Eteru 13–15

Folasaga

Sa valoia e le perofeta o Eteru le Ierusalema Fou. Sa ia lapatai atu foi ia Korianetuma, o se tupu sa Iareto, o le a faaumatia lona nuu ona o le amioleaga, ma sa ia aoaiina Korianetuma ma lona aiga ina ia salamo. Ina ua mumusu Korianetuma ma le nuu e salamo, sa fateteleina taua ma le amioleaga mo le tele o tausaga seia oo ina faaumatia atoa le nuu o sa Iareto. Na o Eteru ma Korianetuma na sao e molimauina le faataunuuina o le valoaga a Eteru.

Ata

taua a sa iareto

Eteru 13:1–12

Sa faamaumauina e Moronae ia valoaga a Eteru e uiga i le Ierusalema Fou ma le Ierusalema tuai

Mafaufau i nisi o aai i lenei vaitaimi e i ai nisi igoa o loo faailoa mai ai se vaega taua o le aai. Mo se faataitaiga, Parisi, Farani, e iloga foi o le Aai o Moli. Ina ia amata, vaai pe mafai ona e faatusatusaina ia aai o loo i lalo ma isi o latou igoa sa’o (o loo tuuina atutali i le faaiuga o le lesona).

Kairo, Aikupito	O Le Aai Matagia
Manila, Filipaina	O Le Aai o Olo e Afe
Sikako, ISA	O Le Aai e Faavavau
Aai o Mekisiko, Mekisiko	O Le Penina o le Orient
Roma, Italia	O Le Aai o Maota Tetele

O le lesona o lenei aso e tatai atua le gauai atu i aai taua e lua i aso mulimuli: (1) Ierusalema ma le (2) o le Ierusalema Fou. I aso e gata ai o nei aai e lua o le a iloga mo lo latou amiotonu. Sa aoao atu e Eteru sa Iareto o le laueleele o loo latou nonofo ai o se nofoaga mo se aai i le lumanai e ta’ua o le Ierusalema Fou.

Faitau le Eteru 13:2–8. Sa faaalia e le Alii i le Perofeta o Iosefa Samita o le Ierusalema Fou o loo faailoa mai i le Eteru 13:6 o le a fausia i le Itumalo o Jackson, Misuri, ISA (tagai MF&F 57:1–4; 84:1–4). O le a le tala a Eteru e uiga i nei aai i le Eteru 13:3, 5? Mafaufau loloto pe faapei le ola ai i se aai faapena. Suesue le Eteru 13:10–11 e aoao ai po o le a le mea e tatau ona tofo i ai se tagata ina ia mafai ona nofo i aai paia o le Ierusalema Fou ma Ierusalema tuai (lea o le a paia pe a toe fausia mo le Alii; tagai Eteru 13:5).

O le isi igoa mo le Ierusalema Fou o Siona (tagai Mose 7:62; Mataupu Faavae o le Faatuatuaga 1:10). E ui atonu tatou te le nonofo i Ierusalema po o Ierusalema Fou, e mafai e tagata uma o le ekalesia ona saili e faatu ia Siona. E mafai ona tatou saunia ina ia aumau i nofoaga paia, e aofia ai le malo selesitila a le Atua, pe a tatou mama e ala i le Togiola a Iesu Keriso.

Eteru 13:13–15:34

Sa teena e sa Iareto Eteru ma faaauau pea le amioleaga ma taua seia oo ina faaumatia i latou

Faitau le Eteru 13:13–19, ma tagai i tulaga o le nuu o sa Iareto i le vaitaimi o Eteru. Suesue le Eteru 13:20–22 ia iloa ai le savali a Eteru ia Korianetuma ma le auala na tali mai ai Korianetuma lona nuu.

Tali le fesili lenei, i lau api talaaga mo le suesueina o tusitusiga paia:
1. O a ni auala na e vaai ai i tagata i o tatou aso o faamaaaina o latou loto ma tetee atu i auauna a le Alii?
2. O le a se mea o le a e faia e faatumauina ai lou lava malosi i le faatuatua ma usitaia ia upu a perofeta?

E pei ona faamaumauina i le Eteru 13:23–14:20, na tauina e Korianetuma ni taua ma le tele o tagata o e na taumafai e aveese le malo mai ia te ia, e aofia ai Sareto, Kiliata, ma Lipi. Na iu lava ina lofituina le malo atoa a sa Iareto i taua. O le fili mulimuli a Korianetuma o se tagata e igoa ia Sesa. O le tulaga o le faaumatiaga i totonu o sa Iareto mai nei taua o loo auiliiliina i le Eteru 14:21–25 ma le Eteru 15:1–2.

Faitau le Eteru 15:3–6 ia iloa ai po o le a le mea na taumafai Korianetuma e fai e faasao ai tagata na totoe mai le faaumatiaga. Mafaufau e uiga i le mafuaaga na teena ai e Sesa le talosaga a Korianetuma ma le mafuaaga na mumusu ai tagata i autau uma e lua e siilima (tagai foi i le Eteru 14:24).

Faitau le Eteru 15:12–17, ma tagai mo faamatalaga e uiga i le tulaga o sa Iareto. O le a se mea sa e mauaina na sili ona matautia pe faanoanoa e uiga i o latou tulaga? Manatua sa faaaluina e Eteru le tele o tausaga e lapatai atu ai i tagata ina ia salamo (tagai Eteru 12:2–3; 13:20). Faitau le Eteru 15:18–19, ma faailoa mai ia taunuuga e oo mai i le teena o lapataiga a le Alii ina ia salamo. E tusa ai ma mea sa e faitauina, faamaea le faamatalaga lenei: Afai tatou te teena ia lapataiga a le Alii ina ia salamo, o le a .

I le avanoa o i luga, atonu sa e tusia ai se mataupu faavae e pei o lenei: Afai tatou te teena ia lapataiga a le Alii ina ia salamo, o le a aluese Lona Agaga ma o le a maua e Satani le malosi i o tatou loto.

I le faaaogaina o Eteru 15:19 ma le mataupu faavae tatou te aoao mai ai, faamalamalama atu pe aisea e avea ai se tasi po o le sili atu o ‘alofaga nei lea e ono tuuina mai i lenei vaitaimi e se tasi mo le mumusu ia salamo e sese:
1. Ou te iloa o ata tifaga lea ou te matamata i ai e le ogatusa ma tulaga faatonuina a le Ekalesia, ae e foliga mai e leai so latou aafiaga ia te a’u.
2. O le inu pia ma a’u uo e le leaga. Na o lo matou fiafia lava.
3. Ua na o se tamai ponokalafi. E le faapea o ou alu ma faia ni amioga le mama. Ma le isi mea, e mafai ona ou tuuina i soo se taimi ou te manao ai.
4. E le manaomia ona ou salamo i le taimi nei. E mafai ona faatali seia tau oo i le taimi ou te alu ai i se misiona pe faaipoipo ai i le malumalu.

Eteru 15:20–32 e faatatau i le auala na fetauai ai autau e lua a sa Iareto seia oo ina na o o latou taitai, o Korianetuma ma Sesa, sa totoe. Ona fasiotia lea e Korianetuma o Sesa.

O le talafaasolopito o sa Iareto o loo aumaia ai se faataitaiga manino o le mea e tupu i se nuu pe a latou teena faatasi ia taumafaiga faifai soo a le Atua ina ia uunaia i latou e salamo. E ui atonu tatou te le fetaiai vave ma ni faaumatiaga faaletino i le mumusu e salamo, ae o le a tatou aafia i ni lagona o le tausalaina pe afai tatou te teena ia lapataiga a le Alii ina ia salamo.

Ata

tagata oti i luga o le tafa o le taua

Toe mafaufau i le saunoga lenei mai ia Elder Neil L. Andersen o le Korama a Aposetolo e Toasefululua: “Ou te molimau atu e mafai ma e naunau le Faaola e faamagalo a tatou agasala. Sei vagana ai agasala a i latou o e ua filifilia le malaia ina ua latou iloa lelei, e leai se agasala e le mafai ona le faamagaloina. O se matua faamanuiaga ofoofogia mo i tatou taitoatasi le liliu ese mai ia tatou agasala ae o mai ia Keriso. O le amiotonu paia o se tasi lea o fua aupito suamalie o le talalelei, o le aveese o le tausalaina ma le tiga mai o tatou loto ae suia i le olioli ma le filemu o le mafaufau” (“Salamo … Ina Ia Ou Faamaloloina Outou,” Ensign po o le Liahona, Nov. 2009, 41).

Iloilo soo se mea atonu o e faia e ono faalavelave i le faatosinaga a le Agaga Paia i lou olaga. Mafaufau pe faapefea ona e maua le mana o le Togiola a Iesu Keriso e faia ai ni suiga manaomia lea o le a fesoasoani ia te oe ia maua le Agaga ma tetee atu i le mana o Satani.

Mai le Eteru 13–15 ua tatou aoao ai o le ita ma le tauimasui e oo atu ai i le faia o filifiliga lea e faatiga ai ia i tatou lava faapea ma isi. Faitau pe toe faitau ia fuaitau nei, ma faailoga upu po o fuaitau ia e aoao atua lenei upumoni: Eteru 13:27; 14:24; 15:6, 22, 28.

Mafaufau po o a taunuuga o le le pulea o le ita e mafai ona i ai i luga o se aiga po o nisi mafutaga. Mafaufau i se tulaga i lou olaga lea atonu e manaomia ai lou lafoai o lagona o le ita po o le tauimasui.

A o e faitauina le saunoaga lenei mai ia Elder David E. Sorensen, o se sui faamaloloina faamamaluina o Fitugafulu, tagai pe faapefea ona e foiaina lagona o le ita po o se manao e tauimasui: “Pe a faatiga e se tasi i tatou po o i latou foi tatou te alolofa i ai, e toetoe lava ina a lofituina i tatou i lena tiga. E mafai ona avea lena tiga po o le le tonu o se mea e aupito sili ona taua i le lalolagi, ma ua leai ai se isi lava mea tatou te faia ae taumafai e tauimasui. Peitai, ua aoao mai i tatou e Keriso, le Alii o le Filemu, se auala e sili atu. E mafai ona faigata tele ona faamagalo atu i se tagata se mea leaga na latou faia ia i tatou, peitai, a tatou faamagalo atu, o lona uiga ua tatou savalia le ala mo se lumanai e sili atu. E le toe pulea lo tatou ala i se sese e fai mai e se isi tagata. A tatou faamagaloina atu i isi, ona faasaolotoina lea o i tatou e filifili pe faapefea ona tatou ola. O le faamagalo atu o lona uiga, e le toe faatonuina o tatou taunuuga e faafitauli ua te’a, ma ua mafai ona tatou tulimatai atu i le lumanai, ma le alofa o le Atua i o tatou loto” (“O Le Loto Faamagalo E Suia ai le Oona Matauitui i le Alofa,” Ensign po o le Liahona, Me 2003, 12).

Tali le fesili lenei, i lau api talaaga mo le suesueina o tusitusiga paia: O anafea na e aafia ai po o se tasi e te iloa i se faamalologa ma le saolotoga ina ua uma ona filifili e faamagalo atu?

E mafai ona e faatoilaloina soo se lagona o le ita ma le tauimasui pe afai o le a e liliu atu ia Iesu Keriso ma maua le mana o le faamagaloga ma le toafimalie e ala i Lana Togiola. Manatua ia liliu atu i le Alii i le tatalo mo le fesoasoani e te manaomia i na tulaga.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Eteru 13–15 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: