Sa valoia e Nifae nisi o tulaga luitauina o aso e gata ai, e aofia ai aoaoga sese ma le faamaualuluga o lotu sese o le a faapea ona atinae ae. Sa ia aoao mai auala e iloa ai aoaoga faavae sese ma uiga faalelalolagi ma iloa auala o le a taumafai Satani e faasese ai alii ma tamaitai mai se olaga amiotonu.
Ua faamatala mai e Nifae lotu pepelo ma manatu sese o o tatou aso
I le tele o aganuu e i ai faailo i alatele e lapatai ai tagata feoai pe a i ai se tulaga lamatia i luma atu o le auala po o le ala. I le atunuu ma le aai o loo e nofo ai, o a siepi ma lanu o faailo i alatele e latapai ai avetaavale i se tulaga lamatia o loo taatia i luma atu? Ma le isi, e masani ona faailoga ia vailaau oona ma isi mea e le sefe i faailoga ma lapataiga i luga o koneteina ma pusa e tuu ai. O faapefea ona faailogaina nei aitema i le mea o loo e nofo ai?
E pei lava o nei faailoga lapatai faaletino, o le Tusi a Mamona o loo i ai ni lapataiga e fesoasoani e te aloese ai mai faatosinaga e afaina ai lou agaga. Na faailoa mai e Peresitene Ezra Taft Benson le auala e mafai ai e le Tusi a Mamona ona lapatai ma faamalosia oe e tetee atu i fuafuaga leaga a Satani” “O le Tusi a Mamona o loo ta’u mai ai fili o Keriso. E ta’usese ai mataupu sese ma tuu ai i lalo finauga. (Tagai 2 Ni. 3:12.) E faamalosia ai soo lotomaualalalo o Keriso e tetee atu i faiga faatiapolo, auala, ma aoaoga faavae a le tiapolo i o tatou aso. O ituaiga o tagata tetee o loo i le Tusi a Mamona e tutusa lava ma le ituaiga o loo i ai i aso nei. O le Atua, faatasi ai ma lona muaisilafia e le gata mai, sa ia mamanuina le Tusi a Mamona ina ia mafai ona tatou iloa ai measese ma iloa ai auala e faasagatau atu ai i aoaoga, faiga faaupufai, tapuaiga ma manatu faafilosofia sese o o tatou taimi” (“The Book of Mormon Is the Word of God,” Ensign, Ian. 1988, 3).
O le Tusi a Mamona ua faailoa ai manatu sese o le tiapolo ma faamalosia ai i tatou ia tetee atu i ana faiga amioleaga. E pei ona tusia i le 2 Nifae 28, na ta’ua e Nifae nisi o aoaoga sese a le tiapolo ua taatele i augatupulaga uma. Suesue i le 2 Nifae 28:3–9, ma faailoga ia aoaoga ma manatu sese a Satani e te iloaina iinei. (Ia matau o le 2 Nifae 28:7–9 o se fuaitau o le mau tauloto. Atonu e te manao e faailoga i se ala iloagofie ina ia mafai ona e mauaina i le lumanai.)
I lau api talaaga mo le suesueina o tusitusiga paia, faamaumau mai le 2 Nifae 28:3–9 se tasi o aoaoga sese e te manatu e sili ona leaga i le autalavou i aso nei, ma faamatala au mafuaaga. Ia aofia ai foi se faataitaiga o le auala e mafai e tagata talavou ona faatosinaina e lena aoaoga sese.
Faitau le 2 Nifae 28:12–14, ma vaai mo le mea na lapatai mai Nifae o le a tupu i le tele o lotu ma tagata, e oo lava i nisi “o soo lotomaualalalo o Keriso” (fuaiupu e 14). O nei mea e mafua mai i le faamaualuluga ma aoaoga faavae sese ua e faitau i ai i le 2 Nifae 28:3–9. Faitau le 2 Nifae 28:15–16, 19, ma faailoa nisi o taunuuga o nei aoaoga sese. Atonu e te manao e faailoga le fasifuaitau i le 2 Nifae 28:19 o loo faamatala mai ai le mea o le a fai e le tiapolo ia i latou o e e le salamo.
Faitau leotele le 2 Nifae 28:7–9. Faaalu se taimi e tauloto ai le 2 Nifae 28:8. Atonu e te manao e tusi i totonu o lau api talaaga mo le suesueina o tusitusiga paia pe tauloto atu i se tagata o le aiga po o se uo. I aso mulimuli, e toatele o le a latou aoao atu ia mataupu faavae sese, lē aoga, ma valea. I lau api talaaga mo le suesueina o tusitusiga paia, lisi ni auala o loo faalauiloa mai ai nei aoaoga faavae valea ma faamatala faapuupuu pe mafai faapefea ona e iloa aoaoga faavae valea o le lalolagi ma aloese mai ai.
Ua lapatai mai Nifae e uiga i le tau faasese a Satani
O se sauniuniga mo lou suesueina o le vaega o totoe o le 2 Nifae 28, faitau le aafiaga lenei a Peresitene Boyd K. Packer, Peresitene o le Korama a Aposetolo e Toasefululua, a o asiasi atu o ia i se nofoaga faasao o le vaomatua a o i ai i se tofiga i Aferika:
“Sa matou tutu i se vaivai e matamata a o o mai manuvaefa e feinu. Sa o se vaitau na sili ona matutu ma sa tau leai se vai o le mea moni sa na o vaega palapala. …
“O aila, sa faapitoa lava le sesegi tele. Latou te latalata atu i le lua palapala, ona toe faliu lea ma taufetuli ese ma le fefefe tele. Sa mafai ona ou iloa atu na leai ni leona na lata ane ma ou fesili ai i le taitai pe aisea na latou te feinu ai. O lana tali, ma o le lesona lenei, o ‘Korokotaila.’
“Na ou iloaina atonu o loo tausua mai o ia ma sa ou toe fesili mo’i ai loa ia te ia, “O le a le faafitauli?” O le tali lava e tasi: ‘Korokotaila.’ …
“‘Lapisi,’ na ou fai atu ai. ‘E leai lava ni korokotaila i o. Soo se tasi lava e mafai ona iloa lena mea.’ …
“Sa mafai ona ia iloaina ou te le o talitonu ia te ia ma sa ou taumate ai, ua fuafua o ia e aoao mai ia te a’u se lesona. Sa matou tietie atu i se isi nofoaga lea sa tu ai le taavale i luga a’e o augutu o le vaivai palapala lea na mafai ona matou tilotilo ifo ai i lalo. ‘A la le,’ na ia fai mai ai. ‘Vaai la i ai.’
“Sa leai se mea na mafai ona ou vaaia sei vagana ai le palapala, o sina vaivai, ma ni manu atuatuvale sa tutu mamao mai. Ona faafuasei lea ona ou vaaia!—se korokotaila lapoa lava, o loo taotooto i le vaivai palapala, o loo faatalitali mo soo se manu e lei mafaufauina ua matuai fiainu lava e alu atu e inu.
“Na faafuasei ona avea au ma tagata talitonu! Ina ua mafai ona ia iloaina o loo o’u naunau lava e faalogo, sa ia faaauau ai loa le lesona. ‘O loo i ai korokotaila i le nofoaga atoa lenei,’ na ia fai mai ai, ‘e le na o totonu o vaitafe. E le mafai ona i ai so matou vai e aunoa ma se korokotaila i soo se mea e latalata ane i ai, ma e lelei ona e talitonu i ai.’ … …
“I se isi malaga i Aferika sa ou talanoaina ai lenei aafiaga ma se tagata e vaaia manufeai i se isi nofoaga. … …
“Ona ia faaali mai lea ia te au se nofoaga na tupu ai se faalavelave. O se alii talavou mai Egelani sa galue i le faletalimalo mo lea vaitau. E ui i lapataiga tumau ma faifai pea, ae sa ia sopoia lava le pa o le lotoa ma alu atu e siaki se mea i le isi itu o se pisipisi papa’u o le vaivai sa le lilofia ai ona seevae tenisi.
“‘Sa lei atoa se lua o ana laa,’ sa fai mai ai le tagata e vaaia ia manu, ‘ae maua loa o ia e le korokotaila, ma sa leai ma se mea na matou mafaia e laveai ai o ia’” (“Korokotaila Faaleagaga,” Liahona, Oke. 2002, 10–11).
O le a le mea e leaga ai le masalomia o le i ai o korokotaila pe a e le iloaina atu i latou? E faapefea ona faapei le aafiaga a Peresitene Packer ma le alii talavou o le mea na faamatala mai e Nifae i le 2 Nifae 28:22?
Sa faamalamalama mai e Peresitene Packer:
“O i latou e matutua atu ia te outou i le olaga ua uma ona suesue teisi e uiga i vaivai palapala ma sii mai se leo o le lapataiga e uiga i korokotaila. E le na o korokotaila lapopoa ia e mafai ona ‘aina outou, ae o korokotaila faaleagaga, lea e matua sili atu ona matautia, ma sili atu ona taufaasese ma tau le vaaia, e sili atu nai lo korokotaila le mavaaia o Aferika.
“O nei korokotaila faaleagaga e mafai ona fasiotia pe faamanuaina o outou agaga. E mafai ona latou faaumatiaina lo outou filemu ma le filemu o i latou e alolofa ia te outou. O korokotaila na e ao ona lapataiina ai, ma e toetoe lava a leai se nofoaga o i ai le vai i lenei olaga atoa i le taimi nei ua le o faatamaiaina e i latou” (“Korokotaila Faaleagaga,” 11).
I laina o loo lalo, tali ai fesili nei: O a ni auala e ono tutusa ai korokotaila i Aferika ma faaosoosoga ma togafiti a Satani?
Faitau le 2 Nifae 28:20–21, 24–26, ma vaai mo auala e saili ai Satani e faatamaia i tatou. (Atonu e aoga le iloa o le upu faaoleole i le 2 Nifae 28:21 o lona uiga o le faatoafilemu, faanana, pe faamoe faaleagaga.) E tusa ai i nei fuaiupu, o a auala e faaaoga e Satani e taumafai e faaoleole ai i tatou ma taitai atu tatou i lona mana? .
O se mataupu faavae iloga na aoao mai i nei fuaiupu o le: E faaaoga e Satani ia auala e taumafai e faatoilalo ai i tatou, e pei o le faaosoina o i tatou i le ita, faaoleole ma faanana i tatou, ma faaviivii i tatou.
Tali se fesili e tasi pe sili atu, i lau api talaaga mo le suesueina o tusitusiga paia:
E faapefea ona faaaoga e Satani le ita e taufaasese ma faaleaga tagata taitoatasi, aiga, ma lotoifale?
O a nisi o mea lelei ua faatosina ai e Satani ia tagata taitoatasi e feita i ai?
Faamatala ia le itiiti ifo ni faataitaiga se lua ia auala e ua faaoleole ai nisi o tagata ma faapea ona faatauasoina ai i mea matautia a Satani.
Faitau le faamatalaga lenei mai ia Epikopo Richard C. Edgley, o se fesoasoani i le Au Epikopo Pulefaamalumalu, e faatatau i le faagasologa faifaimalie lea e faaaoga e Satani e maileia ai i tatou: “E le mafai ona tatou faapea o le a tatou totoina ni saito vao i lo tatou talavou pe o le a na ona tatou faifaimea laitiiti i tuaoi o le agasala. E leai ni tuaoi o le agasala. O galuega uma, lelei pe leaga, e i ai lava sona taunuuga. O galuega lelei uma lava e faaleleia ai o tatou tomai e fai ai mea lelei ma tutu atili ai ma le mausali e tetee atu i le agasala po o le toilalo. O solitulafono uma lava, e tusa lava pe itiiti, e atili faatosina atu ai i tatou i faatosinaga a Satani i le isi taimi na te faaosoosoina ai i tatou. E avea i tatou e Satani i sina inisi i lea taimi ma lea taimi, ma faaseseina i tatou e tusa ai ma taunuuga o mea ua ta’ua o agasala itiiti seia oo lava ina ia faapologaina i tatou i solitulafono matuia. Ua faamatalaina e Nifae lenei metotia o se tasi o ala faaōleōle, faamoemoe malie, ma le faasee ese atu sei oo ina ‘umia i [tatou] e Satani i ana filifili leaga matautia, e leai se laveaiina mai ai’ (2 Ni. 28:22; tagai foi i le f. 21)” (“Ina Ia Malosi Lou Lagona Mautinoa,” Liahona, Ian. 1995, 48).
E faaaoga e Satani ia nei auala maaleale e tauanau ai i tatou ia mafaufau, tautala, ma fai mea sese. Faitau le 2 Nifae 28:27–29, ma vaai mo lapataiga faaopoopo.
Na tuuina mai e le Alii le isi lapataiga ma faamanuiaga, lea o loo i ai e lata i le faaiuga o le mataupu lenei. Faitau le 2 Nifae 28:30–32, ma mafaufau loloto i fesili nei: Aisea e ta’u ai e le Atua ia nisi o tagata manuia? E faapefea ona fesoasoani lo tatou faalogo atu i fautuaga a le Atua e faatoilalo ai auala a le tiapolo?
I lau api talaaga mo le suesueina o tusitusiga paia, tusi e uiga i se mea ua e aoaoina mai lenei lesona o le a fesoasoani ia te oe e faatoilalo ai auala a Satani. O a nisi o nofoaga, gaoioiga, po o uiga e te manao e aloese ai ina e le aliali atu i faatosinaga a Satani?
Mafaufau e uiga i le talanoaga e uiga i faailo o lapataiga i le amataga o le lesona lenei. I lau api talaaga mo le suesueina o tusitusiga paia, tusi se faailo lapatai e faailoa ai se tulaga matautia faaleagaga e te manatu e tatau ona lapataia ai le autalavou i aso nei. Ia saunia e faasoa atu lenei tulaga i lou faiaoga ma tagata o le vasega.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 2 Nifae 28 ma faamaeaina lenei lesona i le (aso).
Fesili, mafaufauga, ma manatu faaopoopo ou te fia faasoa i lou faiaoga: