Seminare
Iunite 26: Aso 3, 3 Nifae 19

Iunite 26: Aso 3

3 Nifae 19

Folasaga

O mea na tutupu o loo faamaumauina i le 3 Nifae 11–18 na tutupu uma lava i le aso e tasi. I le faaiuga o lena aso, o le talafou i le asiasiga a le Faaola ma Lona toe foi atu i le aso e sosoo ai na salalau atu i tagata, ma sa latou “galulue malosi i lena po atoa, ina ia mafai ona latou i ai i le aso e sosoo ai i le nofoaga lea o le a faaali mai ai e Iesu o ia lava i le motu o tagata” (3 Nifae 19:3). I le taeao, na aoao atu ai e le au soo e toasefululua ia tagata ma tatalo ma i latou. Ona papatisoina lea e Nifae le au soo e toasefululua, ma na o latou mauaina le Agaga Paia ma na siomiaina e agelu. I le taimi o lenei faaaliga, na faaali mai Iesu Keriso ma poloaiina le au soo e tatalo, ma na Ia tatalo foi i le Tama e fai ma sui o le motu o tagata. Ona o lo latou faatuatua, na faatumulia ai le au soo i le Agaga Paia. Na faamamaina i latou, ma na tasi i latou ma le Tama ma le Alo.

3 Nifae 19:1–14

Ua auauna atu le au soo e toasefululua i tagata, e pei ona poloaiina ai e le Faaola

Vaai faalemafaufau pe o a ni ou lagona ma ni mea atonu e faia pe ana e iloa o taeao o le a afio mai ai Iesu Keriso i se malumalu e le mamao mai ia te oe. Mata o le a le malosi o le a e taumafai ai ina ia e oo ai iina? Mata e te manao e aumai isi tagata faatasi ma oe? Mata o le a le mea o le a e faia e saunia ai mo lenei aafiaga?

Faitau le 3 Nifae 19:1–3 ma vaavaai mo le tali a sa Nifaē i le folafolaga a le Faaola faapea o le a toe sau o Ia i le aso e sosoo ai. Ina ua maea ona faapotopoto le motu o tagata, na vaevaeina e le au soo e toasefululua le motu o tagata i ni vaega e sefululua ma amata ona aoao i latou. Na o latou aoaoina le motu o tagata ia tootutuli i le tatalo ma aoaoina i latou i le upumoni e tasi na aoaoina e le Faaola i le aso ua mavae. (Tagai 3 Nifae 19:4–7.)

  1. Faitau le 3 Nifae 19:8–9, ma tali le fesili lenei i lau api talaaga mo le suesueina o tusitusiga paia:

    1. O le a le mea na sili ona mananao i ai le au soo? Mai i lou aafiaga, aisea e matua manaomia ai le meaalofa o le Agaga Paia?

    2. O le au soo e toasefululua sa saunia e taitai le Ekalesia i le Atu Amerika ina ua mavae ona afio ese le Faaola. Aisea na taua ai lo latou mauaina o le Agaga Paia ina ia taialaina i latou?

A maea ona e faamaeaina lau api talaaga mo le suesueina o tusitusiga paia, mafaufau loloto i fesili nei: O a ni nai mea e sili ona e manao i ai pe a e tatalo? E faafia ona e tatalo mo le Agaga Paia?

Faitau le 3 Nifae 19:10–12, ma vaavaai mo mea na faia e le au soo ina ua uma ona latou tatalo. O le papatisoga ua faamatalaina i le fuaiupu e 10–12 o le papatisoga lona lua lea mo le au soo e toasefulua. Sa faatulagaina le Ekalesia mo le tele o tausaga i sa Nifae, ma o nei uso a perisitua atonu na papatisoina muamua, e ui lava e lei faamaumauina lo latou papatisoga muamua i tusitusiga paia. O le papatisoga lona lua sa avea o se tulaga faapitoa, e pei ona faamalamalama mai e Peresitene Iosefa Filitia Samita: “Na poloaiina e le Faaola Nifae ma tagata ina toe papatisoina, aua na ia toe faatulagaina le Ekalesia i lalo o le talalelei. A o lei faia lena mea na faatulagaina i lalo o le tulafono [a Mose]” (Doctrines of Salvation, ed. Bruce R. McConkie, 3 vols. [1954–56], 2:336).

Ia manatua o le au soo ma isi sa Nifae na agavaa ina ia i ai i luma o le Faaola. Faitau le 3 Nifae 19:13, ma vaavaai mo mea na foai atu i le au soo e toasefululua mo le i ai o manaoga amiotonu.

  1. Ia fai se lisi i totonu o lau api talaaga mo le suesueina o tusitusiga paia o faamanuiaga e oo mai i le olaga o se tagata ua i ai le meaalofa o le Agaga Paia ma o loo ola agavaa mo lena meaalofa. Ona faatusatusa lea o lau lisi i le upusii lenei a Elder Robert D. Hales o le Korama a Aposetolo e Toasefululua, ma faaopoopo i lau lisi soo se manatu fou e te mauaina:

    “O le Agaga Paia tatou te maua ai le malosi ma le lototele e taitaia ai o tatou olaga i ala o le malo o le Atua, ma o se punavai foi o a tatou molimau i le Tama ma le Alo. …

    “Tatou te manaomia le Agaga Paia e avea ma a tatou soa tumau, e fesoasoani tatou te faia ai filifiliga sili atu o faaiuga tatou te feagai i aso taitasi. O loo osofa’ia pea lava pea o tatou alii ma tamaitai talavou i mea mataga o le lalolagi. O le mafutaga ma le Agaga o le a latou maua ai le malosi e tetee atu ai i le leaga ma, pe a tatau ai, ia salamo ma toe foi atu i le ala sa’o ma le vaapiapi. E leai se tasi o i tatou e ‘asa mai faaosoosoga a le fili. Tatou te manaomia uma lava se malosiaga e ala mai i le Agaga Paia. … O le i ai o le meaalofa o le Agaga Paia, e fesoasoani i tagata o aiga e faia ai filifiliga poto—o filifiliga e fesoasoani ia te i latou e toe faafoi atu ai i latou aiga i lo latou Tama oi le Lagi ma Lona Alo, o Iesu Keriso, e mau faatasi ma i Laua e faavavau” (“O Le Feagaiga o le Papatisoga: O Le I Ai i le Malo ma ni ō le Malo,” Liahona, Nov. 2000, 8).

E faatatau i lau suesuega o le 3 Nifae 19:1–14, mafaufau loloto i faamanuiaga e sili ona e manao i ai i lou olaga ma le mafuaaga e te manao i ai.

Faamaea le faamatalaga o le mataupu faavae e faatatau i le 3 Nifae 19:9, 13: E ala atu i manao ma tatalo faatauanau, e mafai ona tatou .

3 Nifae 19:14–36

Ua faaali mai le Faaola, ma ua tatalo mo tagata ina ia faamamaina e ala i lo latou faatuatua

Ata
Iesu o loo Tatalo ma sa Nifae

Faitau le 3 Nifae 19:14–16 e aoao ai i mea na tutupu ina ua mavae le papatisoina o le au soo e toasefululua ma faatumuina i le Agaga Paia.

Ina ua maea ona tootutuli i lalo le au soo, na poloaiina e le Faaola Ona au soo e toasefululua e tatalo. Faitau le tala e uiga i le latou tatalo i le 3 Nifae 19:17–18, 24–26, 30. E na o le pau lea o le nofoaga i tusitusiga paia na faamaumauina lea na tatalo tuusa’o atu ai tagata ia Iesu Keriso. I a tatou tatalo, e tatou te tatalo i le Atua le Tama i le suafa o Lona Alo, o Iesu Keriso. E leai se vaega o tusitusiga paia ua aoaoina ai i tatou e tatalo atu ia Iesu.

Na fautuaina mai e Elder Bruce R. McConkie o le Korama a Aposetolo e Toasefululua se mafuaaga atonu na tatalo ai le au soo ia Iesu i lenei taimi tulaga ese: “Na maea ona aoaoina i latou e Iesu e tatalo i lona suafa i le Tama, lea na latou mua’i faia [tagai 3 Nifae 19:8–9]. … Ae i le taimi lenei ‘sa latou tatalo atu ia Iesu, ua valaau atu o ia o lo latou Alii ma lo latou Atua.’ [3 Nifae 19:18.] O Iesu sa faatasi ma i latou, o se faailoga o le Tama. O le vaai ai ia te ia, sa faapei lava o loo latou vaai i le Tama; o le tatalo ai ia te ia, sa faapei lava o loo latou tatalo atu i le Tama. Sa avea o se tulaga taua ma tulaga ese” (The Promised Messiah: The First Coming of Christ [1978], 560–61). O le Faaola lava Ia na fetalai, “Ua latou tatalo mai ia te au ona o loo ou faatasi ma i latou” (3 Nifae 19:22).

  1. A o tootutuli tagata, na o latou molimauina le ofoina atu e Iesu Keriso o ni tatalo maoti se tolu mo Ona au soo ma mo i latou. Kopi le siata lenei i lau api talaaga mo le suesueina o tusitusiga paia. Faitau le mau faasino na atofaina ma faatumu le siata.

Fuaitau o mau

O le a le mea na tatalo ai le Faaola?

E mafai faapefea ona e faaaogaina mea ua e aoaoina mai le tatalo a le Faaola i lou olaga?

3 Nifae 19:19–23

3 Nifae 19:27–29

3 Nifae 19:31–34

Faitau le 3 Nifae 19:24. O le a lou manatu i le uiga o le “le faateleina ni upu e tele”? E faatatau i tatalo lea e tuuina mai ai ia i tatou upu ia iloa ai mea e tatalo ai, na aoao mai Elder Bruce R. McConkie, “O tatalo atoatoa o tatalo ia e musuia, lea e faaali ai e le Agaga upu e tatau ona faaaogaina” (Mormon Doctrine, 2nd ed. [1966], 586).

Ina ia fesoasoani ia sili atu ona e malamalama i nisi o mataupu faavae na aoaoina e le Faaola i Ana tatalo, iloilo le 3 Nifae 19:28 ma faailoga upu po o fasifuaitau o loo aoao ai lenei mataupu faavae: A o tatou faatinoina le faatuatua ia Iesu Keriso, e mafai ona faamamaina i tatou. Mafaufau i auala na faatino ai e le au soo le faatuatua i le taimi atoa o aafiaga na faamaumauina i le 3 Nifae 19. O se taunuuga o o latou faatuatua, na faatumuina ai le au soo i le Agaga Paia (tagai 3 Nifae 19:13), ma o le mauaina o le Agaga Paia e manaomia ina ia faamamaina ai.

Faitau le faamatalaga lenei mai ia Peresitene Marion G. Romney o le Au Peresitene Sili, ma vaavaai mo le uiga o le ia faamamaina: “‘Ona oo mai ai lea o le papatisoga i le afi ma le Agaga Paia.’ 2 Nifae 31:3.] O lenei papatisoga i le afi ma le Agaga Paia ua taua e Nifae e aafia ai le liuga tele o le loto o tagata na taua e Alema [tagai Alema 5:14]. E faaliliuina ai i latou mai le faaletino i le faaleagaga. E na te fufuluina, faamalolo, faamama le agaga. … O le faatuatua i le Alii o Iesu Keriso, salamo, ma le papatisoga i le vai e muamua ma manaomiaina i ai, ae o le taunuuga atoatoa [taunuuga faaiu]. O le mauaina o le faamamaina lea o laei o se tagata i le toto togiola o Iesu Keriso” (Learning for the Eternities, comp. George J. Romney [1977], 133).

  1. Mafaufau loloto i le uiga o le faamamaina, ma tali le fesili lenei i lau api talaaga mo le suesueina o tusitusiga paia: E faapefea e le faatinoina o le faatuatua ia Iesu Keriso ona fesoasoani ia i tatou ia atoatoa ma mama?

Na fofogaina e Iesu se tatalo maoae i le afiafi o Lana taulaga togiola lea ua talitutusa lava ma tatalo na Ia fofogaina i sa Nifae i le aso lona lua o Lona asiasiga ma i latou. Faitau le 3 Nifae 19:23, 29 ma le Ioane 17:9, 11, 21–22. Faailoga le fasifuaitau “ina ia tasi i tatou.” Mafaufau pe faapefea ona tasi Iesu Keriso ma le Tama. O a mea ua tatou aoao mai i nei fuaiupu e uiga i le auala e mafai ai ona tatou tasi ma Iesu Keriso?

O se tasi o mataupu faavae o loo aoao mai i nei fuaiupu o le: E ala i le faatuatua e mafai ona faamamaina i tatou ma avea ma e tasi ma Iesu Keriso, e pei ona tasi o Ia ma le Tama. Faitau le faamatalaga lenei mai ia Elder D. Todd Christofferson o le Korama a Aposetolo e Toasefululua e uiga i le auala e mafai ai ona tatou tasi ma le Tama ma le Alo: “O le mea moni lava o le a le mafai ona tatou tasi ma le Atua ma Keriso, sei iloga tatou te avea o Laua finagalo ma faamoemoe, e fai ma o tatou faanaunauga sili. O lea usiusitai e le mafai ona ausia i se aso se tasi, peitai e ala mai i le Agaga Paia, o le a aoaoina ma taitaiina i tatou e le Alii, pe afai tatou te naunau i ai, seia oo i le taimi tonu, e mafai ona faapea mai ai ma le faamaoni, o Ia ua i totonu ia i tatou, e pei o le Tama o i totonu ia te Ia. E i ai taimi ou te lagonaina ai le fefe e mafaufau i mea atonu o le a manaomia, ae ou te iloa, na o le faaatoatoaina o le tasi, e mafai ona maua ai le faaatoatoaina o le fiafia” (“Ina Ia Tasi i Latou ia i Tatou,” Liahona, Nov. 2002, 73).

Faamaeaina suesuega o le asō e ala i le faitauina ma mafaufau loloto i le3 Nifae 19:35–36.

  1. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 3 Nifae 19 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: