Iunite 26: Aso 1

3 Nifae 17

Folasaga

A o faasolo ina faaiuina Lona aso muamua ma sa Nifae, na silafia e Iesu Keriso e toatele tagata sa lei malamalama atoatoa i mea na Ia aoao atu ia i latou. O le mea lea, na Ia aoao atu ia i latou le auala e mauaina ai se malamalamaaga faaopoopo. Na fetagisi tagata ina ua Ia faailoa atu faapea o le a Ia tuumuli. O le faatumulia i le alofa, na toe nofo faaumiumi ai le Faaola ma i latou. Na Ia faamalolo i o latou tagata mama’i, faamanuia a latou fanau, ma tatalo mo i latou. Na lagonaina e le motu o tagata le olioli tele ma le alofa i le Faaola a o latou fegalegaleai ma Ia.

3 Nifae 17:1–3

Ua poloai atu Iesu i tagata e mafaufau loloto i Ana upu ma tatalo mo se malamalamaaga

E faapefea ona e tali atu pe a e tau i se aoaoga i tusitusiga paia pe mai i se taitai o le Ekalesia e te le malamalama i ai? Li’o mea uma e faatatau i ai:

• Ou te le amanaiaina le aoaoga.

• Ou te fesili atu i se isi tagata e fesoasoani ia te au ia malamalama.

• Ou te mafaufau ma le toto’a i le aoaoga.

• Ou te ole atu i le Tama Faalelagi e fesoasoani ia ou malamalama.

O mea na tutupu na faamaumauina i le 3 Nifae 17 na tutupu e latalata i le faaiuga o le aso muamua o Iesu Keriso ma le motu o tagata sa Nifae. Faitau le 3 Nifae 17:1–3, ma faailoga mea na tau atu e le Faaola i sa Nifae e fai ina ia malamalama lelei ai i mea na Ia aoao atu ia i latou. Mafaufau pe faapefea ona fesoasoani lou alu i le fale e te mafaufau loloto ma tatalo ai ina ia e malamalama atili i upumoni o le talalelei.

Na faamalamalama mai e Peresitene Henry B. Eyring o le Au Peresitene Sili le uiga o le mafaufau loloto. Faitau le faamatalaga lenei ma faailoga i vali sesega ia upu po o fasifuaitau e faamatala ai le uiga o le mafaufau loloto: “O le faitau, suesue, ma le manatunatu loloto e le tutusa. Tatou te faitau i upu ma mafai ona maua ai ni manatu. Tatou te suesue ma maua ai manatu ma sootaga o mau. Ae a tatou manatunatu loloto, ua tatou valaaulia faaaliga e ala i le Agaga. Ia te au, o le manatunatu loloto, o le mafaufau lea ma le tatalo ou te faia pe a uma ona ou faitau ma suesue ma le faaeteete i tusitusiga paia” (“Auauna Atu ma le Agaga,” Ensign po o le Liahona, Nov. 2010, 60).

Vaai ma le faaeteete i le 3 Nifae 17:3, ma matau na faatonuina e le Faaola tagata ia “saunia o [latou] mafaufau” mo le isi aafiaga ma Ia. A o lei faaauauina au suesuega, mafaufau loloto pe faapefea ona e taliina fesili nei: O a ni mea e mafai ona e faia e saunia ai lou mafaufau a o lei auai atu i le lotu? A o lei auai atu i le seminare? A o lei faalogologo i le konafesi aoao? A o lei suesueina tusitusiga paia? O le a se eseesega e te manatu o le a faia e le saunia o lou mafaufau i mea e te maua mai i na avanoa e aoao ai?

O se tasi o mataupu faavae tatou te aoao mai i nei fuaiupu o le: E ala i le mafaufau loloto ma tatalo i le Tama, e mafai ai ona tatou maua le malamalamaaga sili atu. (Atonu e te manao e tusi lenei mea i lau tusitusiga paia i autafa o le 3 Nifae 17:1–3.

1. Ina ia fesoasoani ia te oe e faaaoga lenei mataupu faavae, filifili se tasi po o aitema uma e lua ma faaaoga le faatinoga i lou olaga i le aluga o le vaiaso a sau. Tusi i lau api talaaga mo le suesueina o tusitusiga paia mea na e faia. Tusi foi pe faapefea ona faateleina e lenei faatinoga ia mea e te aoaoina i le lotu, seminare, po o konafesi aoao pe mai i tusitusiga paia Ia saunia e faasoa atu lenei gaoioiga o le api talaaga i lou faiaoga. Ia faia foi se fuafuaga e faaauau pea ona e lelei atili i se tasi o nei vaega i le aluga o le vaiaso a sau.

   1. O le a saunia lo’u mafaufau a o le’i auai atu i le lotu po o le seminare.

   2. O le a ou mafaufau loloto ma tatalo e uiga i mea ou te faalogo i ai i le lotu po o le seminare.

3 Nifae 17:4–25

Ua faamalolo e le Faaola e mama’i i sa Nifae ma faamanuia o latou fanau

O Keriso o loo Faamanuiaina Fanau a Sa Nifae

Mafaufau i se taimi na e lagona ai le matuai faagaeetia ma le faatumulia i le olioli o lea sa e le manao ai e uma lea aafiaga. Faitau le 3 Nifae 17:4–5 e saili ai pe na faapefea ona tali atu sa Nifae ina ua fetalai atu le Faaola o le a Ia toe foi atu i Lona Tama.

Na tali atu le Faaola i manaoga amiotonu a sa Nifae ma le alofa tele. O le gaoioiga lenei e mafai ona fesoasoani e te malamalama atoatoa ai i le alofa o Iesu Keriso mo i tatou uma. E mafai foi ona fesoasoani e te iloa ai upumoni faatusitusiga paia e uiga i le uiga ma le natura o Iesu Keriso.

2. Tusi mau faasino nei i lau api talaaga mo le suesueina o tusitusiga paia. Tuu se avanoa i lalo o mau faasino taitasi mo nisi faamatalaga: 3 Nifae 17:6–10; 3 Nifae 17:11–18; 3 Nifae 17:19–25. Suesue fuaitau o mau taitasi nei, ma vaavaai mo upumoni e uiga i le uiga o le Faaola—pe faapeī o Ia. Saili ia le itiiti ifo ma le tolu ni upumoni, e tasi le upumoni mo mau faasino taitasi, ma faamaumau i latou i lalo o le mau faasino talafeagai.

O se tasi o mea na tupu na sili atu ona faagaeetia ma faamomoiloto o loo faamatalaina i le Tusi a Mamona o le faamanuiaina e Iesu o fanau laiti o e na i ai i lena taimi. E fesoasoani lenei mea na tupu tatou te malamalama ai i le natura ma le uiga o Iesu Keriso. A o le’i ona siina mai le tala e uiga i le Faaola ma tamaiti mai le 3 Nifae 17:11–12, 21–25, na saunoa Peresitene Boyd K. Packer, “I le talaaga o le galuega a le Faaola ia sa Nifae, atonu ua mafai ai ona loloto atu la tatou vaai i Lona agaga nai lo se isi lava nofoaga” (“Aoao Atu i Tamaiti,” Liahona, Me. 2000, 21–22).

Matau na aumai e le motu o tagata i latou na mamai ma puapuagatia i le Faaola, e aofia ai i latou na “puapuagatia i soo se ala” (3 Nifae 17:9). O nei puapuagatia atonu na faaletino, faalelagona, pe faalemafaufau. Mafaufau loloto i auala atonu e te “puapuagatia” ai. Mata e faapefea ona fesoasoani le Faaola ia te oe i ou puapuaga pe ana faapea Na te faamanuiaina patino oe?

3. Toe iloilo le mataupu faavae e uiga i le mafaufau loloto na e aoaoina i le amataga o lesona lenei. O se tasi o auala e mafaufau loloto ai o le vaai faalemafaufau ia te oe lava i le tulaga e tasi na faamatalaina i le tala o tusitusiga paia. Faaalu se taimi ma vaai faalemafaufau pe faapeī pe ana avea oe ma se tagata na auai i mea na tutupu ua faamaumauina i le3 Nifae 17. I lau api talaaga mo le suesueina o tusitusiga paia, faamatala ia mea e te manatu e te ono faalogoina, vaaia, ma lagonaina i lena taimi ma mea semanu e te aoao mai le Faaola. Atonu foi e te manao e faamatala le faamanuiaga atonu e te sailia mai le Faaola.

Vaai faalemafaufau

E mafai ona e mafaufau loloto i tusitusiga paia e ala i le faaaogaina o le mataupu faavae o le vaai faalemafaufau. Ina ia faia lenei mea, taumafai e vaai faalemafaufau i mea na tutupu i tusitusiga paia pe vaai faalemafaufau ia te oe lava o se tagata auai i le tala o loo e faitauina. O le vaai faalemafaufau e mafai ona fesoasoani ia te oe e mafaufau ai e uiga, malamalama, ma faaaoga mea ua e faitau i ai i tusitusiga paia

Mafaufau i se fuaiupu e faamatala ai se upumoni ua e aoaoina mai le 3 Nifae 17:6–25. Tusi le fuaiupu i autafa o lau tusitusiga paia e latalata i fuaiupu nei po o i lau api talaaga mo le suesueina o tusitusiga paia. O se tasi o upumoni mai nei mau o le: E lagona e le Faaola le agaalofa tele mo i tatou. Aisea e taua ai mo oe ona iloa le upumoni e uiga i uiga o le Faaola lea ua e aoaoina mai nei fuaiupu?

Faitau le faamatalaga lenei e uiga i le faatuatua: “Ina ia mafai e lou faatuatua ona taitai atu oe i le faaolataga, e tatau ona taulai atu i le Alii o Iesu Keriso. …E mafai ona e faaaogaina le faatuatua ia Keriso, pe a maua le faamautinoaga o loo i ai o Ia, o se manatu sa’o o Lona uiga, ma se malamalamaaga o loo i ai o Ia, e tauivi e ola e tusa ma Lona finagalo” ( Faamaoni i Le Faatuatua: O Se Tusitaiala o le Talalelei [2004], 54).

4. Tali le fesili lenei, i lau api talaaga mo le suesueina o tusitusiga paia: E faapefea e le malamalama i le natura alofa o le Faaola ona fesoasoani ia te oe e faatino le faatuatua ia te Ia?

5. Faasoa atu i se isi tagata se mea ua e aoaoina e uiga i le Faaola mai le 3 Nifae 17. I lau api talaaga mo le suesueina o tusitusiga paia, faamaumau ai le igoa o lenei tagata ma se otootoga o lau tala na ta’u atu ia te ia.

E ui lava tatou te lei maua le aafiaga na maua e sa Nifae ma Iesu Keriso, ae o le a oo mai le aso mo i tatou taitoatasi o le a tatou vaai ma faalogo ai ia te Ia. I le aluga o le aso e tasi pe lua e sosoo ai, mafaufau loloto i lesona lenei. Mafaufau e uiga i le agaalofa o le Faaola a o e tatalo e uiga i ou manaoga, vaivaiga, lototiga, ma tofotofoga.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 3 Nifae 17 ma faamaeaina lenei lesona i le (aso).

   Fesili, mafaufauga, ma manatu faaopoopo ou te fia faasoa i lou faiaoga: