1 O upu a Iakopo, le uso o Nifae, sa tautala atu e ia i le nuu o Nifae:

2 Faauta, o’u uso pele e, o a’u, o Iakopo, ona ua valaauina a’u e le Atua, ma ua faauuina e tusa ma lana faatulagaga paia, ma ona ua faapaiaina a’u e lo’u uso o Nifae, o lē ua outou vaai i ai o se ^atupu po o se ua leoleo ia te outou, o lē ua outou faalagolago i ai mo le saogalemu, faauta, ua outou iloa ua ou tautala atu ia te outou i mea ua sili atu ona tele.

3 Ae ui i lea, ou te toe tautala atu ia te outou; ona ua ou naunau mo le manuia o o outou agaga. Ioe, ua tele lava lo’u popole mo outou; ma ua outou iloa ua ou faapea lava i taimi uma. Ona sa ou apoapoaia outou ma le filiga atoa; ma sa ou aoao atu ia te outou upu a lo’u tamā; ma sa ou tautala atu ia te outou e uiga i mea uma ua tusia, mai le foafoaga o le lalolagi.

4 Ma o lenei, faauta, o le a ou tautala atu ia te outou e uiga i mea o i ai nei, ma mea o le a oo mai; o le mea lea, o le a ou faitau atu ai ia te outou upu a ^aIsaia. Ma o upu ia ua manao lo’u uso ou te tautala atu ai ia te outou. Ma ou te tautala atu ia te outou mo lo outou lelei, ina ia outou iloa ma viia le suafa o lo outou Atua.

5 Ma o lenei, o upu o le a ou faitau atu o upu ia na fetalai i ai Isaia e uiga i le aiga uma o Isaraelu; o le mea lea, e mafai ona faatatauina ia upu ia te outou, ona o outou o e o le aiga o Isaraelu. Ma e tele mea na tautalagia e Isaia e mafai ona faatatau ia te outou, ona o outou o e o le aiga o Isaraelu.

6 Ma o lenei, o upu nei: ^aUa faapea ona fetalai mai o le Alii le Atua: Faauta, o le a ou sii atu lo’u lima i Nuuese, ma faatu la’u ^etagavai i le nuu; ma o le a latou aumai ou atalii i o latou lima, ma o ou afafine o le a latou tauaveina i luga o o latou tau’au.

7 Ma o le a avea tupu ma ou tamā tausitama, ma o latou masiofo ma ou tinā faafailele; o le a latou ifo ia te oe ma o latou mata e faasaga i le eleele, ma etoeto ese le efuefu o ou vae; ma o le a e iloa o A’u o le Alii; ona o le a lē maasiasi i latou o e e ^afaatalitali ia te a’u.

8 Ma o lenei, o a’u, o Iakopo, ou te fia tautala lava e uiga i nei upu. Aua faauta, ua faaali mai e le Alii ia te a’u e faapea o i latou o e sa i ^aIerusalema, le mea na tatou o mai ai, ua fasiotia ma ua ^eave faatagataotaua.

9 Ae ui i lea, ua faaali mai e le Alii ia te a’u o le a latou ^atoe foi mai. Ma sa faaali mai foi e ia ia te a’u e faapea o le a faaali mai e le Alii le Atua, le Paia e Toatasi o Isaraelu, o ia lava ia te i latou, i la le tino; ma a mavae ona ia faaali mai o ia lava o le a latou sasa ia te ia ma ^efaasatauro o ia, e tusa ma upu a le agelu o lē na fetalai mai ia mea ia te a’u.

10 Ma a mavae ona latou faamaaa o latou loto ma faamalōlō o latou ūa e faasaga i le Paia e Toatasi o Isaraelu, faauta, o le a oo mai i luga o i latou ^afaamasinoga a le Paia e Toatasi o Isaraelu. Ma e oo mai le aso o le a taia ma faapuapuagatia ai i latou.

11 O le mea lea, pe a uma ona fetulina’i o i latou i lea mea ma lea mea, ona sa faapea ona fetalai mai ai o le agelu, e toatele o le a puapuagatia i la le tino, ma o le a lē tuua ia fano, ona o talosaga a e faamaoni; o le a faataapeapeina i latou, ma taia, ma inosia; ae ui i lea, o le a alofa mutimutivale le Alii ia te i latou, pe a ^aoo ina latou o mai i le ^emalamalama o lo latou Togiola, o le a toe ⁱfaapotopoto faatasi i latou i laueleele o o latou tofi.

12 Ma amuia lava ^aNuuese, i latou ia o e ua tusi i ai le perofeta; aua faauta, afai latou te salamo ma lē faasagatau ia Siona, ma lē aufaatasi i latou lava ma lena ekalesia tele ma le ^e’inosia, o le a faaolaina i latou; ona o le a faataunuu e le Alii le Atua ana ⁱfeagaiga na faia e ia i ana fanau; ma o le pogai lenei na tusia ai e le perofeta ia mea.

13 O le mea lea, o i latou o e e tau faasaga ia Siona ma tagata o le feagaiga a le Alii, o le a latou etoeto ese le efuefu o o latou vae; ma o le a lē ^amaasiasi tagata o le Alii. Ona o tagata o le Alii o i latou ia o e e ^efaatalitali ia te ia; ona ua latou faatalitali pea mo le afio mai o le Mesia.

14 Ma faauta, e tusa ai ma upu a le perofeta, o le a toe faatulaga e le Mesia o ia lava i le ^ataimi lona lua e toe aumaia i latou; o le mea lea, o le a ia ^efaaali mai ai o ia lava ia te i latou i le mana ma le mamalu tele, seia ⁱfaaumatiaina o latou fili, pe a oo mai lena aso o le a latou talitonu ai ia te ia; ma e leai se tasi e talitonu ia te ia o le a faaumatiaina e ia.

15 Ma o i latou o e e lē talitonu ia te ia o le a ^afaaumatiaina, i le ^eafi, ma afā, ma mafuie, ma le faamaligi toto, ma ⁱfaamai, ma le oge. Ma o le a latou iloa o le Alii o le Atua lea, o le Paia e Toatasi o Isaraelu.

16 ^aOna pe aveesea ea le vete mai lē ua malosi, pe faasaolotoina ^elē ua faatagataotauaina faaletulafono?

17 Peitai ua faapea ona fetalai mai o le Alii: E oo i le ^afaatagataotauaina o lē ua malosi o le a aveesea, ma o le a laveaiina le vete a lē ua matautia; ona o le a ^elaveaiina e le ⁱAtua Malosi Silisili ona tagata o le feagaiga. Ona ua faapea ona fetalai mai o le Alii: O le a Ou finau ma i latou o e e finau ma oe—

18 Ma o le a Ou fafaga i latou o e e faasauā ia te oe, i o latou lava tino; ma o le a latou onanā i o latou lava toto e faapei o le uaina suamalie; ma o le a iloa e tagata uma o A’u o le Alii o lou Faaola ma lou ^aTogiola, o le ^eMalosi Silisili e Toatasi o Iakopo.