O aoaoga a le Tupu o Peniamina sa i ai se aafiaga loloto i le nuu o e na faalogo ia te ia. O nei tagata sa faaalia le faatuatua i le Togiola, salamo, mamaua se faamagaloga o a latou agasala. Ona aoao atu lea e le Tupu o Peniamina ia i latou le mea e ao ona latou faia ia tumau ai le faamagaloga o a latou agasala. Sa ia folafola mai ua pei i tatou o ni tagata aisi aua tatou te faalagolago atoa atu i le Atua mo lo tatou faaolataga. Sa lapatai mai le Tupu o Peniamina e tatau ona leoleo e le aunoa o tatou mafaufauga, amioga, ma gaoioiga.
Na lofituina le motu o tagata i le Agaga ma maua se faamagaloga o a latou agasala
Vaai faalemafaufau e faapea na fesili sau uo, E mafai faapefea ona ou iloa pe ua faamagaloina sa’u agasala faapitoa? O le a faapefea ona e tali i ai?
Suesue i le Mosaea 4:1–3, ma vaavaai mo manatu e fesoasoani i lou taliina o le fesili a lau uo. Tusi pe o le a lau tali atu i ai:
O le tasi o mataupu faavae ua aoaoina i nei fuaiupu o lenei: A o faaali lo tatou faatuatua ia Iesu Keriso ma salamo faamaoni, e mafai ona tatou maua se faamagaloga o a tatou agasala. O lena ituaiga salamo o se elemene taua i le mauaina o le olioli ma le filemu o le mafaufau.
E masani lava, a fesili mai se tagata ia i tatou, tatou te mananao e tuu atu i ai se tali. O le taimi lenei, a o e mafaufau i le ala e tali ai le fesili a lau uo, fuafua pe faapefea ona e taliina le fesili i se fesili. Manatunatu i le Mosaea 4:1–3 ma le faamatalaga lenei a Elder F. Burton Howard, o se Fitugafulu faamalolo faamamaluina: “A e salamo atoatoa, e te lagona le filemu i totonu o le loto. E te iloa ua faamagaloina oe ona o le avega na leva ona e tauaveina, o le a faafuasei ona le toe i ai iina. Ua alu ese ma e te iloa ua alu ese” (“Repentance,” Ensign, Me 1983, 59).
Mafaufau i se fesili e mafai ona e fesili atu ai i lau uo e fesoasoani ia ona iloa ai le ala e mafai ai ona tatou iloa ua faamagaloina i tatou.
Atonu o le a aoga le malamalama i upu e lua o loo i le Mosaea 4:1–3 a o e mafaufau i se fesili e fai atu. O le vaaia o i tatou lava i lo tatou “tulaga faaletino” o lona uiga o le iloaina o lo tatou tulaga pau pe faalelalolagi. O le vaaia o i tatou lava ua “maualalo lava nai lo le efuefu o le eleele” o lona uiga o le efuefu o le eleele e usitai i poloaiga a le Atua (tagai Helamana 12:7–8), ae o fanau a le Atua e le o taimi uma e usitai ai i Ana poloaiga.
O se faataitaiga o le taliina o le fesili a lau uo i se fesili e ono faapea: E te lagona le filemu o le mafaufau pe a e mafaufau e salamo i au agasala? O faatumulia oe i le olioli?
Tali fesili nei, i lau api talaaga mo le suesueina o tusitusiga paia:
Sa faamagaloina le nuu o le Tupu o Peniamina ona o le “faatuatua tele ia Iesu Keriso sa ia te i latou” (Mosaea 4:3).} O a faatinoga o loo tusia i le Mosaea 4:1–2 na faaalia ai lo latou faatuatua? O a ni uiga ma lagona e tatau ona e maua o le a talitutusa ma na o le nuu o Mosaea?
E mafai faapefea ona faaali lou faatuatua ia Iesu Keriso a o e sailia se faamagaloga o au agasala?
Ina ua uma ona molimauina uiga salamo o lona nuu, sa aoao i latou e le Tupu o Peniamina i ni isi o mea e ao ona latou faia e maua ai le faaolataga. A o e faitau i le Mosaea 4:4–8, vaai mo le mea e ao ona tatou faia e maua ai le faaolataga.
Faamatala pe tuu mai ni faataitaiga o le auala o loo e taumafai ai e fai ia mea na faamatala mai e le Tupu o Peniamina:
Ua aoao mai le Tupu o Peniamina i le ala e faatumau ai le faamagaloina o agasala
Ina ua uma ona maua e sa Nifae se faamagaloga o a latou agasala, sa aoaoina i latou e le Tupu o Peniamina i le auala e faatumau ai (pe tausisia) ai lena tulaga mama ma le le filogia. Suesue le Mosaea 4:9–11, 26, 28, 30, vaai mo le mea e ao ona tatou talitonu i ai ma fai ia tumau ai se faamagaloga o a tatou agasala. Tusi le mea e te maua i le siata lenei:
Faatumauina o se Faamagaloga o Agasala
Talitonu
Fai
Sa aoao atu e le Tupu o Peniamina le tele o mea i lona nuu, e pei ona tusia i le Mosaea 4:9–30, ae o le tasi o mataupu faavae aupito taua sa ia aoao mai o le: Afai tatou te faamaualalo i tatou lava i luma o le Atua ma taumafai e atinae uiga faaKeriso, e mafai ona tatou faatumauina se faamagaloga o a tatou agasala.
Na aoao mai le Tupu o Peniamina e faapea, e tatau ona tatou “talitonu i le Atua” (Mosaea 4:9) ma manatua pea “le silisili ese o le Atua” (Mosaea 4:11). I lau api talaaga mo le suesueina o tusitusiga paia, faamatala po o a ni ou aafiaga po o aafiaga o se isi tagata e te iloa na fesoasoani ia te oe e iloa ai e moni le Atua, ma e mamana o Ia, ma e alofa o Ia ia te oe. Aisea e te manatu ai e taua le malamalama ma le manatua o le mana, agalelei, ma le alofa o le Atua? A e manatua nei mea, o le a so latou aafiaga o lou olaga?
Sa faamatala e le Tupu o Peniamina amioga a tagata o e o loo taumafai e faatumau se faamagaloga o a latou agasala. Suesue le Mosaea 4:12–16 e iloa ai ni isi o amioga na faailoa mai e le Tupu o Peniamina. (O le upu fesoasoani i le Mosaea 4:16 o lona uiga o le tuu atu o le toomaga po o se lagolagosua i taimi e manaomia ai le fesoasoani.)
I lau api talaaga mo le suesueina o tusitusiga paia, tusi pe faapefea ona faaalia i ni amioga na faamatalaina e le Tupu o Peniamina o loo taumafai se tagata e faatumau se faamagaloga o ana agasala. E mafai ona e lisiina ni nai isi amioga o le a faaalia ai o loo taumafai se tagata e faatumau se faamagaloga o agasala? Lisi se auala se tasi pe sili atu na e tuuina atu ai le fesoasoani ia i latou na manaomia le fesoasoani.
Sa faatusaina e le Tupu o Peniamina i tatou taitoatasi i se tagata aisi, aua o i tatou taitoatasi ua faalagolago atoa atu i le Atua mo mea uma ua tatou uma. O lenei talafaatusa e mafai ona fesoasoani tatou te talisapaia ai faamanuiaga ua tatou maua mai le Alii. Faitau le Mosaea 4:19–21, ma vaai pe o a auala o loo faapei ai i tatou taitoatasi o se tagata aisi i le silafaga a le Atua.
Mafaufau i lou faalagolago i le Atua. O le a se faamanuiaga se tasi e mafai ona e faafetai ai i le Tama Faalelagi i lenei taimi?
Ina ua uma ona aoao mai e faapea, tatou te manaomia pea le fesoasoani mai le Atua, na fai mai le Tupu o Peniamina ia tatou mafaufau i auala e tatau ona tatou faia ai i latou o e e talosaga mai ia i tatou mo se fesoasoani. Suesue le Mosaea 4:26–27, ma vaai mo auala e tatau ona tatou faia ai i latou e manaomia le fesoasoani.
I lau api talaaga mo le suesueina o tusitusiga paia, tusi ai lau tali i le fesili lenei: E mafai faapefea e le manatuaina o aoaoga a le Tupu o Peniamina o loo i le Mosaea 4 ona fesoasoani ia te oe ia agalelei atili ia i latou o e o loo manaomia le fesoasoani faaleagaga pe faaletino?
Faaalu se taimi e mafaufau loloto ai i mau ua e suesueina i le asō. Pe ua e lagonaina se musumusuga mai le Agaga Paia e uiga i le mea e tatau ona e faia, e faavae i mea ua e aoaoina mai aoaoga a le Tupu o Peniamina? Tusi lenei musumusuga i lau api talaaga mo le suesueina o tusitusiga paia.
Ia manatua e loloto tele le alofa o le Alii ia te oe. A o e salamo i soo se mea sese ma fai le mea sili e te mafaia e mulimuli ai i le faataitaiga a le Faaola, e mafai ona e faatumauina se faamagaloga o au agasala.
Faitau leotele le Mosaea 4:30. O le a le faiā i le va o ou manatu, au upu, ma au faatinoga?
Ata
ata o mafaufauga
Sa faamalamalama mai e Peresitene Ezra Taft Benson lenei faia: “Mafaufau i mafaufauga mama. O i latou e mafaufau i mafaufauga mama e le faia ni faatinoga eleele. E le gata ina e tali atu i luma o le Atua mo au galuega ae faapena foi mo le puleaina o ou mafaufauga. … E moni lava le alagaupu anamua, e te totoina mafaufauga ma e te seleseleina amioga, e te totoina amioga ma e te seleseleina mausa, e te totoina mausa ma e te seleseleina se tagata, ma o lou tagata e iloa ai lou faasinomaga e faavavau. ‘E pei ona manatu o ia i lona loto, ua faapea lava o ia.’ (Tagai Faataoto 23:7.) (i le Conference Report, Oke. 1964, 60).
A o e aoao e pulea ou mafaufauga, o le a e seleseleina faamanuiaga o le avea atili e faapei o Keriso i au upu ma galuega. I lau api talaaga mo le suesueina o tusitusiga paia, tusi ai se auala se tasi pe sili atu e mafai ona e pulea ai ou mafaufauga ma tausisia ai le avea atili e faapei o Keriso.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mosaea 4 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: