3 Nifae 24–26

Folasaga

I le 3 Nifae 24–25, na faataunuuina ai e Iesu Keriso le poloaiga a le Tama Faalelagi e tuuina atu i tagata nisi o valoaga a Malaki. Na folafolaina e Malaki le manaomia e le aiga o Isaraelu ona salamo ma toe foi i le Alii e sauniuni ai mo le afio mai o le Faaola. E pei ona faamaumauina i le 3 Nifae 26:3, na faamalamalama mai e Iesu Keriso i tagata “mea uma, mai lava i le amataga seia oo i le taimi e afio mai ai o ia i lona mamalu.” Na aoao mai Mamona faapea o i latou o e talitonu i le Tusi a Mamona o le a faaalia mai ia te i latou mea silisili (tagai i le 3 Nifae 26:9).

3 Nifae 24:1–6

Ua sii mai e Iesu Keriso upu na tuuina atu ia Malaki e faatatau i le Afio Mai Faalua

Ata

O Le Afio Mai Faalua

A o Ia fetalai atu i nisi o valoaga a Malaki i sa Nifae, na faatatau atu e Iesu Keriso i vaaiga o le afi ma le fasimoli. Vaai faalemafaufau i se afi mumu ma se vaega o le fasimoli. Mafaufau e uiga i mea e ono tutusa ai nei mea faitino e lua o ni mea faamama po o ni mea e fufulu ai [ai se mea].

Faitau le 3 Nifae 24:2–3 . I le 3 Nifae 24:2, ua faatusaina Iesu Keriso i se afi a le tunu auro ma le moli a le taofu ona o mea o le a Ia faia i le Lona Afio Mai Faalua. I le 3 Nifae 24:3, ua faatusaina o Ia i se tagata gaosi mea, o le e faamamaina ario. Ina ia malamalama i nei fuaiupu, e fesoasoani le iloaina o le faagasologa mo le faaleleia o le ario e manaomia ai e le tagata gaosi mea ona uu se vaega o le ario i luga a’e o se vaega pito sili ona vevela o le afi e susunu ese ai ni mea e le mama. E tatau ona vaavaai ma le totoa le tunu auro i le ario, aua afai e umi ona tuu le ario i le afi, o le a faaleagaina. O se taofu o se tagata e faamamaina lavalava pe faapapaeina i latou e ala i le faaaogaina o le fasimoli. O “atalii o Levi” o i latou ia na umia le perisitua i Isaraelu anamua; o lenei faaupuga e mafai ona faatatau i tagata uma o le Alii i aso nei.

Mafaufau loloto i le mea o loo fautuaina mai e lenei vaaiga o le a tutupu i le Afio Mai Faalua o Iesu Keriso. I lau tusitusiga paia i autafa o le 3 Nifae 24:2–3, atonu e te manao e tusi ai le: I Lona Afio Mai Faalua, o le a faamamaina e Iesu Keriso Lona nuu.

Faitau le 3 Nifae 24:5–6, ma faailoa mai po o ai o le a le susunuina pe faaumatia i le afio mai o le Faaola. (Ia matau i totonu o lenei fuaitau o “atalii o Iakopo” o le tagata o le feagaiga a le Alii i totonu o le aiga o Isaraelu.) O nei fuaiupu o loo aoao ai le mataupu faavae: O le a faamasinoina e Iesu Keriso e amioleaga i Lona afio mai.

Tusi le ulutala lenei i lau api talaaga mo le suesueina o tusitusiga paia: O mea e tatau ona ou faia ina ia saunia ai mo le Afio Mai Faalua o Iesu Keriso. A o faaauau pea ona e suesue i le 3 Nifae 24–26, lisi i lalo o ulutal lenei mea ua e aoaoina o le a fesoasoani ia te oe e saunia ai mo le Afio Mai Faalua o Iesu Keriso.

3 Nifae 24:7–18

Ua aoao atu e Malaki le aiga o Isaraelu i le auala e toe foi ai i le Alii

Vaai faalemafaufau i se uo e te latalata i ai po o se tagata o le aiga e foliga mai e le o popole i le auala e aafia ai o ia i amioga a se tagata i le Faamasinoga, le Afio Mai Faalua, po o le faavavau. Mafaufau e uiga i mea e te ono tau atu ma fesoasoani ai i lenei tagata. Faitau le 3 Nifae 24:7, ma faailoa mai mea na fetalai mai ai le Alii i atalii o Iakopo o e na amata ona o ese mai ia te Ia. O le a sou manatu, o le a le uiga o tagata ua “o ese” mai sauniga a le Alii?

I le Ekalesia, o se sauniga, o se faatinoga paia ma aloaia e faatinoina i le pule o le perisitua. O nisi o sauniga e taua i lo tatou faaeaga. O nei sauniga ua taua o “sauniga faaola.” E aofia ai le papatisoga, faamauga o le papatisoga, faauuga i le Perisitua Mekisateko (mo alii), o faaeega paia o le malumalu, ma le faamauga o le faaipoipoga. Faatasi ai ma nei sauniga, tatou te ulufale atu i ni feagaiga paia ma le Alii. Atonu e te manao e lisiina sauniga faaola i lalo o le ulutala i le api talaaga i le galuega atofaina 1. Mafaufau pe faapefea ona fesoasoani nei sauniga ia i tatou e saunia mo le Afio Mai Faalua.

E ui lava na o ese le nuu o le Alii mai i sauniga ma feagaiga o le talalelei, ia matau le folafolaga i le 3 Nifae 24:7, lea na tuuina atu e le Alii ia i latou pe afai latou te toe foi mai ia te Ia. Atonu e te manao e faailoga lenei folafolaga i totonu o au tusitusiga paia ina ia fesoasoani e te manatua ai afai tatou te toe foi atu i le Alii, o le a Ia toe foi mai ia i tatou.

Faitau le 3 Nifae 24:8–10, ma vaavaai mo se tasi o auala na ta’ua e le Alii e mafai ai e atalii o Iakopo ona toe foi atu ia te Ia ma faapea ona saunia ai mo le Afio Mai Faalua. Atonu e te manao e faaaofia ai le totogiina o sefuluai ma taulaga i le lisi i lalo o le ulutala i totonu o le api talaaga i lau galuega atofaina 1.

Faitau le fautuaga lenei mai ia Peresitene Gordon B. Hinckley e uiga i le totogiina o le sefuluai: “E mafai ona totogi a tatou sefuluai. E le o se mataupu e faatatau i tupe, ae o se mataupu tau le faatuatua” (“Ia Tatou Uunai i Luma le Galuega,” Liahona, Ian. 1986, 69).

Mafaufau loloto mo sina taimi pe avea faapefea lou naunautaiga e tuuina atu sefuluai ma taulaga i le Alii o se faailoaga o lou faatuatua ia te Ia. Faitau le 3 Nifae 24:10–12, ma taulai atu i faamanuiaga mo i latou o e totogi se sefuluai atoatoa ma le faamaoni.

Tali fesili nei, i lau api talaaga mo le suesueina o tusitusiga paia:
1. O a ni faamanuiaga ua e mauaina mai le usiusitai i le tulafono o le sefuluai?
2. E te manatu faapefea o le tausia o le poloaiga e totogi au sefuluai ma taulaga ua fesoasoani e te saunia ai faaleagaga oe lava mo le Afio Mai Faalua?

O nisi o tagata o Isaraelu anamua na muimui e faapea, o le tausia o poloaiga a le Alii na le’i i ai se mea lelei na latou maua ai. Na o latou manatu na le aoga a latou taumafaiga, pe na ma’umau (tagai 3 Nifae 24:14). I le isi itu, na latou finau e faapea, o tagata faamaualuluga ma le amioleaga na “fiafia,” “faamautuina,” ma “laveaiina” (3 Nifae 24:15). I nisi faaupuga, na faapea mai nei tagata o tagata amioleaga na sili atu ona manuia nai lo tagata amiotonu. Na tali atu le Alii i nei faitioga i le fetalai atu, o i latou e matatau i le Alii ma mafaufau i Lona suafa, ma ē potopoto soo ia talatalanoa ma le tasi ma le isi, o le o latou mauaina o latou igoa i “se tusi faamanatu” (3 Nifae 24:16). O i latou ia o e na saunia mo le afio mai o le Alii ma faasaoina mo Ona ia lava “maa” taua (tagai 3 Nifae 24:16–17). Na luiina e le Alii i latou o e na faitio e faatalitali ma vaavaai mo le taunuuga mulimuli i le taimi e mafai ai ona latou “foi mai ma iloa le eseesega o le amiotonu ma le amioleaga” (3 Nifae 24:18). O le a latou vaai ai o le a sili atu e amiotonu i le taimi mulimuli.

3 Nifae 25

Ua sii mai e Iesu Keriso le valoaga a Malaki faapea o le a toe sau Elia a o le’i o’o i le Afio Mai Faalua

Ata

Elia ua Toefuataiina Mai Ki o le Mana o Faamauga o le Perisitua

Faitau le 3 Nifae 25:1–3, ma vaavaai pe aisea o le a avea ai le Afio Mai Faalua ma se faamanuiaga ia i latou o e faatuatua ia Iesu Keriso. O le upu aa i le fuaiupu 1 e faasino i tuaa, ma o lala e faasino i fanau. O le mea lea, i le olaga e sosoo ai, o tagata amioleaga o le a lē mafai ona olioli i faamanuiaga o le mafai ona faamauina i o latou augatuaa ma fanau. O tamai povi e “tutupu ae … i le lotoa” o ni faailoga mo fanau ua puipuia, tausia, ma mauaina mea uma e manaomia mo i latou a o latou tuputupu ae.

Na faasoa atu e le Faaola ia sa Nifae mea na tusia e Malaki e uiga i se mea e tupu o le a oo mai a o le’i oo i le Afio Mai Faalua ma o le aofia ai le perofeta o le Feagaiga Tuai o Elia. Faitau le 3 Nifae 25:5–6, ma vaavaai mo mea na aoao mai e Malaki o le a faia e Elia e fesoasoani e saunia ai le lalolagi mo le afio mai o le Alii.

O le toe foi mai o Elia i le lalolagi sa avea o se vaega taua o le Toefuataiga o le talalelei. I le aso 3 o Aperila , 1836, na faaali mai ai Elia ia Iosefa Samita ma Oliva Kaotui i le Malumalu fou faatoa faapaiaina o Katelani (tagai MF&F 110). Na ia faaee mai i o la’ua luga le mana o faamauga o le perisitua, ua mafai ai e aiga ona faamauina i augatupulaga atoa. O le a lou manatu i le uiga o le faamatalaga e faapea “o le a ia liliu loto o tama i fanau, ma loto o fanau i o latou tama” (3 Nifae 25:6)?

Ua aoao mai e nei fuaiupu e faapea a o liliu atu o tatou loto i o tatou tama, ua tatou fesoasoani e saunia le lalolagi mo le Afio Mai Faalua o Iesu Keriso.

Tusi i lau api talaaga mo le suesueina o tusitusiga paia se aafiaga na oo ia te oe po o se tagata o lou aiga lea na fesoasoani e liliu atu ai lou loto i ou tuaa. Atonu e mafai ona aafia ai le faamauina i totonu o le malumalu paia, sailia o lau talafaasolopito o aiga, po o le auai i papatisoga mo e ua maliliu. Afai e le mafai ona e mafaufau i se aafiaga, tusi se parakalafa puupuu e uiga i au faananauga e auai i lenei galuega. (I lalo o le galuega atofaina 1 i le api talaaga, atonu e te manao e tusi ai: o le mauaina o sauniga o le malumalu mo oe lava ma lou aiga, auai i le malumalu, ma aoina mai faamatalaga o talafaasolopito o aiga.)

3 Nifae 26

O a mea e tatau ona faia ina ia maua ai mea silisili na faaali mai e Iesu Keriso

Ua tatou aoao mai le 3 Nifae 26:3 na aoao atu e le Faaola ia sa Nifae “mea uma lava ia o le a oo mai i luga o le lalolagi.” Faitau le 3 Nifae 26:6–8, ma po o le a le tele o le lauga a le Faaola na faamaumauina i le Tusi a Mamona. Suesue le 3 Nifae 26:9–11 e iloa ai le mafuaaga na le’i faaaofia ai e Mamona mea uma.

Na faatonuina e le Alii ia Mamona e faaaofia na o se vaega itiiti o na aoaoga ina ia tofotofo ai lo tatou faatuatua. Mai le 3 Nifae 26:1–21 ua tatou aoao ai e faapea a o tatou talitonu i mea ua faaali mai e le Atua, tatou te saunia ai foi i tatou lava mo faaaliga e tele. Aisea e te manatu ai e taua lo tatou talitonuina o upumoni ua tatou mauaina a’o le’i oo i le taimi tatou te maua ai ni upumoni faaopoopo? (Tagai Alema 12:9–11.) E mafai faapefea ona tatou faaali atu faapea, ua tatou talitonu i mea ua faaali mai e le Alii?

Ina ia faaaoga mataupu faavae ua faamataolaola o loo i luga, tali le fesili lenei i lau api talaaga mo le suesueina o tusitusiga paia: O a ni mea o loo e faia i lou olaga e faaalia ai lou talitonuga i le Tusi a Mamona?

E pei ona faamaumauina i isi vaega o le 3 Nifae 26, na otootoina e Mamona le galuega a le Faaola ma ona aafiaga ia sa Nifae. Faitau le 3 Nifae 26:13–21, ma mafaufau e faailoga pe o faapefea ona faatinoina e tagata afioga a Iesu Keriso.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le 3 Nifae 24 26 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: