Iunite 24: Aso 4

3 Nifae 11:1–17

Folasaga

I se taimi mulimuli i le faafanoga tele ma aso e tolu o le pogisa, e tusa ma le 2,500 alii, tamaitai ma fanau na faapotopoto atu i le malumalu i le laueleele o Nuumau (tagai 3 Nifae 17:25). Na o latou faalogo i se leo, lea i le taimi muamua latou te le i malamalama i ai. A o latou taumafai e faalogo, na o latou malamalama o le siufofoga lava o le Tama Faalelagi o loo faailoa mai Lona Alo, o Iesu Keriso. Ua afio mai le Faaola o le lalolagi. Na valaaulia e Iesu Keriso tagata ia taitoatasi ma molimauina e le tagata lava ia, na fasiotia o Ia mo agasala a le lalolagi e ala i le tagotago atu i manua i lona itu ma faailoga o fao i Ona lima ma vae.

3 Nifae 11:1–7

Ua faalogoina e tagata le siufofoga o le Tamā o fofogaina mai le afio mai o Lona Alo

Alu i fafo ma se penitala ma lenei taiala suesue, ma faalogo mo le 60 sekone. Tusi ni leo se tele e mafai ona e tusiina i le avanoa o loo i lalo:

Ia tuu se fetu i autafa o leo taitasi e te manatu e faigata ona iloa pe atonu foi e te le iloaina pe a e le taumafai e faalogo. Ona toe foi lea i totonu.

Ina ua faatoa uma le faatafunaga tele ma le pogisa na faailoa mai ai le maliu o Iesu Keriso, na faapotopoto tagata i le malumalu i le laueleele o Nuumau. A o latou talanoa i mea na tutupu, na oo mai se aafiaga ofoofogia lea na latou le malamalama i ai i le taimi muamua. Faitau le 3 Nifae 11:1–3, ma vaavaai po o le a le mea na faafaigata ona malamalama i ai tagata. Atonu e te manao e faailoga pe na faapefea ona faamatalaina le siufofoga o le Atua ma le aafiaga o lena siufofoga i latou na faalogo i ai.

Faaalu se taimi e mafaufau ai pe faafepea ona tutusa aga o le siufofoga na faalogoina e tagata ma musumusuga tatou te maua mai le Agaga Paia. O a upumoni e mafai ona e aoaoina mai le 3 Nifae 11:1–3 e uiga i le auala e masani ona fetalai mai ai le Alii ma le Agaga Paia ia i tatou? O se tasi o aoaoga faavae tatou te vaai ua faaalia mai i nei fuaiupu o le: E masani ona fetalai mai le Agaga Paia ia i tatou i se leo filemu, ma itiiti lea e tatou te lagonaina i o tatou loto.

Na faamatalaina e Peresitene Boyd K. Packer, Peresitene o le Korama a Aposetolo e Toasefululua, le auala e faagaoioia ai e le siufofoga o le Alii, e ala i le Agaga Paia, i o tatou mafaufau ma loto:

“Atonu o le mea e tasi silisili na ou aoaoina mai lenei faitauga o le Tusi a Mamona o le siufofoga o le Agaga e oo mai o se lagona nai lo o se leo. O le a e iloaina, e pei ona ou iloaina, ia ‘faalogo’ atu i lena siufofoga lea e lagonaina nai lo le faalogoina. …

“O le meaalofa o le Agaga Paia … o le a taialaina ma puipuia, ma e oo lava i le faasa’oina o au amioga. O se leo faaleagaga e oo mai i le mafaufau o se manatu po o se lagona e tuu i totonu o lou loto” (“Fautuaga i le Autalavou,” Ensign po o le Liahona, Nov. 2011, 17–18).

1. Mafaufau i se taimi na e lagona ai le siufofoga o le Alii po o ni uunaiga o le Agaga e oo mai i lou mafaufau po o le loto. Tusi i lau api talaaga mo le suesueina o tusitusiga paia e uiga i lau aafiaga ma pe na faapeī lona faalogona.

Na faalua ona faalogoina e sa Nifae ia le leo ae na le’i malamalama i ai. Faitau le 3 Nifae 11:4–7, ma vaavaai mo mea na ese ona faia e sa Nifae i le taimi lona tolu ina ia malamalama i le leo. O le a lou manatu i le uiga o le tatalaina e tagata o “o latou taliga e faalogo i ai” i le leo? 3 Nifae 11:5).

Na tuuina mai e Peresitene Boyd K. Packer le fautuaga lenei e uiga i mea e manaomia ona tatou faia e faalogo ai ma malamalama i le siufofoga o le Alii e auala mai i le Agaga Paia. Vase ia upu po o fasifuaitau e fesoasoani ia te oe ia iloa mea e fai, po o mea e aloese mai ai, ina ia sili atu ona lagonaina le siufofoga o le Alii e auala mai i le Agaga Paia.

“E le fafagua e le Agaga i tatou e ala i le e’ē. E le luluina i tatou i se lima mamafa. O le Agaga e musumusu mai. E pa’i mai ma le malū, ioe, afai o pisi i tatou, o le a lē mafai lava ona tatou lagonaina.

“E i ai foi taimi, o le a uunai malosi le Agaga tau lava ina ia taulai atu ai o tatou mafaufau; ae mai lo’u aafiaga, o le tele o taimi, afai tatou te lē faalogo atu i le lagona malū, afai tatou te lē faalogo faatasi ma na lagona, o le a aluese le Agaga ma faatali seia tatou saili atu ma faalogo, i la tatou amio ma faatinoga” (“How Does the Spirit Speak to Us?” New Era Feb. 2010, 3).

Atonu e te manao e tusi mataupu faavae nei i lau tusitusiga paia i autafa o le 3 Nifae 11:5–6 ma i lau api talaaga mo le suesueina o tusitusiga paia: A o tatou aoao e faalogo i le siufofoga o le Alii e auala mai i le Agaga Paia, o le a mafai ona tatou malamalama i fesootaiga ua Ia tuuina mai ia i tatou.

2. Tali fesili nei, i lau api talaaga mo le suesueina o tusitusiga paia:

   1. O a mea e fesoasoani e saunia ai lou mafaufau ma lou loto, ina ia faalogo ma malamalama i le siufofoga o le Alii?

   2. O anafea na e malamalama ai i fesootaiga mai le Alii lea atonu e te misia pe ana e le taumafai e faalogo i ai?

   3. O anafea na e mauaina ai i le silia ma le faatasi se taimi ia se musumusuga mai le Agaga Paia ona faatoa e malamalama ai lea ma mulimuli i ai?

3 Nifae 11:8–17

Ua faaali mai Iesu Keriso ma valaaulia ia tagata e o mai taitoatasi e pa’i atu i Ona manua

Ua Faaali Mai Iesu Keriso i sa Nifae

Taumafai e vaai faalemafaufau i mea na tutupu i le 3 Nifae 11:8–10 a o e faitauina.

Vaai Faalemafaufau i Lou Mafaufau I Mea o Loo Tutupu

Pe a suesueina tusitusiga paia, e masani lava ona fesoasoani le taumafai e vaai faalemafaufau i mea o loo tutupu pe vaai faalemafaufau pe mata e faapeī le i ai iina ma i latou na tutupu ai na mea faapitoa. O lenei tomai suesue e mafai ona faafoliga moni ai mea na tutupu ma tagata o loo i tusitusiga paia ia te oe ma e maua ai avanoa e lagona ai le uunaiga o le Agaga Paia.

3. A o e mafaufau pe faapeī le molimauina o le faaali mai o Iesu Keriso toetu i tagata o le Tusi a Mamona, tusi i lau api talaaga mo le suesueina o tusitusiga paia po o a ni ou manatu ma ni lagona atonu e te mauaina pe ana e i ai iina.

Na saunoa mai Elder Jeffrey R. Holland o le Korama a Aposetolo e Toasefululua e uiga i le taua o le faaali mai o le Faaola i sa Nifae:

“O lena faaaliga ma le tautinoga na fatuina ai le manatu autu, le taimi silisili, i le talafaasolopito atoa o le Tusi a Mamona. O le faailoaga ma le folafolaga na ta’u atu ai ma musuia ai perofeta uma o sa Nifaē mo le ono selau tausaga na muamua atu, ina ia lē tautala lava i se isi mea e uiga i o latou augatama Isaraelu ma sa Iareto mo le faitau afe o tausaga a o le’i tupu lena mea.

“Sa talanoa tagata uma e uiga ia te ia, pepese e uiga ia te ia, fai miti e uiga ia te ia, ma tatalo mo lona afio mai—ae, o lea ua i ai moni lava o ia. O le aso o aso! O le Atua, o le na te faaliliu po pogisa uma i taeao malamalama, ua taunuu mai” (Christ and the New Covenant: The Messianic Message of the Book of Mormon [1997], 250–51).

Ia manatua o tagata sa Nifae ma sa Lamana o e na totoe na aafia talu ai nei i faafanoga matautia ma aso e tolu o le matuai pogisa atoa. Faitau le 3 Nifae 11:10–12, ma vaavaai mo mea na finagalo Iesu Keriso i tagata ia latou iloa e uiga ia te Ia, ma mea na Ia faia i le taimi o Lana auaunaga faaletino. O le fea o fetalaiga a le Faaola e te manatu o le a sili atu ona faagaeetia i lau faalogo pe ana e i ai iina? Mafaufau loloto pe aisea o le a taua tele ai lena fetalaiga ia te oe. Atonu e te manao e faailoga le fasifuaitau e sili atu ona anoa ia te oe i lau tusitusiga paia.

Faitau le 3 Nifae 11:13–15, ma faailoga mea na valaaulia e Iesu Keriso ia tagata ia latou faia ia maua ai se malamalamaaga faaletagata lava ia na Ia finagalo ia latou maua e uiga ia te Ia. Mafaufau i tali o fesili nei: E tusa ai ma le 3 Nifae 11:14, o le a le mea na finagalo le Faaola ia iloa e tagata mai lenei aafiaga? A mafaufau atu i le tusa ma le 2,500 tagata na i ai i lena taimi (tagai 3 Nifae 17:25), mata o le a le umi na faia ai lenei mea? O le a se mea ua aoao atu e lenei mea ia te oe e uiga i le Faaola?

Taitoatasi

4. I lau api talaaga mo le suesueina o tusitusiga paia, tali fesili nei:

   1. Aisea na finagalo ai le Alii ia “taitoatasi’ le tagata ma vaavaai ma tagotago atu ia te Ia? (3 Nifae 11:15).

   2. O a ni aafiaga e te oo i ai i le tago atu i manua na maua e le Faaola a o togiola mo au agasala?

Mafaufau e tusi le upumoni lenei i lau tusitusiga paia i talane o le 3 Nifae 11:11–15 po o i lau api talaaga mo le suesueina o tusitusiga paia: Ua valaaulia au e Iesu Keriso ia ou maua se molimau patino o Ia o lou Faaola.

5. Tali fesili nei, i lau api talaaga mo le suesueina o tusitusiga paia:

   1. E te manatu o le a le malosi o lau molimau patino e uiga i le Faaola? O faapefea ona faatupulaia ma faamalosia i le gasologa o vaitaimi e le’i leva ona mavae atu?

   2. O a ni aafiaga ua taitai atu ai oe i le mauaina o lau lava molimau patino e uiga i le Faaola, po o le a se mea e mafai ona e faia e maua ai se molimau malosi atu?

   3. E mafai faapefea ona e iloa o loo silafia e le Faaola oe lava ia?

Faitau le 3 Nifae 11:16–17, ma vaavaai mo mea na faia e tagata ina ua maea ona latou maua lenei aafiaga faaletagata lava ia ma le Faaola. Atonu e fesoasoani le malamalama o le “Osana” o se alaga o le vivii atu i le Alii.

Tagai lelei i le 3 Nifae 11:15, ma faailoa mai mea na faia e tagata ina ua maea ona fetagofi atu i latou lava i manua a le Faaola. Talu ai e te le’i i ai iina e tago atu oe lava ia i manua o le Faaola, e pei o tagata o loo tusia i le 3 Nifae, e mafai faapefea ona e iloa o Iesu o le Keriso? (Tagai i le Ioane 20:30–31; Moronae 10:3–7; MF&F 46:13–14 mo ni tali talafeagai.)

Ina ia faatatau le 3 Nifae 11:15 ia te oe lava, faamaea le faamatalaga lenei: Pe a ou maua se molimau patino e uiga ia Iesu Keriso, ua ia te a’u se tiutetauave e .

Mafaufau e uiga i ni auala e mafai ai e se tagata ua i ai se molimau ia Iesu Keriso ona “molimau ai” ia te Ia.

Na aoao mai e Peresitene Boyd K. Packer mea nei e uiga i molimau: “E le mafai ona e faia faamalosia mea faaleagaga. O le molimau e le o se mea e lafo faafuasei atu i ou luga; e tuputupu ae. Ma o se molimau o se molimau lava, ma e tatau ona faaaloalogia, tusa lava pe itiiti pe tele. Tatou te maualuga a’e i a tatou molimau e pei o le tatou tuputupu ae i le tino faaletino ma faigata ona iloa o loo tupu, aua e oo mai e ala i le tuputupu a’e” (“How Does the Spirit Speak to Us?” 3).

6. Faaiu lenei lesona e ala i le tusiina o lau molimau ia Iesu Keriso i lau api talaaga mo le suesueina o tusitusiga paia. Atonu e te manao e faaaofia ai mea ua e faia e maua ai lau molimau po o mea ua e fuafua e fai ina ia faamalosia ai. Afai e uunaia e le Agaga, faitau atu i se isi tagata pe valaaulia se tasi e faitau i ai.

7. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 3 Nifae 11:1–17 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: