Seminare
Iunite 7: Aso 2, 2 Nifae 17–20

Iunite 7: Aso 2

2 Nifae 17–20

Folasaga

I le 2 Nifae 17–20, na tusia ai e Nifae e faapea na taumafai Isaia e tauanau le tupu o sa Itua ma lona nuu e faalagolago i le Atua ae le o au o le lalolagi. I le faaaoga ai o ituaiga ma ataata—o faailoga po o faatusa e aoao ai ma molimau mai i upumoni maoae—sa vavalo ai Isaia e uiga i mea e tutupu i ona lava vaitaimi, o le fanau mai o Iesu Keriso, ma le faatamaiaga o e amioleaga i le Afio Mai Faalua o le Alii.

2 Nifae 17–18

E faamanuiaina le malo o Iuta pe a latou faatuatua ia Iesu Keriso

Ina ia fesoasoani i lau tapenaga mo le lesona o le asō, mafaufau i se taimi na e feagai ai ma se tulaga taufaamatau E te manatua lau tali muamua lava. A o e suesue i le 2 Nifae 17–18, taumafai e faailoa le fautua a Isaia ia i latou o e na oo i latou lava i se tulaga faigata pe taufaafefe.

Mo au suesuega o le 2 Nifae 17–18, o le a manaomia ona e iloa e uiga i ni malo laiti se tolu o Suria, Isaraelu, ma Iuta, faapea foi ma le Malo tele atu o Asuria, lea sa saili e faatoilalo nei malo laiti. Iloilo le faafanua lenei ma le siata o loo i ai faatasi.

Ata
faafanua o Isaraelu ma Iuta

Malo

Suria

Isaraelu (Efaraima)

Iuta

Tupu

Resina

Peka

Aasa

Laumua

Tamaseko

Samaria

Ierusalema

Faitau le 2 Nifae 17:1–2, ma faatatau atu i le faafanua. “Ua au faatasi Suria ma Efaraima” o lona uiga o nei atunuu e lua sa fai se la vaega po o se maliega. Taumafai e sue po o ai na osofaia ai. Ia nofouta o le fasifuaiupu “aiga o Tavita” i le fuaiupu e 2 e faatatau ia Aasa ma le nuu o Iuta.

O malo o Isaraelu ma Suria sa mananao e faatoilalo le malo o Iuta ma faamalosi Iuta ia ulu i se sootaga ma i latou e tetee atu i le Malo malosi o Asuria. Sa taufaamatau ane Asuria e faatoilalo se itu atoa o le lalolagi i lena vaitaimi. Sa talitonu Isaraelu ma Suria o le faatoilaloina o Iuta, e mafai ai ona latou maua tagata ma punaoa e tele atu e tau ai ma Asuria na agai atu (tagai 2 Nifae 17:5–6). Sa fuafua le Tupu o Aasa e fai lenei sootaga ma Isaraelu ma Suria.

Mafaufau po o le a se mea e te faia pe ana faapea o oe o Tupu Aasa. I se tasi itu, na taufaamatau ane Asuria e osofai ou tagata. I le isi itu, na taufaamatau ane Suria ma Isaraelu e osofai pe afai e te le auai i se sootaga ma i laua e tau faasaga ia Asuria. Sa nofo Isaia i le malo o Iuta, ma na auina atu o Ia e le Alii ia Aasa ma se aveai. E te manatu o a ni ou lagona e uiga i se aveai mai le perofeta pe ana faapea o oe o Tupu Aasa?

  1. Faitau le 2 Nifae 17:3–8, ma malamalama i le savali a le Alii ia Aasa ma ona tagata, e pei ona tuuina atu e ala i le perofeta o Isaia. (O le faaupuga “aulosoloso pupusa” i le fuaiupu 4 e faatatau i se sulu o lona mumu ua pe, e faatusa i nei malo e lua e gausia ma faoa.) Vaaifaalemafaufau e faapea na e faalogo o fai atu e Isaia lenei aveai ia Aasa. Ma mulimuli ane, na fesili atu ai se uo ia te oe po o le a le tala na fai atu e Isaia. Tusi ni fuaiupu se lua pe tolu i lau api talaaga mo le suesueina o tusitusiga paia e faamatala ai le auala o le a e tali atu ai i lau uo.

Sa taumafai Isaia e fesoasoani i le tupu ma ona tagata ia faalagolago i le Alii mo se fesoasoani, nai lo o le faalagolago i sootaga faaupufai e le mausali.

  1. Tali fesili nei, i lau api talaaga mo le suesueina o tusitusiga paia:

    1. Aisea e taua ai ona tatou liliu atu i le Alii pe a tatou manaomia le fesoasoani nai lo na o le faalagolago i isi tagata e fesoasoani ia i tatou?

    2. O a nisi o auala e ono faaosoosoina ai tagata talavou e faamuamua a latou sootaga ma isi tagata i luma atu o la latou sootaga ma le Tama Faalelagi ma Iesu Keriso?

Na fetalai le Alii o le a ia tuu atu ia Aasa le malo o Iuta o se faailoga o le a Ia puipuia i latou ma o le a le manaomia ona latou faalagolago i sootaga faalelalolagi. Faitau le 2 Nifae 17:14 e iloa ai le faailoga. Li’o le upu Emanuelu i le fuaiupu lenei. I talane o le fuaiupu lenei tusi ai le “Mataio 1:22–23.” Faitau le Mataio 1:22–23 e sue ai le uiga o le igoa Emanuelu.

E mafai faapefea e se faailoga o lona uiga “e faatasi le Atua ma i tatou” ona fesoasoani ia Aasa i lenei taimi? E mafai faapefea e se valoaga a Isaia ona i ai se faatatauga i le fanau mai o Iesu Keriso i seneturi mulimuli ane?

Mo se malamalamaaga atili i le faailoga o le fanau mai o se tamaitiiti, mafaufau i le faamalamalamaga lenei mai ia Elder Jeffrey R. Holland o le Korama a Aposetolo e Toasefululua: “E i ai elemene e tele pe tutusa i lenei valoaga, e pei foi ona i ai i le tele o tusitusiga a Isaia. O le uiga aupito tuusao atonu sa taulai atu i le toalua o Isaia, o se tamaitai mama ma lelei o le na fanaua se atalii pe tusa o le vaitaimi lenei [tagai 2 Nifae 18:3], o le tamaitiiti na avea o se ituaiga ma se ataata o le faataunuuga maoae ma mulimuli ane, o le valaoaga lea o le a faataunuuina i le fanau mai o Iesu Keriso” (Christ and the New Covenant [1997], 79).

Ata
Ua Tusitusi Isaia e uiga i le Fanau mai o Keriso

Na vavalo Isaia e faapea a o le’i matua le tamaitiiti, o le a faoa ai e Asuria autau uma a Isaraelu (Efaraima) ma Suria (tagai 2 Nifae 17:15–25). O le faailoga o lona uiga “e faatasi le Atua ma i tatou” sa fuafuaina e faamautu atu ai i le Tupu o Aasa o le a faatasi le Atua ma i tatou pe a tatou faalagolago ia te Ia, e oo lava foi i taimi o faigata ma le fefe. Mafaufau e tusi le mataupu faavae lenei i totonu o au tusitusiga paia.

Faitau le 2 Nifae 18:6–8, ma vase lalo o le fasifuaitau “vai o Seloa.” O vai o Seloa na faatusaina mo Isaia ia aafiaga toamalie, tumau, ma le lagolago ma le mana o le Atua lea sa manaomia ona avea ma se vaega o le olaga faaupufai a le malo (tagai 2 Nifae 18:6). Sa faaaoga e Isaia le faatatau atu i vai o Seloa o se tulaga e ese ai ona o le nuu o Isaraelu ma le nuu o Iuta na teena le Mesia—“o vai o Seloa,” po o le mana toamalie, malu, tumau, po o le lagolago o le Atua. O le mea lea, e pei ona valoia e Isaia, o le tupu o Asuria ma le faatosinaga leaga ma le mana malosi o lana autau osofai —na faatusaina “i vai o le vaitafe, e malosi ma tele”— na faatoilaloina Suria ma Isaraelu.

O Isaia, i le avea ai o se fatusolo, na faaaogaina auvai tafe e lua ae e matuai eseese e faamatala ai le mea o le a tupu ia Iuta. Ona osofai lea e le autau a Asuria ia Iuta—na faatusaina i le laueleele. Peitai sa le’i manumalo le autau ia Ierusalema —na faatusaina i le faamatalaga “o le a lofia o ia ma oso i luga, seia tau lava o ia i le ūa.”

Faitau le 2 Nifae 18:9–12, ma matau pe faafia ona fautuaina ai e le Alii ia Iuta e aua nei au faatasi ma Suria ma Isaraelu. E pei ona tusia i le 2 Nifae 18:13, o fea na fautuaina e le Alii, e ala atu ia Isaia, ia Iuta e alu i ai mo se fesoasoani?

E oo ane i le taimi na osofaia ai e Asuria ia Iuta ma faamata’uina Ierusalema, ua i ai se tupu fou o le malo o Iuta. O lona igoa o Esekia. Sa faalagolago atu o ia i le Alii ma le perofeta o Isaia. Mulimuli ane, e 185,000 fitafita Asuria na fasiotia i la latou tolauapiga e se agelu a le Alii (tagai 2 Tupu 19:35; Isaia 37:36).

  1. Tali se tasi o fesili nei, i lau api talaaga mo le suesueina o tusitusiga paia:

    1. O a tulaga e lamatia ai le tuuina o lou faalagolago i mea ma faatosinaga o le lalolagi nai lo o le Alii? (Atonu e te manao e mafaufau i ni tulaga e ono faaosoina oe e fai ni filifiliga e faavae i luga o le fefe.)

    2. O anafea na e liliu atu ai i le Alii mo le malosiaga ina ua faaosoosoina muamua oe e liliu atu i isi punaoa? O le a se mea na e aoaoina mai lena aafiaga?

    3. I lalo o le taitaiga a le Tupu o Esekia, sa faasaoina ai le nuu o Iuta mai le faatafunaga ona sa latou mulimuli i le fautuaga a Isaia mai i le Alii. E mafai faapefea i le mulimuli i perofeta o aso nei ona puipuia oe mai i tulaga e afaina ai faaleagaga?

2 Nifae 19:1–7

Ua tautala atu faaMesia Isaia

Pe na i ai se taimi na e ola ai mo se taimi umi e aunoa ma le vaaia o le la pe lagonaina foi lona mafanafana? Afai e leai, vaaifaalemafaufau e faapea na i ai lava se ataata tumau i ou luga, ma e te le mauaina le malamalama ma le mafanafana o le la (e pei o le i ai i totonu o se potu pogisa i taimi uma). Sa faaaoga e Isaia se ata faapena e faailoa ai le tulaga faaleagaga o tagata o e ola e aunoa ma le malamalama o Iesu Keriso.

E lua ni nuu na ta’ua i le 2 Nifae 19:1–2. Faitau fuaiupu nei, ma faailoga igoa o nuu e lua.

I le aluga o seneturi a o le’i oo i le taimi na tusia ai e Isaia nei fuaiupu, na tau ai ni taua se tele i se taumafaiga ia pulea le eria lea ua ta’ua nei o le Nuu Paia. E ta’u e nisi lenei eria o “le nuu o le ata o le oti” ona o le toatele na maumau ai o latou ola iina i taua. I taimi o le Feagaiga Fou, o Nasareta, Kapenaumi, Naina, ma Kana sa tutu i vaega sa ta’ua muamua o nuu o Sepulona ma Nafatali. O aai nei sa faaalu ai e Iesu Keriso le tele o Lona taimi, auauna atu i tagata i le silia ma le 500 tausaga mulimuli ane. Ua ta’ua i aso nei o le eria o Kalilaia

Faailoga i le 2 Nifae 19:2 le faamatalaga na fai mai Isaia o le a iu ina vaai i ai lenei itu.

O le faamatalaga a Isaia e faapea o i latou o e “sa savavali i le pouliuli” ma nonofo i le “laueleele o le ata o le oti” na “vaai i se malamalama tele” o se valoaga e uiga i le misiona a Iesu Keriso i le olaga nei i lenei itu o le lalolagi. O tagata na nonofo i le eria o Kalilaia sa savavali i le pouliuli faaleagaga, ae ina ua nofo ma auauna atu Iesu Keriso ia i latou, sa latou vaaia “se malamalama tele.”

  1. Faitau le 2 Nifae 19:6–7, ma mafaufau po o le fea o faalupega o le Faaola i le fuaiupu e 6 atonu na faapitoa le anoa i tagata Iuta, ona o o latou tulaga. I totonu o lau api talaaga mo le suesueina o tusitusiga paia, tusi ai pe mafai faapefea e se tasi pe sili atu o nei faalupega ona faamatalaina ou lagona e uiga i le Faaola.

2 Nifae 19–20

Ua faamatala e Isaia le faaumatiaga o e amioleaga i le Afio Mai Faalua

O valoaga a Isaia e uiga i le faatamaiaga o Asuria, o loo tusia i le 2 Nifae 20, o se valoaga foi o le faaumatia o e amioleaga i le Afio Mai Faalua. A o e faitau i le mataupu lenei, manatua e pei lava ona faalagolago Esekia i le fautuaga a Isaia mai le Alii ma na faamanuiaina ai, afai e tuu lou talitonuga i le Alii, e le tatau ona e fefe i faamasinoga o le a oo mai i luga o e nonofo i le lalolagi i le taimi e tau atu i le Afio Mai Faalua.

O le a le fuaiupu o loo toe ta’ua foi i le 2 Nifae 19:12, 17, 21 ma le 2 Nifae 20:4? Atonu e te manao e faailoga i au tusitusiga paia. Tusi le fuaiupu i lau api talaaga mo suesuega, ma vase lalo o le upu toasa ma le upu aao. I lalo o le upu toasa, tusi ai le faamasinoga, ae o lalo o le upu aao, tusi ai le alofa mutimutivale. Faitau leotele le fuaiupu, ae fesuiai upu faamasinoga ma le alofa mutimutivale. (“E ui ia mea uma ua le liliu ese ai lava lona [faamasinoga], ae ua faaloaloa atu pea lona [alofa mutimutivale].”)

  1. Tali fesili nei, i lau api talaaga mo le suesueina o tusitusiga paia:

    1. O faapefea ona faamatalaina e le fuaiupu o loo i le gaoioiga e suesue ai o loo i luga, le ala e tali atu ai le Alii i malo, aiga, po o tagata taitoatasi o e teena o Ia?

    2. E mafai faapefea ona e faaaogaina ia upumoni nei i lou olaga? O Iesu Keriso o se Atua o faamasinoga ma le alofa mutimutivale. O Lona alofa mutimutivale e faaloaloa atu ia i latou o e salamo ma tausi Ana poloaiga.

  2. I lau api talaaga mo le suesueina o tusitusiga paia, tusi e uiga i se taimi sa e usiusitai ai i se poloaiga faapitoa ma lagona a le alofa mutimutivale o le Atua.

  3. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 2 Nifae17–20 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: