Alema 33–35

Folasaga

E faaaoga ai aoaoga o loo maua i tusitusiga paia, sa fesoasoani Alema i le toatele o sa Sorama ina ia malamalama e mafai ona latou tapuai i le Atua e tusa lava po o le a lo latou tulaga. Sa ia uunaia i latou e vaavaai atu ia Iesu Keriso ma talitonu i Lana Togiola. Sa faamaonia e Amoleka aoaoga a Alema ma folafola atu lana ia lava molimau ia Iesu Keriso. Sa faamamafa atu e Amoleka ua na o le Togiola lava o Iesu Keriso e mafai ai ona faaolaina tagata. Sa ia folafola atu e mafai e tagata taitoatasi ona maua uma faamanuiaga o le Togiola a Iesu Keriso a o latou faaaoga lo latou faatuatua i le salamo. E toatele sa Sorama na faalogo i le lapataiga a Amoleka, sa salamo, ma toe faatasi ma sa Nifae.

Alema 33:1–10

Na aoao atu e Alema se vaega o sa Sorama e mafai ona latou tapuai i le Atua i fafo atu o o latou sunako

Manatua ane, e pei ona faamaumauina i le Alema 32, sa aoao atu e Alema sa Sorama e uiga i le manaomia ona toto o le afioga a le Atua i o latou loto ma faaaoga lo latou faatuatua i le afioga a le Atua. Faitau le Alema 33:1, ma faailoa mai fesili sa i ai ia sa Sorama e uiga i mea na aoaoina ai i latou e Alema.

I lau api talaaga mo le suesueina o tusitusiga paia, tusi pe faapefea ona tali le fesili a sa Sorama e faatatau i le ala e latou te amata ai ona faaaoga lo latou faatuatua. Ma a o e suesue le Alema 33–34, faatusatusa lau tali i mea sa aoao atu e Alema ma Amoleka i sa Sorama.

A o amata ona tali atu Alema i fesili a sa Sorama, sa ia faasaoina se manatu sese e uiga i le tapuaiga sa taofia ai i latou mai le faaaogaina atoatoa o lo latou faatuatua. Faitau le Alema 33:2, ma faailoa mai lenei manatu sese. Ia manatua sa le i faatagaina e sa Sorama tagata matitiva e ulufale atu i o latou sunako e tapuai ai (tagai Alema 32:1–3). E tusa ai ma Alema 33:2, o a mea na tau atu e Alema i tagata e ao ona latou faia e saili ai se tali e faasao ai lenei manatu sese?

Ina ia faasao le manatu sese o sa Sorama e uiga i le tapuai i le Atua, na sii mai e Alema ni mau na tusia e se perofeta e igoa ia Senosa. Sa aoao atu e Senosa tagata o Isaraelu i taimi o le Feagaiga Tuai, ae o ana valoaga o loo faamaumauina i le na o le Tusi a Mamona. Faitau le Alema 33:3, ma saili le upu na faaaoga e Alema e faamatala ai le tapuaiga.

Mafaufau e tusi le mataupu faavae lenei i au tusitusiga paia e latalata ia Alema 33:3 po o i lau api talaaga mo le suesueina o tusitusiga paia: E mafai ona tatou tapuai pea lava pea i le Atua e ala i le tatalo.

Faitau le Alema 33:4–11, ma faailoga tulaga taitasi sa tatalo ai Senosa. O le a le mea na faia e le Alii i taimi taitasi sa tatalo ai Senosa? Ina ia fesoasoani ia te oe e faatusatusa nei fuaiupu i lou olaga, tusi se laina e faafetaui ai tulaga sa tatalo ai Senosa i tulaga tali tutusa i lou lava olaga. (Filifili le tulaga e sili ona talafeaga ma lou olaga. E leai ni tali sao pe sese i lenei gaoioiga.)

Tulaga o Senosa	O Ou Tulaga
I le vao	I le galuega
E faatatau i ona fili	I le lotu
I lona fanua	Tatalo faaleaiga
I lona fale	Pe a e le iloa le mea e fai po ua e fefe
I lona afeafe	Pe a e lagona le tuuatoatasi
I faapotopotoga a le Alii	Tatalo faaletagata lava ia
Ina ua lafoaiina o ia i fafo ma inosia	I ou tulaga faigata uma lava
I ona puapuaga uma lava	Pe a i ai se faaletonu ia te oe ma au uo

Tali fesili nei i lau api talaaga mo le suesueina o tusitusiga paia: E faapefea e le tatalo i nei tulaga uma ona faamanuia ai lou olaga? Tusi se sini faaletagata lava ia pe faapefea ona faatele au tatalo e le aunoa.

Mafaufau e faailoga fasifuaitau i le Alema 33:4–5, 8–9 o loo taua ai le alofa mutimutivale o le Atua, ma manatunatu loloto pe faapefea e le tele o tatalo e le aunoa ona fesoasoani ia te oe e te lagona ai le alofa mutimutivale ma le alofa o le Atua. Ia vaavaai mo le mafuaaga ua mafaia ai e lenei mutimutivale a o e faaauau ona suesue i le Alema 33.

Alema 33:11–23

Ua aoao atu e Alema sa Sorama ia talitonu ia Iesu Keriso

Ata

O Le Faasatauroga

O se tasi o mafuaaga sa faigata ai i nisi o sa Sorama ona iloa pe faapefea ona tapuai i le Atua aua sa latou le iloa o lo latou faatuatua e tatau ona ia Iesu Keriso. Sa latou le malamalama pe talitonu i Lana matafaioi i le ata o le faaolataga (tagai Alema 33:14). Faitau le Alema 33:12–16, o loo faamatala ai e Alema aoaoga a Senosa ona faailoa atu lea o upu a Senoka, se isi perofeta o le Feagaiga Tuai. Vaavaai mo faamanuiaga na faailoa mai e Alema e oo mai ia i tatou ona o Iesu Keriso. Atonu e te manao e faailoga le fasifuaitau “ona o lou Alo” i taimi uma lava e faaali mai ai. Mai nei fuaiupu ua tatou aoao ai lenei upumoni: Ua tatou maua le alofa mutimutivale o le Tama Faalelagi, e aofia ai le faamagaloina o a tatou agasala, ona o le Togiola a Iesu Keriso. Manatunatu loloto i le alofa mutimutivale o le Tama Faalelagi na tuuina mai i ou luga, e aofia ai le tomai e salamo ma le faamagaloina ai au agasala, ona o le Togiola a le Faaola.

E le gata ina sa faamanatu atu ia sa Sorama ia aoaoga a Senosa ma Senoka, sa faamanatu atu foi e Alema ia i latou se taimi na aoao atu ai Mose e uiga i le Togiola a le Faaola. A o i ai Mose ma le fanauga a Isaraelu i le vao, sa utia tagata e gata uogo. Sa fetalai atu le Alii ia Mose e fai se gata mai apamemea, ma tuu i luga o se laau, ma faatonuina tagata o Isaraelu sa utia e vaai i ai. O le gata apamemea i luga o le laau o se “ituaiga” po o se faatusa o Iesu Keriso i luga o le satauro (tagai Alema 33:19).

Ata

O Mose ma le Gata Apamemea

Faitau le Alema 33:19–20, ma faailoa mai mea na tutupu i tagata o Isaraelu o e na filifili e vaai i le gata apamemea ina ua utia i latou ma le mea na tupu ia i latou na filifili e le vaai i ai.

Manatunatu loloto i tali o nei fesili: O le a se mea ua aoao mai ia i tatou e le tala i tagata o Isaraelu ma le gata apamemea i mea e ao ona tatou faia ina ia faamaloloina ai faaleagaga? O a mea e mafai ona e faia e vaai ai i le Faaola ina ia mafai ona Ia fesoasoani ia te oe faaleagaga?

Tali fesili nei i lau api talaaga mo le suesueina o tusitusiga paia: O a nisi o auala patino e mafai ai ona e vaai ia Iesu Keriso i aso uma o lou olaga?

Faitau le Alema 33:22–23, ma faailoga mea e ao ona tatou talitonu ai ia Iesu Keriso ina ia mafai ona faaaoga le faatuatua ia te Ia.

Alema 34:1–14

Sa aoao e Amoleka ia sa Sorama e uiga i le Togiola a Iesu Keriso

O le molimau a Amoleka i sa Sorama, e pei ona faamaumauina i le Alema 34, ua maua ai se molimau lona lua i le molimau a Alema ia Iesu Keriso. Faitau se vaega o le molimau a Amoleka, o loo maua i le Alema 34:8–9, ma mafaufau e faailoga mea na aoao atu e Amoleka e tusa ai ma le manaomia o le Togiola o Iesu Keriso. Manatunatu loloto i lenei fesili: Pe mata e faapefea lou olaga pe ana faapea e le afio mai Iesu Keriso ma faataunuuina Lana matafaioi faapitoa?

Faitau le Alema 34:10–14, ma faailoa mai fasifuaitau o loo maua ai upu e le gata ma le faavavau. Tusi le upumoni lenei i au tusitusiga paia po o lau api talaaga mo le suesueina o tusitusiga paia: O le Togiola e le gata ma faavavau a Iesu Keriso ua maua ai le faaolataga mo tagata uma.

Ina ia fesoasoani ia i tatou ia malamalama i le ala e le gata ai ma faavavau ai le Togiola, Na aoao mai Bishop Richard C. Edgley o le Epikopo Pulefamalumalu: “I le tautalagia o le Faaolataga a Keriso, ou te fiafia i le faamatalaina e le lomifefiloi o le upu le gata ma le faavavau aua ou te talitonu o loo faamatalaina mai ai le uiga moni o le Atua. L gata: ‘E leai ni ona tuaoi po o se gataaga.’ A o le uiga o le faavavau: ‘O le leai o se amataga po o se faaiuga’ (The American Heritage Dictionary of the English Language, 4th ed. [2000], “infinite,” “eternal,” 898, 611)” (“Ma Avea Mou Lelei,” Liahona, Iulai 2002, 73).

Tali le fesili lenei, i lau api talaaga mo le suesueina o tusitusiga paia:
1. O a ni auala e mafai ai e le Togiola a Iesu Keriso ona le gata ma faavavau?
2. E faapefea e le iloa o le Togiola e le gata ma faavavau ona faatupulaia lou agaga faafetai mo le Faaola? E faapefea ona faatupulaia ai lou faatuatua ia te Ia?

Alema 34:15–41

Ua aoao Amoleka i le ala e maua ai faamanuiaga o le Togiola

Faitau le Alema 34:15–17 ma vaavaai mea sa aoao atu e Amoleka ia sa Sorama e tatau ona latou faia ina ia maua ai faamanuiaga e finagalo le Faaola e tuuina mai ia i tatou e ala i le Togiola. Tusi le upumoni lenei i lau tusitusiga paia po o le api talaaga mo le suesueina o tusitusiga paia: : Ina ia mafai ona maua le atoatoa o faamanuiaga o le Togiola, e ao ona faaaoga lo tatou faatuatua i le salamo.

Faitau le saunoaga lenei mai a Peresitene Dieter F. Uchtdorf o le Au Peresitene Sili:

“Tatou te manaomia se faatuatua malosi ia Keriso ina ia mafai ai ona salamo. … Afai tatou te talitonu e silafia e le Atua mea uma, e alofa, ma e alofa mutimutivale, o le a mafai ona tatou tuu atu lo tatou faatuatuaga ia te Ia mo lo tatou faaolataga e aunoa ma le fefo’ifo’ia’i. O le faatuatua ia Keriso o le a suia ai o tatou mafaufauga, talitonuga, ma amioga ia e le tusa ai ma le finagalo o le Atua.

“O le salamo moni e toe aumaia ai i tatou e faia le mea sa’o. … O le salamo o lona uiga o se suia lea o le mafaufau ma le loto—tatou te tuu le faia o mea sese, ma amata ona faia mea e sa’o. E aumaia ai ia i tatou se uiga faaalia fou i le Atua, o le tagata lava ia, ma le olaga lautele” (“Vaega Tonu o le Toe Foi Saogalemu,” Ensign po o le Liahona, Me 2007, 100).

Tali fesili lenei i lau api talaaga mo le suesueina o tusitusiga paia: E faapefea ona tatou faaaoga le faatuatua ia Iesu Keriso pe a tatou salamo?

Faitau le Alema 34:17–27, ma vaavaai mo mea na aoao atu e Amoleka i taimi e ao ona tatou tatalo ai ma mea e tatou te tatalo ai. E faapefea ona e manatu e fesoasoani lenei fautuaga ia sa Sorama, o e na manatu e mafai ona na o le tasi le taimi e tapuai ai i se vaiaso? Filifili se fuaiupu se tasi e te manatu e fesoasoani patino ia te oe. Mafaufau i le ala e mafai ai ona e mulimuli i le fautuaga e uiga i le tatalo i lenei fuaiupu i le aluga o le vaiaso a sau.

Na aoao mai Amoleka e ao ona tatou naunau e talia faamanuiaga o le Togiola a le Faaola e ala i le salamo i a tatou agasala i le taimi nei, nai lo le faatali sei salamo i se taimi mulimuli. Faitau le Alema 34:30–35, ma vase lalo o upu po o fasifuaitau e faailoa ai pe aisea e le tatau ai ona faatuai lo tatou salamo. I le fuaiupu 31, vaavaai mo faamanuiaga na fai mai Amoleka o le a oo mai ia i latou o e filifili e salamo nei. Iloilo ma le faaeteete fuaiupu 32, ona mafaufau lea: E faapefea ona faaaafia e lenei fuaiupu le ala ou te ola ai i aso taitasi?

Iloilo le Alema 34:33, ma mafaufau i le saunoaga a Peresitene Iosefa Filitia Samita: “O le faimeatu’u pe a faatatau i mataupu o le talalelei, o le gaoi lea o le ola e faavavau, o le ola lea i le afioaga o le Tama ma le Alo. O loo i ai le toatele o i tatou, e oo lava i uso o le Ekalesia, o e o loo lagona e le tatau ona faavavevave i le tausia o mataupu o le talalelei ma le tausia o poloaiga” (in Conference Report, Aokuso 1969, 58).

Alema 35

O sa Sorama ua salamo o loo aumau faatasi ma e amiotonu

E toatele sa Sorama na faalogo i apoapoaiga a Amoleka ina ia le faatuai lo latou salamo, ma sa latou salamo ma suia o latou olaga. O e na pulea sa Sorama na lafoaiina i latou mai o latou eleele, ma o nei tagata na o mai i fanua o Seasona, ma sa talia i latou e tagata o Amona— na igoa foi ia Aneti-Nifae-Liae (tagai Alema 35:6–7). O sa Sorama ma sa Lamana amioleaga na feita ina ua talia e tagata o Amona sa Sorama na salamo, ma ua amata ona latou faia sauniuniga mo le taua e faasagatau atu ia sa Nifae (tagai Alema 35:8–11).

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Alema 33–35 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: