1 Ma sa oo ina matou faaputuputu faatasi ituaiga uma o fatu eseese, o saito o ituaiga eseese, ma fatu foi o laau ’aina o ituaiga uma.

2 Ma sa oo ina a’o nofo lo’u tamā i le vao, sa tautala mai o ia ia te i matou, e faapea: Faauta, sa ou ^amiti se miti; pe, i ni isi upu, sa ou vaai i se ^efaaaliga.

3 Ma faauta, ona o le mea sa ou vaai i ai, ua ia te a’u se mafuaaga ou te olioli ai i le Alii ona o ^aNifae ma Sama foi; ona ua ia te a’u se mafuaaga ua ou manatu ai o i laua, ma le toatele o a laua fanau, o le a faaolaina.

4 Ae faauta, ^aLamana ma Lemuelu, ua ou fefe tele ona o oulua; aua faauta, ua ou manatua sa ou vaaia i la’u miti, se vao pouliuli ma le pagatia.

5 Ma sa oo ina ou vaai i se tagata, ma sa ofu o ia i se ^aofu talaloa pa’epa’e; ma sa afio mai o ia ma tu i o’u luma.

6 Ma sa oo ina fetalai mai o ia ia te a’u, ma finagalo ou te mulimuli atu ia te ia.

7 Ma sa oo ina a’o ou mulimuli atu ia te ia sa ou vaai ia te au lava ua ou i ai i totonu o se laolao pogisa ma pagatia.

8 Ma ina ua uma ona ou malaga i ni itula e tele i le pogisa, sa amata ona ou tatalo atu i le Alii ia ^aalofa mutimutivale mai ia te a’u, e tusa ma le tele o lona alofa mutimutivale agamalu.

9 Ma sa oo ina ua uma ona ou tatalo atu i le Alii, sa ou vaaia se ^afanua tele ma le laolao.

10 Ma sa oo ina ou vaaia se ^alaau, o ona ^efua sa manaomia lava e maua ai e le tagata le fiafia.

11 Ma sa oo ina ou alu atu ma ’ai i lona ^afua; ma sa ou iloa ua sili ona suamalie, nai lo o mea uma sa ou tofo muamua i ai. Ioe, ma sa ou vaai o le fua o le laau ua pa’epa’e, ua sili atu nai lo ^emea papa’e uma ua ou vaai i ai.

12 Ma a’o ou ’ai le fua o le laau, sa faatumulia lo’u agaga i le ^aolioli tele; o le mea lea, sa amata ai ona ou ^emanao ia aai ai foi lo’u aiga; ona ua ou iloa ua sili atu ona ⁱmanaomia nai lo isi fua uma.

13 Ma a’o ou vaavaai solo faataamilo, pe atonu e mafai ona ou iloa atu foi lo’u aiga, sa ou vaaia se ^avaitafe; ma sa tafe ane, ma sa latalata i le laau lea sa ou ’aia lona fua.

14 Ma sa ou tilotilo e vaai atu po o fea e tafe mai ai; ma sa ou vaai i lona mata sa mamao teisi atu; ma i lona mata sa ou vaaia ai lo outou tinā, o Sarai, ma Sama, ma Nifae; ma sa latou tutu mai e peiseai sa latou lē iloa le mea e tatau ona latou o i ai.

15 Ma sa oo ina ou talo atu ia te i latou; ma sa ou fai atu foi ia te i latou ma se leo tele ia latou o mai ia te a’u, ma aai i le fua, ua sili ona manaomia nai lo isi fua uma lava.

16 Ma sa oo ina latou o mai ia te a’u ma aai foi i le fua.

17 Ma sa oo ina ou manao ia Lamana ma Lemuelu ia o mai ma aai foi i le fua; o le mea lea, na taulai atu lau vaai i le mata o le vai, atonu pe mafai ona ou iloa atu i laua.

18 Ma sa oo ina ou vaai atu ia te i laua, peitai sa laua ^alē fia o mai ia te a’u ma aai i le fua.

19 Ma sa ou vaai i se ^aāi u’amea, ma sa faaauau faasolo ane i le auvai o le vaitafe, ma sa tau mai i le laau lea sa ou tu ai i ona tafatafa.

20 Ma sa ou vaai foi i se ^aala lauitiiti ma le vaapiapi, sa sau mai autafa o le āi u’amea, e oo mai lava i le laau lea sa ou tu ai i ona tafatafa; ma sa alu atu foi i tafatafa o le mata o le vaipuna, i se ^efanua tele ma le laolao, e peiseai o se lalolagi.

21 Ma sa ou vaai i motu o tagata e lē masino, o le toatele o i latou sa fetaomi mai i luma, ina ia latou maua le ^aala e tau mai i le laau lea sa ou tu ai i ona tafatafa.

22 Ma sa oo ina latou o mai i luma ma amata ona savavali i le ala e tau mai i le laau.

23 Ma sa oo ina alu a’e se ^apuao o le pogisa; ioe, o se puao tele lava o le pogisa, sa oo ina lē iloa ai e i latou o e na amata ona savavali i le ala, lo latou ala, ma latou fesesea’i ai, ma sa leiloloa.

24 Ma sa oo ina ou vaai i isi o fetaomi mai i luma, ma sa latou o mai ma fepiiti i le pito o le āi u’amea; ma sa latou fetaomi mai i luma e ala mai i le puao o le pogisa, ma fepiiti i le āi u’amea, seia oo lava ina latou oo mai ma aai i le ^afua o le laau.

25 Ma ina ua uma ona latou aai i le fua o le laau sa autilo solo o latou mata e peiseai ua latou ^amaasiasi.

26 Ma sa autilo solo foi o’u mata, ma ou iloa ai, i le isi itu o le vaitafe, se ^afale tele ma le laolao; ma sa tu mai e peiseai ua tu i le ea, maualuga i luga a’e o le eleele.

27 Ma sa tumu i tagata, o e matutua ma e laiti, o tane atoa ma fafine; ma o o latou ituaiga ofu sa matua matagofie lava; ma sa peiseai o latou ^afaatauemu ma tusitusi mai o latou tamatamailima i e na o mai ma aai i le fua.

28 Ma ina ua uma ona latou ^atofo i le fua sa latou ^emaasiasi, ona o i latou o e sa faatauemu mai ia te i latou; ma sa latou ⁱpa’u’ū ese atu ai i ala faasaina ma ua leiloloa.

29 Ma o lenei, o a’u o Nifae, ou te le tautala atu ^aupu uma a lo’u tamā.

30 Ae, ina ia tusia faapuupuu, faauta, sa vaai o ia i isi motu o tagata o fetaomi mai i luma; ma sa latou o mai ma pipiimau i le pito o le ^aāi u’amea; ma sa latou fetaomi mai i luma i lo latou ala, ma pipiimau pea i le āi u’amea, seia oo ina latou o mai i luma ma faapa’u’ū i lalo ma aai i le fua o le laau.

31 Ma sa vaai foi o ia i isi ^amotu o tagata o tautagotago atu lo latou ala agai i le fale tele ma le laolao.

32 Ma sa oo ina malelemo le toatele i mea loloto o le ^apunavai; ma e toatele sa lē iloa atu i lana vaai, ua feseseta’i i ala ese.

33 Ma sa toatele le motu o tagata sa ulufale atu i totonu o lena fale uiga ese. Ma ina ua uma ona latou ulufale atu i totonu o lena fale sa latou tusitusi mai le tamatamailima o le ^afaatauemu ia te a’u ma i latou foi o e na aai i le fua o le laau; peitai sa matou lē amanaiaina i latou.

34 O upu nei a lo’u tamā: E tusa o le toatele lava na ^aamanaiaina i latou, na pa’u’ū ese.

35 Ma o ^aLamana ma Lemuelu, sa lei aai i le fua, sa fai mai ai lo’u tamā.

36 Ma sa oo ina ua uma ona tauina mai e lo’u tamā upu uma o lana miti po o le faaaliga vaaia, ma e sa tele naua, sa fai mai o ia ia te i matou, ona o nei mea sa vaai i ai o ia i se faaaliga vaaia, sa popole tele ai o ia e uiga ia Lamana ma Lemuelu; ioe, sa popole o ia ne’i lafoai ese i laua mai luma o le Alii.

37 Ma sa apoapoai atu o ia ia te i laua i le taimi lena ma lagona uma o se ^amatua alofa, ia laua faalogo mai i ana upu, atonu e alofa mutimutivale ai le Alii ia te i laua, ma lē lafoai ese ai i laua; ioe, sa lauga atu lo’u tamā ia te i laua.

38 Ma ina ua uma ona lauga atu o ia ia te i laua, ma vavalo atu foi ia te i laua i mea e tele, sa ia poloaiina i laua ia tausi i poloaiga a le Alii; ma sa faai’u e ia le tautala atu ia te i laua.