Seminare
Iunite 6: Aso 2, 2 Nifae 6–8

Iunite 6: Aso 2

2 Nifae 6–8

Folasaga

O le faamaumauga a Nifae o le vaega muamua o le lauga na aoao mai e lona uso laitiiti o Iakopo o loo maua i le 2 Nifae 6–8. (O le vaega lona lua o le lauga a Iakopo o loo maua i le 2 Nifae 9–10.) Sa vavalo Iakopo e faapea, talu mai le taimi na tuua ai e Liae Ierusalema, na ave faatagataotaua ai sa Iuta ma faasalalauina ona o lo latou amioleaga. Ae peitai, o le a toe faapotopoto mai ma le alofa e le Alii ia sa Iuta i Ierusalema. Sa valoia foi e Iakopo e faapea, o sa Iuta o le a faataapeapeina mo le taimi lona lua pe a uma ona latou teena le Faaola i le taimi o Lana auaunaga i le tino; ma o le a toe faaalia foi e le Alii le alofa mutimutivale ma faapotopoto mai i latou i aso e gata ai a o faasolo ina latou maua se malamalamaaga i le Faaola. Ma le isi, sa sii mai e Iakopo valoaga a Isaia o loo faaalia ai le faamaoni o le Faaola i Ona tagata o le feagaiga, Lona alofa mutimutivale, ma le maoae o Ana folafolaga i e e faamaoni.

2 Nifae 6

Ua vavalo Iakopo i le faataapeapeina ma le faapotopotoina o Isaraelu

O le a sau taga e fai pe afai e fai faalealofa oe e ni tagata e te alofa i ai? Ae faapefea pe afai latou te faaalia i a latou amioga po o uiga faaalia ua le toe taua ia i latou lau fegalegaleaiga? Ia mafaufau loloto pe na e faaali faapenei ni ou uiga i le Alii. I le 2 Nifae 6–8, sa aoao mai e Iakopo le ala e tali mai ai le Alii ia i latou o e, e ala i a latou uiga faaalia ma amioga, ua liliuese mai ia te Ia.

Faitau le 2 Nifae 6:3–5; 9:1, 3, ma vaai mo ni mafuaaga sa tuuina atu ai e Iakopo lenei lauga.

A o e suesue i le asō, vaai mo auala na e mafai ai e aoaoga a Iakopo ona fesoasoani e te “iloa ma viia ai le suafa o lo outou Atua” (2 Nifae 6:4), malamalama lelei ai i feagaiga ua e faia ma le Alii (tagai 2 Nifae 9:1), ma tuu atu ai ia te oe se pogai e “olioli, ma faaea i luga o outou ulu e faavavau” (2 Nifae 9:3).

  1. Tali fesili nei, i lau api talaaga mo le suesueina o tusitusiga paia:

    1. Na amata e Iakopo lana lauga i le valoia o le mea na tupu ia sa Iuta ina ua tuua e Liae Ierusalema ona na latou teena le Alii. Na faapefea ona ia faamatalaina i le 2 Nifae 6:8?

    2. Na valoia e Liae, Ieremia, ma isi perofeta ia lenei faatafunaga. Ina ua faatoilalo e Papelonia ia Iutaia i le tusa o le 587 T.L.M., e toatele na fasiotia ma isi na ave faatagataotaua i Papelonia. Sa iu ai ina faamaluluina loto o tagata Iutaia i le Atua. E tusa ai ma le fuaiupu muamua o le 2 Nifae 6:9, o le a le mea na valoia e Iakopo o le a tupu ia i latou?

    3. Sa valoia e Iakopo, o le a soifua le Faaola i Lona soifuaga i le tino faatasi ma sa Iuta pe a mavae ona latou toe foi mai mai le faatagataotauaina. E tusa ai ma le 2 Nifae 6:9–10, o a ni faatinoga ma ni lagona o le a i ai ia sa Iuta e uiga i le Faaola?

    4. E tusa ai ma le 2 Nifae 6:10–11, o le a le mea o le a tupu i tagata Iutaia o e na teena le Faaola?

Faitau le 2 Nifae 6:11, 14, ma vaai mo fasifuaitau o loo faamatala ai lagona o le Alii e uiga i le aiga o Isaraelu e ui lava ina latou teena o Ia. Atonu e te manao e li’o fasifuaitau “alofa mutimutivale ia i latou” ma le “toe aumai i latou” i totonu o au tusitusiga paia.

  1. I totonu o lau api talaaga mo le suesueina o tusitusiga paia, tusi ai au tali i fesili nei:

    1. O le a le uiga o le “toe aumai” o se tasi po o se mea?

    2. E faapefea ona faaalia i le naunau o le Alii ia toe aumai Isaraelu mo le taimi lona lua ona faaalia ai Lona alofa mutimutivale?

I nei lava foi fuaiupu na aoao mai ai e Iakopo le mea e ao ona fai e tagata Iutaia ina ia mafai ona maua nei faamanuiaga mai le Alii. Toe faitau le 2 Nifae 6:11, 14, ma sue i fuaiupu uma lava le fasifuaitau “a oo [ina] latou”. Faailoga valivali ia upu e faapea ona faamaea ai le fasifuaitau. E tusa ai ma nei fuaiupu, o le a faapefea ona agavaa Isaraelu mo le alofa mutimutivale o le Alii? O nei fuaiupu o loo aoao mai ai le mataupu faavae: E alofa mutimutivale le Alii ia i latou o e e toe foi mai ia te Ia.

  1. Mafaufau loloto i auala ua e molimauina ai le alofa mutimutivale o le Alii ma naunau e faamagalo atu ia i latou o e e toe foi mai ia te Ia. Tusi i lau api talaaga mo le suesueina o tusitusiga paia: Ou te iloa e alofa mutimutivale le Alii ona … Ona faauma lea o le faamatalaga i ni ou lava manatu ma lagona. Atonu e te manao e toe fai le gaoioiga lenei a o e mafaufau i ni auala eseese ua faaalia ai e le Alii e alofa mutimutivale o Ia.

I le 2 Nifae 6 o loo i ai se folafolaga maoae o le faamoemoe mo Isaraelu—lea e aofia ai i tatou uma lava. Faitau le 2 Nifae 6:17–18, ma faauma ia folafolaga nei sa faia e le Faaola:

“Le Atua Malosi Silisili ona ” (2 Nfiae 6:17).

“O le a iloa e tagata uma ” (2 Nifae 6:18).

2 Nifae 7–8

Ua sii mai e Iakopo valoaga a Isaia e uiga i le faamaoni o le Faaola i tagata o le feagaiga ma Lona gafatia ona togiola i tatou

E pei ona tusia i le 2 Nifae 7–8, sa sii mai e Iakopo valoaga a Isaia e uiga i le finagalo o le Alii ma le gafatia ona togiola Isaraelu mai puapuaga lea na mafua ona o a latou agasala. Faitau le 2 Nifae 7:1–2, ma faailoa mai fesili na fesili atu ai le Alii ia Isaraelu lea e iloa ai na alofa lava pea o Ia ia i latou ma finagalo e togiola i latou.

Atonu o le a fesoasoani le malamalama na faaaoga e le Alii gagana faafaatusa e faatatau i le tetea ma le faapologaina, ma le aga fesootai na masani ai tagata o lena vaitau, e aoao ai i latou i se auala malosi ma le faagalogata. O fasifuaitau “tuueseina ea oe,” le tusi alei o le faateaga o lou tina,” ma le “faatau atu i ai oe” e faatatau i le manatu o le solia po o le momotu o se feagaiga. E mafai ona toe faaupuina fesili e faapenei: “Pe na ou liliuese ea mai ia te oe? Pe na ou lafoaia ese le feagaiga na tatou faia?” O le tali i nei fesili o le, “Leai.” O le a le mafai lava ona liliuese le Alii mai ia i tatou pe galo foi feagaiga ua Ia faia. O Ana fesili o se auala o le faamamafaga o le a Ia le solia lava Lana feagaiga ma Isaraelu.

I le faaiuga o le 2 Nifae 7:1, vase lalo o le faamalamalamaga a le Alii o le pogai na vavaeeseina ai Isaraelu mai le Atua ma puapuagatia ai i le faatagataotauaina.

  1. Tali se tasi o fesili nei, i lau api talaaga mo le suesueina o tusitusiga paia:

    1. Aisea e taua ai le malamalama o o tatou manatu, faaiuga, ma amioga e mafai ona vavaeeseina ai i tatou mai le Atua?

    2. Aisea e taua ai ona e iloa e le mafai ona galo pe tuulafoai e le Alii i tatou, e tusa lava pe tatou te faagalo pe tuulafoai o Ia?

I le 2 Nifae 7:2 na fesili atu ai le Alii ia Isaraelu i se fesili taua lea e faatatau foi ia i tatou taitoatasi. Sue ma faailoga le fesili.

O le a lou manatu i le uiga o le fetalaiga a le Alii ina ua Ia fesili, “Pe ua faapuupuu ea lo’u lima ua le mafai ai ona togiola?” Ina ia fesoasoani ia te oe e vaai faalemafaufau i lenei mea, mafaufau e faapea o loo faaloaloa atu i luma lou lima, i le taumafai e aapa atu i se tagata o manaomia le fesoasoani. Afai e faaumi lau aapa atu, o le a le mea o le a e taumafai e fai mo le tagata o loo manaomia le fesoasoani? Ae afai e te faapuupuuina pe toe aveese mai lou lima, o le a se faaupuga e uiga i lou manao e fesoaoani atu i le tagata? Faatasi ai ma lenei vaaiga faafaatusa i lou mafaufau, o le isi auala e toe faaupu ai le fesili a le Alii ia Isaraelu o le: “Pe o o’u taofiofia ma lē aapa atu e togiola outou?”

O le fasifuaitau “pe ua leai ea se mana ia te a’u e laveai ai?” na valaaulia ai Isaraelu e mafaufau loloto i lo latou faatuatua na i ai i le Alii le mana e laveai ai i latou mai puapuaga ia sa mafua ona o a latou agasala.

I le vaega na totoe o le 2 Nifae 7–8, sa tuuina mai ai e Isaia nisi o faataitaiga o le manao o le Faaola ma le mana e togiola ai Lona nuu o le feagaiga.

Faitau le 2 Nifae 7:5–7, ma vaai mo fasifuaitau o i lenei valoaga o loo ta’u mai ai o le a fai ma oo le Mesia o se vaega o Lana taulaga togiola le faaolaina o i tatou. I le 2 Nifae 7:6, vaefaamatalaga a, o loo i ai mau e faatatau i ai e faamatala ma faaali ai le faataunuuina o lenei valoaga. Atonu e te manao e faailoga le Mataio 27:26 i le vaefaamatalaga; ona faitau lea o le Mataio 27:26–31, e vaavaai ai mo auala na faataunuuina ai le valoaga a Isaia.

  1. Tali le fesili lenei i lau api talaaga mo le suesueina o tusitusiga paia: O le a le mea o faaali mai e le 2 Nifae 7:2, 5–7 ia i tatou e uiga i le manao ma le naunau o le Faaola e togiola i tatou?

Ina ia fesoasoani ina ia e iloa nisi faamaoniga o le alofa mutimutivale ma le mana o le Alii i le vaega o totoe o le valoaga a Isaia, vaaifaalemafaufau e faapea sa talosagaina oe e tuuina atu se lauga i le lotu i le mataupu faavae: E finagalo le Faaola e togiola Lona nuu o le feagaiga ma o loo i ai le mana uma e fai ai. Ina ia saunia mo lau lauga, faitau le 2 Nifae 8:3, 11–13, 16, 22, ma filifili fasifuaitau e te lagona ua tuuina mai ai le faamaoniga o le finagalo ma le mana o le Alii e togiola ai i tatou.

  1. Fai se fuafuaga o lau lauga i totonu o lau api talaaga mo le suesueina o tusitusiga paia i le:

    1. Lisiina o ni fasifuaitau se lua pe tolu e matilatila ia te oe ma faamatala pe faapefea ona avea fasifuaitau taitasi ma se faataitaiga o le manao o le Faaola e togiola i tatou pe e uiga i Lona mana e fai ai.

    2. O le filifilia o se tasi o na fasifuaitau ma le faamatalaina o le ala na e maua ai lena aafiaga, pe e te manao foi ia maua ai lena aafiaga, o le faamanuiaga i lou olaga.

A o e faamaeaina lenei lesona, manatua na aoao mai e Iakopo upumoni na e aoaoina nei “ina ia outou iloa ma viia le suafa o lo outou Atua” (2 Nifae 6:4), “ina ia outou iloa e uiga i feagaiga a le Alii” (2 Nifae 9:1), ma “ina ia outou olioli, ma faaea i luga o outou ulu e faavavau” (2 Nifae 9:3). Vaavaai mo se avanoa i le aso e faasoa atu ai i se tasi lou talisapaia o le Alii ma Lona alofa ia te oe.

  1. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 2 Nifae 6 8 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: