Seminare
Iunite 27: Aso 3, 3 Nifae 27

Iunite 27: Aso 3

3 Nifae 27

Folasaga

I le amataga o le latou galuega, ina ua mavae le aso lona lua o le faaali mai o le Faaola toetu ia i latou, na faapotopoto faatasi le au soo e toasefulua a sa Nifae i le tatalo malosi ma le anapogi. Na toe faaali mai Iesu Keriso ia i latou ma tali la latou fesili e uiga i le igoa e ao ona faaigoa ai le Ekalesia. Na aoao atu e le Faaola e faapea, o le Togiola o le ute lea o Lana talalelei ma e ala i le Togiola e mafai ai ona tatou tutu ma le le pona i Ona luma a o tatou salamo, papatisoina, ma tumau seia oo i le iuga. E le gata i lea, na Ia poloaiina Ona soo ina ia faapei o Ia.

3 Nifae 27:1–12

Ua aoao e Iesu Keriso le au soo e toasefululua faapea, o Lana Ekalesia e tatau ona tauaveina Lona suafa

Vaai faalemafaufau e faapea ua e manao e amata i se kalapu po o se au taaalo fou. Filifili le ituaiga kalapu po o le au o le a e fatuina, ona filifili lea o se igoa mo lau faalapotopotoga. Tusi uma i lalo le igoa uma ma le ituaiga o faalapotopotoga e te filifilia:

Mafaufau e uiga i nisi o faalapotopotoga e te iloaina ma le mea ua faauigaina i ai o latou igoa e uiga i lo latou faamoemoega ma tagata o e auai atu i ai.

Na faaauau pea ona aoao atu ma papatisoina tagata e le au soo e toasefululua a sa Nifae. I se tasi taimi na o latou aufaatasi i le anapogi ma le tatalo ae toe asia i latou e le Faaola (tagai 3 Nifae 27:1–2). Faitau le 3 Nifae 27:3–7, ma vaavaai mo le fesili na fesili na fesiligia e le au soo ma le tali a le Faaola. Atonu e te manao e faailoga ia mafuaaga na tuuina mai e Iesu Keriso mo le faaigoaina o le Ekalesia i Lona suafa.

Suesue le 3 Nifae 27:8–10, ma faailoga mea na aoao atu e le Faaola o ni faailoaga o Lana Ekalesia moni. Faauma le fasifuaitau lenei i lau tusi taiala e faailoa ai ni nai vaega autu o le Ekalesia moni:

O le Ekalesia moni a Iesu Keriso e .

Ata
Tagavai a le Ekalesia

Mafaufau i le mafuaaga e taua ai ona le gata ia tauave e le Ekalesia moni a Iesu Keriso ia Lona suafa, ae ia fausia foi i luga o Lana talalelei (tagai 3 Nifae 27:8–10). Na folafola atu e le Faaola ia sa Nifae afai e fausia le Ekalesia i luga o Lana talalelei, o le a faaali mai i ai e le Tama Faalelagi Lana galuega (tagai 3 Nifae 27:10). Mafaufau loloto pe o faapefea ona e vaaia e oe lava le faaali mai e le Tama Faalelagi o Ana galuega i le Ekalesia.

  1. I lau api talaaga mo le suesueina o tusitusiga paia, tusi ai O le avea ai ma se tagata o le Ekalesia a Iesu Keriso e taua ia te au aua … Ona tusi lea o se parakalafa puupuu e faamatala ai ou mafaufauga e uiga i le fasifuaitau. Taumafai e faaaofia ai le tele o mafuaaga e mafai ona e tusiina mai i mea na e aoaoina a o suesueina le 3 Nifae 27:1–12.

3 Nifae 27:13–22

Ua faamanino e Iesu Keriso Lana talalelei, ma aoao mai mea e ao ona tatou faia e tutu ai ma le lē pona i Ona luma

Mafaufau i se taimi na maua ai oe o faia se mea na e iloa e sese. Toe mafaufau i ou lagona na i ai ina ua faaalia le mea moni o mea na e faia. Mafaufau loloto i le fesili lenei: O a ni ou lagona i le tu ai i luma o le Alii ina ia faamasinoina pe afai o loo i ai lava ni mea sese e te le’i salamo i ai? O a ni ou lagona i le tu ai i luma o le Alii ina ia faamasinoina pe afai ua leai lava se auala e salamo ai i soo se agasala na e solia i le taimi o lou olaga?

Ina ua maea ona aoaoina sa Nifae o Lana Ekalesia e tatau ona fausia i luga o Lana talalelei, na faaauau e le Faaola le aoaoina o i latou e uiga i Lana talalelei. O le uiga moni lava o le upu talalelei o le “tala lelei” po o le “tala fiafia.” E ala atu i le talalelei o loo i ai lava le tala lelei mo i tatou uma pe afai tatou te agasala.

  1. Faitau le 3 Nifae 27:13–16, 19, ma vaavaai mo elemene o le talalelei ua avea ma tala lelei mo i tatou uma. O le faavae o le talalelei a Iesu Keriso e faapea na Ia faia le finagalo o Lona Tama i le faataunuuina o le Togiola.Tali le fesili lenei, i lau api talaaga mo le suesueina o tusitusiga paia:

    1. Na molimau atu le Faaola i Ona soo e faapea na Ia afio mai i le lalolagi ina ia faia le finagalo o Lona Tama. E tusa ma le 3 Nifae 27:14, o le a le finagalo o le Tama Faalelagi mo Lona Alo Paia?

    2. Talu ai na faataunuuina e le Faaola le finagalo o Lona Tama, o le a le mea o le a maua e tagata soifua uma lava? (tagai faapitoa i le 3 Nifae 27:19).

  2. Ina ia fesoasoani ia te oe ia talisapaia le maoae o lenei tala lelei, faitau se tasi pe sili atu o fuaitau o mau nei ma tusi se faamalamalamaaga puupuu i lau api talaaga mo le suesueina o tusitusiga paia e uiga i le mafuaaga ua avea ai le Togiola a Iesu Keriso ma tala fiafia tele: 2 Nifae 9:8–10; Alema 34:14–16; Helamana 14:15–18.

Na molimau mai Elder Jeffrey R. Holland o le Korama a Aposetolo e Toasefululua e uiga i le mafuaaga ua avea ai le talalelei ma tala lelei mo tagata uma: “O le ‘tala lelei’ e faapea e mafai ona sosola ese mai le oti ma le seoli, e mafai ona faatoilaloina mea sese ma agasala, o loo i ai le faamoemoe, o loo i ai le fesoasoani, o mea faigata na foiaina, o le fili na faatoilaloina. O le tala e lelei [e] faapeao le tuugamau o tagata uma [o le a] i ai le aso e avanoa ai, faapea o le agaga o tagata uma [e mafai] ona toe faamamaina, faapea o atalii uma o le Atua [e mafai] ona toe foi i le Tama o lē na tuuina mai le ola” (“O Le Galuega Faafaifeautalai ma le Togiola,” Liahona, Mati 2001, 8, 10).

Ata
Keriso i Ketesemane

Pe ua e faalogo ea i se tasi o faapea mai e manaomia ona tatou “ola i le talalelei”? Pe a valaaulia e se tasi i tatou e “ola i le talalelei,” e masani ona latou valaauliaina i tatou e ola i mataupu faavae ma maua ia sauniga na e valaaulia ai le mana o le Togiola o Iesu Keriso i o tatou olaga ina ia mafai ona faaolaina i tatou. Suesue i le 3 Nifae 27:20–21 ma vaavaai mo mea e tatau ona tatou faia ina ia maua ai faamanuiaga uma o le Togiola ma saunia mo le faamasinoga.

  1. Tusi le Afai tatou te , ona mafai lea ona tatou tutu ma le le pona i luma o Iesu Keriso i lau api talaaga mo le suesueina o tusitusiga paia. Faamaea lenei fasifuaitau e ala i le tusiina i totonu se mataupu faavae faaletalalelei mai le 3 Nifae 27:20–21 lea e tatau ona tatou mulimuli ai ina ia mafai ona tutu ma le le pona i luma o le Alii. (E mafai ona e faailoa mai ni nai mataupu faavae mo le vaega “afai” o le faamatalaga o lenei mataupu faavae.) Ona tali lea o le fesili lenei, i lau api talaaga mo le suesueina o tusitusiga paia: O a ni mea e mafai ona ou faia i lou olaga i le taimi nei ina ia ou “ola atoatoa ai i le talalelei” ina ia mafai ona ou maua le mana o le Togiola ma tu ma le le pona i luma o le Atua i le aso mulimuli?

Mafaufau loloto pe faapei le tu ai i se aso i luma o Iesu Keriso ma le iloaina ua faamamaina oe e ala i Lana Togiola i le usiusitai i mataupu faavae, poloaiga, ma sauniga o Lana talalelei.

3 Nifae 27:23–33

Ua aoao e Iesu Keriso Ona au soo ina ia avea e pei o Ia

Ata
Togiola Paia

E pei ona faamaumauina i le faaiuga o le 3 Nifae 27, na tuuina atu e Iesu Keriso faatonuga i Ona au soo e toasefululua ma aoao i latou e uiga i o latou matafaioi i le avea ai ma taitai ma faamasino o o latou tagata. Faitau le 3 Nifae 27:27, ma vaavaai mo le poloaiga na Ia tuuina atu i le au soo ina ia fesoasoani ia i latou e faataunuu ma amiotonu o latou matafaioi. Faaalu se taimi e mafaufau ai i fesili nei:

  • Aisea e taua ai mo i latou o e faamasino atu i isi ona faapei o le Faaola?

  • I le toe tepa i tua i le 3 Nifae 27:21, o a mea na poloaiina ai e le Faaola le au soo e fai?

  • O le a le sootaga i le va o le faia o galuega a le Faaola ma le avea faapei o Ia?

Toe faitau le 3 Nifae 27:21, 27, ma faailoga i totonu o lau tusitusiga paia upu po o fasifuaitau o loo faaalia ai e faamoemoe le Alii i Ona au soo ina ia faataitai i Ana galuega ma avea e pei o Ia.

  1. Tali fesili nei i lau api talaaga mo le suesueina o tusitusiga paia ina ia fesoasoani ia te oe e faaaoga aoaoga a le Faaola ma avea atili e pei o Ia:

    1. O a ni avanoa na ou mauaina ananafi e avea ai e pei o le Faaola?

    2. E mafai faapefea ona avea atili a’u e pei o le Faaola i le asō?

    3. O a galuega a le Faaola e mafai ona ou faia a taeao i le aoga po o le aiga?

Na aoao mai e Peresitene Ezra Taft Benson e faapea o i latou o e taumafai e avea e pei o Iesu Keriso e ausia le maoae moni: “E pito sili lava ma pito i faamanuiaina ma olioli le tagata e pito i latalata ona mulimuli lona olaga i faataitaiga a Keriso. E leai se faiā o lea tulaga ma oa o le lalolagi, ma le malosi, po o le lauiloa. Na o le pau le suega moni o lo tatou maoae, manuia, ma le olioli, o le tele lea e mafai ona tatou ola latalata atu ai e faapei o le Matai, o Iesu Keriso. O Ia o le ala sa’o, o le upumoni atoatoa, ma le ola atili” (“O Meaalofa a Iesu Keriso—ma Mea e Faamoemoeina mai ia i Tatou,” Liahona, Tes. 1987, 3).

  1. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le 3 Nifae 27 ma faamaeaina lenei lesona i le (aso).

    Fesili, mafaufauga, ma manatu faaopoopo ou te fia faasoa i lou faiaoga: