Seminare
Iunite 1: Aso 4, Vaaiga Aoao i le Tusi a Mamona

Iunite 1: Aso 4

Vaaiga Aoao i le Tusi a Mamona

Folasaga

Na faamatalaina e le Perofeta o Iosefa Samita mea o le a tutupu i le oo mai o le Tusi a Mamona. E ala i le suesueina o lana tala, o lau molimau i lona valaauga faaperofeta ma le matafaioi paia a le Tusi a Mamona i le Toefuataiina o le atoatoaga o le talalelei a Iesu Keriso e mafai ona faateleina. O le a fesoasoani foi lenei lesona e te masani atili ai i le ala na tusia ai anamua le Tusi a Mamona. Na molimau mai perofeta o Mamona ma Moronae i le taitaiga a le Alii ao latou tusiaina ma tuufaatasia tusitusiga a isi perofeta e toatele i papatusi auro. Ao e suesue, vaavaai mo faamaoniga o le aao o le Alii i le oo mai o le Tusi a Mamona ma le matafaioi a le Tusi a Mamona e mafai ona taitaia ai lou olaga.

“O Le Molimau a le Perofeta o Iosefa Samita”

O le a faapefea ona e talia le fesili “Na faapefea e lau Ekalesia ona maua le Tusi a Mamona?”

O le “Molimau a le Perofeta o Iosefa Samita,” i anomea i le faatomuaga i le amataga o le Tusi a Mamona, o loo maua ai ni upusii mai le Iosefa Samita—Talafaasolopito, i le Penina Tau Tele. O loo faamatalaina ai le oo mai o le Tusi a Mamona i upu lava a le Perofeta. E faamalosiauina oe e faitau lana tala atoa mai le Iosefa Samita—Talafaasolopito i au suesuega o tusitusiga paia i aso taitasi.

Ona o le “Molimau a le Perofeta o Iosefa Samita” e le o i ai ni numera o fuaiupu, o le a faatulagaina e lenei lesona le Iosefa Samita—Talafaasolopito ia faigofie ai mo oe ona maua faitauga atofaina. Ao e suesueina le molimau a le Perofeta o Iosefa Samita, vaavaai mo faamaoniga o le Tusi a Mamona na oo mai i le mana o le Atua.

Faitau le Iosefa Samita—Talafaasolopito 1:29–35, 42–43, ma vase auiliiliga o le asiasiga a Moronae ia Iosefa Samita o le a e faaaofia ai pe a e faamatalaina nei mea i se tasi. I le Iosefa Samita—Talafaasolopito 1:34, o le a le tala a Moronae i mea o loo i ai i papatusi auro?

  1. Tali le fesili lenei, i lau api talaaga mo le suesueina o tusitusiga paia: O le a se mea se tasi i le Iosefa Samita—Talafaasolopito 1:29–35, 42–43 o le a e manao e faamamafa atu pe a e faasoa atu lenei tala i se tasi? Aisea e taua ai ia te oe?

  2. Faitau le Iosefa Samita—Talafaasolopito 1:51–54, ma faamaumau ou manatu i fesili nei i lau api talaaga mo le suesueina o tusitusiga paia: O le a se mea na aoaoina e Iosefa Samita i ana asiasiga faaletausaga ma le agelu o Moronae? Aisea e te manatu ai na taua ia Iosefa le faia o lenei aoaoga e fa-tausaga ao lei mauaina ma faaliliuina papatusi?

Ina ua mavae se taimi o le sauniuniga ma faatonuga, na tuuina atu ia Iosefa Samita papatusi i le 1827 ma le tiutetauave o le faaliliuina e ala i le meaalofa ma le mana o le Atua. Faitau le Iosefa Samita—Talafaasolopito 1:59–60, ma faailoa mai le poloaiga na tuuina atu ia te ia e uiga i papatusi auro.

“O Se Faamalamalamaga Puupuu e uiga i le Tusi a Mamona”

Ata
Ua Otootoina e Mamona ia Papatusi

Ina ia malamalama i le ala na faatulagaina ai le Tusi a Mamona, faitau “O se Faamalamalamaga Puupuu e Uiga i le Tusi a Mamona,” e maua i le “Molimau a le Perofeta o Iosefa Samita.” Faatusatusa mea e te faitau i ai i le ata o i le faaiuga o lenei lesona, o loo faamalamalama ai le ala na fetaui lelei ai seti o papatusi eseese ua maua ai le Tusi a Mamona.

E tele tagata na avea ma tusitalafaamaumau i le taimi o le talafaasolopito o Sa Nifae ma Sa Lamana, e amata mai ia Liae ma faaiuina i le sili atu ma le 1,000 tausaga mulimuli ane i le perofeta-tusitalafaasolopito o Mamona ma lona atalii o Moronae. Na faatonuina Mamona e le Alii ina ia otootoina tusitusiga a nei perofeta anamua ma le talafaasolopito o le 1,000 tausaga a lona nuu. Na faamaumauina lana otootoga i papatusi a Mamona, ua taua foi o papatusi auro. Ina ua maliu Mamona, na faamaea e lona atalii o Moronae faamaumauga ma nanaina papatusi seia oo ina tuuina atu i le Perofeta o Iosefa Samita.

Helamana 3:13–15 o se tasi o fuaitau na faamatalaina ai e Mamona le faia o le otootoga o faamaumauga a Sa Nifae. Ao e faitau i ai, ia matau na sili atu le tele o mea na tusia nai mea na mafai e Mamona ma Moronae ona faaaofia i papatusi auro.

Faitau Upu a Mamona 1:9 ma le Mamona 8:34–35. Vali upu po o fuaitau o loo faamatalaina ai le ala na fesoasoani ai le Alii ma taitaia Mamona ma Moronae ao la tuufaatasia faamaumauga o le Tusi a Mamona.

  1. Tali le fesili lenei, i lau api talaaga mo le suesueina o tusitusiga paia: Pe ana faapea o oe o Mamona po o Moronae ma na i ai le tiutetauave e faaitiitia le tele o tusitusiga faaperofeta i se faamaumauga se tasi, e faapefea ona e filifili po o a mea e faaaofia i lau otootoga?

Mai nei fuaiupu e mafai ona tatou iloa ai na vaai tusitala o le Tusi a Mamona i o tatou aso ma tusia mea o le a sili ona fesoasoani ia i tatou.Atonu e te manao e tusi lenei mea i au tusitusiga paia i autafa o le Mamona 8:35.

Na molimau mai Peresitene Ezra Taft Benson o le Tusi a Mamona “na tusia mo tatou aso” ma faamalamalamaina le ala e mafai ai ona fesoasoani le iloaina o lenei mea ia i tatou ao tatou suesueina le Tusi a Mamona:

“Sa lei maua e Sa Nifae lenei tusi; faapea foi Sa Lamana anamua. Sa tusia mo i tatou. Sa tusia e Mamona i le faaiuiuga o le malo o tagata Sa Nifae. I lalo o musumusuga a le Atua, o Le ua silafia mea uma mai le amataga, na ia otootoina le tele o tala faamaumau na tusia i le tele o seneturi, ma ia filifili mai tala, ma saunoaga, ma mea na tutupu e aoga ia i tatou. …

“Afai na latou vaai i o tatou aso, ma latou filifili mea e sili ona taua mo i tatou, e le o se pogai sili ea lena ona taua e tatau ai ona tatou suesue ma aoao i le Tusi a Mamona? E tatau ona tatou fesili ifo soo ia i tatou lava, “O le a le pogai na musuia ai e le Alii ia Mamona po o Moronae po o Alema ia tuu lena mea i le tusi? O le a se lesona e mafai ona ou aoaoina mai lena mea e fesoasoani ia te au ou te ola ai i nei aso?’” (“O Le Tusi a Mamona—O Le Maa’au’au o lo Tatou Faatuatuaga,” Liahona, Ian. 1987, 6).

O le faia o nei ituaiga o fesili ao e suesue o le a fesoasoani ia te oe e iloa ai mataupu ma aoaoga faavae na silafia e le Alii o le a sili atu ona fesoasoani ia te oe i lou olaga.

Mafaufau nei loa i lou olaga. Mafaufau i fesili o ia te oe po o faigata o e feagai o le a e manao e maua mai ai se taitaiga mai le Atua. Tusi se tasi pe lua o na mea i lau api talaaga patino (ae le o lau api talaaga mo le suesueina o tusitusiga paia lena e te faaali i lou faiaoga). I taimi o au suesuega o le Tusi a Mamona i aso taitasi, vaavaai mo mataupu faavae e maua mai ai le taitaiga ma fautuaga e fetaui ma nei tulaga.

I le mataupu o le suesuega o tusitusiga paia i aso taitasi, na saunoa mai ai Peresitene Gordon B. Hinckley: “Atonu e te manatu e tele au feau. Sefulu i le sefululima minute i le aso i tusitusiga paia, aemaise lava i le Tusi a Mamona, e te maua ai le malamalama ofoofogia i upumoni o le faavavau na faasaoina i le mana o le Atua mo le faamanuiaina o Lana fanau. Ao e faitau … , o le a faalatalata atu ai ia te Ia, o le pogai o lo tatou faaolataga” (“Ia Tu Atu e Tusa ma le Faatusa Paia i Totonu ia te Outou,” Liahona, Ian. 1990, 97).

  1. Mafaufau loloto po o le a le sini o le a e faatuina e fesoasoani ia te oe e sili ai ona tele ni au mea aoga mai le faitauina o le Tusi a Mamona i lenei tausaga. Tusi au sini i lau api talaaga mo le suesueina o tusitusiga paia. Atonu e te manao e faatulaga ni taimi masani e iloilo ai lou alualu i luma.

  2. Tusi le fuaitau lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le lesona “Vaaiga Aoao i le Tusi a Mamona” ma faamaeaina i le (aso).

    Fesili, manatu, ma vaaiga faaopoopo, ou te fia faasoa i lou faiaoga:

Ata
atatusi o papatusi