Iunite 14: Aso 4

Alema 1–4

Folasaga

E le i pine ona tofia Alema e fai ma faamasino sili, sa amata e se tagata e igoa ia Ne’oa ona aoao atu mataupu sese ma aumaia faitaulaga pepelo i tagata o sa Nifae. Sa ia fasiotia se tagata amiotonu ma sa faasalaina mo lana soligatulafono. I nai tausaga mulimuli ane, sa le manuia le taumafai a Amiliki e avea ma tupu o sa Nifae. Ina ua filifili tagata e teena o ia e fai ma tupu, na ia faapotopoto e na lagolagoina o ia—e taua o sa Amiliki—e o atu e tau ma sa Nifae. Na manumalo sa Nifae, ae o le sefulu o afe o tagata na fasiotia. Ina ua lagona le loto maulalo ona o le taua, e toatele sa Nifae na manatua o latou tiute, ma e faitau afe na auai i le Ekalesia. Ae peitai, i le tausaga e tasi, e toatele tagata o le Ekalesia ua faamaualuluga ma ua faasaua i isi. Na manatu Alema e faamatuu atu ona tiute o se faamasino sili ae taulai e molimau atu i le talalelei a Iesu Keriso.

Ua lauga atu Ne’oa

Alema 1

Ua faamanuiaina tagata o le Ekalesia e ui ina salalau le faitaulaga pepelo ma le sauaga

O nisi o taimi ua saili tagata ina ia tautaua. Ia i ai se taimi e mafaufau ai e uiga i le matautia e ono i ai ona o lenei manaoga. O le a se mea e tupu pe afai ua sili lou popole i le manatu o au uo e uiga ia te oe nai lo mea o finagalo ai le Atua ia te oe?

E pei ona faamaumau i le Alema 1, o le tagata e igoa ia Ne’oa sa avea ma se tasi tautaua tele i nisi o tagata. Faitau Alema 1:2–6, ma maitau mea sa aoaoina e Ne’oa ma le tali atu a tagata i ai.

Saili i laina muamua o le Alema 1:12 mo le upu sa faaaoga e Alema e faamatala ai mea na aoao atu e Ne’oa ia sa Nifae. Ona tagai lea i vae o faamatalaga 12a. Faitau 2 Nifae 26:29, le mau faasino muamua o lo o lisiina atu i le vae o faamatalaga, ma saili mea ua fai pe e le o faia e faitaulaga pepelo.

Faaaogaina o Mau Faasino

O vae o faamatalaga o lo o i lalo o itulau taitasi o mau ua aofia ai ma mau faasino i isi mau e mafai ona maua ai le malamalama sili a o e suesue. Ia fai ma mea masani le faitau o mau faasino i mau o lo o e suesue i ai. Atonu e te manao e faailoga mau faasino i au vae o faamatalaga e fesoasoani e te malamalama lelei ai i mau.

O faitaulaga pepelo o le talai atu lea e tagata o “mataupu faavae sese … mo le faamoemoe o le mauaina o ia ma le mamalu” ma “faatutu a’e i latou lava e fai ma malamalama i le lalolagi” (Alema 1:16; 2 Nifae 26:29). Ua latou le mananao e atinae le malo o le Atua i a latou talaiga. Ae peitai, ua latou mananao e maua taui (e pei o oa, manuia faaleagafesootai, o le pule i isi) ma viiga mai isi tagata. Ua latou mananao e taulai atu le faamuamua ia i latou lava, ae le mo le Atua ma Lana talalelei. O le faitaulaga pepelo o se agasala matuia lea i le silafaga a le Atua, e pei ona faamalamalama e Alema ina ua ia faapea atu ia Ne’oa, “Afai e tuu le faafaitaulaga pepelo ia faamalosia i totonu o le nuu lenei, o le a avea ma mea e mautinoa ai le faaumatiaina atoa o i latou” (Alema 1:12).

A o taumafai Ne’oa e “taitai ese tagata o le ekalesia,” o se tagata amiotonu o Kitiona ua ia ‘tutetee malosi atu lenei tagata ia te ia, ma aoai o ia i le afioga a le Atua” (Alema 1:7). I le tali atu, na se’i ae e Ne’oa lana pelu ma fasioti ia Kitiona. Na faamasinoina Ne’oa mo ana soligatulafono ma faasalaina o ia i le oti. Faitau Alema 1:16 e iloa ai pe na avea le oti o Ne’oa ma mea na faaiuina ai le faitaulaga pepelo i le nuu o sa Nifae.

Faitau Alema 1:26–27, ma faailoa mai auala na eseese ai amioga a faitaulaga a sa Nifae a le Atua mai ia Ne’oa ma isi o e sa faatinoina faitaulaga pepelo.

1. I lau api talaaga mo le suesueina o tusitusiga paia, tusi auala sa amioa’i ai faitaulaga a sa Nifae. E faapefea ona ese amioga a faitaulaga a sa Nifae mai amioga a i latou na faatinoina faitaulaga pepelo?

A o sosolo atu le faitaulaga pepelo i le nuu, e toatele tagata na amata ona faasaua i tagata faatuatua o le Ekalesia. Ina ia saunia e suesue le vaega o totoe o Alema 1, mafaufau i ala ua e vaai ai i isi tagata o taufaifai, tauemu, pe faasaua ia i latou o loo tausi poloaiga a le Atua.

Faitau Alema 1:19–20, ma vaavaai mo mafuaaga ua faasaua ai e nisi o tagata uso o le Ekalesia. Alema 1:21–31 ua faamaumau ai auala na tali atu ai tagata o le Ekalesia i sauaga. Faitau fuaitau o mau o loo i lalo ma faatumu le siata:

Alema 1:21–24	Alema 1:25, 27–31
Na faapefea ona tali atu nisi [o le Ekalesia] i sauaga?	Na faapefea ona soifua nisi [o le Ekalesia] e ui lava i sauaga?
O a ni taunuuga o a latou amioga?	O a faamanuiaga na latou maua?

Tusi se mataupu faavae ua e aoaoina mai le suesueina o lenei siata:

O se tasi o mataupu faavae atonu e te faailoa mai o le: Afai tatou te ola i le talalelei, e mafai ona tatou maua le filemu i o tatou olaga, e tusa lava po ua sauaina i tatou.

2. I lau api talaaga mo le suesueina o tusitusiga paia, faamatala pe faapefea e le malamalama i le mataupu faavae o lo o i luga ona mafai ona fesoasoani ia te oe pe a feagai ma sauaga po o le faamalosi mai ina ia tausia poloaiga. Ona tali lea o se tasi o fesili nei:

   1. O anafea na e tausi ai poloaiga e ui lava i sauaga ma le faamalosi ina ia aua nei faia, ma o a faamanuiaga sa e maua?

   2. E faapefea ona e tali atu i ou fili?

Alema 2

Ua aufaatasi sa Amiliki ma sa Lamana e tau faasaga atu ia sa Nifae

Alema 2 ua faamatala e tusa ai ma isi tofotofoga o sa Nifae. Faitau le ulutala o le mataupu e saili ai pe sa faapefea e le tagata e igoa ia Amiliki ma e mulimuli ia te ia ona tetee atu ia sa Nifae. Sa manao Amiliki e avea ma tupu ia sa Nifae, ae sa faia e sa Nifae se palota ma filifili ai e tetee ia te ia ma faaauau la latou faigamalo faafaamasino. Sa faapotopoto faatasi e na mulimuli ia Amiliki ma fai o ia ma o latou tupu. Na poloaiina e Amiliki e sa mulimuli ia te ia e tau ma sa Nifae, ma na mulimuli ane faatasi atu sa Lamana ia sa Amiliki e tau ma sa Nifae.

Ona sa faatuatua sa Nifae i le Alii, sa fesoasoani le Alii ia i latou i la latou taua ma sa Amiliki ma sa Lamana. Faitau Alema 2:18, 28–31, 36, ma faailoga upu faamalosia ma sa faamalosia i taimi uma lava e faaali mai ai. Vaavaai mo auala sa faamalosia ai e le Alii sa Nifae.

3. I lau api talaaga mo le suesueina o tusitusiga paia, tusi e faatatau i se taimi na e lagona ai le faamalosia o oe e le Alii a o e taumafai e fai le mea sao.

Alema 3

Sa vavaeese mai e sa Amiliki i latou lava mai le Atua

Mafaufau e uiga i savali atonu o taumafai nisi o tagata e auina atu ia i latou lava e ala ia latou filifiliga i lavalava, teuina o o latou ao, tautaliga ma isi mea teuteu, pe’a, ma le tatuiina o tino.

O le makaina o muaulu o sa Amiliki

Faitau Alema 3:4, ma faailoa mai pe sa faapefea ona suia e sa Amiliki o latou foliga vaaia.

O ai na “faailoga ese mai” ai sa Amiliki?

O ai na latou mananao e avea atili ai?

O le suia e sa Amiliki o o latou foliga vaaia o se faailoga lea o lo latou fouvale. E pei ona faamaumau i le Alema 3, sa faamanatu mai e Mamona i tatou i le fetuu ma le faailoga na oo mai i luga o sa Lamana i le selau tausaga muamua ona o lo latou fouvale i le Atua (tagai Alema 3:6–10; tagai foi 2 Nifae 5:20–24). Sa malilie lava sa Amiliki e tuu ia faailoga i o latou muaulu, ae o nei faailoga sa avea o se faatusa lea sa talitutusa ma le faailoga na tuuina atu e le Alii ia sa Lamana.

Faailoga le fasifuaitau i le Alema 3:18 o lo o faamatala ai le amioga a sa Amiliki e faasaga atu i le Atua. Faailoga foi i le Alema 3:19 mea na aumai e sa Amiliki i o latou lava luga ona o lo latou fouvale.

O le a se mea na outou aoao mai le Alema 3:18–19 e uiga ia i latou ua fetuu e le Alii? (O i latou ua o mai e fouvale faaaliali faasaga atu i le Atua ua latou aumaia le fetuu i o latou lava luga.) E taua ona malamalama o le fetuu o le tulaga o le “vavae ese mai luma o le Alii” (2 Nifae 5:20). E ala ia latou amioga, na vavae ese e sa Amiliki i latou lava mai le Atua.

Mai le faataitaiga a sa Amiliki, ua tatou aoao ai o la tatou filifiliga le vavae ese o i tatou lava mai le Atua. O i latou ua “o mai i fafo i le fouvale aliali e faasaga i le Atua” (Alema 3:18) ua vavaeeseina i latou lava mai le Atua, po o se isi faaupuga, ua aumai le fetuu i o latou lava luga.

4. Tali le fesili lenei i lau api talaaga mo le suesueina o tusitusiga paia: Ina ia ese mai ia sa Amiliki, o le a se mea e mafai ona e fai i lou olaga i le taimi nei ina ia mautinoa ai e te le vavaeeseina oe lava mai le Atua?

Alema 3:20–25 o lo o tau mai ai le faatoilaloina e sa Nifae o sa Lamana i se tasi o taua, ae e toatele tagata mai i ituau e lua sa maliliu ai. Faitau le Alema 3:26–27, ma vaavaai mo lesona taua ua manao Mamona ia tatou aoaoina mai le tala ia sa Amiliki ma taua i le va o sa Nifae ma sa Lamana.

Faauma le mataupu faavae lenei e tusa ai ma mea sa e faitau iai i le Alema 3:26–27: Tatou te maua le fiafia po o le pagatia e faalagolago i

Tuu atu se taimi e mafaufau ai i se isi ua e filifili e te mulimuli i ai i lou olaga. Mafaufau i fesili nei: O a ituaiga o taui, po o totogi, e ofoina atu e Satani mo i latou e mulimuli ia te ia? (E masani ona foliga mai e faatosina i le amataga, ae mulimuli ane o lona taunuuga o le faanoanoa ma le vaisu.) I le isi itu, o a ni taui ua e maua mai le Alii ona ua e filifili e mulimuli ia te Ia?

5. Tusi i lau api talaaga mo le suesueina o tusitusiga paia e uiga i se taimi na e maua ai le fiafia ona o le mulimuli i le Alii.

Alema 4

Ina ua tuanai se vaitaimi o le tuputupu ae o le Ekalesia, na amata ona faamaualuluga tagata o le Ekalesia ma sa faamavae Alema o se faamasino sili ma valaau atu ia i latou ia salamo.

Ina ua tuanai taua ma sa Lamana ma sa Amiliki, sa “fagua sa Nifae i le manatuaina o lo latou tiute,” ma latou “amata ona faatu atoatoa le ekalesia” (Alema 4:3–4). O se taunuuga, e tusa ma le 3,500 tagata na auai i le Ekalesia (tagai Alema 4:5). Ae peitai, i se taimi puupuu o le tausaga, o le toatele o tagata o le Ekalesia ua amata ona faamaualuluga. Faitau Alema 4:8–12, ma faailoa mai uiga leaga na tulai mai ona o le faamaualuga o tagata o le Ekalesia. O se mataupu faavae e mafai ona tatou aoao mai lenei fuaitau o mau o le: Afai tatou te faia se faataitaiga le amiotonu, o a tatou amioga e mafai ona faigata ai i isi ona talia le talalelei.(Tagai i le Alema 4:10.)

6. I totonu o lau api talaaga mo le suesueina o tusitusiga paia, tusi se faataitaiga se tasi o se uiga amioleaga po o se uiga sa faia e sa Nifae i le Alema 4:8–12. Faamatala pe aisea e taua ai ona aloese mai i lena amioga po o uiga i le avea ai o se tagata o le Ekalesia i aso nei.

O se taunuuga o le amioleaga i le Ekalesia, sa tofia ai e Alema se tasi alii e suitulaga ia te ia o se faamasino sili ina ia mafai ona tuuto atu lona taimi atoa i lona tofiga o se ositaulaga pule faamalumalu i le Ekalesia ma fesoasoani i tagata e foia lo latou faamaualuga ma a latou agasala e ala lea i le “tuuina atu o le molimau manino” (Alema 4:19). Faitau Alema 4:19, ma vase mea sa manao Alema e fai e fesoasoani ai i ona tagata.

Alema 4:19 ua faailoa mai ai nei mataupu faavae: O le faataunuuina o o tatou tiute faaleagaga e ono manaomia ai le ositaulaga. Ua molimau atu auauna a le Alii ma valaau atu i e agasala ina ia salamo. O le tuuina atu o le molimau manino e fesoasoani ai i isi ia sili atu ona latalata i le Atua.

E mafai ona e vaai faalemafaufau i se tasi o tuua lona tulaga taua faalemalo, e pei o le avea o se peresitene o se atunuu, ina ia mafai ona auauna atu i se misiona? Sa faia e Alema!

7. Ia tusi i lau api talaaga mo le suesueina o tusitusiga paia le fasifuaitau: “tuuina atu o se molimau manino” (Alema 4:19) ua faailoa mai ai le auala e aoao atu ai Alema. Ia faamaumau foi pe na faapefea ona uunaia oe e suia pe faaleleia e ala i le faalogo i se tasi o molimau e uiga i le talalelei.

8. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Alema 1–4 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: