1 Nifae 8

Folasaga

I le 1 Nifae 8 ua tatou faitau e uiga i le faaaliga a Liae i le laau o le ola. Na ia lagonaina le olioli tele ao ia ai i le fua o le laau, e faatusaina i faamanuiaga o le Togiola. Ona ia vaai lea i vaega eseese o tagata o e na eseese uiga faaalia i le laau ma ona fua. Ina ia fesoasoani i lau tapenaga mo lenei lesona, atonu e te manao e usu pe faitauina foi ia upu o le pese “The Iron Rod” (Viiga, nu. 274). Ao e suesueina lenei mataupu, mafaufau loloto i le ala ua aumaia ai e le Togiola ia te oe le olioli tele ma le mea ua tatau ona e faia nei ma le lumanai e maua ai ona faamanuiaga uma lava. Mafaufau i faafitauli e te ono manaomia ona faatoilalo e maua ai nei faamanuiaga.

1 Nifae 8:1–18

Ua ai Liae i le fua o le laau o le ola ma valaaulia lona aiga ia latou aai foi

Mafaufau i se taimi i lou olaga na e lagona ai le alofa o le Alii mo oe lava ia. Mafaufau pe faapefea e filifiliga e te faia ona aafia ai lou latalata atu i le Alii ma lou mafaia ona lagona Lona alofa. Ao e suesue i le 1 Nifae 8, vaavaai mo le mea o loo ia aoaoina oe e fai ma le mea e tatau ona e aloese ai ina ia e latalata atili i le Alii ma lagona le malosi sili atu o Lona alofa i lou olaga.

Faitau 1 Nifae 8:2, ma faailoa le aafiaga o Liae ao i ai i le vao. Faitau le 1 Nifae 8:5–12, vaai po o le a le ata autu po o le faamoemoega tupito o le miti a Liae.

Ata

O Le Miti a Liae i le Laau o le Ola

A uma ona faailoa le ata autu, lisi nisi o upu ma fuaitau na faaaoga e Liae e faamatala ai le fua i le 1 Nifae 8:10–11.

E masani ona faaaoga e le Alii mea tatou te masani ai o ni faatusa e fesoasoani ia i tatou e malamalama ai i upu moni faavavau. Ina ia fesoasoani ia te oe e faailoa le faatusa o le laau o le ola i le miti a Liae, faitau le fuaitau lenei mai ia Elder Neal A. Maxwell o le Korama a Aposetolo e Toasefululua: “O le laau o le ola … o le alofa lea o le Atua (tagai 1 Ni. 11:25). O le alofa o le Atua mo Lana fanau na aupito faaalia i Lana meaalofa o Iesu e fai ma o tatou Togiola: ‘Aua ua faapea lava ona alofa mai o le Atua i le lalolagi, ua ia aumai mai ai lona Atalii e Toatasi (Ioane 3:16). O le taliaina o le alofa o le Atua o le taliaina lea o le Togiola a Iesu ma le saolotoga [saoloto mai le pologa po o le agasala] ma le olioli e maua mai ai ” (“O Lesona mai ia Lamana ma Lemuelu,” Liahona, Ian. 2000, 7).

Ina ia fesoasoani ia te oe e iloa se mataupu faavae o faaalia i le 1 Nifae 8:10–12, vase lalo i au mau po o le a le mea na fai e Liae i le fua i le 1 Nifae 8:11, ma vase lalo o taunuuga i le 1 Nifae 8:12. Mafaufau i ala e mafai ai ona e “ai” i le Togiola e pei ona “ai” Liae i le fua.

Ua faaalia i le aafiaga o Liae o le o mai ia Iesu Keriso ma aai i Lana Togiola e aumaia ai le fiafia ma le olioli.

Tali le fesili lenei, i lau api o talaaga mo le suesueina o tusitusiga paia: O anafea na aumaia ai e le Togiola a le Faaola le fiafia ma le olioli i lou olaga?

Mafaufau loloto pe aisea e tatau ai ona tatou mananao, e pei o Liae ina ia iloa e o tatou aiga ma uo ia faamanuiaga o le Togiola pe a uma ona tatou oo i ai. Faitau 1 Nifae 8:3–4, 13–18, ma vaai po o a uiga faaalia o tagata o le aiga o Liae i le valaaulia a Liae e aai i le fua o le laau o le ola.

E le mafai ona tatou faia se faaiuga pe o le a filifili isi e aai i le alofa o le Atua. Ae ui i lea, e pei o Liae, e mafai ona tatou valaaulia ma faamalolosia i latou. Mafaufau pe faapefea ona e valaaulia ma faamalosia se tasi e te iloaina e sau ia Keriso ma maua faamanuiaga o Lana Togiola.

1 Nifae 8:19–35

Ua vaai Liae i le manuia o nisi ma le toilalo o isi ao latou agai atu i le laau o le ola ma aai i le fua.

Mulimuli ane i le 1 Nifae o le a e faitau ai e uiga i le ala na faaalia ai foi ia Nifae le faaaliga o le laau o le ola. Na ia faamaumauina uiga o faatusa eseese ma ata i le faaaliga. Faaaoga le kata lenei e faailoa ai faatusa ma o latou faaliliuga. Suesue au tusitusiga paia e faauma ai le galuega fai lenei. Ua uma ona e suesueina ma aoaoina le faaliliuga o faatusa muamua e lua.

Faatusa mai le Miti a Liae	O Le Faaliliuga o le Faatusa na Tuuina atu ia Nifae
O le laau (tagai 1 Nifae 8:10; ua taua o le laau o le ola i le 1 Nifae 15:22)	O le alofa o le Atua (tagai 1 Nifae 11:25)
O le fua o le laau (tagai 1 Nifae 8:10–12)	O le meaalofa sili i meaalofa uma a le Atua—faamanuiaga o le Togiola a Iesu Keriso (tagai 1 Nifae 15:36)
Le vaitafe o vai (eleelea) (tagai 1 Nifae 8:13)	(Tagai 1 Nifae 12:16): 15:27)
O le ai uamea (tagai 1 Nifae 8:19)	(Tagai 1 Nifae 11:25): 15:23–24)
Le puao pogisa (tagai 1 Nifae 8:23)	(Tagai 1 Nifae 12:17)
Le fale tele ma le ateatea (tagai 1 Nifae 8:26)	(Tagai 1 Nifae 11:36): 12:18)

Atonu e fesoasoani le faailogaina o au mau e ala i le tusiaina o le faaliliuga o faatusa taitasi (tali i le koluma lona lua o le kata i luga) e sosoo ma le fuaiupu po o fuaiupu o loo ta’ua ai le faatusa (fuaiupu i le koluma muamua o le kata).

A o e faitauina le upusii lenei mai ia Peresitene Boyd K. Packer o le Korama a Aposetolo e Toasefululua, vase lalo o le mea na ia saunoa ai pe aisea e taua ai mo i tatou le suesue i le miti a Liae:

“Atonu e te manatu e leai se uiga faapitoa ia te oe o le miti po o le faaaliga a Liae, ae e i ai.O loo e i ai i totonu; o loo tatou i ai uma lava i totonu. …

“O le miti a Liae po o le faaaliga i le ai uamea o loo i ai mea uma e manaomia e se Au Paia o Aso e Gata Ai e malamalama ai i le suega o le olaga” (“Finding Ourselves in Lehi’s Dream,” Ensign, Aug. 2010, 22).

A o e suesueina le vaega o totoe o le 1 Nifae 8, mafaufau pe faapefea ona fesoasoani mea ua e aoaoina e te “malamalama ai i le suega o le olaga.” Faitau 1 Nifae 8:21–33 vaai pe faapefea ona taofia e le vaitafe, puao pogisa, ma le fale tele ma le ateatea tagata i le miti a Liae mai le aai ma olioli i le fua o le laau. Atonu e te mafaufau e faailoga i au mau upu autu ma fuaitau e faatatau i nei faafitauli ma lo latou ogaoga i tagata.

Mata o a ni faafitauli na vaai ai Liae o loo i o tatou olaga i le taimi nei? Vase lalo o soo se faafitauli lava ua e vaaia ua taofia ai se tasi mai le sau i le Faaola ma lagona ai le olioli: ponokalafi, sailia o le taliaina po o le viiga mai isi, mausa, manatu faapito, manaolasi, lotoleaga i isi, e le tatalo ma e le suesue i tusitusiga paia, faaaogaina ma le le tatau o faafiafiaga i masini, auai ma le le tatau i soo se gaoioiga po o se taaloga, le faamaoni, ma le mulimuli i mea o loo fai e tagata uma. Mafaufau i nisi faataitaiga faaonapo nei o nei faafitauli.

O le mataupu faavae lenei o se tasi lea o auala o le otootoina o mea e mafai ona e aoaoina mai le suesueina o faafitauli i le 1 Nifae 8:21–33: Faamaualuga, faalelalolagi, ma le gauai atu i faaosoosoga e mafai ona taofia oe mai le mauaina o faamanuiaga o le Togiola.

Tusi le otootoga o loo i luga i lau api talaaga mo le suesueina o tusitusiga paia, ma ou lagona i lona moni ma auala e mafai ona faaaogaina ai i lou olaga.

Mafaufau loloto i le ala e ono taofia pe faatelegese ai lou alualu i luma faaleagaga e mea eleelea o le lalolagi, faaosoosoga a Satani, ma le faamaualuga o le lalolagi.

Toe suesue 1 Nifae 8:21–33. O le taimi lenei, vaavaai mo tali i fesili nei:

Na faapefea ona manaomia le ai uamea (le afioga a le Atua—lena e aofia ai tusitusiga paia, upu musuia a perofeta ma isi taitai o le Ekalesia, ma faaaliga patino) ia i latou na aai fiafia i le fua?
O le a le fuaitau i le 1 Nifae 8:30 o loo faamatala mai ai le mea e tatau ona tatou faia ina ia mafai e le afioga a le Atua ona taitaia saogalemu i tatou i le laau o le ola?

Tusi i lau api talaaga mo le suesueina o tusitusiga paia pe faapefea e le afioga a le Atua ona taitaia ma puipuia saogalemu i tatou mai faaosoosoga.

Ua aoao mai e nei fuaiupu ia mataupu faavae nei o le talalelei: Afai tatou te piimau i le afioga a le Atua, o le a fesoasoani ia i tatou e faatoilalo faaosoosoga ma faatosinaga faalelalolagi. O le piimau i le afioga a le Atua e fesoasoani ia i tatou e latalata atili atu ai i le Alii ma maua faamanuiaga o le Togiola.

Ina ia fesoasoani ia te oe e iloa le faamaoniga o nei mataupu faavae i lou olaga, tali se tasi po o fesili uma nei i lau api talaaga mo le suesueina o tusitusiga paia:
1. O anafea na taiala ai oe ma puipuia saogalemu mai faaosoosoga, faamaualuga, po o le faalelalolagi e le afioga a le Atua?
2. O anafea na fesoasoani ai le afioga a le Atua ia te oe ia latalata atili i le Faaola?

Na uunaia e Liae lona aiga “ma lagona uma o se matua alofa, ia latou faalogologo mai i ana upu” (1 Nifae 8:37). Na manao o ia ia latou maua le olioli ma faamanuiaga o le Togiola a Iesu Keriso e pei ona ia maua.

Tusi i lau api talaaga mo le suesueina o tusitusiga paia, se sini mo le faaleleia o lau suesuega i afioga a le Atua.

A o e mulimuli ma piimau i afioga a le Atua, e mafai ona e manumalo i faafitauli na semanu e taofia oe mai le taliaina o le Togiola ma le mauaina o le olioli moni.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina 1 Nifae 8 ma faamaeaina lenei lesona i le (aso).

Fesili, mafaufauga, ma manatu faaopoopo ou te fia faasoa i lou faiaoga: