaga mo le suesueina o tusitusiga paia: A tatou faitau, mafaufau loloto, ma tatalo, o le Agaga Paia o le a …

E pei lava ona lagolagoina e le maa’au’au isi maa i le faitotoa faaofuofu, o se molimau o le Tusi a Mamona e faamalosia ai a tatou molimau o isi mataupu faavae o le talalelei. Faitau le parakalafa lona iva o le faatomuaga, e amata i le “O i latou o e e mauaina lenei molimau paia … ,” ma vase nisi upumoni faaopoopo se tolu o le a e mauaina se molimau ao e mulimuli i le fautuaga i le parakalafa valu. Ao tatou faitau, mafaufau loloto, ma tatalo e uiga i le Tusi a Mamona, o le a molimau mai le Agaga Paia e moni, o Iesu o le Keriso, o Iosefa Samita o se perofeta a le Atua, ma o le Ekalesia a Iesu Keriso o le Au Paia o Aso e Gata Ai o le malo lea o le Alii i luga o le fogaeleele.

Faamatala i lau api talaaga mo le suesueina o tusitusiga paia, pe aisea ua ta’ua ai le Tusi a Mamona o le maa’au’au o la tatou tapuaiga.

Mau a Molimau

Mafaufau o oe o se faamasino o taumafai e saili le mea moni i se feeseeseaiga i le va o ni tagata se toalua. O le a le taua o le i ai o se molimau i le mea na tupu? O le a se taua sili atu o le i ai o ni molimau se tele?

Na faaali atu e le Alii ia papatusi auro na faaliliu mai ai e Iosefa Samita le Tusi a Mamona i ni molimau. Faitau le “Mau a Molimau e Toatolu,” ma faailoga ni fuaitau se tolu pe fa na latou faaaogaina e molimau ai i papatusi ma le oo mai o le Tusi “O le Mau a Molimau e Toavalu.” Ia matau le eseesega o aafiaga o vaega e lua, e pei ona faaalia i lalo.

Molimau e Toatolu	Molimau e Toavalu
Na faaali atu e se agelu ia i latou papatusi, le Urima ma le Tumema, le ufifatafata, le Liahona, ma le pelu a Lapana.	Na faaali atu e Iosefa Samita ia i latou papatusi.
Na tautino atu e le siufofoga o le Atua le paia o faamaumauga.	Na latou fetagofi (“tau sii i luga”) papatusi auro.

Tali le fesili lenei, i lau api talaaga mo le suesueina o tusitusiga paia: Aisea e taua ai le i ai o nisi molimau o papatusi auro e faaopoopo atu ia Iosefa Samita?
Tusi i lau api talaaga mo le suesueina o tusitusiga paia, lau molimau i le Tusi a Mamona, Iosefa Samita, ma le talalelei toefuataiina a Iesu Keriso. Afai e te lagonaina e le o i ai nei sa oe lava molimau, tusi po o le a lau mea o le a fai ina ia maua se molimau i le Tusi a Mamona i lenei tausaga. Ina ia faamalosia lau molimau, faasoa atu ou lagona i le mea na e tusia i se tasi o ou matua po o se tasi o lou aiga po o se uo.

Tusi le fuaitau lea i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le lesona “Anomea o le Faatomuaga o le Tusi a Mamona” ma faamaeaina i le (aso).

Fesili, manatu, ma vaaiga faaopoopo, ou te fia faasoa i lou faiaoga: