Seminare
Iunite 25: Aso 2, 3 Nifae 13

Iunite 25: Aso 2

3 Nifae 13

Folasaga

E pei ona faamaumauina i le 3 Nifae 13, na faaauau e le Faaola Lana lauga i le malumalu i le laueleele o Nuumau. Na ia lapataia tagata e faasaga i togafiti pepelo ma aoao i latou e faapea, o a latou galuega amiotonu ua fiafia i ai le Tama Faalelagi. Na Ia faatonuina foi le motu o tagata ina ia toloa’i oa i le lagi, ma apoapoai i Ona soo e toasefululua e saili muamua le malo o le Atua nai lo o le popole muamua i o latou lava popolega faaletino.

3 Nifae 13:1–18

Ua lapataiina e le Faaola tagata sa Nifaē e faasaga i le pepelo ma aoao i latou ina ia faia galuega amiotonu e faafiafia ai le TamaFaalelagi

Faamaea le iloiloga faaletagata lava ia i lou mafaufau e ala i le filifilia po o le fea o fasifuaitau e sili atu ona faamatalaina ai lou faaosofia e faia le alofa (foai atu i isi), tatalo, ma le anapogi:

Ou te faia le alofa ona:

  1. E tatau ona ou faia.

  2. Ou te alofa i le Alii ma ou te fiafia e fesoasoani i isi tagata.

  3. Ou te manao i isi ina ia manatu lelei ia te au.

Ou te tatalo ona:

  1. Ou te le manao e fai atu “leai” i luma o isi tagata pe a talosagaina au e tatalo.

  2. Ua na o se vaega o le faagasologa masani o lo’u aso.

  3. Ou te manao e fesoota’i ma lo’u Tama Faalelagi.

Ou te anapogi ona:

  1. O le anapogi e fesoasoani ia te a’u e faalatalata atili ai i le Alii.

  2. O le a manatu isi tagata o a’u o se tagata leaga, pe a ou le faia.

  3. E le faatagaina e ou matua ona ou ai pe afai o loo ou anapogi.

I le 3 Nifae 13, na aoao atu e Iesu Keriso i le motu o tagata sa Nifae le taua o faamoemoega o se tagata i le faia o alofa, tatalo, ma anapogi. O tali o loo lisiina atu i lenei iloiloga faaletagata lava ia e atagia ai faamoemoega eseese e ono i ai ia i tatou mo le faia o nei mea faatinoga po o isi auaunaga tuuto faalelotu.

  1. Tali fesili nei, i lau api talaaga mo le suesueina o tusitusiga paia: Mata e afaina pe aisea e tatou te faia ai galuega amiotonu? Aisea, pe aisea e leai ai?

  2. Kopi le siata lenei i lau api talaaga mo le suesueina o tusitusiga paia, ma faatumu e ala i le faitauina o mau faasino taitasi ma tali fesili e lua. A o e faitauina, atonu e fesoasoani le iloa o se tagata pepelo o se tasi e faafoliga mai e pei e amiotonu po o le fai mai o se faamatalaga ae ese le mea e na te faia.

    Gaoioiga

    O le a le faamoemoega na lapatai mai ai le Alii, a o tatou faia lenei gaoioiga?

    O le a le fetalaiga a le Alii i le auala e tatau ona tatou faia ai lenei gaoioiga?

    Faia o alofa (3 Nifae 13:1–4)

    Tatalo (3 Nifae 13:5–6)

    Anapogi (3 Nifae 13:16–18)

Mafaufau i fesili nei:

  • E mafai faapefea e o tatou faamoemoega mo le faia o galuega amiotonu, ona aafia ai le auala tatou te faia ai ia mea?

  • O a nisi o faamoemoega amiotonu atonu e musuia ai se tagata ina ia fai faalilolilo le alofa, tatalo, po o le anapogi?

O se tasi o faamoemoega amiotonu mo le faia o nei mea o le faafiafia lea o le Tama Faalelagi. Faitau le 3 Nifae 13:4, 6, 18, ma vaavaai mo mea na folafola mai e le Alii ia i latou o e e le faalauaiteleina o latou faatinoga amiotonu.

O se mataupu faavae taua na aoao mai e le Faaola i nei fuaiupu o le: Afai tatou te faia amioga amiotonu ona tatou te alolofa i le Tama Faalelagi, o le a Ia tauia mai faaaliali i tatou.

  1. I lau api talaaga mo le suesueina o tusitusiga paia, tusi e uiga i se taimi na e lagona ai le faamanuiaina ona o le saili e fai le mea e faafiafia ai le Tama Faalelagi nai lo ia iloa mai e isi.

Ia faapuupuu le iloiloina o lau iloiloga faaletagata lava ia i le amataga o le lesona e iloilo ai ou faamoemoega mo le faia o alofa, tatalo, ma anapogi. Mafaufau pe faapefea ona e faaaogaina aoaoga a le Faaola e faaleleia ai ou faamoemoega mo le faia o nei mea po o isi galuega o le tuuto i le Alii.

Na tuuina atu e le Faaola faatonuga faaopoopo i sa Nifae e uiga i le tatalo. Faitau le 3 Nifae 13:7, ma vaavaai mo le auala na faamalamalama ai e le Alii fasifuaitau ta’ua soo pe auiliili o loo faailoa atu e aunoa ma le loto atoa i le tatalo. O le upu le aoga o lona uiga e gaogao, e aunoa ma se manatu po o se lagona i ai. O le tautu i upu fai soo le aogā e mafai foi ona faauigaina o le faia soo ma le le manatu i upu e tasi po o le tatalo e aunoa ma le faatuatua.

  1. Tali fesili nei, i lau api talaaga mo le suesueina o tusitusiga paia:

    1. Aisea e te manatu ai e taua le aloese mai le faaaogaina o upu tauloto fai soo le aoga i a tatou tatalo i le Tama Faalelagi?

    2. O a nisi o mea e mafai ona e faia e aloese ai mai upu tauloto fai soo le aoga, a o e tatalo?

Faitau le 3 Nifae 13:8, ma vaavaai mo se mataupu faavae na taua e Iesu Keriso e uiga i le Tama Faalelagi. Atonu e manao e faailoga lenei mataupu faavae i lau tusitusiga paia. O se tasi faamoemoega o a tatou tatalo o le “faamautuina mo i tatou lava ma isi faamanuiaga ua finagalo le Atua e tuuina mai pe a tatou ole atu mo na faamanuiaga i le faatuatua” (Bible Dictionary, “Tatalo”).

Ata
alii talavou o loo tatalo

Faitau le 3 Nifae 13:9–15, ma mafaufau loloto i mea e finagalo le Alii ia e aoao e uiga i au tatalo. Mafaufau i auala e faaleleia ai au tatalo e ala i le faaaogaina o mea ua e aoao mai i aoaoga a le Faaola.

3 Nifae 13:19–24

Ua aoao e Iesu Keriso le motu o tagata ina ia toloa’i oa i le lagi

Pe ua e faitau pe faalogo i se tala e uiga i le oa na leiloa pe na natia? O nisi taimi i nei tala, o tagata su’e oa e iu lava ina ausia o latou sini ae oo ane i ai e le o i ai se oa pe e le’i i ai lava. Faitau le 3 Nifae 13:19–20, ma faailoa mai ituaiga e lua o oa na fetalai i ai le Alii. O lē fea o na oa na Ia fetalai mai o le a i ai lava iina mo i tatou pe afai tatou te sailia?

  1. Tali fesili nei, i lau api talaaga mo le suesueina o tusitusiga paia:

    1. O le a le eseesega i le va o “oa i luga o le lalolagi” ma “oa i le lagi”?

    2. Mai mea ua aoaoina i le 3 Nifae 13:21–24, o a nisi o upumoni na aoao mai e le Faaola e uiga i le sailia o oa faalelalolagi ma oa faalelagi? (Atonu e fesoasoani ina ia e malamalama atili i nei fuaiupu ia iloa ai o le upu mamone o se faaupuga mo le faalelalolagi po o tamaoaiga.)

    3. E mafai faapefea e le sailia o oa o le lalolagi, ona aveesea o tatou mafaufau mai le sailia o oa i le lagi?

E le’i aoao mai le Faaola e faapea e leaga ia tupe po o meatotino faalelalolagi. Ae na Ia faamamafa mai le taua o le tuu o o tatou loto i oa faalelagi lea e tumau ae le o oa faalelalolagi.

O se tasi o mataupu faavae e mafai ona tatou aoao mai le 3 Nifae 13:19–24 o: Ina ia avea le Atua ma o tatou matai, e tatau ona tatou alolofa ma auauna atu ia te Ia ia sili atu i mea o le lalolagi.

Faamata o a nisi o faataitaiga o le taumafai e auauna i le Atua ma mamone i le taimi e tasi? Aisea atonu o le a faafaigata ai ona alofa atu ma auauna atu i taimi uma i le Atua nai lo mea o le lalolagi? Aisea e taua ai le taumafaiga e faamuamua le Atua?

  1. Faitau faataitaiga nei. I lau api talaaga mo le suesueina o tusitusiga paia, faailoa mai poo le fea o matai e te manatu o loo auauna i ai le tagata: Atua po o le mamone (faalelalolagi).

    1. O se alii talavou ua faafitia se galuega atonu e manaomia ai o ia e misi ana fonotaga o le Aso Sa, ae filifilia se galuega e maualalo le totogi lea e le manaomia ai ona ia faigaluega i le Aso Sa.

    2. O se tamaitai talavou e masani ona faitio i ona matua e uiga i lona manao mo ni ofu fou. O ofu o loo manao i ai e sili atu o latou tau nai lo le mea e gafatia e lona aiga.

    3. O se alii talavou e masani ona totogiina lana sefuluai i le tupe na te mauaina mai lana galuega. Peitai ane, ua ia faaaogaina uma lona totogi e faatau ai mea faafiafia, e aofia ai ni ata tifaga ma pese le talafeagai, ma ua leai ma se tupe o teuina mo se misiona po o le aoga.

    4. O se tamaitai talavou e faaaogaina i nisi taimi se vaega o lona totogi e faatau ai nai meaalofa laiti e faaali ai lona alofa mo isi.

3 Nifae 13:25–34

Ua faatonuina e le Faaola le au soo e toasefululua e saili le malo o le Atua nai lo ō latou lava popolega faaletino

Ata
Sa Nifae e Toatolu

A o latou o atu e auauna atu i tagata, na faatonuina e Iesu Kerisos Ona soo sa Nifae e toasefululua ia aua le popole i o latou manaoga faaletino mo meaai ma lavalava (tagai 3 Nifae 13:25–31). Faitau le 3 Nifae 13:32–33, ma vaavaai mo mea na tau atu e le Faaola i Ona soo e faatatau i o latou manaoga faaletino. O a mea na Ia folafola mai ia i latou o e faamuamua le Atua ma Lona malo i o latou olaga?

O se mataupu faavae e mafai ona tatou aoaoina mai nei fuaiupu atonu o le: Afai tatou te saili muamua le malo o le Atua, o le a Ia fesoasoani ia i tatou e saunia mo o tatou manaoga.

  1. Tali fesili nei, i lau api talaaga mo le suesueina o tusitusiga paia:

    1. E faapefea e se tagata ona “saili … muamua le malo o le Atua”? (3 Nifae 13:33).

    2. O a ni auala ua taulima ai e le Alii ou manaoga ina ua e faamuamua o Ia i lou olaga?

Ua molimau mai Peresitene Ezra Taft Benson i faamanuiaga e oo mai i le faamuamua o le Atua i o tatou olaga (atonu e te manao e tusi lenei upusii i luga o se pepa ma tuu i totonu o au tusitusiga paia ina ia iloilo pe faasoa atu i le lumanai):

“Pe a tatou faamuamua le Atua, o isi mea uma lava o le a oo atu i o latou tulaga tatau po o le aveese foi mai o tatou olaga. O lo tatou alofa mo le Alii o le a pulea ai lo tatou alofa, mea e faia i o tatou taimi, sailia o mea tatou te fiafia i ai, ma le faasologa o mea e tatau ona faamuamua… …

“E tatau ona tatou tuuina atu i le Atua, le Tama o o tatou agaga, le faasilisili ese i mea uma i o tatou olaga” (“O Le Poloaiga Silisili—O Le Alofa i le Alii,” Liahona, Iulai 1988, 4–5).

Mafaufau loloto pe faapefea ona faamanuiaina oe po o i latou e te iloaina ona o le faamuamua o le Atua i o outou olaga.

  1. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 3 Nifae 13 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: