3 Nifae 14

Folasaga

O loo faaauau pea le lauga a Iesu Keriso i le malumalu i le 3 Nifae 14. Na Ia aoao atu i tagata e uiga i le faamasino atu i isi ma faatonuina i latou e saili faamanuiaga mai le Tama Faalelagi e ala i le tatalo. Na lapataia foi e le Faaola e uiga i perofeta pepelo, ma faamamafa atu le taua o le faia o le finagalo o le Atua.

3 Nifae 14:1–6

Ua aoao mai le Faaola e uiga i le faamasino atu i isi

Faitau upu o le fuaiupu lona lua o le viiga “Fa’aola e ia ‘Ou Alofa” (Viiga, nu. 150)—po o le pesepese ia te oe lava pe afai e te fiafia e faia lena mea:

O ai a’u e faamasino
Ae ua tele o’u sese?
Lilo faanoanoa i le loto
Ma ua le ma vaaia.
O ai a’u e faamasino?
Faaola e, ou te mulimuli atu ia te oe.

E pei ona faamaumauina i le 3 Nifae 14, na faaauau pea ona aoao atu le Faaola i sa Nifae i le malumalu. Faitau le 3 Nifae 14:1–2, ma mafaufau pe faapefea ona faatatau lenei taitaiga mai le Faaola i le fuaiupu lona lua o le viiga na e faitauina. (Atonu e fesoasoani ina ia e malamalama o le fasifuaitau “o le a faamasinoina ai outou” e faatatau i le tulaga e fuaina ai pe faamasinoina ai e se tagata se tasi.)

Tali fesili nei, i lau api o talaaga mo le suesueina o tusitusiga paia:
1. E faapefea ona faatatau le fautuaga a le Faaola o loo i le 3 Nifae 14:1–2 i le fuaiupu lona lua o le viiga “Fa’aola e ia ‘Ou Alofa”?
2. O le a faapefea ona e faailoa atu le upumoni taua na aoaoina e le Faaola i le 3 Nifae 14:2 i au lava upu? (Atonu e te manao foi e tusi lenei upumoni po o le mataupu faavae i autafa o lau tusitusiga paia.)

Na tuuina mai e Elder Dallin H. Oaks o le Korama a Aposetolo e Toasefululua le malamalamaaga lea e fesoasoani ia i tatou e malamalama ai i le poloaiga a le Faaola o le “aua le faamasino atu” o loo i le 3 Nifae 14:1. A o e faitau i ai, vase le ituaiga o faamasinoga na ia ta’u mai e tatau ona tatou aloese ai ma le mafuaaga.

“E lua ituaiga o faamasinoga: Faamasinoga mulimuli, lea o loo faasa i tatou ona faia, ma faamasinoga e faia i le ogatotonu, lea ua faatonuina i tatou e fai, ae ia faia i luga o mataupu faavae amiotonu. …

“O le faamasinoga mulimuli … o lena taimi i le lumanai, lea o le a tatou laulaututu uma ai i luma o le nofoa faamasino o Keriso ina ia faamasinoina ai e tusa ma a tatou galuega. … Ou te talitonu faapea o le poloaiga faaletusi paia e ‘aua le faamasino atu’ e faasino manino i lenei faamasinoga mulimuli. …

“… Aisea na poloai mai ai le Faaola ina ia aua nei o tatou faia ia faamasinoga mulimuli? Ou te talitonu o lenei poloaiga na tuuina mai ona ua tatou manatu e faia faamasinoga mulimuli i soo se taimi tatou te folafola atu ai faapea o se tagata patino ua alu i seoli (po o le lagi) ona o se gaoioiga patino, po o se taimi patino. Pe a tatou faia lenei mea—ma e tele le faaosoosoga e faia lea mea—ua tatou faatiga ia i tatou lava, ma le tagata ua foliga ua tatou faamasinoina. …

“ …O se faamasinoga amiotonu e tatau, o le faauigaga, faia i le ogatotonu. O le a aloese mai le folafolaina atu e faapea o se tagata ua faamautinoa i ai le faaeaga po o le aveesea o se tagata mai le saisaitia e faavavau i le afi o seoli. O le a aloese mai le folafolaina atu e faapea o se tagata ua aveesea avanoa uma mo le faaeaga po o avanoa uma mo se matafaioi aoga i le galuega a le Alii. O le talalelei o se talalelei o le faamoemoe, ma e leai se tasi o i tatou ua faatagaina e faafitia le mana o le Togiola, e aumai ai se faamamaina o agasala taitasi, faamagaloga, ma se toe suia o le olaga i tulaga talafeagai” (“‘Judge Not’ and Judging,” Ensign, Aug. 1999, 7, 9).

Mafaufau loloto pe faapefea ona fesoasoani le saunoaga a Elder Oaks ina ia e malamalama i le poloaiga a le Faaola ia “aua le faamasino atu.”

Tali fesili nei, i lau api talaaga mo le suesueina o tusitusiga paia: E mafai faapefea e le mataupu faavae mai le 3 Nifae 14:2 e faapea o le a faamasinoina i tatou e tusa ma le auala e tatou te faamasino atu ai ia suia le auala e tatou te vaai atu ai i mea sese ma vaivaiga a isi? Faitau le 3 Nifae 14:12. E mafai faapefea ona fesootai lenei fuaiupu i lenei mataupu faavae?

Pe sa i ai ea se mea itiiti i lou mata, e pei o se laumata po o se fasi pefu? Ua faatatau e tusitusiga paia se mea itiiti i se mata o se tasi o se fasi laau. O se fafie umi, mafiafia ua faatatau i se utupoto. Na faaaoga e le Faaola nei faatusa ia fesoasoani ia i tatou ia malamalama i faafitauli e tutupu pe a tatou faamasinoina ma le amioletonu isi pe le talafeagai le saili masei ia i latou. Faitau le 3 Nifae 14:3–5, ma mafaufau e uiga i mea ua faatusa i ai le fasi laau ma le utupoto.

I lau api talaaga mo le suesueina o tusitusiga paia, tusi se ata o mea na faamatalaina e le Faaola i le 3 Nifae 14:4. Ona tali lea o fesili nei:
1. O le a le mea e te manatu ua faatusa i ai le fasi laau?
2. O le a le mea e te manatu ua faatusa i ai le utupoto?
3. Aisea e te manatu ua faaaoga ai le utupoto nai lo le fasi laau e faatusa i ai faaletonu o i latou o e faamasino atu ma le amioletonu?

Ia matau o le talafaafaatusa a le Faaola o loo taulai atu i vaega o loo lavelavea i le mata, lea, e afaina ai le vaai a se tagata. Mafaufau loloto i fesili nei e uiga ia te oe lava: E mafai faapefea e o’u faaletonu ona aafia ai le ala ou te vaai atu ai i isi? E mafai faapefea ona ou faaaogaina le fautuaga a Iesu Keriso i le 3 Nifae 14:5?

Mata e te manatu e i ai se taimi e talafeagai ai pe tatau ai le faia o faamasinoga e faatatau i amioga a isi tagata? Na faamanino mai e le Perofeta o Iosefa Samita e ui e le tatau ona tatou faamasino atu i isi ma le amioletonu, ae ua faatonuina i tatou e faaaoga faamasinoga amiotonu (tagai Faaliliuga a Iosefa Samita, Mataio 7:1 [i le Mataio 7:1, vaefaamatalaga a]).

O faamalamalamaga lenei ua tuuina mai ai le malamalamaaga faaopoopo i le fesili e uiga i le faamasinoina o isi: “O nisi taimi e manatu ai nisi tagata e sese le faamasino atu i isi i soo se ala lava. E ui e moni e le tatau ona e ta’usalaina isi pe faamasinoina foi i latou ma le lē tonu, ae o le a manaomia lava lou faamasinoina o manatu, tulaga, ma tagata i le gasologa o lou olaga. Ua tuuina mai e le Alii le tele o poloaiga e le mafai ona e tausia e aunoa ma le faia o se faamasinoga” (Faamaoni i le Faatuatua: O Se Tusitaiala o le Talalelei [2004], 50 51).

Ina ia fesoasoani ia te oe ia malamalama i le taua o le faia o faamasinoga amiotonu, faitau le 3 Nifae 14:6 ma faailoa mai nisi o faamasinoga na faatonuina i tatou e Iesu Keriso e faia. A e te le’i faitauina, atonu o le a fesoasoani ia malamalama o le “tuuina atu … o mea ua paia i ulī” ma ia “lafo … penina i luma o puaa” o lona uiga o le faasoa atu o se mea e paia ia i latou o le a le talisapaiaina pe malamalama i lona paia.

E faapefea ona fesoasoani le 3 Nifae 14:6 ina ia e malamalama ai i le manaomia ona faia o faamasinoga amiotonu? Na faamalamalama mai e Elder Dallin H. Oaks ia nisi o tulaga lea e tatau ona tatou faia ai faamasinoga amiotonu:

“Tatou te faia uma faamasinoga i le filifilia ai o a tatou uo, i le filifilia o le auala o le a tatou faaaogaina ai o tatou taimi ma tupe, ma, o le mea moni, i le filifilia o se soa e faavavau. …

“… O se faamasinoga amiotonu o le a taitaia e le Agaga o le Alii, e le o le ita, taui ma sui, loto leaga, po o le manatu faapito” (“‘Judge Not’ and Judging,” 9).

Tali fesili nei, i lau api talaaga mo le suesueina o tusitusiga paia:
1. Aisea e taua ai le faia o faamasinoga amiotonu i tulaga e pei o le filifilia o uo, filifilia o le auala tatou te faaaogaina ai o tatou taimi ma tupe, ma le filifilia o se soa e faavavau? O a nisi o tulaga lea e tatau ai pe talafeagai ai ona faia faamasinoga o isi?
2. E mafai faapefea ona sili atu ona amiotonu au faamasinoga? E mafai faapefea ona faateleina lou faamasino atu ma le amiotonu?

3 Nifae 14:7–12

Ua aoao mai le Faaola e uiga i le sailia o faamanuiaga mai le Tama Faalelagi

Mafaufau i ni taimi na tali mai ai e le Tama Faalelagi au tatalo. Faitau le 3 Nifae 14:7–11, ma vaavaai mo mea na aoao mai e Iesu Keriso e uiga i le naunautaiga a le Tama Faalelagi e tali mai i a tatou tatalo.

O se tasi o mataupu faavae e mafai ona tatou aoao mai le 3 Nifae 14:7–11 e faapea o le a faamanuia i tatou e le Tama Faalelagi pe afai tatou te ole atu ma saili atu ia te Ia i le tatalo. E mafai faapefea e le iloaina o loo naunau mai le Tama Faalelagi e tali mai i au tatalo ona suia ai le ala e te tatalo ai?

Fai atu i se tagata matua faatuatuaina le fesili lenei: O anafea na e lagona ai le alofa o le Tama Faalelagi ia te oe e ala i le auala na Ia tali mai ai i au tatalo? Otooto lana tali ma mea ua aoaoina mai ai i lau api talaaga mo le suesueina o tusitusiga paia.

3 Nifae 14:13–27

Ua aoao mai e le Faaola le taua o le faia o le finagalo o le Tama Faalelagi

A o faaauau pea ona aoao atu le Faaola i sa Nifae na faapotopoto i le malumalu, na Ia tuuina mai ni nai talafaafaatusa e fesoasoani ia tatou malamalama ai i le taua o le usiusitai i Ana aoaoga. O talafaafaatusa taitasi o loo i ai se faataitaiga lelei ma se faataitaiga le lelei.

I lau api talaaga mo le suesueina o tusitusiga paia, tusi se ata faigofie o le faataitaiga lelei ma le faataitaiga le lelei o loo maua i totonu o mau fuaitau nei e tolu. Tusi foi i lalo mea e te manatu e finagalo le Faaola ia tatou aoaoina e ala i le faatusatusaina o faataitaiga lelei ma faataitaiga le lelei. Ia sauni e faaali atu au ata i lau vasega ma faamatala mea ua e aoaoina mai nei talafaafaatusa.

Faitau le 3 Nifae 14:21–23, ma mafaufau e uiga i mea e te ono tau atu i se tagata na fai atu ia te oe ua na o le pau le mea e te manaomia ona fai e sao ai i le malo o le Atua o le fai atu e te talitonu ia Iesu Keriso.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 3 Nifae 14 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: