Iunite 13: Aso 3

Mosaea 21–24

Folasaga

Na oo mai Limae i le nofo pologa ia sa Lamana o se taunuuga o lo latou amioleaga (tagai Mosaea 20:21); sa faalotomaualaloina i latou ma liliu atu i le Atua o se taunuuga o lo latou nofo pologa. Sa aumai le nuu o Alema i le nofo poloaga o se tofotofoga o lo latou faatuatua (tagai Mosaea 23:21). Sa taufai tatalo malosi ia vaega e lua ina ia faasaolotoina mai le pologa. E ui o vaega uma o tagata sa iu ina laveaiina ma taunuu mai i Saraemila, sa fesoasoani le Alii i ia vaega taitasi i ni auala eseese. Mai le suesueina o tofotofoga ma le laveaiga o le vaega a Limae, e mafai ona e vaaia ai o le a tali e le Alii a tatou tatalo i Lana lava ala ma le taimi pe a faalotomaualaloina i tatou lava. Mai le suesueina o tofotofoga ma le laveaiga o le nuu o Alema, e mafai ona e iloa ai le ala e faalagolago ai i le Alii mo le malosi i le totonugalemu o a oe lava tauiviga ma luitau.

Sa Nifae o loo la’uina ogalaau

Mosaea 21–24

O sa Nifae i le nuu o Liae-Nifae ua oo i le faataunuuga o valoaga a Apinati

Vaai faalemafaufau e faapea sa e nofo i le nuu o Liae-Nifae i le taimi o le nofoaiga a le Tupu o Noa ma teena aoaoga a Apinati. O lenei la ua tou i ai ma le tou nuu i le nofo pologa ia sa Lamana, e pei lava ona valoia e Apinati. O le a sou manatu i se mea e te faia?

Ia mafaufau e uiga i soo se tofotofoga po o faigata o loo e aafia ai i le taimi nei. Faitau fuaiupu nei mai au tusitusiga paia, ma faailoga mea o loo aoao mai ai e uiga i le sailia ma le mauaina o le laveaiga: Mosaea 21:5, 14; 22:1–2; 23:23; and 24:21. Ina ia laveaiina e masani lava o lona uiga ia faasaolotoina, fesoasoani i ai, pe aumaia mai se mea.

A o e faitau i le faamatalaga lenei mai ia Elder Richard G. Scott o le Korama a Aposetolo e Toasefululua, vase lalo o pogai e lua na ia ta’u mai o tofotofoga ma mafatiaga tatou te oo i ai i o tatou olaga: “E leai se tasi e manao i faigata. O tofotofoga, le fiafia, faanoanoa, ma le loto nutimomoia e oo mai ia i tatou mai puna eseese autu e lua. O i latou o e solia tulafono a le Atua o le a i ai pea lava pea na luitau. O le isi mafuaaga mo faigata o le, ia ausia ai faamoemoega a le Alii lava ia i o tatou olaga ina ia mafai ona tatou maua le alualu i luma lea e maua mai le tofotofoina. E matuai taua lava mo i tatou taitoatasi ona iloa pe mai le fea o mafuaaga nei e lua e sau ai o tatou tofotofoga ma luitau, aua o le gaoioiga e faasa’o ai e matuai ese lava” (”Trust in the Lord,” Ensign, Nov. 1995, 16).

Sa aumai le nuu o Limae i le nofo pologa ona o lo latou le usiusitai, ae o le nuu amiotonu o Alema na oo i ai faigata o le a faapea ona latou alualu ai i luma. Sa faalotomaualaloina le nuu o Limae ma aumai i le Atua o se taunuuga o lo latou nofo pologa. O le suesueina o nei tala e lua e uiga i laveaiga faalelagi e mafai ona fesoasoani ia te oe e faateleina ai lou faatuatua e valaau atu ai i le Alii mo le laveaiga mai po o a lava puapuaga o loo e aafia ai.

1. I le siata o loo i lalo, o le fesili muamua—Na faapefea ona latou oo i le nofo pologa?—ua taliina mo oe. I lau api talaaga o le suesueina o tusitusiga paia, tali le fesili lona lua: Na faapefea ona laveaiina i latou?

	Nuu o Limae	Nuu o Alema
Na faapefea ona latou oo i le nofo pologa?	(Mosaea 20:21–22; 21:1–4) Ona sa le’i salamo tagata, sa faapea ona tuu atu e le Alii ia sa Lamana le mana e aumai ai tagata i le nofo pologa.	(Mosaea 23:1–4, 19–20, 25–38; 24:8–9) Sa tausia e le nuu a latou feagaiga, ae sa faalataina, pueina, ma faasalaina i latou e tagata amioleaga.
Na faapefea ona laveaiina i latou?	(Mosaea 22:1–9, 13–14)	(Mosaea 24:17–25)

Mafaufau loloto i tali i fesili nei e uiga i le nuu o Limae:

• E tusa ai ma le Mosaea 21:6, o a ni faamaoniga sa i ai sa le’i oo ina faalotomaualaloina e le vaega a Limae i latou lava ma liliu atu i le Alii? E faapefea ona eseese lenei mea ma le ala na tali atu ai le nuu o Alema i lo latou nofo pologa? I le manatunatu ai i le aafiaga o le vaega a Limae, o le a se mea ua e aoaoina e ono fesoasoani ia te oe e tali atu ai ma le talafeagai i o oe lava tofotofoga?

• E ui lava sa le’i vave laveaiina le nuu o Limae mai o latou puapuaga, na faapefea ona faamanuia i latou e le Alii? (Atonu e te manao e faailoga le fasifuaitau “solosolo manuia” i le Mosaea 21:16.) Pe na e lagonaina le fesoasoani a le Alii e aveese mai oe mai se tofotofoga e faasolosolo mai i le taimi?

• O le a sou manatu i le saofaga o uiga faaalia o tagata, na faamatalaina i le Mosaea 21:30–33, i lo latou laveaiga faaiu?

2. Filifili se tasi o upumoni nei na maua mai le mea na e suesueina e uiga i tofotofoga ma le laveaiga o le nuu o Limae. I lau api talaaga mo le suesueina o tusitusiga paia, tusi se parakalafa e faamatala ai le ala e mafai ona e faaaoga ai lena upumoni i lou lava olaga.

   1. A tatou faalotomaualaloina i tatou lava, valaau atu i le Alii, ma salamo i a tatou agasala, o le a Ia faafofoga mai i a tatou tatalo ma tuu māmā le avega o a tatou agasala i Lana lava taimi.

   2. A tatou osifeagaiga e auauna atu i le Alii ma tausi Ana poloaiga, o le a saunia e le Alii se ala mo lo tatou laveaiga.

Mafaufau i puapuaga ma le laveaiga o le vaega a Alema a o e faitau i le faamatalaga lenei mai ia Elder Richard G. Scott: “A foliga mai ua sologa lelei mea uma, ae palalasi faatasi mai loa se anoano o luitau. Afai o na tofotofoga e le o ni taunuuga o lo tatou le usiusitai, o i latou o ni faamaoniga e manatu le Alii ua e saunia e tuputupu ae atili (tagai Faataoto 3:11–12). O lea na te tuuina mai ai ia te oe aafiaga e faaosofia ai le tuputupu ae, malamalama, ma le agaalofa lea e polesi ai oe mo lou manuia e faavavau. Ina ia aumai oe mai le mea o loo e i ai agai atu i le mea ua finagalo o Ia ia e i ai, e manaomia ai le tele o le falōoga, ma o lena mea e masani lava ona aafia ai le le mautonu ma le tiga” (”Trust in the Lord,” 16–17).

Faailoga upu ma fasifuaitau i le Mosaea 23:21–22 o loo faaalia ai o le Alii o le a tofotofoina lo tatou onosai ma le faatuatua ina ia fesoasoani e faateleina ai lo tatou faalagolago ia te Ia (tagai foi MF&F 122:5–7).

Tusi ni tali pupuu i fesili nei i totonu o lau tusi lesona:

• E te manatu o le a le tofotofoga e sili ona faigata ona onosaia pe ana fai sa e i ai faatasi ma le nuu o Alema i le taimi o mea na tutupu o loo tusia i le Mosaea 23–24? Aisea?

• O le a se mea e mafai ona e aoao mai i le ala na tali atu ai Alema ma lona nuu i o latou tofotofoga? (Tagai Mosaea 24:1–12, 15–16.)

• E ui ina sa le’i vave laveaiina e le Alii le nuu o Alema, o le a le mea na Ia faia muamua mo i latou? (Tagai Mosaea 24:15.)

O le mataupu faavae e tasi e mafai ona tatou aoaoina mai le aafiaga o le vaega a Alema o le a tatou gauai atu ma le onosai i le finagalo o le Alii, o le a Ia faamalosia i tatou ma laveai i tatou mai o tatou tofotofoga i Lana lava taimi.

3. I lau api talaaga mo le suesueina o tusitusiga paia, faamalamalama lou manatu i le uiga o le gauai atu ma le onosai i le finagalo o le Alii i se taimi o tofotofoga, ma le ala o le faia o lena mea e mafai ona saunia ai oe e maua le malosi ma faamanuiaga o le a Ia saunia e fesoasoani ai ia te oe i le aluga o lena taimi faigata.

I le amataga o le lesona lenei, na fai atu ai e te mafaufau i tofotofoga po o faigata o loo feagai nei ma oe. A o e mafaufau i ai, fuafua e tusi tali i fesili nei i lau api talaaga mo le suesueina o tusitusiga paia po o luga o se isi fasipepa.

• O a ni tofotofoga o loo feagai nei ma a’u i lo’u olaga?

• O le a se mea e tatau ona ou faia e saunia ai a’u lava ia maua le mana laveai o le Alii i lo’u olaga?

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mosaea 21–24 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: