Folasaga i le Eteru
Aisea e Suesue ai Lenei Tusi?
A o e suesue i le tusi a Eteru, o le a e aoao e uiga ia sa Iareto—o se vaega o tagata o e na malaga mai i le Itulagi i Sisifo ma nonofo ai iina mo le tele o seneturi ao lei taunuu le nuu o Liae. O le a fesoasoani lenei tusi ia te oe ia iloa mataupu faavae taua e faatatau i le tatalo, faaaliga, ma le sootaga i le va o le faatinoina o le faatuatua ia Iesu Keriso ma le mauaina o le poto faaleagaga. O le a fesoasoani foi ia te oe ina ia malamalama i le matafaioi a perofeta i le faatauanauina o tagata ina ia salamo ma taunuuga o le a oo mai ia i latou o e teena Iesu Keriso ma Ana perofeta.
O Ai na Tusia Lenei Tusi?
Sa faapuupuuina e Moronae lenei tusi mai papatusi auro e 24 ua ta’ua o papatusi a Eteru. Ua faaigoaina mo le perofeta o Eteru, o le perofeta mulimuli o sa Iareto ma fatuina se talafaamaumau o lo latou talafaasolopito (tagai Eteru 15:33–34). I aso o le Tupu o Mosaea, sa maua ai e nisi o le nuu o Limae ia papatusi a Eteru ao latou sailiili mo le laueleele o Saraemila (tagai Mosaea 8:7–11; Eteru 1:2). Sa tuufaasolo atu e perofeta a sa Nifae ma tausi talafaamaumau ia papatusi a Eteru seia oo mai ia Moronae. Sa ta’u mai e Moronae na te lei faaaofia ai le “tasi vaeselau” o le talafaamaumau i lana tuufaatasiga (Eteru 15:33).
O Anafea ma o Fea na Tusia ai?
O punavai autu ia na faaaogaina e fatu ai le tusi a Eteru sa tusia i seneturi ao lei faia e Moronae lana tuufaatasiga. O le uluai talafaamaumau a sa Iareto sa fatuina i le taimi sa tusi ai e le uso o Iareto le faaaliga sa ia vaaia ao lei sopoia e lona nuu le vasa (tagai Eteru 4:1). E leai nisi tagata tusi talafaamaumau i totonu o sa Iareto sa ta’ua pe ana le oo ia Eteru (tagai Eteru 13:3; 15:33). Sa tuufaatasia e Moronae le tusi a Eteru (tagai Mamona 8:3–6; Moronae 10:1). E lei faamatala mai e Moronae po o fea lea sa i ai o ia ao ia faia le tuufaatasiga, e ui sa ia tusia sa faaumatia ia sa Iareto i “lenei laueleele i matu” (Eteru 1:1), ma faailoa mai atonu sa i ai o ia i le laueleele lea sa faaumatia ai i latou.