Folasaga i le 1 Nifae
Aisea e Suesue ai Lenei Tusi?
Ao e suesueina le 1 Nifae, o le a e iloaina “o le alofa mutimutivale agamalu o le Alii i luga o i latou uma o e ua ia flifilia, ona o lo latou faatuatua, e faamalolosi tele ai i latou” (1 Nifae 1:20). Mo se faataitaiga, o le a e vaai i le ala na fesoasoani ai le Atua ia Nifae e maua papatusi apamemea ina ia maua e lona aiga tusitusiga paia, ma le ala na faasaoina ai e le Atua Nifae mai lamatiaga faaletino i lona ola, ma le ala na faasaoina ai e le Atua Liae ma ona tagata mai le fiaaai i le vao ma le faafanoga i le moana, le laveaiina o i latou saogalemu i le nuu folafolaina.
Na maua e Liae ma ona tagata le alofa mutimutivale ma le fesoasoani a le Atua ao latou tausia poloaiga. Na sailia e Liae ma Nifae le taitaiga mai le Atua ma mauaina i tusitusiga paia, miti, faaaliga, ma le Liahona. Na maua e Nifae ma faamaumauina se faaaliga o le talafaasolopito o le lalolagi na faaalia ia te ia le silisiliese o le mana o le Atua. E ala mai faaaliga, na vaai Nifae i le papatisoga, galuega talai, ma le faasatauroina o Iesu Keriso i le lumanai.
Ao e suesueina aafiaga o Nifae ma Liae i lenei tusi, e mafai ona e aoao e saili ma maua faamanuiaga o le lagi i lou olaga.
O Ai na Tusia Lenei Tusi?
O le atalii o Liae o Nifae na tusia lenei tusi e tusa ai ma le poloaiga a le Alii na te tausia se talafaamaumau a lona nuu. Na fanau Nifae i se mea o totonu po o le latalata lava i Ierusalema. Na soifua o ia iina i le taimi o le galuega a le perofeta o Ieremia ma le nofoaiga a le Tupu o Setekaia.
Na sailia e Nifae lana lava molimau e uiga i upu a lona tama i le faatafunaga o Ierusalema ma le manaomia ona malaga ese lona aiga. Ao ia faaauau le sailia ma mulimuli i fautuaga a le Alii, na avea Nifae ma meafaigaluega i aao o le Atua. Na ia toe foi atu faalua ma le usiusitai i Ierusalema ma ona uso—muamua ina ia maua mai papatusi apamemea ma mulimuli ane ina ia faatauanau le aiga o Isamaeli e faatasi ma le aiga o Liae i le vao. Faatasi ai ma le fesoasoani a le Alii, na fausia e Nifae le vaa na aveina atu ai lona aiga ma isi i luga o le sami i le nuu folafolaina. Ina ua maliu Liae, na avea Nifae ma taitai i lona nuu.
O Anafea ma o Fea na Tusia ai?
Na tusia e Nifae le tala ua avea ma 1 Nifae e latalata lava i le 570 T.L.M.—30 tausaga talu ona tuua e ia ma lona aiga Ierusalema (tagai i le 2 Nifae 5:28–31). Na ia tusia ao i ai o ia i le laueleele o Nifae.